Ataatsimiinnerit najuuffigisakkit — ’annerusumik taamaassaagut ullussaq qanillimmat’
1 Jehovap innuttaasa katerisimaartarnerup pingaaruteqassusia nalunngittuaannarsimavaat. Israelikkut naalaffinni juutillu naalagiartarfiini katersuuttarsimapput, tamakkua pallorfiginninnermi ilumoortumi qitiummata. Tamakkunani Jehovamit ajoqersorneqartarsimapput katerisimaarnerlu ineriartornartoq nuannaarutigisarsimallugu. Kristumiut siulliit aamma katerisimaanngitsoortarsimanngillat. Ulluni kingullerni makkunani tatineqarneq annertusiartortillugu anersaakkut nukissaq kristumiut ataatsimiinnerini pisinnaasarput atorfissaqartipparput, ’annerusumillu taamaappoq ullussaq qanillimmat’. (Epr. 10:25) Ataatsimiinnernut najuuttariaqarnitsinnut pissutit pingasut taasinnaavavut.
2 Katerisimaarneq ineriartornartoq nuannaarutiginiarlugu: Biibilimi kajumissaarneqarpugut ’oqaaqqissaaqatigiittarlutalu ineriartoqatigiittassasugut’. (1 Tás. 5:11) Jehovamik asannittut allat ilagigaangatsigik isumarput ineriartornartunik immertarparput, ajunngitsuliornissatsinnullu kajuminnerulerluta. Allanit immikkoorniarutta eqqarsaatit isumaatsut, namminissarsiortut ileqqorluttulluunniit pinngoriaannaanerussapput. — Uss. 18:1.
3 Ajoqersorneqarniarluta: Ataatsimiinnitsinni Biibilimik ajoqersorneqarneq siumukartoq pilersaarutaasarpoq, Jehovamut asanninnerput pigiinnarniassagatsigu annertusisinniarlugulu, ’Guutip siunnersuutaata’ maleruarnissaanut atoriaannaasunik ikiorneqarsinnaaqqulluta. (ap. sul. 20:27) Ataatsimiinnerni ilinniartarparput nutaarsiassamik nuannersumik ilinniartitsinermi oqaluussinermilu qanoq ililluta pikkorinnerulersinnaasugut, piginnaassutsit pisariaqartut Biibilip sallusuissutaanik ilassinnikkumasunik nassaarnerup ikiuinerullu kingunerisaanik nuannaangaarnermik misigisaqarumagaanni.
4 Illersorneqaqqulluta: Silarsuarmi matumani ajortumi ilagiit anersaakkut qimarnuiupput — eqqissineqarfiusut asanniffiusullu. Guutip anersaava illernartoq ilagiit ataatsimiinnerini naammangaartumik najuuttarpoq. Anersaap inerititaanik inerititaqartittarpaatigut soorlu makkuninnga: ’asanninneq tipaatsunnerlu eqqissinerlu kamajuinnerlu inussiarnernerlu ajunngissuserlu uppernerlu saamanerlu imminullu naalakkersinnaaneq.’ (Gal. 5:22, 23, NV) Taamaattumik ataatsimiinnerit uppernitsigut nukittujuarnissatsinnut aalajaattuarnissatsinnullu ikiortarpaatigut. Misilinneqarnissanullu nalaassinnaasatsinnut piareersartarpaatigut.
5 Taamaattumik kristumiut ataatsimiinneri aalajangersimasumik najuuffigisarutsigik tussiaasiortup Tussiaat 133:1, 3-mi allaatigisaatut ittut misigissaagut: „Iluarlunilu nuannillaaraaq qatanngutigiit isumaqatigiillutik najortigiileraangata.“ Sumi tamaani Guutip innuttaasa ullumikkut pallorfiginninniarlutik katersuuttarfiini ’Jehovap tunniussimavaa pilluaqqussut — inuussutissaq soraajuitsoq’.