Noa umiarsualiortoq

NOA nuliaqarpoq pingasunillu erneqarluni. Erneri ateqarput Sem, Kam Jafetilu. Tamarmik nuliaqarput. Ilaqutariit Noakkut arfineq pingasuupput.

Guutip Noa eqqumiitsumik suliassaqartippaa. Noa umiarsualioqquneqarpoq. Umiarsuarmik taaneqaraluarpoq, illerfissuartulli takisuutut isikkoqarluni. Guuti oqarpoq: ’Quleriinnik pingasunik initaqassaaq.’ Noa, ilaqutai, uumasut nerisassarpassuillu initaaniissapput.

Guuti oqarpoq Noap umiarsuaq ussissassagaa, imermik pitarneqarsinnaajunnaarlugu. ’Ulersuaq nalliutikkumaarpara silarsuaq tamaat aserorlugu. Umiarsuarmiinngitsut tamarmik toqussapput!’

Noap ernerisalu Jehova naalappaat umiarsualiulerlutillu. Inuilli allat illaannarput. Ajortuliortuarput. Noap oqaluttuuppai Guutip naammassiumaagaanik, upperinngilaalli.

Umiarsuaq taama angitigigami sananeqarnera sivisoqaaq. Ukiorpassuilli qaangiummata kiisami inerpoq. Taava Guutip Noa oqarfigaa uumasut umiarsuarmut ikiteqqullugit. Uumasut ilaat marlukkuutaartussaapput, angutivissat arnavissallu. Uumasulli ilaat arfineq marlukkuutaartussaapput, Guuti taamatut Noamut oqarpoq. Timmissallu assigiinngitsut tamarmik ilaat ilaasussaapput. Guutillu oqaasia maleqqissaarlugu Noa iliorpoq.

Kingulliullutik Noa ilaqutaalu umiarsuarmut ikipput. Taava Guutip matu matuaa. Iluani Noa inoqutaalu utaqqipput. Takorlooruk illit umiarsuarmiittutit utaqqillutillu. Ilumut Guutip oqarneratut ulersuaqassanerpa?