Oqaluussineq pingaartiguk
1. Silarsuarmi inuppassuit oqaluussinerput qanoq isigaat?
1 Inuppassuit Saatanip silarsuaaniittut oqaluussinerput ‘sianiilliornertut’ isigaat. (1 Kor 1:18-21) Mianersunngikkutta isiginnittaatsip taamaattup sapiissuseerutitissinnaavaatigut ilungersuussinerpullu annikillisillugu. (Uss 24:10; Es 5:20) Jehovamut Nalunaajaasutut pingaartitsinissatsinnut sunik pissutissaqarpugut? — Es 43:10.
2. Sooq oqaluussineq ‘suliassatut illernartutut’ oqaatigineqarsinnaava?
2 ‘Suliassaq illernartoq’: Apustilip Paulusip oqaluussineq “suliassamik illernartumik” taavaa. (Rom 15:15, 16, NV) ‘Suliassaq illernartoq’ qanoq isumaqarpa? Oqaluussinermik peqataanitta ‘Illernartumut’, Jehovamut, suleqataalersippaatigut taamaalillutalu aqqanik illernarsisitseqataalerluta. (1 Kor 3:9; 1 Petr 1:15) Jehovap oqaluussinerput ‘qujaniutinik pilliuteqarnertut’ isigaa, taamaattumik oqaluussineq pallorfiginninnitsinni pingaaruteqarluinnarpoq. — Hebr 13:15.
3. Sooq nutaarsiassamik nuannersumik oqaluussineq ataqqinaataangaarpa?
3 Nutaarsiassamik nuannersumik oqaluussineq ataqqinaataangaarpoq ikittuinnaat piginnaatitaaffigisaat. Suliassaq taamaattoq inngilit nuannaarutigalugu suliarerusussagunaraluarpaat qularnanngitsumillu iluatsilluartumik suliarisinnaassagunarlugu. (1 Petr 1:12) Taamaattorli, Jehovap uagut inuit naammaalluinnanngitsut, ‘marraasut’, suliassamut angingaartumut sulisussatut toqqarsimavaatigut! — 2 Kor 4:7.
4. Qanoq takutissinnaavarput oqaluussineq pingaartillutigu?
4 Suliaq pingaartoq: Suliarput nuannaarutigigatsigu oqaluussinerput inuunitsinni ‘pingaartittariaqarnerpaatut’ isigaarput. (Fil 1:10) Taamaattumik, sapaatip akunneri tamaasa suliamut tamatumunnga peqataaniarluta pilersaarutigisarparput. Nipilersortartoq, nipilersoqatigiinni silarsuarmi tusaamasaasuni nipilersortarnerminik pingaartitsisoq, piginnaasaminik ineriartortitsiniassaguni tusarnaartitsilernerit tamaasa piareersarumassaaq. Taamatuttaaq, uagut oqaluussiartunnginnitsinni piareersartassaagut ‘oqaatsimik sallusuissutaasumik eqqortumik atuisinnaaqqulluta’ ‘ajoqersuinittalu’ pitsanngoriartornissaa sulissutigalugu. — 2 Tim 2:15 NV; 4:2.
5. Oqaluussinerput kia pingaartippaa?
5 Inuit amerlanerit isiginnittaasii nuanninngitsut nikallussutigeqinagit. Eqqaamajuk, angalaarfigisartakkatsinni amerlasuut pulaartarnivut pingaartimmatigit. Inunnili akuerineqarnissaq ujartunngilarput. Jehova qanoq isumaqarnersoq pingaarnerpaavoq, taassumalu suliniarnerput pingaartingaarpaa. — Es 52:7.