Aaperaat upperluartuua?

Aaperaap ernini Iisaaq Jehovamut asannin­nissaanik neriorsuutaanillu tamanik tatigin­ninnissaanik ilinniartippaa. Iisaarli 25-t missaannik ukioqartoq Jehovap Aaperaat sapernar­torujus­suarmik piumaffigivaa. Sumik?

Guutip Aaperaat ima qinnuigaa: ‘Ernituat nunamut Morijamut qaqqamukaqatigiuk pilliutigiar­torlugu.’ Aaperaap nalulluinnarpaa sooq Jehovamit taama ilioqquneqar­nerluni. Taamaak­kaluartorli naalappoq.

Aqaguani ullaakkut makiaarluni Aaperaat Iisaaq kiffamilu ilaat marluk ilagalugit Morijamut aallarpoq. Ullut pingajussaani qaqqat ungasianiit takusin­naalerpaat. Aaperaap Iisaallu pilliiar­tornerminni kiffani utaqqeqquai. Iisaap qisussat nammappai Aaperaallu savilisarluni. Iisaap ataatani aperaa: ‘Naammi savaaraq pilliutissaq?’ Aaperaap akivaa: ‘Ernik, Jehovap isumagiumaarpaa.’

Kiisami qaqqaq tikikkamikku pilliiviliorput. Taava Aaperaap Iisaaq assaasigut isigaasigullu qilersoriarlugu pilliivimmut ilivaa.

Aaperaap savini tigugaalu Jehovap inngilia qilammiit nipituumik oqarpoq: ‘Aaperaat! Nukappiaraq ajoqusis­sanngilat! Ernerit pilliutigeriaan­naagakku maanna paasivara Guuti upperigit.’ Taava Aaperaap sava angutiviaq nassumminik orpikkanut naatissimasoq takulerpaa. Iisaaq qilerus­saapallariarlugu sava angutiviaq taarsiullugu pilliutigaa.

Taamanimiillu Jehovap Aaperaat ikinngutimisut taasalerpaa. Nalunngiliuk sooq? Jehovap peqqussutai paasiuaan­nanngik­kaluarlugit Aaperaap naalattuaan­narmagit.

Jehovap Aaperaamut neriorsuutini eqqaaqqippaa: ‘Pilluaq­qussavakkit kinguaas­sarpassuaqar­nissallu isumagalugu,’ tassa meerarpas­suaqalissaaq. Jehova aamma neriorsuivoq Aaperaap kinguaavisa ilaat aqqutigalugu inuit ajunngitsut tamaasa ajunngitsuliorfigiumaarlugit.