Faraop sinnattugai

UKIUT marluk ingerlapput, Josefilu suli parnaarussaaqqavoq. Immitsisup puiorsimavaa. Taava unnuat ilaanni Farao marlunnik eqqumiitsunik sinnattugaqarpoq, qanorlu isumaqarnersut eqqarsaatigai. Sinittoq assilissami takusinnaaviuk? Aqaguani ullaakkut Faraop ilisimasortani qaaqquai sinnattukkanilu taakkununnga oqaluttuaralugit. Nassuiarsinnaanngilaalli.

Kiisami immitsisup Josef eqqaalerpaa. Faraomut oqarpoq: ’Uanga parnaarussivimmiitillunga taavani anguteqarpoq sinnattukkanik nassuiaasartumik.’ Faraop Josef erniinnaq parnaarussivimmit aatippaa.

Faraop sinnattukkani Josefimut oqaluttuarai: ’Nersussuit arfineq-marluk pualasuut kusanartut takuakka. Taava nersussuit arfineq-marluk saluttut quloruusullu takuakka. Pualasuullu saluttunit iineqarput.

Aappassaanik sinnattorama karrit arfineq-marluk ulikkaartut inerittullu ivimmit ataatsimit naasut takuakka. Taava karrit arfineq-marluk panertut amitsut takuakka. Karrillu ajunngitsut karrinit amitsunit iineqarput.’

Josefip Farao oqarfigaa: ’Sinnattukkat marluk ataatsimik isumaqarput. Nersussuit pualasuut karrillu ulikkaartut tassa ukiut arfineq-marluk, nersussuillu saluttut karrillu amitsut tassa aamma ukiut arfineq-marluk. Ukiut arfineq-marluk Egyptenimi atuutissapput inerititaqarluarfiusut. Kingornagut ukiut arfineq-marluk atuutissapput inerititakiffiusut.’

Taava Josefip Farao oqarfigaa: ’Angut silatooq ivertiguk ukiunilu ajunngitsuni arfineq-marlunni nerisassanik katersuinissamut pisortanngortillugu. Taava ukiuni arfineq-marlunni ajortuni inerititakiffiusuni inuit perlernavianngillat.’

Faraop tamanna iluaraa. Josef ivertippaa nerisassanik katersuisunngortillugu, toqqorseqqullugulu. Faraomut tulliulluni Josef Egyptenimi pingaarnerpaanngorpoq.

Ukiut arfineq-pingasut kingornisigut, kaannersuup nalaani, Josefip angutit aggersut takulerpai. Kikkuusut nalunngiligit? Tassaaku angajui qulit! Ataataata Jakobip Egyptenimut aallartissimavai nunaminni Kana’animi nerisassaarutileramik. Josefip qatanngutini ilisarai, taakkuali taanna ilisarinngilaat. Suna pillugu ilisarinngilaat? Tassa Josef inersimasunngorsimammat, allatullu ittunik atisaqarmat.

Josefip eqqaalerpaa nukappiaraalluni sinnattukkani, tassa qatanngutimi sikiffigissagaanni. Oqaluttuaq tamanna eqqaamaviuk? Josefip paasilerpaa Guutip Egyptenimut aallartikkaani, pissutissaqarluarluni. Taava Josef qanoq iliorpa? Takoriartigu.