Umiiartut qeqertami

TAKUUK! Umiarsuaq umiusimavoq! Aserorsimavoq! Inuit immamut pississimasut takusinnaavigit? Ilaat nunamut pereersimapput. Paulusiuna ilaasoq? Qanoq pisimasoq tusariartigu.

Eqqaamassavat ukiut marluk Paulus Kæsareami parnaarussaasimasoq. Taava taanna parnaarussallu allat umiarsuarmik Romamukaanneqarput. Qeqertaq Kreta uiartillugu anorersuarmit nalaanneqarput. Anori sakkortungaarmat angutit umiarsuaq aqussinnaajunnaarpaat. Ullukkut seqineq unnuakkullu ullorissat takusinnaanngilaat. Kiisa, ullorpassuit qaangiummata, umiarsuarmiittut annannissaminnik neriuutaarupput.

Taava Paulus nikuippoq oqarlunilu: ’Arlassiluunniit inuunini annaassanngilaa; umiarsuaq kisimi aserussaaq. Unnuarmi Guutip inngilia uannut takutippoq oqarlunilu: „Erseqinak, Paulus! Romami kaasarimut sassartinneqassaatit. Guutillu angalaqatitit tamaasa annaakkumaarpai.“’

Anorersuup pitorarnerata ulluisa 14-ianni unnuap qeqqata nalaani, umiartortut malugaat imaq ikkalisoq! Taartumi ikkarlinnissartik aarleqqutigalugu kisarput. Qaalermat kangerliumaneq takulerpaat. Aalajangerput umiarsuaq sissamut pisikkumallugu.

Sissaq pallimmassuk umiarsuaq sioqqanut qingartaqqiussimasunut ikkarlippoq. Taava mallit qaararfigilerpaat, umiarsuarlu aserortilerpoq. Sakkutuut naalagaat qullersaasoq oqarpoq: ’Nalussinnaasusi tamassi siulliullusi immamut pississaasi sissamullu nalullusi. Taavalu ilaat kingulliullutik pississapput umiarsuullu aseqqukui ikaarutiginiassallugit.’ Taamaaliorpullu. Taamaalillutik umiarsuarmiittut 276-it tamarmik sissamut annapput, soorlu inngili neriorsuisimasoq.

Qeqertaq Maltamik ateqarpoq. Tassani najugallit inussiarneqaat, umiiartullu ilassilluarlugit. Sila pitsanngulermat Paulus umiarsuarmut allamut ikitinneqarpoq Romamullu aallarunneqarluni.