Inuusuttut aperipput . . .

Qanoq ilillunga Guuti kiffartuussinnaavara angajoqqaama akerlerippassuk?

KAMAL, Chani aamma Jaswinder tassaapput qatanngutit arnat inuusuttut Indiamiut pingasut Englandimi najugaqartut. Kristumioorusupput, angajoqqaavisali — aap, ilaqutaasami tamarmik — sapinngisartik tamaat upperisatoqartik taakkununnga attatiinnartinniarsaraat. Annersarneqartarput, sioorasaarneqartarlutik sutigullu tamatigut akerlilersorneqarlutik, naggataagullu angerlarsimaffimminnit allamut nuuttariaqalerput.

Immaqa illit pissutsit taama ittut atorsinnaavatit Bibelimik atuaqqissaartarninni ’anersaakkut ittumik ilumoortumillu ataatamik pallorfiginninnissat’ kissaatigilersimagukku. (Juánase 4:23) Imaassinnaavoq angajoqqaavit upperisarsiorneq sunaluunniit tunussimagaat imaluunniit illit upperisartaat taakkua upperisamik paasinnittaasiannut akerliusoq. Taamaattoqartillugu ilaquttanit akerlilersorneqalerneq tupaallaatigisariaqanngilat. Jesusip siulittuutigisimavaa kristumiussuseq ilumoortoq amerlasuutigut ilaqutariinnik avissaartitsiumaartoq. (Matîuse 10:34-37) Taava una apeqqutaalerpoq: Pissutsit taama ittut nalaakkaanni qanoq iliortariaqarpa?

Kamalip, Chanip Jaswinderillu najoqqutassat Bibelimi ilinniakkatik aalajangiusimajuarpaat, aatsaalli angajoqqaatik qimallugit nuukkamik akornusersorneqaratik Guuti pallorfigisinnaalerpaat. Suli angajoqqaannit akisussaaffigineqaruit taamaattumillu angajoqqaatit qimallugit nuussinnaanngikkuit, taava qanoq iliorsinnaavit angajoqqaannit akerlilersorneqarnerit anigorniarlugu? Bibelimi unnersuussutaasunik najoqqutassinneqarpugut.

Ataqqinnittuugit

Bibelimi Pîtrusip agdlagai sujugdlît 3:15-imi kajumissaarneqarpugut ’saamalluta ataqqinnilluinnarlutalu’ (NV) upperisarput oqaluttuarisaqqullugu. Immaqa Bibeli ilinnialeqqammerpat angajoqqaatillu upperisannik oqaluttuukkusungaarakkit immaqa paamitsatsittoorsinnaavatit immaqalu misigilersissinnaallugit illit taakkunannga ilisimasaqarnerusutit. Kialuunniilli nuannarinngilaa ammut isigineqartutut oqaluunneqassalluni imaluunniit ilisimasakitsutut misigissalluni — taamaattumik angajoqqaatit „ilinniartinniartuaannarukkit“ taava ilimagisariaqarpat pitsaanngitsumik qisuariarfigissagaatsit.

Rita, inuusuttuulluni Tysklandimi najugaqarsimasoq, ima oqarpoq: „Ilikkakkannik tamanik erniinnaq angajoqqaakka oqaluttuuppakka, taamaalillungalu oqaluttuuppakkalusooq taakkua upperisaat eqqunngitsuusoq.“ Angajoqqaalli pisussaapput allanit — aammattaarlu meeqqaminnit — isornartorsiorneqarnatik namminneq isummertarnissaminnut paasinnittaaseqarnissaminnullu. Rita ima nassuerpoq: „Imminuinnaq pinnanga aamma taakku eqqarsaatigisimasussaagaluarpakka aammalu Guutimut uppernerat ataqqinerusimasariaqaraluarlugu.“

Paulus Timoteusimut inuusuttumut allappoq ’angut utoqqaq appisaluussanngikkaa’. Isumaqassannginnerpit najoqqutassaq tamanna aamma ilaqutariinni, angajoqqaanut asasinut attaveqarnermi, atortuusariaqartoq? — 1 Timûtiuse 5:1.

Angajoqqaatit naalakkit

’Ilissi meeqqat, angajoqqaasi naalassigik,’ Bibelimi allassimavoq. (Evfisumiut 6:1) Niviarsiaqqap Kayimik atillip najoqqutassaq tamanna malissimavaa. Arfineq- pingasuinnarnik ukioqarluni Jehovap Nalunaajaasui attaveqarfigilerpai. „Uanga qatanngutikkalu angajoqqaatsinnit perorsarneqarsimavugut inunnut allanut akaarinnittussanngorluta,“ Kay oqaluttuarpoq, „taamaattumillu Bibelimik atuaqqissaarnissannut aammalu Jehovap Nalunaajaasuisa ataatsimiittarnerinut orniguttarnissannut akueraannga.“ Taamaakkaluartoq Kayip qulakkeersimajuarniartarpaa oqaatsimi iliuutsimilu upperisaminut ajunngitsumik ersiutaanissaat.

„Jehovap innuttai ilagisalerakkit,“ Kay nassuiaavoq, „paasilerpara angajoqqaakka naalanngiffigigukkit aliasuinnassanngitsut, aammattaarli isumaqassasut sallusuissut uannut ajortumik sunniuteqarsimasoq. Taamaattumik sapinngisara tamaat uannut suliareqquneqartut suliariniartarpakka, soorlu eqqaavimmik anitsineq, piffissaq eqqorlugu angerlarneq, pattagissamik noqartilimmik sungiusarneq allallu. Akeqqinngisaannarpungalu.“

Kayip upperisaatut angajoqqaavi upperisaqalinngillat, kisianni naalattuugami akerlilersorneqarnani Guuti pallorfigisinnaasimavaa, 19-inillu ukioqalerami kristumiutut kuisippoq.

Angajoqqaatit oqaloqatigisakkit

Kunngi silatooq Salomon ima allassimavoq: ’Uangami ataatama ernerigaanga, anaanama aqassugaralungalu pisuarigaanga.’ (ússatit 4:3) Angajoqqaatit illit upperisattut upperisaqanngimmata imaanngilaq akerarigitit. Taakkununnga ernerulluarniarlutit imaluunniit paniulluarniarlutit sapinngisannik iliortuaannartariaqarputit. Taakkua eqqumiigisaannik upperisaqalersimagavit qanoq aliasutsigisimanerannik paasinnittuuniarit, aammalu misigissutsinnik ernumassutinnillu oqaluttuuttuaannakkit. Maanna illit Bibelip najoqqutassaanik siulersorneqartilersimagavit, arlaatigut naapitaqartassaatit illit angajoqqaavillu isumaqatigiinngissutigisassinnik. — 1 Korintumiut 2:14.

Assersuutigalugu angutip inuusuttup Alanimik atillip kissaatigilersimavaa piffissaq annerusoq kristumiutut kiffartornermut atulerniarlugu, kisianni angajoqqaavisa kissaatigaat ilinniarnini ingerlatiinnassagaa. Alan ima oqaluttuarpoq: „Tamanna pillugu ataatama oqaloqatiginissaa siooragilaarsimavara, tassami tamanna tassaammat aalajangerneq annertooq. Taamaattumik aalajangerpunga isertortumik atuarfimmi atuartuujunnaarniarlunga — taamaaliornermali ajornartorsiutit amerlanerulersiinnarpai. Tamatuma kingorna ataatamit tatigineqaleqqinniarlunga ilungersorsimaqaanga. Pilersaarutinnik oqaluttuussimagaluarukkutoq, naak immaqa tamanna artornaraluartoq, taava isumaqarpunga uannut ataqqinninnerusimassagaluartoq, aammalu aliasuuterpassuit ernumassuterpassuillu pinngitsoorsimassagaluarivut.“

Soorliuna Alanip angajoqqaaminik oqaloqatiginninnissani sapilersimagaa? Ima oqarpoq: „Arlaannut iliuusererusutaraluamut angajoqqaat akornutaagaangata taava malersorneqartutut misigisimalernartarpoq. Ima eqqarsarnartarpoq: ’Tassa maanna ilinniarsimasakka tamarmik eqquupput! Inuk assuarlersissallugu angutaanut — inuullu illoqatini qinngarsortigissavai!’“ (Matîuse 10:35, 36) Alanip nammineq misigisani naapertorlugit paasivaa pisariaqanngitsoq angajoqqaani akeqqamisut isigissallugit. Inuusuttut allat ima siunnersorpai: „Angajoqqaatit oqaloqatigisakkit! Qanoq inninnik qanorlu eqqarsaateqarninnik oqaluttuuttakkit. Isumaqarpunga angajoqqaat amerlanerit tusarnaassasut — ingammik paasigunikku meeqqamik oqaatsitik ilumoorukkaat.“

Bibelimi najoqqutassat aalajangiussimajuaannassagaluarukkilluunniit ’ajornanngippat sapinngisannik inuit tamaasa eqqissiveqatiginiakkit’. (Rûmamiut 12:18) Angajoqqaatit ammaffigalugit pissutsinut isiginnittaatsinnik oqaluttuuttarukkit, taava ajornartorsiutit millisissinnaassavatit — immaqaluunniit pinngitsuuissinnaassallugit. Arlaannik aalajangersimasumik angajoqqaavit peqquppatsit pinngitsoornallu taamaalioqquppatsit, Bibelimilu najoqqutassanut akerliunngippat, soorunami naalattariaqarpatit. Naalasseriitsuunallu assortuiumatuujoqinak, kisianni ’qanilaarsutsit inunnut tamanut malunnarsili’. — Filípimiut 4:5.

Uppeqatitit ikiortiserisakkit

’Ataatat ilinnik ernertaartoq [imaluunniit panissaartoq] naalaguk, anaanallu asiginnaqinagu utoqqaalerpat,’ ússatit 23:22-mi taama allassimasoqarpoq. Angajoqqaatilli uppinngitsuugunik qanoq eqqarsaateqarnersutit paasiuminaatsissavaat. Assersuutigalugu nukappiaqqap Johnimik atillip Bibelimi najoqqutassiat ilaat pillugu ataatani oqaloqatigeriaraluarpaa. Ataataali ima akiinnarpoq: „Bibelimit imaluunniit peqatigiiffimmit uanga qanoq iliornissannik ilitsersorneqarusunngilanga. Illit taamaaliorterusukkuit, taava illit tamanna nammineq akisussaaffigaat!“

Kisianni kisimiinngilatit. Jesus neriorsuisimavoq ilagiit iluanni kristumiut ’qatannguteqalerumaartut. (Mákorse 10:30) Siuliani eqqartorneqartup, Kayip, tamatuma ilumoornera paasisimavaa. „Qatanngutikka kristumiut angutit arnallu ilaqutartaarisutut ippakka,“ taama oqaluttuarpoq. Soorunami inuit allat, qanorluunniit asatigigaluaraanni, ataatamut anaanamulluunniit taartaasinnaanngillat. Kisianni ilagiit iluanni — ataatatsitut anaanatsitullu — nuannarilikkatsinnik aammalu siunnersuisinnaallutillu unnersuussisinnaasunik nassaarsinnaavugut. — Naleqqiuguk Korintumiunut agdlagkat sujugdlît 4:15.

Isumalluartuaannarit

Miserratigisariaqanngilaq naak siunnersuutit taagukkavut malikkaluarlugilluunniit pissutsit atukkatit ilungersunarsinnaammata. Kisianni eqqaamajuk: Inuit aamma pissutsit allanngorsinnaapput! Ilanngutassiap aallaqqaataani eqqartorneqartut qatanngutit Indiamiut arnat pingasut ima oqaluttuarput: „Aallaqqaataanit aalajaatsuullutalu ataqqinnittuunerput pissutaalluni maanna ilaquttavut tamaasa pitsaasumik attaveqarfigaavut.“ Niviarsiaraq tuluk Janemik atilik ima allappoq: „Akulikitsumik annikilliortarsimavunga, arlaleriaqalungalu sallusuissut pillugu sorsuuteqartariaqartarsimallunga, kisianni maannakkut kristumiutut ilumoortutut isummakka angajoqqaama akuerisinnaanerulerpaat, erniinnarlu kuisinnissara qilanaarutigaara.“

Ilaatigut angajoqqaat tunniulluinnarlutik Jehovamut kiffanngortarput, meeqqamik ajunngitsumik maligassiuinerat takoreerlugulu! Aammattaaq illit Guutimik mianerinnittumik pissuseqarnerit pillugu ataqqineqalersinnaavutit aammalu ’uppertunu’innaanngitsoq aammattaarli ilaquttannut maligassiuisunngorsinnaallutit. (1 Timûtiuse 4:12) Guutimik kiffartuusinissannik aalajangernerit aalajangiusimajuaruk. Ilanngutassiami matumani siunnersuut qinunikkut sapinngisannik maleruarniarniaruk, Jehovalu tatigiuk. Tussiaasiortup ima neriorsoqqissaarpaatigut: „Atugassatit Jehovap assaanut tunniukkit, tatigiuk ilaginnaaginnarnavianngimmat.“ — Tussiaat 37:5. gD 8/7 1987

[Qupp. 26-mi issuagaq]

Kristumiup inuusuttup ernumassutai angajoqqaat uppertuunngitsut paasiuminaatsissinnaasarpaat

[Qupp. 24-mi assiliartaq]

Arnat inuusuttut uku pingasut kristumiutut upperisartik aalajangiusimajuarsimavaat naak ilaquttaminnit akerlilersorneqaraluarlutik