Atuaqqissaaqateqalernissat neqeroorutigiuk — naapittareersimasannut
1 Jehova unnersiutiginissaa kissaatigaarput allallu taamaaliornissaannik ikiorlugit. Qilammi pinngortitat kiffartorput ’soraaratik ullukkulluunniit unnuakkulluunniit ima oqarlutik: ’Illernarpoq, illernarpoq, illernarpoq Jehova Guuti ajugaqanngitsoq’. (sar. 4:8) Amerlangaartut pillugit ima oqaatigineqarpoq ’naalaffiutaani kiffartuukkaat ullukkullu unnuakkullu’. (sar. 7:15) Periarfissani tamani ’ullukkullu unnuakkullu’, allat aamma unnersiutiginneqataaqqullugit ikiorniartuartarpavut.
2 Amerlanersavut aalajangersimasunik aggertarfeqarput, immaqa atuagassianik pajuttakkatsinnik. Biibilimik atuaqqissaaqatiginissaannik qanittukkut neqeroorfigigaluanngiligit? Immaqa atuagaq ’Paratiisilersaarut’ pigereerpaat imaluunnit atuagassiaaraatitta ilaat. ’Anori silalu’ oqaloqatigiissutigiinnarnagit imaluunnit apeqqutinik assigiinngitsunik eqqartuiinnarnani ajunnginneruvoq aaqqissuulluagaasumik eqqartorlugu aallartiinnaraanni.
3 Amerlanertigut imatut oqartoqarsinnaavoq: „Qanoq ililluta Jehovap nalunaajaasuatut Biibilimik atuaqqissaartarnerput takorusuppiuk? Ajunngitsumik qisuariarpat atuakkami ’Paratiisilersaarummi’ immikkoortualuit atuarlugit aallartiinnarneqarsinnaapput, minuttialuit qaangiuppata kingorna aperisinnaavat qanoq isumaqarfigineraa sapaatip akunnerata tulliani taamatut ingerlateqqerusunneraa. Aallaqqaataaneerneqarsinnaavoq, kisianni pulaagaq aalajangersimasumik immikkoortumik sammeqqaagaqarusuppat taamaaliortoqarsinnaavoq.
4 Fynimi qatanngutip arnap paninilu tallimanik ukiulik arlaleriarlutik pulaaqqittagaqarsimapput. Arnaq atuagassianik pisimavoq nutaamillu aggeqqinnissamik isumaqatigiissuteqarfigeqqinneqarluni. Taamaanneranilu pania oqarpoq: „Anaana, eqqaamassavat atuaqqissaaqateqalerniarnissarput.“ (Tamanna katersuutsitsinermi ilagiinnut nakkutilliisup eqqartorsimagamiuk.) Arnap tusaammagu taamaattumik arnaata nassuiaattariaqarpaa suna siunertaralugu pulaarnerlutik. Arnaq ernerluni atuaqqissaaqatigineqartalernissaminut akuersivoq.
5 Naapittariikkatta ilagaat aappaasut uppinngitsut. Pioneerip aappaasumut uppinngitsumut Biibilimik atuaqqissaaqatigisalernissaanik neqeroorfigisimavaa. Atuaqqissaartanissaminut akuersivoq, ajunngitsumillu siumukariartorluni, kuisimanngitsutullu oqaluussisartunngorpoq ilagiinnullu nakkutilliisup tikeraarnerani katersuutsitsinernut tamanut ilaasimavoq. Maannakkullu angummik nulia Jehovamut nalunaajaasuusumut atuaqqissaaqatiginnittalersimavoq!
6 Qanittumik Jehova, Jesus inngilillu suleqatigalugit kiffartuuteqarnerput naammassisinnaavarput ’ullukkullu unnuakkullu’ ulapputeqartuaannarutta Jehova unnersiutigalugu allallu taamaaliornissaannik ikiorlugit. (kmD 95/6 Tilbyd bibelstudium)