Inuusuttut aperipput:
Qanoq ilillunga ’ataatagalu anaanagalu ataqqisinnaavakka’?
’ILIUUSERISARTAKKANNIK arlaannik angajoqqaannut attaveqarninnut ajoqutaasumik taasaqarsinnaavit?’ Apeqqut tamanna inuusuttunut 160-iusunut apeqqutigineqarsimavoq. Nukappiaqqat 43 procentii oqaluttuarsimapput „angajoqqaatik ataqqinnittumik iliorfiginngikkaangamikkik“ taakkununnga attaveqarnertik ajoqusertarsimallugu. Niviarsiaqqat 42 procentii akisimapput ’ataatartik soqutiginngikkitsik’, 63 procentiilu nalunaarsimapput ’anaanartik akeqqittarlugu’ imaluunniit arlaatigut oqaatseriitsuullutik oqaasipiluttarlutillu. Taamaakkaluartorli inuusuttut taakkua ilarpassuisa nassuerutigisimavaat angajoqqaaminnik nuannaartitsinissaminnut taakkuninngalu suleqatiginnikkumassuseqarnissaminnut pisussaasutut misigisimallutik, ajunngitsumilli piniaraluarlutik kukkujuartarlutik.
Naak immaqa angajoqqaanik ataqqinninnissamik Bibelimi inassutigineqartut malinnissaat qamuuna kissaatigigaluarlugu kukkusoornarsinnaasarpoq. Tamanna qanoq pinngitsoorneqarsinnaava? — Evfisumiut 6:2.
Eqqortumik isumaqarneq
Angajoqqaat sammivinnit marlunnit isigineqarsinnaapput. ússatit 30:17-imi eqqartorneqarpoq ’isi ataataminik mitaatiginnittoq anaanaminillu naalakkusunngitsoq’. Illuatungaanili ússatit 17:6-imi allassimavoq ’qitornat angutitik ataqqinaatigigaat’. Tassa angajoqqaat asissugassatut, mitaatigisassatut, isigineqarsinnaapput — imaluunniit tulluusimaarutissatut, nuannaarutissatut, isigineqarsinnaapput. Angajoqqaanut qanoq isiginninneq taakkuninnga ataqqinninnermut imaluunniit ataqqinninnginnermut aalajangiisuuvoq.
„Angajoqqaalli ataqqineqarnissaminnut naleqqutinngippata qanoq ililluni ataqqiniarneqarsinnaappat?“ niviarsiaraq Louisemik atilik taama aperaaq. Akissut tassaavoq pissusii ajunngitsut isiginiartariaqartut, angajoqqaat pingaartittariaqartut eqqarsaatigiuaannarlugillu. Paasiniaaqqissaartartut Nick Stinnettip John DeFrainillu paasiniaaqqissaarnerminni paasisimavaat ilaqutariit ingerlalluartut malunnaataat pingaarnerusoq tassaasoq tamarmik pingaarteqatigiinnerat. „Pingaartitsinitsinnik ersersitsinissamik ajornartitsinitsinnut pissutaasut ilagaat erlinnartuutinik ujaasinissamut ilinniarsimannginnerput,“ atuakkiaminni Secrets of Strong Families-imik (Ilaqutariit ingerlalluartunngornissaannut aqqutissat) taaguutilimmi taama nassuiaapput. „Saffiugassanik piiaaffinni sulisut aligoqqinnik [diamantinik] ujarlersut aligoqqinnik annikitsuinnannguanik ujarlernermut piffissartik tamaat ujaqqanik issumillu tonserpassuarnik oqimaassusilinnik misissuinermut atortarpaat. Uagut tamatuma akerlerluinnaanik iliukulavallaartarpugut. Aligoqqippassuit issumik ipermillu nassaarfiginiaannarlugit ilungersorluta misissortarpavut. Ilaqutariit ingerlalluartut aligoqqinnik nassaarniallaqqissuupput.“
Inuit tamarmik pissutsinik ajunngitsunik, nersornartunik, pigisaqarput. Pissutsit tamakku ajunngitsut ujaraanni aammattaaq nanineqarsinnaapput. Taamaalilluni angajoqqaat ’aligoqqinnik ujarlerfiginerisigut’ ataqqinissaannut pissutissat nassaarineqarsinnaapput.
Angajoqqaalli eqqortumik isumaqarfigilerumagaanni imminut eqqortumik isumaqarfigisariaqarpoq. Immini ajunngitsunik takusaqarsinnaanngikkaanni inuit allat pissusii ajunngitsut takujuminaattarput. Ukiuni hundredelinni siullerni kristumiunut apustili Paulus ima allappoq: ’Nungullusi oqarfigaassi immissinnik isumassaq qaangerlugu isumaqarfigeqqunasi, kisianni immissinnik annerunianngitsumik isumaqarfigeqqullusi.’ — Rûmamiut 12:3.
Naak pingaarniartuusussaanngikkaluarluni taamaattoq akerlia ingasaattariaqanngilaq, tassa ’imminut’ ingasattumik nikagisariaqanngilaq. Qanoq iliuutsikkut tamatigut peqqissaartumik Bibeli maleruarniarsarigaanni nammineq naliliisinnaassuseq tatigineqarluarsinnaavoq, ’Jehovap nalunaajaatai sallusuitsuummata, paasisakitsumik ilisimatuunngortitsisarmata’. (Tussiaat 19:8) Taama naliliisinnaanermik tatiginnikkaanni ataqqinninngitsuliornermik kinguneqartumik allanit puffatsitaanavianngilaq.
Oqalunnikkut ataqqinninneq
Angajoqqaat ataqqinninnermik ersersitsivigiumagaanni taakkununnga qanoq oqaatsillu qanoq ittut atorlugit oqaaseqartarneq eqqarsaatigisariaqarpoq. Suut tamarmik pissusissamissut ingerlagaangata tamanna ajornartorsiutaaneq ajorajuppoq. Ilaannikkulli angajoqqaat ajuallannartunik oqarsinnaasarput iliuuseqarsinnaasarlutilluunniit. Aammattaaq inuusuttuaraanermi misigissutsikkut patajanerup kingunerisaanik ajuallaqqajaanarlunilu imminut kamaateqqajaanartarpoq. Isumatsassimaneq, siooraneq aammalu ajorsartitaasimasutut imaluunniit sumiginnagaasutut misigisimaneq annertuumik artorsaatissiisinnaapput, Jobitut ima oqartutut qisuariartitsisinnaallutik: ’Taamaattumik oqaatsikka ajuallattorpallapput [isumaatsoorpallapput, NV].’ — Jûpe 6:1-3.
Isumaatsoorlunili oqaatsit ataqqinninngitsuliornerusinnaapput. „Ilaannikkut anaanaga ajornartorsiutinnik oqaloqatigigaangakku paasinngikkaanganga kamassuataalersarpunga, narrujuummisinniaannarlugulu oqaasipiluffigisarlugu. Taamatut uanga akiniaariaaseqarsimavunga,“ Roger 22-nik ukiulik taama nassuerpoq. „Kingornatigulli nuannaanngittaqaanga, nalunerlu ajorpara aammattaaq anaanaga nuannaanngitsoq.“
Rogerip paasilerpaa oqaatsini isumaatsut ’panap kapisinerisut’ narrujuumminartuusut, ajornartorsiutinillu sunilluunniit aaqqiissutaasinnaanngitsut. Bibelimilu oqaatigineqartoq ilisimavaa: ’Ilisimatuut oqaat katsorsaataapput.’ (ússatit 12:18; 15:1) „Sapernaraluartoq anaanaga uterfigaara utoqqatserfigalugulu,“ Roger oqaluttuarpoq. „Nalunngilara taamaaliorneq Jehovap isaani eqqortutuaasoq. Taava eqqissisimanerusumik ajornartorsiut oqaloqatigiissutigisinnaalerparput, aaqqillugulu.“ Aap, taamatut pisoqartillugu utoqqatsingaarnikkut ersersinneqassaaq angajoqqaanik ataqqinninnissamik unneqqarissumik kissaateqarneq.
Kannguttaatsumik oqalunneq kamannerup kingunerigajuttarmagu misigissutsip tamatuma aseruutaalluinnarsinnaasup nununissaa ilinniassallugu pingaaruteqartorujussuuvoq. ’Silaqanngitsup isumalunnini tamaat anittarpaa, ilisimatuulli kingumoortittarpaa [nunusarpaa, New International Version],’ ússatit 29:11-mi taama allassimasoqarpoq. Kamaleraangavit imminut eqqissisaqqaarallartarit; taava eqqissisimaniarsaralutit oqalugit. Ataqqinnittumilli oqalunnissamik ilinniarneq ataatsiminngaanniit qulit tungaannut kisitsinissamik ilinniarnermit nalunarneruvoq.
Siuneqarsutsip naleqassusia
’Inuk silaqarnerata kamajuitsunngortittarpaa [siuneqarsuseqarnerata kamannera unitsittarpaa, NV], nersornassavorlu pinerluffigineqarnini qaangiinnarsinnaagunigit,’ ússatit 19:11-mi taama allassimasoqarpoq. Bibelip allanneqaqqaataani oqaatsip hebræerisuup „siuneqarsuseq“-mik nutserneqarsinnaasup eqqarsaat manna imaraa: arlaannut „pissutaasumik ilisimanninneq“. Taamaattumik siuneqarsuseqaraanni isumaqatigiinnginneq piinnarnagu siamasinnerusumilli isiginiartariaqarpoq.
Assersuutigalugu, angajoqqaavit arlaannut aalajangersimasumukarnissannik itigartippatsit, taava ima imminut apereriarit: ’Ajutuunnginnissara pillugu itigartinnerpaannga? Taavunnaruma taavunnanngikkumalu suna assigiinngissutaava? Ajornartorsiutiga tassaanerpa naapertuilluanngitsumik ajuallatsitaasutut misiginera, pingaarniarnerma narrujuummisinneqarnera?’ Naak itigartitaanerit maannakkorpiaq nikallornaraluartoq, imaappa inuunerit tamarmi aserortoq? Eqqarsarluareerlutit qularnanngitsumik paasilissavat oqqavit naalakkersornissaanut akeqqinnikkullu pissutsit ajorsisiinnannginnissaannut pissutissaqarluartoq. — ússatit 10:19; 16:23.
Siuneqarsutsip paasinninneq allisittarpaa, tassami pissutsinik allat atugaannik tunuliaqutaannillu eqqarsaatiginninnissamut iluaqutaasarami. (ússatit 21:11) Assersuutigalugu, niviarsiaraq ima oqaluttuarpoq: ’Siornatigut ilaquttama ilaginissaat saperluinnarpara. Ataatamali anaanaa perululluni napparsimalermat piffissaq annertooq najortariaqartarparput. Aanama ataataga nukappiarannguatut oqaluuttarpaa, uangalu ataatama peqatittut isiginissaa eqqarsaatigisimanngisaannaraluarpara. Paasilerpara nukappiarannguatut oqaluunneqarneq ataatannut akueriuminaassimassaqisoq, uangalu taama namminissarsiortigisariaqanngikkaluarlunga. Maanna arlannik qinnuigigaanganga paamitsaappallaartarunnaarpara.’
Aammattaaq siuneqarsutsip paasitissavaatigut ’immitsinnut kamageqatigiissinnaanerput’ qanoq naleqartigisoq. Aap, naak naammagittaalliornissamut pissutissaqavissorigaluarluta kamageqatigiinnissatsinnut isumakkeerfigeqatigiinnissatsinnullu piumassuseqartariaqarpugut. (Kulorsamiut 3:13) Narrujuummisinneqarsimagaanni akiniaanissamik eqqarsarneq pissusissamisoorpoq. Unneqqarissumilli isumakkeerfiginninnikkut kamanneq ataqqinninngitsumik oqalunnermik imaluunniit iliornermik kinguneqartartoq pinngitsoorneqarsinnaavoq.
Ingammik angajoqqaanit perorsaatissinneqarnermi siuneqarsuseq atorfissaqartinneqartarpoq. Siuneqarsuseqaraanni unnersuunneqarnerup ilassinissaa aammalu taamaaliornerup iluaqutaanerpaanerata paasinissaa ajornannginnerussaaq. (Naleqqiuguk Tussiaat 2:10.) Toqqaannartumik oqaatigissagaanni ’sianiitsup ataatami perorsaaneri asiginnartarpai’. (ússatit 15:5) Taamaattumik unnersuunneqarnermi akerliliinermut isumalulernermulluunniit taarsiullugu unnersuummik malinninnikkut angajoqqaanik ataqqinninneq ersersittariaqarpoq.
Siuneqarsuseqartup angajoqqaani qanoq misigisimanersut aammattaaq eqqarsaatigissavaa ikiorniarlugillu. Angut inuusuttoq Joshimik atilik oqaluttuarpoq qanoq ilillutik qatanngunnilu anaanamik isummamigut qanoq issusia sianigisarsimallugu. „Ilaanni anaanaga qasusimaqaluni suliffimminit angerlarpoq,“ Josh oqaluttuarpoq. „Tamanna sungiusimavarput, taamaattumik angerlannginnerani uagut — tassa uanga qatanngutigalu — illumi ipertaajaareersimavugut. Tamanna anaanatta nuannaarutigeqaa.“ Illittaaq angajoqqaatit tamatumunnga assingusumik ataqqinninnermik ersersitsivigisarpigit?
Aammattaaq namminerisaminnik inuunerannik ataqqinninnikkut angajoqqaat ataqqinnittuliorfigineqarsinnaapput. Ilaannikkut kisimiilaarusuttarput. Immaqa pingaaruteqartumik oqaloqatigiissutissaqartarput kisimiillutik, illit najuuffiginngisannik, oqaloqatigiissutigerusutaminnik. Tamatumani pisinnaatitaaffiat ataqqiuk. Init arlaannut iseruit paasigukkulu angajoqqaatit pingaaruteqartumik oqallisigisaqartut taava illit nammineq ininnut uteruit imaluunniit ikinngutivit arlaannut pulaaruit pitsaanerussannginnerpa? Taamaalillutit ersersitsissaatit siuneqarsuseqarlutit.
Qanoq ilillutit angajoqqaannik ataqqinnittuliorfiginnissinnaanerit eqqumaffigiuaannaruk. Taamaalillutit taakkununnga attaveqarnerit amerlanertigut pitsanngorsartarsinnaassavat, taamaanngikkaluarpallu Guutip iluarisaanik iliorninnik ilisimanninnerit nuannaarutigisinnaassavat. Aap, angajoqqaatit ataqqikkit — ’nunami pilluaqqullutit inuummersoqqullutillu’. — Evfisumiut 6:3. (gD 22/4 88)
[Qupp. 25-mi assiliartaq]
Angajoqqaatit narrujuummissutigisannik oqaaseqarpata ataqqinninngippaluttumik oqaaseqarnaveersaarit