Allat pisariaqartitsineri naapertorlugit avitseqatigikkit
1 Jehovap ’inussiaq’ aalajaallunilu silatooq aqqutigalugu anersaakkut pisariaqartitatsinnik isumassortarpaatigut. (Mat. 24:45-47) Tamanna atuakkat, Biibilit, videobåndit, kassettebåndit CD-ROM-illu biibililersaarutit aqqutigalugit pisarpoq. Jehovap naammattumik piisaapilunngikkaluarluni tunisarpaatigut. Naatsorsuutigaa immitsinnut aveqatigissagivut taamaalilluta ajunngitsuutit tamatta iluaqutigissagatsigik.
2 Ikiuutissat eqqartorneqartut tamarmik aningaasarpassuarnik akeqarput. Aningaasartuutit tamakku nunarsuaq tamakkerlugu qatanngutinit matussutissinneqartarput. Ingammik tamanna taamaalersimavoq nammineq piumassutsimik tunissuteqarnermik aaqqissuussineq pilersinneqarmat. Qatanngutinit nunani pigissaarnerusuniittunit tunissutit atorlugit Peqatigiiffiup qatanngutit nunani aningaasaqarnikkut periarfissakitsuniittut ikiorsinnaasimavai. Oqaluussisartut ataatsimiinnernut kiffartuussinermullu atorfissaqatitaat pisinnaanngortinneqarsimapput.
3 Qanoq ikiuisinnaasugut: Paulusip allat pisariaqartitaat naapertorlugit avitseqatiginissaannik kajumissaarutaa malissinnaavarput. (Rûm. 12:13) Nunarsuaq tamakkerlugu suliamut aningaasanik tunissuteqaraangatta, toqqaannartumik qatanngutinut nunarsuarmi tamarmiittunut pigisatsinnik avitseqatiginnittarpugut. Tamanna eqqarsaatigalugu ilaasa aalajangersimavaat qaammatit tamaasa aalajangersimasumik nunarsuaq tamakkerlugu suliamut tunissuteqartarnissartik, soorlu naalagaaffilersaartarfimmut aningaasartuutinut tunissuteqartarnermissut. Nalunngilaat aningaasat atuagassiat saqqummersinneqarnissaannaannut atorneqarneq ajortut suliatsinnulli tamanut sumulluunniit atorneqartartut. Amerlanerit akuttunngitsumik taamaaliorsinnaappata qatanngutitta nunarsuarmi tamarmiittut tamanna iluaqutigissaqaat.
4 Avitseqatiginnissinnaavuguttaaq saqqummersinneqartunut piniaraagatta tunuarsimaartarnitsigut. Atorfissaqartitaannatsinnik piniaraangatta qatanngutit sumiiffinni allaniittut pisariaqartitsivissut anersaakkut ajunngitsuutsinik pinissaannik periarfississavavut, taamaalilluni aamma taakkua nukittuujuaannarsinnaapput nunarsuullu ilaani najugarisaminni oqaluussineq siuarsarsinnaatillugu. — Epr. 13:16.
5 Tamanna ingammik eqqaamasariaqarparput saqqummersinneqarsimasunik Peqatigiiffimmut annertuumik aningaasartuutaasussanik piniaraangatta. Ilaatigut makkua pineqarput videobåndit, CD-ROM-it, atuagarsuit qinerlerfissiat, kassettebåndinillu pisartakkat. Ilaqutariinni ilaasortat tamaasa immikkut pissarsiniunnagit immaqa ilaqutariit tamarmik ataatsimik pissarsiniunnissaat naammassaaq. Nammineq pissatta tungaatigut tunuarsimaarutta, allat ajunngitsuutinik avitseqatiginissaannik periarfississavavut. — Fil. 2:4.
6 Amerlanerit atuagassianut atuakkanullu namminneq atortakkaminnut aningaasartuutit matunissaat piareersimaffigisarpaat, aammalu saniatigut nunarsuaq tamakkerlugu ajoqersuinermut aningaasanik tunissuteqartarlutik. Immaqali ilaasa tunissutimik nammineq pisaminnik matusinersut nalornissutigaat. Naatsorsuutiginngilaat saqqummersut namminneq atukkatik allat matussagaat, suugaluarpataluunniit soorlu makku: erinarsuutit, atuakkat ukiumoortut, biibilit, CD-ROM-iugaluarpata, kassettebåndiugaluarpata, videobåndiugaluarpata il. il. Taamaattumik oqaluussisartut amerlasuut eqqarsaatigisarpaat atuagassiat assigisaallu atuagaarniarfinni qanoq akeqarnersut. Biibili hundrede koruunit missaanni akeqarpoq, amermik qalilik akisunerulluni. Atuagaq qinerlerfissiaq hundrede koruuninik arlalinnik akeqarpoq, leksikonilu CD-ROM-imi 500-t 1000 koruunillu akornanni pineqarsinnaalluni. (Biibili qallunaatuunngortitaq atortussaatitaq CD-ROM-imi 2000-t koruunit missaanni akeqarpoq.) Qaammatisiutit sisamanik qalipaatilik immaqa 30-40-t koruunit missaanni akilerlugu tunineqartarpoq, CD-it ilaat 50 aamma 100 koruunit akornanni akeqarput videofilmillu 100 koruunit sinnerlugit akeqarlutik. Naak Peqatigiiffiup atuagassiaatai iluanaarutaassanngikkaluartut taamatut sanilliussinerit ikiorsinnaavaatigut silarsuarmi suliamut qanoq annertutigisumik tunissuteqarnersugut. Tunissutit isertitat aningaasartuutinik matussutissiinngippata Peqatigiiffiup suliamik annertusinissaanut periarfissai killeqalersinnaapput.
7 Jesus oqarsimavoq ajoqersugai ilumoortut erseqqissumik asaqatigiinnerisigut ilisarineqassasut. (Juá. 13:34, 35) Tunissuteqarnikkut tukkortuunitta namminissarsiunngitsumillu allat pisariaqartitaannik avitseqatiginninnitta tamanna pitsaanerpaamik ilumoorluta kristumiuunitsinnik nalunaajaataassaaq.