Biibili qanoq oqarpa?

Guutip isaani naleqarpugut?

„INUUNERA TAMANGAJAAT IMMINUT NIKANARTUTUT MISIGISIMAVUNGA,“ ARNAQ KRISTUMIU ALLAPPOQ. „QANORLUUNNIIT ANNERTUTIGISUMIK JEHOVA ASAGALUARLUGU, TAASSUMUNNGALU KIFFARTORNERMI QANOQ ANNERTUTIGISUMIK ILIUUSEQARALUARLUNGA, MISIGIUARPUNGA NAAMMANNGITSOQ.“

NAAMMANNGIVISSUTUT misigisumik imaluunniit imminut nikanartittumik nalunngisaqarpit? Imaluunniit ilaannikkut nammineq taama misigisarpit? Amerlasuut taamaapput, aamma Guutip kiffaasa ilaat. Ulluni ’ajornartunik nalliuttoqarfiusuni’ inuugatta kialuunniit tamatuma kinguneri maluginngitsoorsinnaanngilai. Inuppassuit allanit ’nunujuitsunit, qiningasunit ajunngitsunillu uumissuisunit’ neriorsulussinnarneqarsimapput pinerluffigineqarsimallutilluunniit. Tamanna ’ulluni kingullerni’ makkunani malunnarnerujartorpoq. (2 Timûtiuse 3:1-5) Tarnikkut ajoqusigaanerit taamaattut pissutigalugit inuk imminut ataqqiunnaarsinnaavoq.

Ilaannikkulli misigissutsit nuanniitsut imminut inornartunik anguniagaqartinnermit pissuteqarsinnaapput. Anguniakkat angunngikkaanni atorfissaqanngitsutut misigineq sakkortusisarpoq. Qanorluunniilli ikkaluarpat imminut ataqqinngitsut upperiuminaatsissinnaavaat Guutimit allanilluunniit asaneqarlutik. Immaqa allaat isumaqarput allat asasinnaanngivikkaatik.

Jehova Guutili taama isumaqanngilaq. Oqaatsimini akeqqami Satan Diaavulup ’salloqittaasumik periaasia’ pillugu mianersoqquaatigut. (Evfisumiut 6:11, Jewish New Testament) Periaaseq tamanna atorlugu Satanip Guutimut pallorfiginnikkunnaarsinniarpaatigut. Tamanna anguniarlugu naleqanngitsutut misigilersittarpaatigut, isumaqalersilluta Jehova asassalluta pissutissaqanngitsoq. Satanili ’sallusuuvoq’, aap, ’sallunerit ataatagaat’. (Juánase 8:44) Taamaattumik salloqittaalluni periaasianit nakutitaatissanngilagut. Biibili aqqutigalugu Jehovap isummaminik paasitippaatigut naleqartutullu isigaluta nalunarunnaarsillugu.

Naleqarnitsinnik oqimaaqatigiissumik isumaqarneq

Biibilip mianersoqquaatigut sapiissuseerunnermit qanoq sunnerneqarsinnaasugut. Ussatit 24:10-mi allassimavoq: „Ullormi annikilliorfiusumi sapiissuseerukkuit taava nukikissimassaqaatit.“ Nuanniitsumik misigissuseqartuarneq nukissaalatsinarlunilu sanngiillisitsiserlunilu qajannarsisitsisarpoq. Satanip tamanna nalunngilluinnarpaa. Atorfissaqanngitsutut misigigutta artornareeqaaq; Satanilli taama misigissuseqarneq atornerluppagu artornarnerungaassaaq.

Taamaattumik nammineq naleqarnerput ajunngitsumik oqimaaqatigiissumillu isigisariaqarparput. ’Nungullusi oqarfigaassi immissinnik isumassaq qaangerlugu isumaqarfigeqqunasi, kisianni immissinnik annerunianngitsumik upperneq Guutip kimulluunniit agguutigititaa missiliorlugu isumaqarfigeqqullusi,’ apustili Paulus allappoq. (Rûmamiut 12:3) Nutsikkami allami allassimaffik taanna ima nipeqarpoq: „Tamassi oqarfigaassi naleqarnersi qaangerlugu immissinnik naleqarteqqunasi, silatusaarlusili immissinnik misileeqqullusi.“ (Charles B. Williams) Allassimaffimmi kajumissaarneqarpugut imminut oqimaaqatigiissumik isumaqaqqulluta. Makitanaveersaartariaqarpugut. Aammali tamatuma akerlerluinnaanik isumaqarnaveersaartariaqarpugut, tassami ajunngitsumik eqqarsartaaseqarnerup ilagivaa imminut arlaannik isumaqarfigineq. Aap, Guutimit isumassarsisitaalluni Paulus oqarpoq tamatta Jehovap isaani naleqartugut.

Jesusittaaq eqqaavaa imminut ataqqineq naleqqulluartuusoq oqarami: ’Tullit ilittut asassavat.’ (Matîuse 22:39) Oqaatsip ’ilittut’ atorneqarnerata takutippaa imminut ataqqinermik pigisaqartariaqartugut. Sanngiissuteqartarpugut kukusarlutalu; Guutilli iluarisaanik iliorniarutta, eqqunngitsuliornivut peqqissimissutigalugit isumakkeerfigeqqullutalu qinnuigigutsigu, suli imminut ataqqisinnaavugut. Uummatitta isornartorsiuigajuttup ajornerarpatigut eqqaamassavarput ’Guuti uummatitsinnit annerusoq’. (1 Juánase 3:20) Allatut oqaatigalugu Jehovap immaqa imminut isiginitsinnit allaanerulluinnartumik isigaatigut.

Neriuutaarussimagutta sapiissuseerutitaasimallutalu

Tussiaasiortoq David ima allappoq: „[Jehovap] qanippai neriuutaarussimasut, annaattarpai sapiissuseerutitaasimasut.“ (Tussiaat 34:19) Matthew Henry’s Commentary on the Whole Bible-imi versi taanna ima oqaaseqarfigineqarpoq: „Inuit naapertuilluartut . . . uummatikkut artorsaateqangaarneq anersaamikkullu peqqissimineq ilisarnaatigaat. Nalunnginnamikku ajortiliullutik maniguupput imminullu pingaartinngivillutik; imminut pingaaruteqanngitsutut isigipput isumaqarlutillu nersornaatissaqaratik.“

Uummatikkut ’neriuutaarussimasut’ imaluunniit anersaamikkut ’sapiissuseerutitaasimasut’ immaqa Jehova ungasillugu misigipput isumaqarlutik taassumannga isumagineqarnissamut pingaanngippallaarllutik. Taamaanngilarli. Davidip oqaasiisa paasitippaatigut Jehovap ’imminnut pingaaruteqanngitsutut isigisut’ ajattornavianngikkai. Guutitta misiginneqataasup nalunngilaa taama misigigaangatta imminik aatsaat taama pisariaqartitsitigisartugut, qanissavaatigullu.

Tamatumunnga atatillugu eqqarsaatigeriaruk ukiualuit matuma siorna anaanaasoq ernerminik marlunnik ukiulimmik quersornersuarmik ipianartumik nappaatilimmik napparsimmavimmukaassinasuartoq. Nakorsat nukappiarannguaq misissoramikku aalajangerput nakkutigineqarniassammat unnuaq naallugu uninngagallartariaqartoq. Anaanaasoq unnuaq taanna sumiippa? Nukappiaqqap siniffiata saniani issiavoq. Erninnguani napparsimammat najortariaqarpaa. Ilimagisinnaavarput Ataatarput asannittoq qilammiusoq anaanaasumit iliuuseqarnerussasoq, taannami assilillugu pinngortitaavugut. (1 Moses 1:26; Jesaja 49:15) Tussiaat 34:19-imi neriorsoqqissarneqarpugut ’neriuutaarussimagaangatta’ Jehovap ’qanissagaatigut’ ataatatut anaanatulluunniit asannittutut — soqutiginnilluni ikiuerusullunilu. — Tussiaat 147:1, 3.

’Qupaloraarsuppassuarnit pingaarneruvusi’

Jesus nunamiikkallarami Jehovap eqqarsaataasa misigissusiisalu ilarpassui, aamma kiffaminut nunamiittunut misigissusii, saqqummersittarpai. Ataasiaannarnani Jesusip ajoqersukkani paasitippai Jehovap isaani naleqangaartut. — Matîuse 6:26; 12:12.

Assersuutigalugu Jesusip ajoqersukkami inuttut naleqarnerat ima nassuiarpaa: ’Qupaloraarsuit marluk aningaasat minnertaannik akeqartarinnginnerpat? Taakkualu ilaat ataaserluunniit nunamut nakkarnavianngilaq Ataatassi [ilisimanngippani, NV]. Ilissili nutsasiluunniit tamarmik kisissimapput. Taamaattumik erseqinasi; qupaloraarsuppassuarnit pingaarneruvusi.’ (Matîuse 10:29-31) Eqqarsaatigeriartigu Jesusip tusarnaartaasa oqaatsit taakku qanoq paasisimaneraat.

Qupaloraarsuit tassaasimapput timmisat nerineqarsinnaasut akikinnerpaartaasa ilaat. Timmiaaqqat taakku amerlanertigut erisariarlugit kapillugit sianneqartarput. Qularnanngitsumik Jesusip niueriartorfimmi takusimavai arnat piitsut aningaasaatiminnik kisitsisut qupaloraarsuit qassit pisiarisinnaanerlugit paasiniarlugu. Timmissat taakku ima nalikitsigititaasimapput aningaasannguamik ataatsimik (assarionimik taaneqartumik oorinik ikittunik nalilimmik) marluk pisiarineqarsinnaasimallutik.

Kingusinnerusukkut Jesus tamatumunnga assingusumik allanngortilaarlugu assersuusiorpoq. Lúkarse 12:6 naapertorlugu Jesus aperivoq: ’Qupaloraarsuit tallimat aningaasat minnertaannik marlunnik akeqartarinnginnerpat?’ Qupaloraarsuit marluk aningaasannguamik ataatsimik akeqarput, kisianni aningaasannguit marluk qupaloraarsuit, sisamat pinnagit, tallimalli pisiarinissaannut naammapput. Tassa pisinermi qupaloraarsuk ataaseq, naleqanngitsutut isigineqarunartoq, akeqanngitsumik pineqartarpoq. Jesusili nangippoq: ’Taakkualu ilaat ataaserluunniit [aamma pisinermi akilinngisaq] Guutimi puigugaanngilaq.’ Jesusip assersuutip tamatuma siunertaa ima nassuiarpaa: ’Qupalorarsuppassuarnit pingaarneruvusi.’ (Lúkarse 12:7) Tamanna tusarnaartaanut qiimmassaataasimassaaq.

Jesusip qiimmaallannartumik assersuusiornerata siunertaa paasivarput? Jehovap timmiaaqqat naleqartikkunigit, kiffani nunamiittut annerungaartumik naleqartissavai. Jehovap isaani arlaannarpulluunniit malugineqanngitsoornavianngilaq. Tamatta taassumunnga ima naleqartigigatta uatsinni annikitsualuit minnerpaartaat allaat takusarpai. Allaat nutsatta amerlassusiat nalunngilaa.

Satanip soorunami misigissutsit, soorlu imminut nikagineq, imaluunniit ’salloqittaasumik periaatsimi’ ilaat allat atorlugit Jehovamut kiffartorunnaartinniassavaatigut. Satanili ajugaateqinagu! Arnap kristumiup aallaqqaataani eqqaaneqartup Napasuliaq Alapernaarsuiffik-mi allaaserisaq iluaqutigaa, tassani Satanip misigissutsitsinnik atornerluiniarnera mianersoqqussutigineqarpoq.a Qatanngut arnaq ima allappoq: „Paasisimanngikkaluarpara Satanip misigissutsikka aqqutigalugit nikallortinniarsarigaanga. Paasissutissap tamatuma ikiorsimavaanga misigissutsit taamaattut akiornissaannut. Maanna nakimaallunga Satanip saassussineri akiorsinnaavakka.“

Jehovap ’suut tamaasa ilisimavai’. (1 Juánase 3:20) Nalunngilaa maannakkorpiaq suut atortariaqarivut. Aamma nalunngilaa suut atorsimagivut immaqa imminut ataqqinitsinnut ajoqutaasut. Eqqaamajuk Jehovap uatsinnut isumaa pingaarnerpaasoq! Qanorluunniit imminut nikagitigigaluarutta, Jehovap neriorsoqqissaarpaatigut kiffani tamaasa naleqartutut isigigini. Tamanna tatigilluinnarsinnaavarput Jehova akeqqani Satan Diaavulu assiginagu ’sallusuitsuummat’. — Títuse 1:2. (gE 8/6 99)

[Quppernerup ataani ilanngussaq]

[Qupp. 15-mi issuagaq]

Ataatatut asannittutut Jehovap aliasuttut qanippai

[Qupp. 15-mi assiliartat]

Jehovap qupaloraarsuk puigunngikkuniuk, soormi taava puigussavaatigut?

[Suminngaanneernerat]

Lydekker

Illustrated Natural History