Qanoq ililluni soqutiginnilersitsiartuaartoqarsinnaasoq
1 Korintumiunut agdlagkat áipait 4:4-mi ima allassimavoq: ’Taakkunani uppinngitsut isumaat silap matuma guutiata tappiillisippai, Kristusip tassa Guutip assingata naalannassusianik iivangkiiliup qaamangaarnera taakkununnga qaamaqqunagu.’ Taamaattumik tupinnanngilaq inunnik allanik Jesusimut ajoqersuganngorniartunik ikiuinermi pikkorisaarnissaq ilungersortumillu suliniuteqarnissaq pisariaqarmata. Tamannali suliassatta ilagaa pingaartoq. — Mat. 28:19, 20.
2 Inuit ilumoorusuttut anersaakkut ineriartornissaannut ikiorniaraanni arlaleriaqaluni pulaartariaqartarput. Taamaattumik siumukariartortumik pulaaqqiisarnitsigut amerlanerusunik Biibilimik atuaqqissaaqateqalernissarput sulissutigisariaqarparput.
3 Assut soqutiginnippaluttut atuakkamillu pisimasut pulaaqqittarpigit? Aamma atuagassianik pisimanngikkaluartut pulaaqittarsinnaavatit. Pioneri pulaaqqaarnermini atuagassianik siaruarterineq ajortoq inussiarnisaarsimasunut tamanut pulaaqqittarsimavoq. Biibilimut tunngasumik oqaloqatigiilluarsimaneq pulaaqqinnissamut pissutissaalluarpoq.
4 Pulaaqqiinermi naqitaaqqat atorlugit Biibilimik atuaqqissaaqateqalertarit: Naqitaaraatitsinni sammineqartut ullumikkumut naleqquttorujussuupput. Taakkunani erseqqissarneqarpoq Biibilimik ilisimasaqalernissap tamatuminngalu atuinissap qanoq pingaaruteqartigissusiat.
Ima oqarsinnaavutit:
◼ „Kingullermik oqaloqatigiissutigaarput sooq Biibili tatigineqarsinnaasoq. Siunissarli Biibilimi qanoq oqaatigineqarpa?“ [Pulaagaq oqaaseqarli.] Taava naqitaaraq Silarsuaq manna aniguissava? takutiguk oqarlutillu: „Inuit ilaat isumaqarput ullumikkut silarsuarmi pisartut Biibilimi siulittuutit eqquunnerigaat silarsuullu naggatissaa qanillisoq. Eqqarsaat tamanna illit qanoq isumaqarfigaajuk?“ Naqitaaqqamillu takutiguk itsaq silarsuaasimasoq peerussimasoq silarsuarlu ullumikkut atuuttoq peerumaartoq. Naqitaaraq ikiortigalugu nassuiaruk silarsuup naggatissaa isumaqanngitsoq qilaviup nunaviullu peerunnissaat. Isumaqatigiissuteqarfigiuk aggeqqikkuit immikkoortoq ’Nalunaaqqut’ misissussagissi, naqitaararlu tunniullugu.
5 Assingusumik atorsinnaavat naqitaaraq Asasatsinnut toqusimasunut neriuutissaqarpa?
Ima oqarsinnaavutit:
◼ „Apeqqut aalajangersimasoq inuit kikkulluunniit sukkulluunniit eqqarsaatigisarpaat, upperigaluarunikku upperinngikkaluarunikkuluunniit. [Unillatsiarit.] Inuk toqugaangat susoqartarpa? [Pulaakkat oqaaseqarli.] Naqitaaraq una ikiortigalugu tamanna akissutissarsisinnaavat.“ Saqqaa qulequtaalu oqaaseqarfigikkit immikkoortorlu siulleq aallartillugu. Immikkoortunut tamanut naleqquttunik aperisaruk allassimaffiillu innersuussutigineqarsimasut atuartarlugit. Atuagassiaaraq Guutip ilumut soqutigaatigut? tamatumunnga assingusumik atorneqarsinnaavoq.
6 Atuaqqissaarneq ingerlatiinnaruk: Siunnersuutit tamakku malikkukkit Biibilimik atuaqqissaaqateqalernissannut periarfissaqassaatit. Oqaloqatigiinneq kingorna aalajangersimasumik pisalersinnaaqqullugu anileruit pulaakkat ima oqarfigisinnaavat: „Takuat qanoq ililluni minuttialunnguit ingerlanerinnaanni apeqqutinut pingaaruteqartunut akissutissarsisoqarsinnaasoq. Immaqa sapaatip-akunnerata tulliani piffissaq sivisunerulaartoq tamatumunnga atorsinnaavarput makiffissamik neriuut arlaalluunniit illit soqutiginartitat oqaluuseralugu.“ Pulaaqqiigaangavit apeqqut ataasiinnaq ilanngutassiani tamakkunani taaneqartoq atortarsinnaavat. Tulluarpat atuagassiaaqqamut nuussinnaavutit imaluunniit atuagaq ’Paratiisilersaarut’ atuaqqissaaqatiginnissutigisinnaallugu.
7 Sallusuissummik ujarlersumik Biibilimik atuaqqissaaqatiginninneq taassuminngalu silarsuup tappiitsuuneranit aniguinissamut ikiuineq nalerisimaarnermik misigiffiusaqaaq. Taamaattumik qanortoq Jehovap siunnersuutit tamakku atorlugit pulaakkatsinnik soqutiginnilersitsiaanitsinni ilungersornivut pilluaqqugiligit, ajunnginnerusunik angusaqarniassagatta. (kmD Hvordan man opdyrker interesse)