Abigajil Davidilu

ARNAQ pinnersoq Davidimut orniguttoq kinamitaavaana? Tassaana Abigajil. Arnaavoq silatooq, Davidilu ajortuliornissaraluanik akornuserpaa. Tamannali tusartinnagu David qanoq ingerlasimasoq tusariartigu.

Saul qimarratigereeramiuk David qaarusummut toqqorpoq. Ilaqutaasa tassani David ilagilerpaat. Angutit 400-t missingi katersuupput, Davidilu siulersortigaat. Taava David Moabip kunngianukarpoq oqarlunilu: ’Ataataga anaanagalu ilissinni najugaqarlit qanoq pinissara paasitserlugu.’ Taamanernit David innuttaalu qattunerni toqqortertuaannarlutik inuulerput.

Tamatuma kingorna Davidip Abigajil naapippaa. Uia Nabal nunaatilissuuvoq pisoorsuaq. 3000-inik savaateqarpoq 1000-inillu savaasaateqarluni. Nabal erlituujuvoq. Nulia Abigajil pinnersuuvoq. Aamma eqqortuliornissaq nalunngilaa. Allaat Ilaanni ilani annaappai. Qanoq pisimasoq tusariartigu.

David innuttaalu Nabalimut ajunngitsuliorfiginnissimapput. Savaataanik sernissueqataasimapput. Taava ullut ilaanni David innuttami ilaannik aallartitsivoq Nabal kiffartuutissamik qinnuigeqqullugu. Davidip innuttaasa Nabal naapippaat, kiffai savanik meqquiaaleruttortut. Ulloq nalliuttorsiorfiuvoq, Nabalilu mamartorpassuarnik nerisassaateqarpoq. Taamaattumik Davidip innuttai oqarput: ’Uagut ajunngitsuliorfiginikuuatsigit. Savaatissinnik tillinniarsimanngilagut, paarseqataasimallutali. Maannalu ajunngitsuliorfigaluta nerisassanik tunilaartigut.’

’Nerisassaatikka angutinut ilissitut ittunut tunniunnianngilakka,’ Nabal oqarpoq. Tukkuitsutut oqaluppoq, Davidilu oqaatiginerlullugu. Angutit uteramik tamakkuninnga oqaluttuummanni David kamaqaaq. ’Panalersoritsi!’ innuttani peqquai. Aallarpullu Nabal innuttaalu toqorariartorlugit.

Nabalip innuttaasa ilaata, Nabalip tukkuippalulluni oqaasiinik tusartup, Abigajil pisimasumik oqaluttuuppaa. Taavalu Abigajil piaarnerpaamik nerisassanik katersuivoq. Siutituut nerisassanik usilersorpai aallarlunilu. David naapikkamiuk siutituutiminit aqqarpoq, sikillunilu oqarluni: ’Naalagara-aa, uiga Nabal soqutigissanngilat. Sianiitsuuvoq sianiitsuliortarlunilu. Aajuku tunissutissakka. Tiguniakkit, pisimasumullu isumakkeerfigitigut.’

’Arnaavutit silatooq,’ David akivoq. ’Nabal erlitoqimmat toqunnialeraluariga akornuserparma. Eqqissillutit angerlarit.’ Kingorna Nabal toqummat Davidip Abigajil aamma nuliartaaraa.