Biibili Qanoq Oqarpa?

Ukioq 2000 immikkut pingaaruteqarpa?

NUNANI killerni qaammatisiutit naapertorlugit ukiumik 2000-imik taaneqartartoq inuit amerlanersaasa upperisarsiornikkut isumaqartinngilaat. Assersuutigalugu juutit, musliimit hindullu namminneq upperisarsiornikkut qaammatisiuteqarput, nunani killerni qaammatisiutinut naapertuutinngitsunik. Kinamiut qaammat najoqqutaralugu qaammatisiutitik malillugit upperisarsiornikkut ullorsiortarfitik ullorsiutigisartakkatillu allat aalajangersimavaat. Taamaattumik inuit milliardilikkuutaat, immaqa nunarsuup inuisa amerlanersaasa, ukioq 2000 immikkut isumaqartinngilaat.a

Inuppassuilli, ingammik nunani killerniittut, Gregorip qaammatisiutai malillugit ukiunut tuusintilinnut tulliuttunut appakaatilerneq alapernaallutik utaqqivaat. Inuit ilaannut alapernaannerinnaanngilaq. Ukioq 2000 ukiunut nutaanut aallartiffittut, oqaluttuarisaanermi allanngulerfittut, isigaat. Inuppassuit Biibilimik upperinninnerartut isumaqarput siulittuutit arlallit ukiumi 2000-imi eqquukkumaartut. Ilaasa anersaakkut tupinnartuliornersuaqarnissaa ilimagaat. Allallu annilaangapput isumaqarlutik nunarsuarmi ajunaarnersuaqarumaartoq — silarsuaq aserorumaartoq. Ilimagisat tamakku Biibilimik tunngaveqarpat?

Jehova, Guuti piffissamik eqqorluaasoq

Biibilip Guutia ’ullut utoqqaasuannik’ taaneqarpoq. (Dâniale 7:9) Taassuma piffissaq tamakkiisumik nakkutigaa, tamannalu pinngortitarsuup ingerlaasiagut takuneqarsinnaavoq, ullorissat ingerlaarnerannit atomit minnersaasa aalaasiinut. Piffissamik aalajangersaaqqissaarsimavoq. Biibilimi oqaatigineqartutut Jehovap inuit ’ineqarnissaat aalajangersakkanik taamaaffissaqartippai killiffissaqartillugillu’. (apustilit suliait 17:26) Jehova tassaavoq Guuti piffissamik eqqorluaasoq, aalajangigaalu piffissaq eqqorluinnarlugu pisarput.

Taamaattumik ukiut naatsorsugaanerat Biibilimi assut pingaartinneqarpoq. Biibilimi oqaluttuat piffissaq eqqarsaatigalugu imminnut ataqatigiipput, taamaalilluni inuup oqaluttuarisaanerata aallartiffia tikillugu kingumut naatsorsuisoqarsinnaalluni. Taamatut naatsorsuinerup ukiunik naatsorsuisalerfitta siorna ukioq 4026 ukiutut Adamip pinngortinneqarfiatut tikkuarpaa. Ukiut 2000-it missaanniittut qaangiummata Abraham inunngorpoq, sulilu ukiut 2000-it qaangiummata Jesus inunngorluni.

Biibilip ukiunik naatsorsuutaanik sammisaqartut ilaat namminersorlutik ullunut aalajangersimasunut tikkuartunik naatsorsuisimapput. Adamip, Abrahamip Jesusillu tamarmik ukiunik 2000-inik akunnilimmik inuusimanerat aallaavigalugu ilaatigut siulittuutigaat Jesusip inunngorneranit ukiut 2000-it qaangiunneranni annilaarnartumik pisoqarumaartoq. Tamanna naatsorsuinerpassuit Biibilip ukiunik naatsorsuutaanik tunngaveqarnerarneqartut ilaannaraat.

Ilumoorpoq piffissaq Jehova Guutip ajussutsip peerneratigut silarsuarmillu nutaamik atuutilersitsinermigut inuit akornanni pissutsinut akuliuffissaa Biibilimi eqqartorneqarmat. Tassani siulittuutini atorneqarput oqaatsit soorlu ’naggatissaq’, ’silarsuup matuma naggatissaa’, ’ullussat kingulliit’ aamma ’Guutip ullussaa’. (Daniel 12:4; Matîuse 24:3; 2 Timûtiuse 3:1; 2 Pîtruse 3:12) Biibililli ’naggatissaq’ ukiumut 2000-imut atassusinngilluinnarpaa. Gregorip qaammatisiutai malillugit ukiut tuusintillit aappassaasa naanerat allakkani isumassarsiaritaasuni sumiluunniit immikkut pingaarutilittut ersersinneqanngilaq.

’Qaqugu tamakku taamaalissappat?’

Jesusip apustilii Guutip piffissamik aalajangersagaanut soqutiginninnermik annertuumik ersersitsisimapput Jesus ima aperigamikku: ’Oqarfigitigut: Qaqugu tamakku taamaalissappat, sunalu tikiuffissannut silarsuullu matuma naggatissaanut nalunaaqqutaassava?’ (Matîuse 24:3) Ullumikkuttaaq inuppassuit siunissami pisussat assut paaserusuttarpaat. Biibilimi siulittuutinik pingaartunik eqquuffissaannillu soqutiginninneq pissusissamisuuginnarpoq, silatusaarneruvorli Guutip tamakkununnga isumaa akueralugulu ataqqissallugu.

Jehovap ernini aqqutigalugu siunertani saqqummersissimavai tamatumunngalu isummani paatsuugassaanngitsumik ersersissimallugu. Jesus qilalianngitsiarluni ajoqersukkami Guutip neriorsuutaasa eqquuffissaat pillugu aperimmanni ima akisimavoq: ’Ilissinnut nalunaariaqanngilaq qaquguluunniit qanoq ilisukkulluunniit pissasoq, Ataatap pissaanermigut aalajangeriigaa.’ (apustilit suliait 1:7) Siusinnerusukkut Jesusip ajoqersukkani ima oqarfigisimavai: ’Ullussamilli taassuminnga ullulluunniit qanoq ilinissaanik ilisimasoqanngilaq, inngililluunniit qilammiittut ernerulluunniimmi ilisimanngilaat; Ataatama kisimi nalunngilaa.’ — Matîuse 24:36.

Ersarippoq ’qaquguluunniit qanoq ilisukkulluunniit pisussat’, ingammik Biibilimi siulittuutit eqquunnissaat eqqarsaatigalugit, ilisimassallugit inunnut pisinnaatitaaffiunngitsoq. Tamakkua uagutsinnut paasitinnginnissaat Guutip qinersimavaa. (Matîuse 24:22-44) Guutip piumasaata akerlianik ’ullussaq ullulluunniit qanoq ilinissaa’ pillugu naatsorsuinitsigut Guutip siunertaa allanngortissinnaavarput? Naamik, tamanna ajornarluinnarpoq. (4 Moses 23:19; Rûmamiut 11:33, 34) Biibilimi allassimavoq: „[Jehovap] siunertarisai taamaattuassapput naassaanngitsumut.“ (Tussiaat 33:11) Jehova tassaammat Guuti ajugaqanngitsoq siunertai tamatigut piviusunngortarput. — Jesaja 55:8-11.

Naalli Guutip ’qaquguluunniit qanoq ilisukkulluunniit pisussat pissaanermigut aalajangereersimagaluarai’ inuit ilarpassuisa tamakkuninnga naatsorsuiniassallutik nuannaraat. Ilaat imminnut ullormik eqqartuutiffimmik siulittuisartunngortissimapput. Taamaattumik apustili Paulusip ullut aalajangersimasut pillugit isumaliutersorniartartunut tusarnaarnerup navianaataanik Thessalonikamiut immikkut ittumik unnersuussimavai, ima allalluni: ’Inanniarpassili, . . . tassanngaannaq eqqarsaatissigut nakimasunngorteqqunasi annilaarteqqunasilu anersaamulluunniit oqaatsimulluunniit allakkanulluunniit uatsinnit pisorisanut [Jehovap, NV] ullussaa maannakkut pissasoralugu. Qanoq ittumilluunniit salloqittartinnaveeritsi.’ — 2 Tásalûníkamiut 2:1-3.

Jehovap nalunaajaasuusugut upperilluinnarparput Guutip siunissamut atatillugu siunertai piffissaq taassuma aalajangersimasaa eqqorlugu piviusunngortinneqarumaartut, ulloq nalunaaquttallu-akunnera eqqoqqissaarlugu. (Habakkuk 2:3; 2 Pîtruse 3:9, 10) Upperaarputtaaq pisussat tamakkua siunissami ungasinngitsumi piumaartut. (2 Timûtiuse 3:1-5) Isumaliutersuutilli ullumikkut siammarsimaqisut isumaliutigineq ajorpavut tapersersornagilluunniit.b Ukioq 2000, ukioq 2001 ukiorluunniit alla inuit aalajangersimasaat Jehovap piffissamik aalajangersagaanut atassuserneqarsinnaanngilaq. (gE 8/5 98)

[Quppernerup ataani ilanngussat]