’Inunnut tamanut’ oqaluussineq
1 Inunnut assigiinngitsunik kulturilinnut upperisalinnullu oqaluussigaangatta eqqaamasariaqarparput Jehovap piumasarigaa ’inuit tamaasa annaqqullugit sallusuissummillu ilisarsileqqullugit’. (1 Tim. 2:4) Naqitaararpassuit atuagassiaaqqallu arlallit inunnut assigiinngitsunut saaffiginnittut saniatigut marlunnik pitsaasunik atuagassiaateqarpugut inunnut Guuti Kristusilu pillugit eqqorluartumik ilinniartinneqarsimanngitsunut sukkulluunniit neqeroorutigisinnaasatsinnik.
2 Atuakkami Menneskets søgen efter Gud-imi sammineqarput nunarsuarmi upperisarsiornerit annerit qanoq pilersimasut, taamaattumillu tamanna inunnut sumiikkaluartunulluunniit ikiuutaasinnaavoq upperisaminnik Biibilimi Guutimik ilumoortutuamik ajoqersuutigineqartunut sanilliussinissamut. Atuakkap Inuk inuit inuusimasut pingaarnerpaartaat-p Jesusip inuunera peqqissaartumik allaatigaa taamaalillunilu sakkuulluarluni Guutip ernera pillugu allanut ilinniartitsinermi taassumunngalu kajungersisinneqarnissaannut, soorlu ukiuni hundredelinni siullerni inuit amerlasuut aamma taamaassimasut. (Juá. 12:32) Immaqa siunnersuutit tulliuttut atorsinnaavatit.
3 Tulluartuutikkukku atuagaq ’Inuk’ pulaakkannut neqeroorutigisinnaavat ima oqarlutit:
◼ „Jesus eqqartorneqaraangat suna eqqarsaatigisarpiuk? [Pulaakkat akili.] Oqaluttuarisaanermik ilisimatuut amerlasuut Jesus akueraat inuit inuusimasut pingaarnerpaartarigaat. [Atuakkap siulequtaanit issuakkamik atuaagit.] Biibilimi allaqqavoq Jesus tassaasariaqartoq maligassaq malittariaqagarput.“ 1 Pîtruse 2:21 atuaruk taavalu siuleqqummi quppernermi kingullermi immikkoortoq siulleq atuarlugu. Pulaagaq Jesus pillugu ilinniarnerunissaminut soqutiginnippat, atuakkamik atuagaatitta pisoqaanerusut ilaannik ilanngussillutit neqeroorfigisinnaavat. Naggataatigut Juánase 17:3 atuaruk, imalu aperillutit: „Qanoq ililluni Guutip ilinniarneratigut inuuneq naassaanngitsoq anguneqarsinnaava?“ Pulaagaq isumaqatigiissuteqarfigiuk apeqqut akiniarlugu aggeqqinnissannik.
4 Oqaloqatigiinneq nangeqqikkukku ima oqarsinnaavutit:
◼ „Neriorsorsimavakkit uteqqinniarlunga takutinniarlugu qanoq ililluni inuuneq naassaanngitsoq Guutimik ilisarsinikkut anguneqarsinnaanersoq.“ Atuagaq ’Ilisarsineq’ saqqummiuguk, kapitalilu siulleq ikiortigalugu takutillugu Biibilimik atuaqqissaarneq qanoq ingerlanneqarsinnaasoq.
5 Atuagaq „Menneskets søgen efter Gud“ atorukku aallarniillutit ima oqarsinnaavutit:
◼ „Ullumikkut upperisarsiornerit amerlammata, qanoq ililluta paasisinnaavarput upperisaq sorleq Guutip akuerineraa?“ Pulaagaq akereerpat, atuakkami qupperneq 377 takutissinnaavat. Immikkoortoq 7 takutiguk, pulaagarlu aperalugu isumaqataannginnersoq eqqortumik upperisarsiornerup inuit assigiinngitsunik nagguillit kattuttissannginnerai. Allassimaffiit innersuussutigineqarsimasut ilaat qupperuk, periarfissaqarpallu eqqaaneqartut ilaat oqaloqatigiissutigiuk. Pulaagaq soqutiginnivippat, atuagaq neqeroorutigisinnaavat ingerlannginnernilu aperalugu: „Upperisarsiorneq eqqortoq inuit inuunerannut iliuusiinullu qanoq sunniuteqartariaqarsoraajuk?“ Isumaqatigiissuteqarfigiuk qaqugu aggeqqissinnaanerlutit apeqqut akiumallugu.
6 Pulaaqqiiguit naatsumik saqqummiussereeruit kingullermik apeqqutigisimasannut utersinnaavutit ima aperillutit:
◼ „Inuit upperisaat inooriaasiannut qanoq sunniuteqartariaqarsoraajuk? [Pulaagaq oqaaseqartiguk.] Kristusip upperisarsiorneq ilumoortoq ilisarnaateqarnerarpaa“. Atuakkami Menneskets søgen efter Gud-imi qupperneq 12-imi Matîuse 7:17-20 issuarneqartoq atuaruk. Tamatuma kingorna pulaagaq kajumissaarsinnaavat quppernermi 13, 14-imilu immikkoortoq 20 atuaqqullugu. Piffissaq apeqqutaatillugu qupperneq 16-18-imi immikkoortut 25-miit 29-mut oqaluuserineqarsinnaapput. Tamanna atuagassiaaqqamik Guutip sumik piumaffigaatigut-mik imaluunniit ’Ilisarsinermik’ atuaqqissaaqatigiinnermik kinguneqarsinnaavoq.
7 Aallarniinissamut siunnersuutit: Atuakkami Menneskets søgen efter Gud-mi pulaaqqaarnermi pulaaqqiinermiluunniit aallarniinissamut amerlasuunik siunnersuuteqarpoq. Aallarniisinnaavutit apeqqutinik soqutiginartunik saqqummiussillutit. Aajuku eqqaaneqarput apeqqutissat sammisassallu assigiinngitsut quppernernilu suni sammineqartut:
„Apeqqutit akineqartariaqartut“ — Qup. 17-18.
„Jesus inuua oqaluttualiaannaasoq?“ — Qup. 237.
„Biibili kikkut allappaat?“ — Qup. 241.
„Korani Biibililu“ — Qup. 285.
„Biibilip ilumoorneranut uppernarsaatit“ — Qup. 340-1.
„Jehovap Nalunaajaasuisa suna upperineraat“ — Qup. 356-7.
„Eqqortumik upperisarsiortut suut ilisarnaatigineraat“ — Qup. 377.
8 Quppernerit innersuussutigineqartut atuakkami Menneskets søgen efter Gud-mi quppersinnaavatit immikkoortorlu sammineqartoq oqaloqatigiissutigalugu. Eqqaamajuk atuagaatitta pisoqaanerit ilaannik ilanngussillutit neqeroorutigisassagakku. Pulaaqqiinissamut periarfissiigit apeqqummik atuagassiaaqqamiit Guutip sumik piumaffigivaatigut-mit imaluunniit ’Ilisarsineq’-mit akineqarsinnaasumik pilersitsinikkut. Pulaagaq qaaqqujuk tamanut ammasumik oqalugiaammut, qaaqqusissummillu tunillugu.
9 Naapertuilluartumik nuannarisalinnik Guuti Kristusilu pillugit sallusuissummik ujarlertunik suli inoqarpoq. Taakku oqaluussinitsigut ikiorsinnaavavut. Taamaattumik ’uummaarissumik tamaviaartariaqarpugut, Guuti uumasoq neriuffigigatsigu taanna inuit assigiinngitsut tamarmik annaassisigaat’. — 1 Tim. 4:10, NV.