Biibilimik atuaqqissaaqateqarnermi sunniuteqarluartumik ilinniartitsigit
1. Biibilimik atuaqqissaaqateqartartut suna akisussaaffigaat?
1 Guutimut kiffartortoqalersinnaanngilaq Jehovap ‘kajungilersinngippagu’. (Joh 6:44) Oqaluussisartulli Biibilimik atuaqqissaaqateqartut inuit Ataatamut qilammiusumut qanillisinnaaqqullugit aamma iliuuseqartariaqarput. (Jaak 4:8) Tamatumani piareersarluarsimanissaq pingaaruteqarpoq. Atuaqqissaaqatitta tusarliussaq uummammiuliutissappagu siuariartuutigissappagulu immikkoortunik apeqqutinillu atuartarnerinnaq naammanngilaq.
2. Biibilimik atuaqqissaaqateqarnermi sunniuteqarluartumik ilinniartitsinermi suut anguneqarsinnaappat?
2 Biibilimik atuaqqissaaqateqarnermi sunniuteqarluartumik ilinniartitsissagaanni oqaluussisartup isumagissavai atuaqqissaaqatimik (1) Biibilip ajoqersuutaanik paasinninnissaat, (2) Biibilip ajoqersuutaanik qularunnaarnissaat aamma (3) Biibilip ajoqersuutaanik maleruaalernissaat. (Joh 3:16; 17:3; Jaak 2:26) Taakkua pingasut anguniarnissaat qaammatinik arlalinnik sivisussuseqarsinnaasarput. Anguniagassat taakku immikkut tamarmik Jehovamut attaveqalernissamik tunniulluinnarnissamillu ineriartortitsinermut ersiutaapput.
3. Sooq ilinniartitsillaqqissoq atuaqqissaaqatini qanoq isumaqarnersoq aperisarpa?
3 Biibilimik atuaqqissaaqatigineqartoq qanoq eqqarsartaaseqarpa? Atuaqqissaaqaterput ilikkakkaminik paasinnillunilu qularunnaarsimanersoq paasiumallugu nammineq oqaluppallaarnata oqaaseqaqqullugu kajumissaarsinnaavarput. (Jaak 1:19) Sammineqartoq pillugu Biibilimi qanoq allassimasoqartoq paasivaa? Nammineq oqaatsini atorlugit tamanna nassuiarsinnaavaa? Ilikkakkani qanoq isumaqarfigai? Upperaa Biibilimi ilinniartitsissutigineqartut ilumoortuusut? (1 Th 2:13) Paasivaa ilikkakkani inuunermini allannguisitsisariaqartut? (Kol 3:10) Apeqqutinut taakkununnga akissutissarsiniarnitsinni pissuserissaarluta aperisariaqarpugut atuaqqissaaqaterput qanoq isumaqarnersoq taavalu tusarnaarluta. — Matt 16:13-16.
4. Atuaqqissaaqatigisartakkatta Biibilimi ilikkakkani paasiuminaatsillugilluunniit maleruaruminaatsippagit qanoq iliussaagut?
4 Ileqqut eqqarsartaatsillu pigiliussimasat allanngortikkuminaattarput. (2 Kor 10:4, 5) Taava qanoq iliussaagut atuaqqissaaqatigisartakkatta ilikkakkani akueriuminaatsillugilluunniit maleruaruminaatsippagit? Atuaqqissaaqatigisartakkatta uummataani Guutip oqaasiata anersaallu illernartup sunniuteqarnissaannut erinitsajuilluta utaqqisinnaassuseqartariaqarpugut. (1 Kor 3:6, 7; Hebr 4:12) Atuaqqissaaqatigisartakkap sammisaq paasiuminaatsippagu maleruaruminaatsippaguluunniit nukingisaarnagu sammisamut allamut ingerlaqqiinnaraanni ajunnginnerussaaq. Erinitsajuissuseqarluta inussiarnersumillu Biibilimik ilinniartitsiuarutta imaassinnaavoq iluarsisariallit pisariaqartut piffissap ingerlanerani iluarsinissaannut piumassuseqalissasoq.