Biibilimik atuaqqissaaqatitaarusuppunga!
1 Ilarpassuavut taama oqarsimapput, pissutissaqarluarlutik. Biibilimimmi atuaqqissaaqateqartarnikkut nutaanik ajoqersuganngortitsinissamik anguniagaq angusarparput. (Mat. 28:19, 20) Taamaakkaluartorli ilarpassuavut qaammaterpassuarni, immaqa ukiorpassuarni, oqaluussiuaraluarlutik nuannaarneq immikkut ittoq allat sallusuissummik ilinniartinneratigut anguneqartartoq misigisimanngilaat. Tamanna novembarimi qanoq iliuuseqarfigisinnaavarput? ’Ilisarsineq’ qaammammi tamatumani neqeroorutissaasoq ikiortigalugu atuaqqissaaqatitaarniarluta immikkut suliniuteqarsinnaavugut.
2 Weekendimik ataatsimik arlalinnilluunniit immikkoortitsigit: Tamassi kajumissaarumavassi novembarimi piffissamik Biibilimik atuaqqissaaqatitaarniarnissamut atugassamik immikkoortitsinissassinnik. Atuakkamik atuaqqissaaqatigiinnermut aqutsisut weekendimik ataatsimik arlalinnilluunniit toqqaasinnaapput gruppillu pulaaqqiisarnermi immikkut suliniuteqarnissaannik aaqqissuussillutik.
3 Pulaaqqiinernik allattuiffitit katersuunnernut tamakkununnga nassartakkit. Soqutiginninnermik ersersitsisimasut, atuagassianik pisimasut imaluunniit ataatsimiinnernut najuussimasut tamaasa pulaakkit. Biibilimik atuaqqissaaqateqalernissat siunertaralugu tamatigut pulaartarit.
4 Qanoq Biibilimik atuaqqissaartoqartartoq takutiguk: Katersuunnerni immikkut ittuni tamakkunani qanoq ililluni pulaaqqiinermi Biibilimik atuaqqissaaqateqalersoqarsinnaasoq piareersarluakkamik takutinneqassaaq. Ima oqartoqarsinnaavoq: „Inuppassuit biibileqarput, kisianni naluaat apeqqutit inuunermut tunngasut pingaartut tassani akineqartut. [’Ilisarsinerup’ imaasa allattorsimaffiat takutiguk, kapitalillu 3-p, 5-ip, 6-ip, 8-p 9-llu qulequtaat atuarlugit.] Atuakkami tassani sammineqartut sapaatip-akunneranut nalunaaquttap-ataatsip missaani sammisarutsigik qaammatialuinnannguit ingerlaneranni Biibili tunngaviusunik paasisaqarfigissavat. Aalajangersimasumik toqqagaqaruit qanoq tamanna ingerlasarnersoq takutissavakkit.“ Pulaagaq ulapinnini pissutigalugu akuersinissaminut nangaappat oqarfigisinnaavat sivikinnerusumik atuaqqissaartoqarsinnaasoq. Brochuri Guutip sumik piumaffigaatigut? takutiguk, neqeroorfigalugulu sapaatip-akunneranut minutsini 15-20-ni ilinniagassaq ataaseq atuaqqissaartarsinnaagissi.
5 Tamatta atuaqqissaaqatitaarnissarput ilungersorluta suliniutigigutsigu Jehovalu qinnuigisarlugu suliniutivut pilluaqqussagai, atuaqqissaaqatitaassaqqaarpugut. (1 Juá. 5:14, 15) Atuaqqissaaqatitaarusukkuit maani novembarimi nassaarnissannut periarfissaqarputit.