Inuusuttut aperipput . . .

Imertarpit — aap, ajorpa?

Imigassartortarneq pillugu silatusaartumik aalajangiisinnaajumalluni aalakoornartup sunaanera aammalu inummut qanoq sunniuttarnera ilisimasariaqarput. Aalakoornartorli pineqaraangat ilisimasassat piviusorsiortut pinnagit misigissutsilli inuppassuarnit tunaartariniarneqartarput. Illimmi? Misilitsilaarusuppit? Isummat assigiinngitsut matuma ataaniittut nalaasigut eqqorpoq imaluunniit eqqunngilaq allattakkit. Akissutit qupperneq 14-imiipput.

Eqqorpoq imaluunniit eqqunngilaq

1. Imigassat aalakoornartortallit siullerpaamik qiillannartuupput . . .

2. Aalakoornartoq qanorluunniit annertutigigaluartoq timimut ajoqutaavoq . . .

3. Imigassat aalakoornartortallit — immiaaraq, viinni, imigassarlu — tamarmik sukkaqatigiissumik aammut akuleruttarput . . .

4. Akoqanngitsumik kaffisoraanni imaluunniit nillertumik kuutsitsivigilluni uffaraanni aalakoorunnaajaarnarneruvoq . . .

5. Aalakoornartoq aalajangersimasumik annertussusilik tamanut assigiimmik sunniuttarpoq . . .

6. Aalakoorneq tassaavoq imerajuttuuneq . . .

7. Aalakoornartoq allallu eqqissisaataasut (soorlu barbituratit) ataatsikkut pigaanni tamarmik immikkut sunniutigisartagaat sakkortusisarput . . .

8. Aalakoornartut assigiinngitsut immikkoortillugit imeraanni aalakuulernanngillat . . .

9. Timip nerisassanik uutsisarnermisut imigassaq uuttarpaa . . .

10. Ataasitoreernerup imaluunniit marlutoreernerup kingorna biilerneq ulorianarpoq . . .

QANOQ ingerlava? Ilikkagaqarpit? Misilitsinneq tamanna eqqarsaatersornerinnarmut tunnganngilaq. Aalakoornartunut tunngasunik eqqorluartumik ilisimasaqarnissaq pingaaruteqartorujussuuvoq. Nakkarfiusinnaasut ilisimagaanni ingalassimaneqarsinnaapput. Bibelimi ima mianersoqqussuteqarpoq: ’[Viinni imaluunniit imigassaq] kingornagut kiisiumaarpoq pulateriaarsuttut, pulateriaarsuttut toqunartulittut ikiliilluni.’ — ússatit 23:32.

John, angut inuusuttoq USA-p avannaata kujasissuani najugalik, assersuutissaalluarpoq aalakoornartup, atornerlunneqaruni, ’pulateriaarsuttut kiisisinnaaneranut’. Taanna suli 20-nik ukioqalernani katissimavoq. Unnuit ilaanni nulianilu inuusuttoq parrutereerlutillu kamaqaluni illuminnit anivoq. Imeriarniarpoq. Vodka literip affangajassua aarlorutereerlugulu artulerpoq. Nakorsat napparsimasunik paarsisullu ilungersorsimanngitsuuppata maanna toqoreersimassagaluarpoq. Nalunanngitsumik ilisimasimanngilaa piffissap taama annikitsigisup ingerlanerani aalakoornartumik taama annertutigisumik pineq qanoq ajortigisumik kinguneqarsinnaasoq. Aalakoornartup sunniuttarneranut tunngasunik ilisimasaqannginnini pissutigalugu inuunini annaangajalluinnarpaa.

Tamannaannaanngilarli. Qularnanngitsumik John isumaqarsimagaluarpoq ajornartorsiutini aalakoornartumut ipitissinnaallugit, tassa qanorluunniit ilillutik tammassasut. Kisimili taamatut isumaqanngilaq. Inuusuttualuit Vågn op!-imit aperineqaramik sooq imertalersimanersut ima akipput: ’Qimaaniarluta.’ Sumit qimaaniarlutik? Angerlarsimaffimmi tatisimaneqarnermit qimaaniarlutik. Allat oqarput atuarfimmi ingerlanerliornertik imaluunniit ajornartorsiutit allat pissutigalugit imertarlutik. Taamaattumik aalakoorneq tassaavoq qimaaniarluni misiliineq.

Taamaattoqarsinnaavali? Aammattaaq matumani pitsaassaaq imigassap inummut qanoq sunniuttarnera ilisimasaqarfigilaassallugu.

Kingunerlutsitsinarpoq

Aalakoornartutoraanni aalakoornartup qaratsap sulinera arriillisittarpaa siooraneq millisittarlugu. Tassa imaappoq inuk imernermi siornatigornit eqqissisimanerulersarpoq, annilaangannginnerulerluni isumakulunnginnerulerlunilu. Tassanngaannaq ajornartorsiutit millisutut isigilersarpai. Taamaattumik Bibelimi ima allassimasoqarpoq: ’Sussaajunnaalersoq silaarunnartumik immissiuk.’ Sooq? Ussatip oqaasertaqarneratut ’naalliungaarnini puiorniassammagu’.a — ússatit 31:6, 7.

Paulip tamanna misigisimavaa. Taanna angutaavoq inuusuttoq inuusuttuaraatilluni angerlarsimaffimmi ajornartorsiutit qimarratiginiarlugit imigassartortarsimasoq. „Siusissukkut paasivara imernikkut tatisimaneqarnera oqilisissinnaallugu,“ oqaluttuarpoq. „Imersimagaangama eqqissisimasaqaanga.“ Taamaassimassappat taava immaqa isumaqarputit qasuersaarumalluni imerneq isumassarsiatsialassuusoq ajoqutaavallaarnaviarnanilu. Tassami aalakoornartup sunniinera unikkaangat imilinnginnermi siooraneq allanngorsimaneq ajormat, ilaa?

Naamik! Aalakoornartoq kingunerlutsitsinarpoq. Tarnit nakorsaat dr. Stanley E. Gitlow ima nassuiaavoq: „Eqqissinartutut sunniuttartoq sivikitsoq qaangiukkaangat aalakoornartup sunniinera alla sunniuttarpoq, tassa isumalliulerneq. Silarsuarmi kinaluunniit sumilluunniit kingunipiloqanngitsumik eqqissisaasiorsinnaanngilaq sunniuttarneranit sivisunerusumik qaangiunniarneq ajortumik.“

Allatut oqaatigalugu: Nalunaaquttap akunneri marlussuit qaangiuttullu aalakoornartoq sunniutaarukkaangat, siooraneq ernumassutillu takkuteqqittarput, tamatumuunakkulli imilinnginnermit sakkortunerullutik. Tassa imilinnginnermi siooraneq imaluunniit annilaanganeq imereernerup kingorna sakkortusisarpoq. Sunniuttoq tassaasarpoq aqagutaarneq, imereernerullu kingorna allaat nalunaaquttap akunnerini aqqaneq-marlunni sunniusimasarpoq.

Taavalu aqagutaarnerup nalaani imeqqikkaanni qasukkartutut misigineq takkuttarpoq, siooranermillu misigisimaneq annikilleqqittarluni. Nalunaaquttalli akunnerisa marlussuit kingorna annertuseqqissaaq, tamatumuunakkullu suli sakkortunerulluni! Taamatut ingerlajuartarpoq. Imerajuttuinnaanngitsut tamanna misigisarpaat. Kikkut tamarmik imingaatsiartartut tamanna misigisinnaavaat.

Tamakku tamaasa eqqarsaatigigaanni nalunanngilaq aalakoornartup siooraneq annikillisinneq ajoraa, kisiannili allaat annertusisittaraa. Aalakoornartorlu inummut sunniussinnaajunnaarpat ajornartorsiutit peerussimanavianngillat, siornatigutullu annertutigiinnassallutik, immaqalu allaat annertunerullutik! Tassa aalakoornartoq arlaannit qimaaffigissallugu isumassarsiaanngilaq pitsak.

Soorunami taamaalilluta oqarnianngilagut kinaluunniit naammattumik utoqqaassuseqalereersimasoq ilaanneeriarluni killilimmik imertarpat eqqunngitsuusoq. Aap, apeqqut tamanna Bibelimi oqimaaqatigiissumik isumaqarfigineqarpoq. Assersuutigalugu eqqorluartumik oqaatigineqarpoq viinnip uummat ’kajumilersittaraa’. (Estare 1:10) Aammattaaq toqqaannartumik ima oqaatigineqarpoq: „Imerpallaaraanni nipitusaarpallaalernarpoq isumaatsutullu pissusilersornarluni. Putumaneq sianiitsuliorneruvoq.“ — ússatit 20:1, Today’s English Version. (gD 8/10 84)

[Quppernerup ataani ilanngussaq]

[Qupp. 14-mi ungalusaq]

Misilitsinnermi akissutit eqqortut eqqunngitsullu

 1. EQQUNNGILAQ. Aalakoornartoq siullerpaamik arriillinartuuvoq. Aalakoornartup taamaallaat siooranermik millisitsinermigut eqqissisimanermillu misigilersitsinermigut, tassa imernerup siornanit annilaangannginnerulersitsinermigut, qiimmaallatsitsisarpoq.

 2. EQQUNNGILAQ. Annikitsumik imertaraanni qularnanngitsumik timimut ajoqutaaneq ajorpoq. Annertuumilli imertaraanni sungiutiinnarsimallugulu, uummammut, qaratsamut, tartunut timillu pisataanut allanut ajoqutaasinnaavoq.

 3. EQQUNNGILAQ. Imigassaq kimittooq viinnimit immiaaqqamillu sukkanerusumik aammut akuleruttarpoq.

 4. EQQUNNGILAQ. Kaffi eqeersitsisinnaavoq, nillertumillu uffarneq masatsitsisinnaavoq, aalakoornartorli tartunut uninnissami tungaanut aammi ingerlaartarpoq, tassa nalunaaquttap akunneranut aalakoornartoq 15 grammisut annertutigisukkaarluni tartumut unerartarluni.

 5. EQQUNNGILAQ. Aalakoornartup qanoq sivisutigisumik timimut sunniussimasinnaaneranut assigiinngitsut aalajangiisuusarput, assersuutigalugu qanoq oqimaatsigineq aammalu nerisimaneq imaluunniit nerisimannginneq.

 6. EQQUNNGILAQ. „Aalakoorneq“ tassaavoq imerpallaarsimanerup kingunera. „Imerajuttuuneq“ ersiutaavoq imertakkanik killiliisinnaajunnaarsimanermut. Aalakoortut tamakkeratik imerajuttuupput, aamma imerajuttut tamakkeratik aalakoortarput.

 7. EQQORPOQ. Aalakoornartoq nakorsaallu akuleriissinneqarunik tamarmik immikkut sunniutaat sakkortusisarput. Assersuutigalugu aalakoornartoq eqqissisaammik akuneqaruni kinguneqapilutsinneqarsinnaavoq, ilisimajunnaarnermik allaallu toqumik. Taamaattumik imigassaq iisartagarlu akuleriissikkaanni sunniutaat tassaaneq ajorput imigassat marluk imaluunniit iisartakkat marluk sunniutaasa nalingi. Akerlianilli sunniuteqartarput nakorsaatit pingasut, sisamat, qulit imaluunniit amerlanerusut nalingisut.

 8. EQQUNNGILAQ. Qanoq aalakoortiginermut aalajangiisuusarpoq qanoq annertutigisumik aalakoornartumik imersimaneq, immiaaraagaluarpat, whiskyugaluarpat, vodkaagaluarpat suugaluarpalluunniit.

 9. EQQUNNGILAQ. Nerisassanit allanit sukkanerusumik aalakoornartoq timimut akuleruttarpoq. Aalakoornartup 20 procentia aqajaqqukkoorluni aammut ingerlagasuartarpoq. Sinnera aqajaqqumit inalugaaqqakkoorluni ingerlasarpoq aammullu akulerulluni.

10. EQQORPOQ. Amerlanertigut ataasiinnarmik imerneq naliliisinnaassusermut sunniuttarpoq, qisuariartaatsinut nalinginnaasunut sunniuttarluni aammalu pisariaqanngitsumik sapiisertitsilersarluni. Marluinnarnik imernerup minuttit arlaqanngitsunnguit ingerlanerinnaanni biilinik ingerlatitsisinnaassuseq pitsaajunnaarsittarpaa.

[Qupp. 13-mi assiliartaq]

Imigassat aalakoornartut atornerlunneqarunik ’pulateriaarsuttut kiisisinnaapput’