Inuusuttut aperipput:

Ikinngutima ilaat ajornartorsiulerpat qanoq iliussaanga?

Sherrie 14-inik ukiulik ima oqarpoq: „Ikinngutiginerpaasara kristumiuujunnaarmat aliasoqaanga. Sapinngisara tamaat ikiorniarsimagaluarpara.“a

IKINNGUTIVIT ilaat ajornartorsiulersimava imaluunniit navianartukkut ingerlalersimava? „Chris qanittuararsuarmik attaveqarfigisimavara,“ Johnny oqarpoq. „Ikinngutigiittorujussuusimavugut. Ullulli ilaanni angerlarsimaffimminnit qimaavoq. Uissuummisorujussuuvunga misigalungalu ujartariaqarlugu. Unnuaq tamaat biilimik ujarpara.“

Biibilimi mianersoqqussutigineqarpoq inuusuttut utoqqaallu assigiimmik ullussani kingullerni annertuumik tatineqarumaartut. (2 Timûtiuse 3:1-5) Taamaattumik kristumiut inuusuttut ilaannikkooriarlutik nakkartoortassappata tupaallaatigisariaqanngilarput. Asasamilli taamaalisoqaraangat misigissutsikkut assigiinngitsunik misigiffiusarpoq, aliasulluni, misiginneqataalluni imaluunniit kamalluni. Ikinngut ikiorusunnartaraluarpoq, qanorli ililluni?

’Annaassinnaavara’

Biibilimi allassimavoq: ’Ajortuliortumik ingerlavigisaanit tammarfianit utertitsisoq tarnimik toqumit annatsitsisuuvoq ajorterpassuillu matoorlugit.’ (Jâko 5:20) Imaappali taamaaliornissat illit akisussaaffigigit? Taamaattariaqanngilaq. Ikinngutivit angajoqqaavi pingaarnerpaamik akisussaaffeqarput. (Evfisumiut 6:4) Biibilimi Galâsiamiunut agdlagkat 6:1-imi aamma ima allassimavoq: ’Qatanngutikka, inuk misiginngitsoorluni pinerlukkaluarpat taava ilissi anersaamut atasusi iluarsisinniarsiuk anersaamik qanilaartumik.’ Ilagiinni nakkutilliisut taamatut ikiuinissamut piukkunnaateqarnerpaapput, ikiuinissamullu ilinnit piginnaaneqarnerullutik.

Nassuerutigisariaqarpat inuusuttuutilluni misilittakkat killeqartarmata. (Naleqqiuguk Eprîarinut agdlagkat 5:14.) Taamaattumik piginnaanivit killeqarnerat maniguullutit nassuerutiginiaruk sapinngisallu qaangerlugu iliorniarsareqinak. (Ussatit 11:2) Assersuutigalugu, inusuttunnguup Rebekahmik atillip ikinngutini qanigisani ikiaroornartutortalersimasoq ikiorniarsarisimagaluarpaa. Rebekah oqaluttuarpoq: „Angajoqqaaminut oqaluttuarnani uannut oqaluttuarnera uannut nammakkersuutaasorujussuuvoq. Ikiorniarsarigaluarpara, nukillalaarnartorujussuuvorli. Qanoq ilioriarsinnaannginnera paasigakku aatsaat oqiliallappunga . . . Paasivara annaannissaa uanga pisussaaffiginagu.“ Taamaattumik Rebekahp kajumissaarpaa inersimasunut piginnaaneqarnerusunut saaffiginneqqullugu.

Matthew inuusuttoq tamatumunnga assingusumik nalaataqarsimavoq, taassumali piginnaanermi killeqarnera aallaqqaataanilli paasisimavaa. Ikinngutini ajornartorsiulersimasoq pillugu Matthew oqarpoq: „Uannut orniguppoq ajornartorsiutiminillu oqaluttuullunga, oqarfigaarali angajoqqaani saaffigissagai. Nalunngilluinnarparami taassuma ajornartorsiutai uanga nammakkiussinnaanagit.“

Qanoq ikiuisinnaasutit

Imaanngilarli qanorluunniit ikiuisinnaanngilluinnartutit. Pissutsit qanoq innerat apeqqutaasorujussuuvoq. Immaqa ikinngutivit ilinnut oqaluttuarnissani kissaatigaa. Soorunami ikiorusuppat tusarnaarusullugulu. (Ussatit 18:24; 21:13) Immaqaluunniit navianartukkut ingerlalersimavoq. Pissusissamisuussaaq oqarfigissallugu soorunami nuannarigit, kisianni maannakkorpiaq iliuusii nuannarinngikkitit.

Ikingutimmi annertuumik unioqqutitsisimappat? Immaqa allanut oqaqqunak neriorsuisinniarsarigaluarpaatit. Biibilimili ima allassimavoq: ’Alla ajortuliaasigut peqatigeqinagu; minguitsuujuarniarit.’ (1 Timûtiuse 5:22) Ikinngutit napparsimasorujussuuppat nakorsamillu ikiorneqartariaqarluni, nakorsiarnissaa piumasarissannginnerpiuk? Annertuumillu kukkuluttorsimaguni taamatuttaaq anersaakkut ikiorneqarnissani pisariaqartitsigaa. Isertuukkukku anersaakkut toqussaaq, tamannalu ilagiinnut sunniuteqarnerlussaaq. Taamaattumik ilagiinni utoqqaanertat tamatuminnga ilisimatinnissaannut pisussaavutit. — Naleqqiuguk Mosesimik allakkat pingajui 5:1.

Caroline, ikinngutiminut isumaatsuliortumut angajoqqaaminut salluliortumut atatillugu sapiissusermik ersersitsisimasoq, ima oqarpoq: „Utoqqaanertanut saaffiginninnissaanut sapaatit-akunnerinik marlunnik piffissalerpara. Oqarfigaara nammineq saaffiginninngippat uanga saaffiginnissallunga. Taamatut oqarnissara uannut sapernartorujussuuvoq.“ Johnny siusinnerusukkut eqqaaneqareersoq pissutsikkut aalajaassutsimik tamatumunnga assingusumik aamma ersersitsisimavoq. Taanna ikinngutini pillugu ima oqarpoq: „Tupaallaqaanga paasigakku niviarsissamik ineqateqartoq. Aamma takuakka nukappissat allat pulaartut pujortaallutillu ernguttut.“ Johnnyp ikinngunni anillalaaqqoriarlugu sakkortunerpaamik siunnersorpaa ilagiinni utoqqaanertanut ikiortissarsiussasoq.

Immaqa iliuuseqarnerit ikinngutivit nuannaarutigissavaa — immaqaluunniit naamik. Biibilimi oqaluttuarineqarpoq Josefip inuusuttup qatanngutimi angutit iliuusii kukkusut pillugit ’tusakkaminik ajortunik tamanik ataatani oqaluttuuttarsimagaa’. Taamaaliorami soorunami qatanngutiminit iluarineqanngeqaaq. Oqaluttuarineqarpoq ’uumissuleraat’. — 1 Moses 37:2-4.

Pinngitsuusaaginnassaanga?

Susoqarsimanngitsutut ikinngutit ilagiuaannarukku ikiorniarlugu nammineq ilungersuutitit assortortutut issavatit. Paulusip kristumiut unioqqutitsisunik ilaqartarnissaannik mianersoqqusimavai. Taama ittunik qanimut ikinnguteqaruit ajortup tungaanut saakkiartuinnartissavaatsit. — 1 Korintumiut 15:33.

Niviarsiannguup inuusuttup Molliep nuanniitsoq tamanna misigisimavaa ikinngutini Sally isertorluni nukappiaqqamik peeraqalermat. Sally katinnissaminut inuusuppallaaginnarani aamma nukappiaqqanik kristumiuunngitsunik peeralersorpoq. Mollie pinngitsuusaaginnarpoq Sallylu ilagiuaannarlugu. Tamanna qanoq kinguneqarpa? Mollie oqaluttuarpoq: „Naggataatigut Sallyp nukappiaqqamik silamiumik naapeqateqarnissara aaqqissorpaa, illoqarfimmukaqatigiippugullu.“ Qujanartumilli suli ajornerusumik pisoqanngitsoq Mollie ilagiinni utoqqaanertanit ikiorneqarpoq.

Aamma Lynn imminut ulorianartorsiortissimavoq niviarsiaraq Bethimik atilik ikinngutiginiarsariinnaramiuk. „Isumaqarsimagaluarpunga annaassinnaassallugu,“ Lynn oqaluttuarpoq, „iluatsinngilarli. Imerniartarfiliaqatigaara. Nalunngikkaluarpara tamanna eqqunngitsuliornerusoq, ikinngutimali ajortumik pinissaa annilaanngatigigakku. Taassuma ajornartorsiutai artorsaatigilerpakka. Allanut oqaatiginngilara, neriullunga ajornartorsiut nammineq iluarsiumaartoq, anneruliinnarporli.“ Alianartorujussuarmik pisoqarmat Lynnip annaassiniaraluarnera maangaannarpoq. Ikinngutaa Beth angummit inuusuttumit peeqqaminit inuartarineqarpoq.

Immaqa ikinngummut ilumoorneq nersortarialittut isumaqarfiginarsinnaagaluarpoq. Qanorli iliussagaluarpit ikinngutit immami sarfartorujussuarmi ipeqqajaappat? Annaanniarlugu pissiffigissagaluarpiuk? Taamaalioruit marluullusi ajunaassaasi. Silatusaarnerussaaq annanniummik nalussivigigukku. Taamatuttaaq ’ungasikannianit’ pisariaqartumik ikiuiniartariaqarputit. — Jûtarse 22, 23.

Ikinngutit ilagiinnit anisitaasimappat illit taassumunnga qanillattuinnginnissat pisariaqartorujussuuvoq. Biibilimi peqqussutigineqarpoq taamaattut ’ilagisassanngikkivut’. (1 Korintumiut 5:11) Naak ikinngutit qanoq ingerlanersoq suli paaserusukkaluarlugu pitsaanerpaamik ikiorsinnaassavat Jehovamut ilumoornikkut ikinngutivillu inooriaasiatigut malinnginneratigut. (Tussiaat 18:26) Imaassinnaavoq aalajangersimalluinnarnerit ikinngutivit inuunerminik nalileeqqinnissaminut iluaqutigigaa. Sulilu pingaarnerusumik, ilumoornerit Jehovamut nuannaarutaassaaq. — Ussatit 27:11.

Oqimaappallaaqaaq

Ikiuiniarnerigaluit amerlasuutigut iluatsinngitsoortarput. Rebekah ikinngutini pillugu ima eqqaamasaqarpoq: „Ikiorniarsarigaluarpara. Allaat allaffigaara, akineqanngisaannarpungali.“ Carolinep ikinngutini ’innermik pinnguartoq’ qaammaterpassuarni ikiorniarsarisimagaluarpaa, naggataatigulli ’nammakkersorneqarpallaartutut’ misigilersimalluni.

Pingaartorujussuuvoq paasissallugu tamatta immikkut ’Guutimut nassuersussaajumaaratta’. (Rûmamiut 14:12) Naak arlaatigut iliuuseqarnikkut allat nammagaannik, imaluunniit inuttut ajornartorsiutaannik, ikiuineq pissusissamisooraluartoq taamaattoq allap ’akisussaaffik nammagassaa’, tassa Guutimut akisussaaffia, allap nammassinnaanngilaa. „Kialuunniimmi akisussaaffik nammagassani nammineq nammattussaavaa,“ Biibilimi allassimavoq. (Galâsiamiut 6:5, NV) Ikinngutivit aalajangerneri illit akisussaaffiginngilatit.

Taamaakkaluartorli ikinngut inuunerminik aseruisoq takullugu alianartorujussuuvoq. Angut inuusuttoq Mikemik atilik ikinngutiminik annaasaqarnini pillugu ima oqarpoq: „Aliasuutigisorujussuuara. Mark angajoqqaavilu qanittuararsuarmik attaveqarfigisimavakka. Misigaanga nuannaarutissaarullunga.“

Taamatut annaasaqarnermik aliasuutiginninneq pissusissamisuuginnarpoq. Misigissutsitit tatigisannut ilinnillu ikiuisinnaasumut oqaloqatigiissutigikkit. (Ussatit 12:25) „Angajoqqaannit ikiorneqarlunga qaangerpara,“ Rebekah oqarpoq. Aamma uummammiutit Jehova Guutimut qinunikkut aniatissinnaavatit. (Tussiaat 62:9) Carolinep suut tamaasa pitsammik ataatsimut eqikkarpai ima oqarluni: „Jehovamut qinusarneq allanullu oqaluussisarneq uannut iluaqutaasorujussuupput. Aamma ilagiinniittunut allanut, ingammik qatanngutinut arnanut utoqqarnut, qanittuararsuanngorsimavunga. Kiisami paasisimavara tamatta immikkut iliuutsitsinnut akisussaasugut uangalu nammineq inuunera ingerlateqqittariaqariga.“ Carolinetut iliornikkut imminut ikiorsinnaavutit — immaqa aamma ikinngutit isumaatsuliortoq ikiorsinnaassavat. (gE 22/1 96)

[Quppernerup ataani ilanngussaq]

[Qupp. 17-mi assiliartaq]

Ikinngutit ikiortissarsiornissaanik kajumissaaruk