Ajoqersuganngortitsiniarneq — tamatta immikkut akisussaaffipput
1 Ilagiit kristumiut suliassaat Jesus Kristusimit, ilagiinnut qullersaasumit, erseqqissumik oqaatigineqarpoq. Qilaliarnissi sioqqutitsiarlugu ima peqqusivoq: „Aallaritsi inunnillu inuiannit tamaneersunik ajoqersuganngortitsigitsi.“ (Mat. 28:19, 20, NV) Kiffartornitta qanoq ingerlannissaanut tamatumalu Jehovamit pilluaqqusaanissaanut suliassamut tamatumunnga qanoq isiginninnerput aalajangiisuuvoq. Taamaattumik pingaaruteqarpoq ajoqersuganngortitsiniarnermik suliaqarnitsinnut qanoq isiginninnitta tamatumanilu periaatsitta akuttunngitsumik misiligartarnissaat.
2 Ilagiit ataatsituinnaanngitsoq suliassamik tamatuminnga akisussaaffeqarput. Ilagiinnut ilaasortaasut tunniulluinnarsimasut kuisimasullu tamarmik immikkut pisinnaasatik periarfissatillu naapertorlugit ajoqersuganngortitsiniarneq anguniagarisariaqarpaat — peqqissuseq, inuit isiginnittaasiat allallu tamatumani aalajangiisuullutik. Oqaatsit Rûmamiunut agdlagkat 1:14, 15-imiittut atorlugit Paulusip oqaluussinermut qanoq isiginninnini oqaatigaa: ’Pisussaavunga: taamaattumik uanga tusagassamik nuannersumik oqaluussissutiginninnissara kajungereqaara.’ (NV) Atuakkami qinerlerfissiami kristumiut siulliit pillugit ima allassimasoqarpoq: „Ulluni tamakkunani kristumiut pinngitsoqaratik ’ajoqersuiartortitaapput’.“ Qinerlerfissiami allami ima allassimasoqarpoq: „Ajoqersuiartortitatut sulinerup aallarniutaasup tamatuma ersersippaa ajoqersuiartortitatut sulisut aallaqqaataaniilli apustiliinnaanngitsut. Kristumioqatigiilli tamarmik tamanna peqatigiissutigigaat.“ (Vagttårnet, 15. maj 1983, q. 10) Illit — naak oqaluussiffigisassanni soqutiginninngitsoqaraluaqisoq — oqaluussinerinnaanngitsumik, aammattaarli ajoqersuganngortitsiniarnermik, kajumilluarlutit ulapputeqarpit?
3 Ajoqersuganngortitsiniarnermik sulineq nukinginnarpoq. Inuit inuunerat nalorninartorsiorpoq. Jehovap ilisariniarnissaanut inuunermillu naassaanngitsumik angusinissamut piffissaq sivikitsuinnaavoq. Paulusip oqaaserisimasaatut ullormi Jehovap akuliuffissaani oqarnissatsinnut naleqquttumik tamatta immikkut sulisariaqarpugut: ’Tamarmik aavinut pinngitsuuvunga.’ (ap. sul. 20:26; naleqqiuguk Hisĩkiale 3:21.) Inuit maannakkorpiaq sallusuissut pisariaqartippaat. Maannakkut Jehova ilisarigaanni ikiaroornartumik atornerluineq, nappaateqarneq, aalakoornartumik ajornartorsiuteqarneq, ilaqutariit iluanni ajornartorsiuteqarneq aammalu neriuutissaqannginneq pinnagu, inuuneq siunertaqarluartoq siunissami qularnaatsumik neriuutilik anguneqarsinnaavoq. Inuit inuunikeqaat, inuunerullu nalunassusia pissutigalugu sukkulluunniit toqumit nalaanneqarsinnaavugut. (Jâk. 4:13, 14) Tusagassaq nuannersoq ’Guutimit pissaataavoq uppertut tamarmik annassutissaat’, aammalu ’inuunermut matumunnga piumaartussamullu atasumik unnersuummik ilaqarpoq’. (Rûm. 1:16; 1 Tim. 4:8) Ajoqersuganngortitsiniarnermik tamatta immikkut akisussaaffeqarnerput tamakku tamarmik erseqqissarpaat.
4 Tamatta immikkut eqqarsaatigeqqissaartariaqarparput oqaluussinermut peqataanitta ersersinneraa atuaqqissaaqatigiinnermik siulersuinissarput ilumut uummatitsigut kissaatigineripput. Inooriaaseq pigisanik pingaartitsivallaarfiusoq uatsinnut ilaquttatsinnullu ima piffissaajaataatigisinnaavoq allaat inunnik allanik ikiuinissatsinnut piffissaqaratalu toqqissivissarsisinnaassanata. ’Katersugarpassuaqarneq’ inuunermik paatsiveqanngiffiullunilu eqqissiveqanngiffiusumik kinguneqarajuttarpoq. (úss. 15:16) Ilavut inuunerminnik pisariinnerulersitsiniaanermikkut immaqalu inuuniarnerminnik pilimannginnerulersitsiniaanermikkut inooriaatsimik inunnik allanik ikiuinissamut piffissaqarnarnerusumik angusisinnaassapput. — Evf. 5:16; Mat. 6:22-24.
5 Qinusarnitsinni inunnik allanik ikiuinissamik kissaateqarnerput aammalu Jehovap pinngortitarpassuinik anersaajusunik takussaanngitsunik suleqateqarnitsinnik pingaartitsinerput eqqaasarsinnaavarput. (Naleqqiuguk apustilit suliáinik agdlagkat, kap. 8-10.) Tamattali immikkut qinnutigisariaqarparput oqaluussinermi pikkorissarnissatsinnut ilisimassuteqarnissarput siuneqarsuseqarnissarpullu aammalu siunnersuuterpassuit pitsaasut Jehovap peqatigiissortaanit pisut atornissaannut nakimanngissuseqarnissarput. (Kul. 4:2-4; 2 Tás. 3:1; Jâk. 1:5) Naalagaaffimmik Kiffartuuteqarneq-mi januari 1989-imeersumi arlalinnik pitsaasunik siunnersuuteqarpoq. Tamakku ilaat atoreerpigit? Aap, qaammatip kingulliup ingerlanerani qasseriarlutit Bibelimik atuaqqissaaqateqarnissamik neqeroorutiginnippit? Qasseriarlutit siunnersuutigineqartut misilippigit? Qasseriarlutit soqutiginnittunik ataatsimiinnernut qaaqqusivit?
6 Kiffartorneq akisussaassutsimik misigisimanniffiusoq inuttut Jehovamut qanimut attaveqarnermik tunngaveqarpoq, tamatumanilu Bibelimik atuaqqissaarluartarnissaq pisariaqarpoq. Jehovap ajunngissusianik nammineq misigisaqareersimanerput qujamasuutigalugu immitsinnut erliginata inunnik allanik ikiuisariaqarpugut, annaanneqarnissatsinnik siunertarisaasoq uniunnginniassagatsigu. — 2 Kor. 6:1.
7 Ajoqersuganngortitsiniarneq tamatta immikkut akisussaaffitsitut isigigutsigu nalerisimaarneq annertooq nuannaarutissarpassuillu angusinnaassavavut. Tamanilli pingaarnerpaasoq tassa ilungersornitsinnik Jehovap pilluaqqusiumaarnera. Pilluaqqusaaneq tamanna ’pisuunngortitsisaraaq, erloqinartumillu ilasarinngilaa’. — úss. 10:22.