Arnat qanoq siunissaqarpat?

INUIAAT oqaluttuarisaanerat angutip arnamik ajoqusiineranik naqisimanninneranillu oqaluttuanik ulikkaarpoq.“ Arnanik immikkoortitsinermut akerliuniarluni ukiut 150-it matuma siorna Seneca Fallsimi New Yorkimiittumi nalunaarummi taamatut allassimasoqarpoq.

Tamatuma kingorna siumukarneqangaatsiarsimavoq, FN-illi atuagassialiaani The World’s Women 1995-imi oqaatigineqartutut suli angunngisat amerlaqaat: „Arnat angutillu silarsuaat amerlavallaartutigut assigiinngitsorujussuupput, ilinniagaqarnikkut suliffissaqarnikkullu, peqqissutsikkut, inuttut isumannaassutsikkut sulinngiffeqartarnikkullu.“

Tamatuminnga paasinnikkaluttuinnarneq pissutigalugu nunat ilaanni inatsisiliortoqarsimavoq arnat pisinnaatitaaffiinik illersuisunik. Inatsisilli inuit isiginnittaasiinik allanngortitsisinnaanngillat, inuillu isiginnittaasii naapertuilluanngissutsimut paqumisunnermullu aallaaviupput. Assersuutigalugu, niviarsiaqqat atortittartut inuuniarnermi atugarisaat eqqarsaatigeriakkit. Nunarsuaq tamakkerlugu kanngunartoq tamanna pillugu Newsweek-imi ima allassimasoqarpoq: „Inatsisiliorneq meeqqat kinguaassiuutitigut atornerlunneqartarnerannik unitsitsinissamik siunertaqartoq siunertaagaluarpoq pitsaasoq, amerlasuutigulli kinguneqarneq ajorpoq.“ Inatsisillu imminni pinerlunniartarnermik pinaveersimatitsisinnaanngillat. „Nalunanngitsumik arnanut nakuusertarneq nunarsuaq tamakkerlugu ajornartorsiutaavoq,“ Human Development Report 1995-imi allassimavoq. „Inatsisit amerlanersaasa nakuuserneq tamanna unitsissinnaanngilaat — ullumikkut kulturikkut inuiaqatigiinnilu najoqqutarisat allanngunngippata.“ — Uagut naqinnerit uingasunngortippavut.

„Kulturikkut inuiaqatigiinnilu najoqqutarisat“ ileqqutoqqanik sorlanilluinnarsimasunik peeruminaalluinnartunik tunngaveqarajupput. „Ileqqutoqqat angutit isumaqalersittarpaat nuliatik asanagit ajortumik pisarunikkik, isumassornagit atornerluttarunnikkik ajunngitsoq,“ arnaq Kangia Qiterlermeersoq oqarpoq. „Taamaattumik arnaq aalajangeeqataasinnaatitaanngilaq, pisinnaatitaaffeqarani pissutsinillu atukkaminik pitsanngorsaanissaminut periarfissaqarpiarani.“

Uiusunik ataataasunillu ilinniartitsineq

Beijingimi Kinamiittumi 1995-imi arnat ataatsimeersuarneranni iliuusissatut pilersaarutitut siunnersuummi nalunaarutigineqarpoq „silarsuaq eqqissinartoq, naapertuilluartoq inunnillu qajassuussisoq“ arnanik ataqqinniffiusoq aatsaat anguneqarsinnaasoq „kikkut tamarmik isumaqatigiillutik pilertortumillu iliuuseqarpata“.

Arnat inuunerat ’eqqissinartunngortinniarlugu, naapertuilluartunngortinniarlugu inunnillu qajassuussisunngortinniarlugu’ iliuusissatut pilersaarut tamanna sunniuteqassappat uiusut ataataasullu ilaquttamik iluanni malerualertariaqarpaat. Jehovap nalunaajaasuisa qularinngilluinnarpaat tamatumunnga atatillugu Biibilimik ilinniartitsineq ajunngitsumik kinguneqassasoq. Takusareersimavaat uiusut Guutip imminnut piumasaqaataanik ilinnialeraangamik nuliaminnik panimminnillu ataqqinnilerlutillu isumassuilersartut.

Pedro, uiusoq sisamanik meeralik Afrikap qeqqaneersoq, nuliami pisariaqartitaanik ullumikkut eqqumaffiginninnerulersimavoq. Nuliani meeqqanik paaqqinninnerani allaallu pulaartoqaraangamik inoroorsaarnerani ikiortarpaa. Taamatut uiusup isumassuisarnera nunami najugarisaani nalinginnaanngikkaluarpoq. Sunaana pissutigalugu nuliani pingaartilerlugulu suleqatigilersimagaa?

„Biibili atuartalerakku uiusup pisussaaffiinut atatillugu najoqqutassiat marluk pingaartut ilikkarpakka,“ Pedro oqaluttuarpoq. „Nuliannut pissuseqarfiginninninnut assut sunniuteqarsimapput. Najoqqutassiaq siulleq, Pîtrusip agdlagai sujugdlît 3:7-imi nassaassaasoq, tassaavoq uiusup nuliani ataqqisariaqaraa ’pisattatut qajannarnerusut iliorfigalugu’. Aappaa, Evfisumiunut agdlagkat 5:28, 29-miittoq, tassaavoq uiusup nuliani ’timimisut’ iliorfigisariaqaraa. Siunnersuutit tamakku malerualerakkit immitsinnut qanittuararsuanngorsimavugut. Uagut angutit Guutip unnersuussutai najukkatsinni ileqquusunit pingaarnerutittariaqarpavut.“

Michael Afrikap kitaaneersoq nassuerpoq Jehovap nalunaajaasui ilagalugit Biibilimik atuaqqissaartalinngikkallarami nuliani iluanngitsumik pisarsimallugu. „Kamaleraangama allaat unatartarsimavara,“ Michael oqaluttuarpoq. „Biibililli paasitippaanga pissusera allanngortittariaqariga. Maannakkut ilungersorlunga kamannaveersaartarpunga nuliaralu timittulli asaniartarlugu. Marluullutalu pilluarnerujussuanngorsimavugut.“ (Kulorsamiut 3:9, 10, 19) Nuliata, Comfortip, ilalerpaa: „Maannakkut Michaelip nunatsinni ileqquusumit annermik ataqqillungalu tunniusimaffigaanga. Ajornartorsiutit oqaloqatigiissutigisarpavut suleqatigiittarlutalu.“

Pedrop Michaelillu tamarmik immikkut nuliaminnik ataqqinninnissartik asanninnissartillu ilikkarsimavaat Guutip oqaasiani, arnanik immikkoortitsinermik Pinngortitsisup iluarinninngilluinnarneranik erseqqissaasumi, ilitsersuussutit malerualeramikkik.

Guutip arnanik isumassuinera

Guuti arnanik isumassuiuaannarsimavoq inuulluarnissaannillu soqutiginnittuaannarsimalluni. Guutip siuaasavut siulliit oqarfigisimavai pikitsitsinermikkut naammalluinnanngitsunngornerat kinguneqarumaartoq angutit nuliaminnut ’naalagaalernerannik’, naak tamanna aallaqqaammulli siunertarinngikkaluarlugu. (1 Moses 3:16) Eva pinngortissimavaa Adamimut ’tulluartunngorlugu’, ikinngutissaatut. (1 Moses 2:18) Mosesip inatsisaani itsaq Israelikkunnut atuuttuni ersersinneqarpoq uillarnernik ajortumik pinninneq Jehovap iluarinngikkaa, Israelikkullu peqquneqarput uillarnernik ikiuisaqqullugit inussiarnisaarfiginnittaqqullugillu. — 2 Moses 22:22; 5 Moses 14:28, 29; 24:17-22.

Jesusip, Ataataminik qilammiusumik malinnittup, nalimini ileqqutoqqat arnanik nikaginnittut malissimanngilai. Arnanut inussiarnersumik oqaluttarsimavoq — allaat tusaamanerlugaasunut. (Lúkarse 7:44-50) Aammattaaq arnat peqqiilliortut ikiortarsimavai. (Lúkarse 8:43-48) Ilaannilu uillarneq ernituaminik toqusoorluni aliasuttoq takugamiuk ilisiartortut ornikkasuarsimavai angullu inuusuttoq toqumit uummartillugu. — Lúkarse 7:11-15.

Jesusip ajoqersugaasa ilaat arnaasimapput, taakkualu ilaat toqumit makititaaneranik takunnittunut siullernut ilaapput. Arnat soorlu Lydia, Dorkas Priskalu inoroorsaarnikkut, misiginneqataanikkut sapiissutsikkullu maligassaalluartutut Biibilimi eqqartorneqarput. (apustilit suliait 9:36-41; 16:14, 15; Rûmamiut 16:3, 4) Kristumiut siulliit arnanik ataqqinninnermik ilinniartinneqarsimapput. Apustili Paulusip ajoqersuiartoqatini Timoteus oqarfigisimavaa ’arnat utoqqaat anaanatut arnallu inuusuttut qatanngutitut tamatigut minguilluni’ iliorfigisassagai. — 1 Timûtiuse 5:2.

Arnat ataqqinnittumik pineqartut

Ullumikkuttaaq angut kristumiu arnanut ataqqinnittuusariaqarpoq. Ileqqutoqqat arnanik nikaginnittut arnanut ajortumik pinninnissaminut patsisiginianngisaannassavai. Arnanut ataqqinnittumik pinera allaat upperneranut takussutissaalluassaaq. (Matîuse 5:16) Salima, arnaq Afrikameersoq, oqaluttuarpoq kristumiunut najoqqutassiat iliuutsikkut ersersinneqartut qanoq ililluni iluaqutigisimagini.

„Peroriartorfinni arnat niviarsiaqqallu ajortorujussuarmik pineqartarput. Anaanaga ullormut nalunaaquttap-akunnerini 16-ini sulisarpoq, arlaalli naammassineqanngitsoorsimagaangat isornartorsiortinnersuaq kisiat pissarisarpaa. Sulili ajorneruvoq ataatama imerpallaarsimariarluni anaanannik unataasarnera. Arnat allat nunaqqatigisavut aamma taama pineqartarput. Nalunngilarali taama pinninneq kukkunerusoq takusinnaavaralu inuunerput ernumanermik aliasuutinillu ulikkaaraa. Naluarali qanoq ililluni pissutsit allanngortinneqarsinnaanersut.

Inuusuttuaranngorama Jehovap Nalunaajaasui ilagalugit Biibilimik atuartalerpunga. Arnat ataqqinnittumik pineqartarnissaat pillugu apustilip Peterip allagai assut maluginiarpakka. Imali eqqarsarpunga: ’Maani arnanik isiginnittaasitoqaq eqqarsaatigalugu ilimanarpallaanngilaq unnersuussutip tamatuma malinneqarnissaa.’

Naalagaaffilersaartarfimmulli, Jehovap nalunaajaasuisa ataatsimiittarfiannut, ornigukkama angutinit arnanillu inussiarnersumik pineqarpunga. Tupaallannarneruvorli paasillugu angutit nuliaminnik piviusumik isumassuisuusut. Ilagiit ilikkarnerujartortillugit paasiartulerpara Jehovap nalunaajaasuisa tamarmik allanik asannittumik pinnittarnissaat naatsorsuutigineqartoq. Allaat angutit ilaat uattulli tunuliaqutaraluarlutik arnanik ataqqinnittumik pinnittarput. Ilaqutariissuarnut taakkununnga ilanngukkusulerpunga.“

Aaqqiissutissaq ataavartoq

Arnanik ataqqinninneq Salimap Jehovap nalunaajaasuisa akornanni malugisimasaa nammineq pilersuunngilaq. Biibilimik ilinniartitsinerup, inuit Guutip imminnut naligititaatut ittumik inoqatiminnik naleqartitsilernerannik nassataqartup, kinguneraa. Tamatuma paasitikannerpaatigut ullumikkut suut anguneqarsinnaasut, Guutillu naalagaaffia nunarsuarmut tamarmut naalakkersuilerpat suut anguneqarumaartut. (Daniel 2:44; Matîuse 6:10) Guutip naalagaaffiata qilammiittup naapertuilluanngissuseq tamaat piissavaa. Biibilimi ima neriorsoqqissaarneqarpugut: „[Jehova], peqqussutitit nunami atuukkaangata taava inuit najugaanni nunallit iluartuliornissaq ilikkartarpaat.“ — Jesaja 26:9.

Ullumikkut inuit millionilikkuutaat naapertuilluassutsimik ilinniartinneqaramik eqqarsariaatsiminnik allannguisimapput. Pinngortitat uumassusillit tamarmik Guutip naalagaaffianut naalatsigititaappata ilinniartitsineq tamanna nunarsuarmi tamarmi ingerlaannassaaq angutillu arnanik naqisimanninnerat — Adamip ajortuliornerata kingunerisaa — atorunnaarsissallugu. Jesus Kristusip, Guutip Kunnginngortitaata, akuerinavianngilaa arnanik immikkoortitsinerup naalakkersuinermini nunarsuarmi pissutsinik aseruinissaa. Kristusip naalakkersuinera pillugu Biibilimi ima allassimasoqarpoq: „Annaatissavai piitsoq ikioqqulluni suaartartoq, annikilliortitarlu ikiortissaaleqisoq. Nallittussavai sanngiitsoq piitsorlu, ajorsartut inuunerat annaatissavaa. Akiliullugit iperagaatissavai qunutitaanermit persuaalliorfigineqarnermillu.“ — Tussiaat 72:12-14.

Allaaserisani tulleriinni makkunani ingammik ajornartorsiutit arnat akiortariaqagaat sammineqarput. Aammali anguterpassuit ajortumik pineqartarsimapput. Oqaluttuarisaanerup ingerlanerani angutit pissaanilissuit ajortullu angutinik arnanillu naakkittaaqisumik pinerliisarsimapput. Aammattaaq arnaqarpoq taamatut iliortarsimasunik. Assersuutigalugu Biibilimi eqqaaneqarput arnat ajortut, soorlu Jesabel, Atalja Herodiasilu, tamarmik pisuussuteqanngitsut aavannik kuisisimasut. — 1 Kunngit 18:4, 13; 2 Israelikkut 22:10-12; Matîuse 14:1-11.

Taamaattumik inuiaat tamarmik Guutip silarsuassaa nutaaq taassuma naalagaaffianit aqunneqartoq pisariaqartippaat. Piffissaq arnat angutilluunniit assigiinngisitaajunnaarfissaat ajortumilluunniit pineqartarunnaarfissaat, kiisalu ullut tamaasa nuannaarfissaat, erniinnaq nalliutissaaq. — Tussiaat 37:11. (gE 8/4 98)

[Qupp. 13-mi assiliartaq]

Kristumiut uiusut Biibilimi najoqqutassianik maleruaapput nuliaminnillu ataqqinnittuullutik