Johannesip Jesus imermut kuisippaa

TAKUUK tui angutip niaquata qulaanut pisoq. Angut tassaavoq Jesus. Jesus maanna 30-t missiliorlugit ukioqarpoq. Aappaalu tassa Johannes. Taanna tusalaareerparput. Eqqaamaviuk Mariap eqqarlini Elisabet tikeraarmagu Elisabetip naartua nuannaarnermit aalalersoq? Naartua taanna tassaavoq Johannes. Maannali Johannes Jesusilu susunuku?

Johannesip Jesus Jordanip kuussuata ernganut morsutsippaa. Tassa kuisinneq. Siullermik imermut morsutsinneqarpoq, taavalu nuisinneqaqqilluni. Johannesip inuit kuisarpai; taamaattumik taagorneqarpoq Johannes Kuisisoq. Sunali pissutigalugu Johannesip Jesus kuivaa?

Jesusip taamaalioqqummani. Inuit takutitsiumasut ajortuliatik tamaasa aliasuutigigitik Johannesip kuisarpai. Jesusili ajortumik sumilluunniit iliorsimava? Naaggarluinnaq, Guutimmi erneraa qilammeersoq. Taava allamik pissuteqarpoq Johannes qinnuigigamiuk kueqqulluni. Suna pissutaasoq tusassavat.

Johannesimukanngikkallarami Jesus sanasuusimavoq. Sanasoq qisunnik sanasarpoq, nerriviliorluni, issiaviliorluni allanillu sanasarluni. Aammattaaq Mariap uia Josef sanasuuvoq, taassumalu Jesus sananermut ilinniartissimavaa. Jehovalli ernini sanasooqqullugu nunamut aallartinngilaa. Immikkut ittumik suliassaqartippaa, piffissanngulerporlu Jesusip suliassaminik tamatuminnga aallarniinissaanut. Ataatami piumasaa naammassissallugu tikiunnini takutikkumallugu Jesusip Johannes qinnuigaa kueqqulluni. Guutip tamanna iluarinerpaa?

Aap, Jesus kuisereermat nipi qilammit tutsiuppoq: ’Tassa ernera, nuannarisara.’ Qilak ammarporlusooq tuilu Jesusip qulaanut pivoq. Tuiviunngilarli. Taamatut isikkoqaannarpoq. Tassaavoq Guutip anersaava illernartoq.

Maanna Jesus eqqarsaatissarpassuaqarpoq. Ullut 40-t inuilaamiippoq. Tassani Satanip ornippaa. Satanip pingasoriarluni Guutip inatsisai unioqquteqqullugit Jesus usserpaa. Jesusili taamaaliorumanngilaq.

Jesus uterpoq angutillu naapillugit, taassumunngalu ajoqersuganngorput, tapersersortinngorlutik siulliit. Ilaat ateqarput: Andreas, Peter (taaneqartartortaaq Simon), Filip Nataʹnaelilu (taaneqartartortaaq Bartolomæʹus). Jesus ajoqersuganngoqqammersullu Galilæamut aallarput. Galilæami illoqarfimmi Nataʹnaelip najugaani Kanami unitsiarput. Jesus katittorsiornersuarmut ilaavoq siullermeerlunilu tupinnartuliorluni. Sunaasoq nalunngiliuk? Imeq viinninngortikkamiuk.