Nghee oita nomapiyaano tai ka xulifwa po

KALUNGA OTA KA HANAUNA PO OMAPANGELO OPANHU

Kalunga ota ka hanauna po omapangelo opanhu poita yaArmagedon.a (Ehololo 16:16) Pefimbo opo, ‘eehamba adishe dokombada yedu’ otadi ka ongala pamwe, opo di ka lwe “oita mefiku linene laKalunga Omunaenghono adishe.” (Ehololo 16:14) Armagedon oita yaKalunga oyo tai ka xulifa po oita aishe.

Kalunga ota ka pingena po omapangelo opanhu nOuhamba waye, ile epangelo, olo tali ka pangela okudja meulu nokali na efiku li hanaunwe po. (Daniel 2:44) Kalunga okwa nangeka po Omona waye, Jesus Kristus, oye a kale Ohamba yao. (Jesaja 9:​6, 7; Mateus 28:18) Epangelo olo olo Ouhamba,b oo Jesus a honga ovahongwa vaye va ilikane kombinga yao. (Mateus 6:​9, 10) Ovanhu aveshe otava ka kala va hangana koshi yepangelo limwe, olo tali pangelwa kOmupangeli umwe, Jesus.

Mepingafano novapangeli vopanhu, Jesus ita ka longifa eenghonopangelo daye omolwokulihola mwene. Molwaashi omuyuki noke na okatongo, kape umwe ta ka kala e udite ta ungaungiwa naye shihe li pauyuki, omolwomuhoko waye, oukwashiwana, ile eputuko. (Jesaja 11:​3, 4) Ovanhu itava ka pumbwa okukala tava kondjele omaufemba avo. Omolwashike mbela? Omolwaashi Jesus ota ka kala e na ko nasha nonghalonawa yomunhu keshe. ‘Ota ka xupifa ohepele oyo tai lilile ekwafo, nosho yo omudinwa nakeshe oo ehe na omukwafi. . . . Ote ke va amene komafininiko nokelongifo leenghono.’ — Epsalme 72:​12-14.

Ouhamba waKalunga otau ka hanauna po oilwifo ya nyika oshiponga kombada yedu. (Mika 4:3) Otau ka hanauna po yo ovakolokoshi ovo inava hala okweefa po omalwoodi, ile hava nyono po ombili yavamwe. (Epsalme 37:​9, 10) Ovanhu aveshe otava ka kala meameno kombada yedu alishe. — Hesekiel 34:28.

Koshi yepangelo laKalunga, ovanhu aveshe otava ka kala nonghalamwenyo ya denga mbada. Otali ka xulifa po omaupyakadi aeshe, oo haa ningifa ovanhu va lwe, ngaashi oluhepo, ondjala nosho yo omhumbwe yomaumbo. Keshe umwe ota ka kala e na oikulya ya wana noi na oukolele nosho yo onhele iwa yokukala. — Epsalme 72:16; Jesaja 65:​21-23.

Ouhamba waKalunga otau ka kufa po oilanduliko aishe ii oyo ya etifwa koita. Osho inashi kwatela mo ashike ouyahame wopalutu, ndele osha kwatela mo yo ouyehame wopamadiladilo nowopamaliudo, oo wa etifwa koinima ii oyo ya ningwa pefimbo loita. Nokuli naavo va fya otava ka nyumunwa nokukala vali nomwenyo kombada yedu. (Jesaja 25:8; 26:19; 35:​5, 6) Omaukwaneumbo otaa ka hangana vali, novanhu itava ka dimbuluka vali oinima ii oyo ya ningwa monakudiwa, molwaashi “oinima ikulu oya xula po.” — Ehololo 21:4.

KALUNGA OTA KA XULIFA PO OULUNDE

Ngeenge Ouhamba waKalunga owa hovele okupangela kombada yedu, ovanhu aveshe otava ka longela Kalunga kashili, Jehovac, “Kalunga kohole nokombili.” (2 Ovakorinto 13:11) Ovanhu otave ke lihonga nghee tava dulu okukala pamwe nombili. (Jesaja 2:​3, 4; 11:9) Ovo hava dulika kuKalunga itava ka kala vali ovalunde, ndele otava ka kala va wanenena. — Ovaroma 8:​20, 21.

KALUNGA OTA KA HANAUNA PO SATANA NEENDEMONI DAYE

Ouhamba waKalunga otau ka hanauna po Satana neendemoni daye, ovo hava xumifa komesho oita. (Ehololo 20:​1-3, 10) Nopehe na enwefe mo lavo lii, ‘ombili otai ka hapupala.’ — Epsalme 72:7.

Oto dulu okukala nelineekelo kutya eudaneko laKalunga li na sha nokuxulifa po oita nosho yo omapiyaano otali ka wanifwa po. Ota dulu noku na ehalo lokuxulifa po oita.

• Kalunga oku na ounongo nosho yo eenghono odo da pumbiwa, opo oita nelongifo leenghono i xulifwe po. (Job 9:4) Iha nyengwa kusha. — Job 42:2.

• Kalunga iha kala a hafa, ngeenge ovanhu tava mono oixuna. (Jesaja 63:9) Oku “tonde keshe oo e hole elongifo leenghono.” — Epsalme 11:5.

• Kalunga oha wanifa po alushe omaudaneko aye; iha fufya. — Jesaja 55:​10, 11; Titus 1:2.