Inuusuttut aperipput

Anaanat inuusuttuaqqat qanoq ilillutik ingerlalluarsinnaappat?

LINDA ataatsikkut tupallunilu, sioorallunilu, kamallunilu, neriuutaaruttutullu misigilluni, isumatsaqalunilu tusakkaminik assortuivoq.a Misissortinnermini annilaangaginerpaasaminik tusarlerneqarpoq — qaammatit pingajussaani naartuvoq. Linda katinneqanngitsoq 15-iinnarnillu ukiulik USA-mi inuusuttuaqqat naartulersoortartut ukiumut 1 millioniusut ilaannaraat. Inuusuttuaqqalli naartulersoortarnerat nunarsuarmi tamarmi ajornartorsiutaavoq, naggueqatigiinni aningaasatigullu atugarisatigut assigiinngitsuni tamani.

Niviarsiaqqat inuusuttuaqqat ilaat eqqarsartarput naartulernerup angerlarsimaffimmit pilluaaffiusumit aniguisissagaatik imaluunniit ikinngutiminnut nukappissamut attaveqarnertik aalajaallisassagaa. Allat meeraq nuannaartoriinnarlugu imaluunniit namminneq pinnguariinnarlugu asasassamittut isigisarpaat. Takorluuinerilli taama ittut peertarput kisimiilluni anaanaaneq artornartoq nammineq misigileraanni. Anaanat katinneqanngitsut artornartunik annernartunillu pinngitsoornatik aalajangigassaqartarput. Aamma immaqa aningaasatigut, misigissutsikkut nanertisimanermik kiserliornermillu sorsugassaqartarput, kiisalu kisimiilluni meeqqamik perorsaaniarnermi artorsaatissaqartarlutik. Taamaattumik pissutissaqarluartumik Pinngortitsisutta kristumiut kajumissaarpai ’uersaaneq qimarratigeqqullugu’, ilaatigut katissimanani atoqatigiinneq. — 1 Korintumiut 6:18; Jesaja 48:17.

Kinguaassiuutitigut kanngunartuliorneq Jehovap nalunaajaasuisa akornanni akuersugaanngilaq. (1 Korintumiut 5:11-13) Taamaattorli ilaqarput anaananik inuusuttunik katissimanngitsunik. Taakkua ilaat Guuti ilikkanngikkallaramikku naartulersimapput. Allat kristumiutut perorsagaasimapput, kanngunartuliornermulli nakkartoorsimallutik. Taakkua ilaat eqqunngitsumik iliorsimanerminnik peqqissimissutiginnissimapput ilagiinnillu ilungersortumik oqaanneqarsimmallutik. Inuusuttunut taama ittunut Guutip oqaasiani sunik ikiuutissaqarlunilu unnersuussuteqarpa?b

Naartutitsisiga katissavara?

Biibilimi erseqqissumik oqaatigineqarpoq naartuersinneq Guutip inatsisaanik unioqqutitsinerusoq. (2 Moses 20:13; naleqqiuguk 2 Moses 21:22-24; Tussiaat 139:14-16.) Aamma oqaatigineqarpoq anaanaasup kisimiittup naartulernini kissaatigisarinngikkaluaruniulluunniit meeqqap isumassornissaanut akisussaaffeqartoq. (1 Timûtiuse 5:8) Amerlanertigut pitsaanerusarpoq niviarsiaqqap nammineq meeqqani perorsarpagu, meerarsianngortinnagu.c

Meeqqamik kisimiilluni perorsaanerup artornassusia eqqarsaatigalugu anaanaasut ilaat eqqarsartarput meeqqap ataataa katissallugu silatusaarnerussasoq. Inuusuttuaqqalli ataataasut ilarpassuisa meeqqaminnut anaanaanulluunniit pisussaaffiginninnermik misiginerat annikitsuararsuusarpoq. Aammalu inuusuttuaqqat ataataasut ilarpassui suli atuartuusarput suliffeqaratilluunniit. Taamaaliorneq, paasiniaasartup taasaa „meeqqap aappariinnerup avataani inunngunnginnissaa piinnarlugu aappariinneq nalorninartoq“, pissutsinik ajornerulersitsiinnarsinnaavoq. Aamma eqqaamasariaqarpoq Biibilimi kristumiut peqquneqarmata taamaallaat ’Naalakkami katinnissaannik’. (1 Korintumiut 7:39) Tamanna Lindap (aallaqqaataani eqqartorneqartup) paasivaa, aalajangerporlu meeqqap ataataa 18-inik ukiulik katinniarnagu. Linda nassuiaavoq: „Taanna Guutimik Biibilimilluunniit soqutigisaqanngilaq.“

Imaattariaqanngilaq inuusuttoq ataataasoq puiorneqarluinnassasoq. Immaqa meeqqap alliguni paaserusussavaa kina ataatagalugu. Imaassinnaavorluunniit inuusuttoq ataataasoq taassumaluunniit angajoqqaavi misigisut ileqqussatigut pisussaallutik meeqqap ilagisarnissaanut imaluunniit aningaasatigut tapersersuinissaminnut. Immaqali anaanaasup angajoqqaavisa kissaatiginerusinnaavaat angummut inuusuttumut attaveerutissasoq. (1 Tásalûníkamiut 4:3) Nunalli ilaanni ataataasut katinneqanngitsut katissimasutulli inatsisitigut pisinnaatitaaffeqartinneqarput. Ataataasumut katissimanngisamut ilaqutaanullu ajunngitsumik attaveqaannaraanni immaqa angajoqqaajussutsimik akerleriissuteqarneq nuanniitsoq pinngitsoorneqarsinnaassaaq.d Anaanaasoq ataataasumut killilimmik attaveqartariaqaruni eqqaamasariaqarpaa ileqqussatigut nakkarsarumanani misigissutsikkut kissalaarfigilernaveersaarnissaa. Inersimasunik inersimalluartunik peqateqartarnissaa nalinginnaasumik siunnersuutiginarpoq.

Ikiortissarsiorit

Atuakkami Surviving Teen Pregnancy-mi ima allassimasoqarpoq: „Meeqqap tigummiinnarnissaa perorsarnissaalu aalajangiukkukku tamanna ilutigalugu inersimasut akornanniilernissat qinerpat. . . . Inuunerpit ilaata eqqasuutissartakinnerusup, pisussaaffittakinnerusup akisussaaffittakinnerusullu qimannissaa qinerpat.“ Taamaattumik inuusuttuaraq anaanaasoq ikiorneqarnissamik tapersersorneqarnissamillu pisariaqartitsivoq. Anaanaasup inuusuttup ernumasup iluaqutigissavaa meeqqanik paaqqutarinninnermut tunngasunik atuassalluni (immaqa atuakkanik atorniartarfimmit atorluni), suliassaminut sapiukkunnaarniassagami.

Angajoqqaat tapersersuinerat pingaarutilerujussuuvoq. Immaqa niviarsiaqqap anaanaa meeqqanik perorsaanermik misilittagartuujuvoq. Ikioqqunissarli ajornaatsuinnaanngilaq. Immaqa niviarsiaqqap angajoqqaavi suli aliasullutillu kamapput. Immaqa panimmik naartunerata ulluinnarni inuunerminnut ajortumik sunniuteqarnissaa sioorassutigaat. „Angajoqqaakka kamaqaat, iliuusererusutaraluatimmi amerlaqimmata,“ Donna 17-inik ukiulik oqaluttuarpoq. „Oqartarput meerartaarnera pissutigalugu nikeriarsinnaajunnaarlutik.“ Piffissap ingerlanerani angajoqqaat amerlanerit aliasunnertik qaangeriartuaartarpaat sapinngisaminnillu ikiuunnialersarlutik. Anaanaasup inuusuttup angajoqqaaminik aliasuutissiisimanerminik aliasuutiginninnini ilumoorluni oqaluttuarippagu qularnanngitsumik pissutsit sukanganartut qasukkassapput. — Naleqqiuguk Lúkarse 15:21.

Taavami niviarsiaqqap angajoqqaavi ikiuerusunngippata imaluunniit niviarsiaqqap imminniiginnarnissaanut akissaqanngippata? Nunani pisortanit ikiorsiiffigitiffiusinnaasuni anaanaasup katissimanngitsup aallaqqaammut ikiorserneqarnissani allatut ajornartumik qinertariaqarsinnaavaa, tamannalu Biibili naapertorlugu akornutissaqanngilaq. Imaassinnaavorli sipaarniaqqissaartariaqassasoq. „Aningaasat naammattusaarnissaat ajornartorsiutima annersaraat. Taamaallaat nerisassanut nanginullu naammapput,“ Sharon 17-inik ukiulik oqarpoq. Piffissap ingerlanerani immaqa anaanaasoq suliffittaassaaq. Anaanatut pisussaaffiit, suliffiup anersaakkullu suliniutit oqimaaqatigiissaarnissaat ajornakusoorsinnaavoq, ilaalli iluatsitsisarput.

Ilisimassuseqarlutillu naliliisinnaassuseqarit

Angajoqqaat isumaqataappata nangartarteerulluni piuataalernissamut taarsiullugu angerlarsimaffimmi najugaqaannarneq iluaqutaasinnaasorujussuuvoq. Angerlarsimaffimmi najugaqaannarneq amerlanertigut akikinnerusarpoq. Aammalu avatangiisit sungiusimasat toqqissinermik misigiffiusinnaapput. Anaanaq inuusuttoq angajoqqaamini najugaqaannaruni immaqa atuarnerminik ingerlatsiinnarnissaa ajornannginnerussaaq. Niviarsiaraq nammineersinnaalernissaminut periarfissaqarnerussaaq pinngitsoorani atuarfiusussat tamaasa naammassigunigit.e

Soorunami kinguaariit pingasut ineqatigiinnerat artornarsinnaavoq. Immaqa anaanaasup kisimiittup inissakilliorneq naammagiinnartariaqassavaa. Aamma immaqa angajoqqaat qatanngutaasullu unnuakkut meeraaqqap qianeranit itertinneqartarneq sungiunniartariaqassavaat. Immaqalu ilaqutariit ulluinnarni ingerlaasiat allanngortinneqartariaqassaaq. Kisianni soorlu Ussatit 24:3-mi ima allassimasoq: „Ilisimassut atorlugu illu sananeqartarpoq, siuneqarneq atorlugu tunngavilerneqartarpoq.“ Aap, attorneqartut tamarmik asanninnermik namminissarsiunngitsumik allanillu isumassuinermik ersersitsippata ilaqutariinni aporaannersuaqarnissaralua pinngitsoortinneqarsinnaassaaq.

Anaanaasup inuusuttup nammineq akisussaaffini iperarniarsarippagu suullu tamarmik anaanaminit suliarineqarnissaat naatsorsuutigilerpagu ajornartorsiuteqalissaaq. (Naleqqiuguk Galâsiamiut 6:5.) Imaassinnaavorluunniit aanaasup ajunngitsumik isumaqarluni ernuttaminik paaqqutarinninneq tigulluinnaraa. Atuakkami Facing Teenage Pregnancy-mi ima allassimasoqarpoq: „Aataakkuusut panimmik katissimanngitsup meeraanik meeqqamissut perorsaappata ilaqutariinni akerleriinnerit annertusisinnaapput paatsiveerutitsilerlutillu meeqqap kikkorpiaat angajoqqaarigai.“ Aataakkuusut ikiuinerat tapersersuinerallu qujamasuutissarujussuuvoq, angajoqqaalli eqqaamasariaqarpaat Biibili naapertorlugu namminneq meeqqaminnik perorsaanissaminnik akisussaaffeqaramik. (Evfisumiut 6:1, 4) Ammasumik oqaloqatigiittarneq suleqataajumassuserlu paatsooqatigiinnermik pinngitsoortitsisinnaapput. — Ussatit 15:22.

Kisimiinngilatit

Naak aappariinnerup avataani meerartaarneq ajornartorsiutinik nassataqartaraluartoq taamaattoq neriuutaarulluinnarfiunngilaq. Kukkuluttornerminnik peqqissimissutiginnittunut Guuti ’isumakkeerfiginnittuartarpoq’. (Jesaja 55:7) Anaanaasup kisimiittup tamanna eqqarsaatigisaruniuk immaqa imminut qatsuffimmini iluaqutigisinnaavaa. Nikallungagaangami Jehova annertoqqutigisarsinnaavaa qinunikkullu saaffigisarsinnaallugu. Aamma meeqqami perorsarnissaanut ikioqqulluni Guuti qinnuigisinnaavaa. — Naleqqiuguk Eqqartuussisunik allakkat 13:8.

Aamma ilagiit kristumiut aqqutigalugit Jehova ikiuisarpoq. Naak Jehovap Nalunaajaasui kanngunartuliornermut akuersaartuunngikkaluarlutik isumataartunik Guutillu iluarisaanik iliorlutik allatut inooriaaseqalersunik isumassuisarput. (Rûmamiut 15:7; Kulorsamiut 1:10) Ilagiinniittut ilaat immaqa ataataasumut anaanaasumulluunniit kisimiittumut pissuserissumik arlaatigut ikiuuteqarsinnaapput. (Naleqqiuguk Mosesimik allakkat tallimaat 24:17-20; Jâko 1:27.) Qaqugukkulluunniit ikinngutaalersinnaapput ajunngitsut pisariaqarpallu tusarnaarumasut. (Ussatit 17:17) Naak meeqqap angajoqqaavi ilungersornartumik ajortuliorsimagaluartut meeraq pisuussuteqanngilaq. Taamaattumik anaanaasoq kisimiittoq isummamik eqqortumik ersersitsippat ilagiit akuliussinnaapput.

Guutip inatsisaanik unioqqutitsinngilluaannaraanni oqinnerujussuusimassagaluarpoq. Aqqummilli eqqunngitsumik qimatsisut isumataartullu qularinngissinnaavaat pissutsit atukkatik pitsaanerpaamik atorsinnaaqqullugit Jehovamit ikiorneqarnissartik. (gD 8/10 94)

[Quppernerup ataani ilanngussat]