Apeqquteqarfik
◼ Toqugutta pigisavut tamaasa ilaannaaluunniit Jehovap peqatigiissortaanut tunniukkusukkutsigit suna eqqaamasariaqarparput?
Inuk toquguni pigisani oqartussaaffigiunnaassavai. (Oqal 9:5, 6) Taamaattumik amerlasuut pigisami qanoq agguaanneqarnissaannut testamentilioreertarput. (2 Kng 20:1) Inatsisitigut atuuttoq naapertorlugu nalinginnaasumik allassimasarpoq kina pigisanik isumaginnittuussanersoq. Taama ittumik allakkiortoqarsimanngikkaangat nunani amerlasuuni oqartussat aalajangertarpaat toqusup pigisai qanoq agguaanneqassanersut. Taamaattumik pigisavut qanoq agguaanneqarnissaannut kissaateqarutta, assersuutigalugu tamaasa ilaannaaluunniit Jehovap peqatigiissortaanut tunniunneqarnissaannik, taava inatsisit naapertorlugit allakkiortoqarnissaa eqqarsarluaqqissaarlunilu isumaginnittussamik toqqaasoqarnissaa pingaaruteqarpoq.
Isumaginnittussaq akisussaafferujussuaqarpoq. Pigisat amerlassusii apeqqutaallutik katersorneqarnissaannut agguaanneqarnissaannullu piffissarujussuaq atorneqarsinnaavoq. Tamatuma saniatigut oqartussat malittarisaminnik najoqqutassiaqartarput. Ilagiinni ilaasortat tamakkerlutik pigisanik isumaginnittussatut tulluartuusinnaanngillat. Toqqagarput suliaminut piukkunnartuusariaqarpoq, tatiginartuulluni kissaatitsinnillu eqqortitsisuussalluni. — Allaaserisaq “Fordelene ved planlægning af pension, arv og skifte” Vågn op! 8. decembari 1998-imoortoq takuuk.
Pigisanut isumaginnittooqquneqaruit: Toqoreeruni pigisaminut isumaginnittooqqullutit aperineqaruit akisussaaffik naammassisinnaanerlugu qinunikkut eqqarsaatigeqqaassavat. (Luk 14:28-32) Inuttaa toquppat kingornussisussat tamaasa ilisimatittariaqassavatit. Tamatuminngalu piginnaatitaaleruit inatsisit aamma testamenti naapertorlugit pigisat agguaatissallugit pisussaaffigilissavat. Kingornussassat annikippata annertuppataluunniit testamentimi allassimasut eqqortinneqassapput. Tunissutit tamarmik inatsisitigut ingerlatsivimmut Jehovap Nalunaajaasuinit atorneqartumut tunniunneqartut Jehovap peqatigiissortaanit pigineqarput. — Luk 16:10; 21:1-4.