Ilaqutariinni eqqissineq ataavartiguk

1. Ilaqutariin­ni suut saqitsaas­sutaasin­naasar­pat?

ILAQUTARIIN­NI asan­nin­nerup, paaseqatigiin­nerup eq­qis­sinerul­lu atuuf­figisaan­ni inuusut pil­luarlutik inuusin­naap­put. Neriup­pugut ilaqutariin­ni ilis­sin­ni pis­sutsit taama it­tut atuut­tut. Ajoraluar­tumik ilaqutariip­pas­suaqar­poq taamatut ingerlan­ngitsunik, ilaqutariin­nik arlaan­nik pis­suteqar­tumik saqitsaaf­fiusunik. Suut ilaqutariin­ni saqitsaas­sutaalersin­naap­pat? Kapitalimi uani pingasut iserfigis­savavut. Ilaqutariit ilaan­ni inoqutaasut as­sigiin­ngitsunik up­perisaqarsin­naasar­put. Al­lani im­maqa meeq­qat as­sigiin­nik angajoq­qaaqan­ngil­lat. Al­lanilu amerlanerusunik pigisaqalerusus­suseq saqitsaas­sutaaler­tarsorinar­poq. Ilaqutariil­li ilaan­ni saqitsaas­sutaasoq im­maqa ilaqutariin­ni al­lani saqitsaas­sutaaneq ajor­poq. Sunaana as­sigiin­ngis­sutaasoq?

2. Ilaqutariit­tut inuuneq pil­lugu sumut siunersiuisoqar­tar­pa, un­nersuus­sutil­li pitsaaner­paat sumi nas­saas­saap­pat?

² Isum­mak­kut paaseqatigiin­nis­saq pingaar­torujus­suuvoq. Al­lat pis­sutsinut qanoq isigin­nin­nerat ilumoorluni paasiniarsarisaraan­ni ilaqutariin­ni ataqatigiin­nerup ataan­nar­tis­sin­naanis­saa ilimanaateqar­nerujus­suus­saaq. Pingaaruteqar­toq al­la tas­saavoq sumi un­nersuun­neqarfis­sarsior­neq. Inuit ilar­pas­suisa suleqatimik, sanilimik, aviisini al­laaserin­nit­tar­tut al­lal­luun­niit siun­nersuutaat malit­tar­paat. Ilaasali pis­sutsit atuk­katik pil­lugit Guutip oqaasiani qanoq al­las­simasoqar­toq paasisimavaat ilik­kak­katil­lu malilersimal­lugit. Taman­na qanoq ilil­luni ilaqutariin­ni eq­qis­sinerup atatiin­nar­neqar­nis­saanut iluaqutaasin­naava? — 2 Timûtiuse 3:16, 17.

UIIT ALLAMIK UPPERISAQARPAT

3. (a) Al­lamik up­perisalim­mut katin­neq pil­lugu Biibilimi qanoq un­nersuus­suteqar­pa? (b) Kristumiu up­pin­ngitsumik aap­paqar­pat najoq­qutas­siat tun­ngaviusut suut atuutis­sap­pat?

³ Al­lamik up­perisalim­mut katin­nis­saq Biibilimi sak­kor­tuner­paamik nangar­taatigineqar­poq. (5 Moses 7:3, 4; 1 Korintumiut 7:39) Im­maqali katereer­ner­pit kingor­na aatsaat sal­lusuis­sut Biibilimeersoq ilik­karsimavat. Taava? Soorunami aap­pariit­tut neriorsuutersi atuut­tuaan­nas­saaq. (1 Korintumiut 7:10) Biibilimi erseq­qis­sar­neqar­poq aap­pariin­neq ataavar­tuusus­saasoq, aap­pariil­lu kajumis­saar­neqar­put ajor­nar­torsiutitik qimarratiginagit aaq­qin­niar­taq­qul­lugit. (Evfisumiut 5:28-31; Títuse 2:4, 5) Taavami uiit up­perisan­nik ingerlatsinin­nut akerlilersuisorujus­suup­pat? Im­maqa ataatsimiigian­ngitsoor­tin­niar­tar­paatit, imaluun­niit oqar­tarluni nam­mineq nuliani il­lumiit il­lumut angalaarluni up­perisamik oqaluuserin­nit­tas­san­ngitsoq. Taava qanoq ilius­savit?

4. Nuliaasoq up­pin­ngitsumik ueqaruni qanoq ilil­luni misigin­neqataas­sutsimik ersersitsisarsin­naava?

⁴ Im­minut ima apereriarit: ’Uima taamatut isumaqar­neranut suna pis­sutaava?’ (Us­satit 16:20, 23) Sulerisar­nersutit paasil­luarsiman­ngik­kuniuk im­maqa isumaalugisas­savaatit. Im­maqaluun­niit ilaqutaasut ilaan­nit tatisimaneqar­poq ileq­qunut pingaar­tutut isigisamin­nut ilaasarun­naar­nerit pis­sutigalugu. „Angerlarsimaf­fitsin­ni kiser­ngoruk­kaangama qimagaasutut misigisar­punga,“ angut oqalut­tuar­poq. Misigisimavoq up­perisaq pisuul­luni nuliani an­naalerlugu. Kiserlior­nermili nas­suerutiginis­saanut pingaar­niar­pal­laarsimavoq. Imaas­sin­naavoq uivit pisariaqar­tik­kaa erseq­qis­saavigineqas­sal­luni il­lit Jehova asagak­ku imaan­ngitsoq uiit asan­ngin­nerulersimagit. Uiit pif­fis­saqarfiginiar­taruk.

5. Nuliaasoq uini al­lamik up­perisaqar­pat qanoq oqimaaqatigiis­sumik isumaqar­tariaqar­pa?

⁵ Pis­sutsini taama it­tuni nuliaasut kristumiuusut silatuumik iliorsin­naas­sap­pata suli pingaar­nerusoq pisariaqar­poq. Guutip oqaasiani nuliaasut ima kimit­tuumik kajumis­saar­neqar­put: ’Ar­nat ukorsii, uisi naalas­sigik, soorlu Naalak­kami ileq­qus­saasoq.’ (Kulorsamiut 3:18) Tas­sa at­taveqaruman­ngis­sutsimik ineriar­tor­titsineq Biibilimi mianersoq­qus­sutigineqar­poq. Al­las­simaf­fim­mi al­las­simam­mat ’Naalak­kami ileq­qus­saasoq’, erser­poq nuliaasup uiminut naalatsigitiitigaluni Naalak­kamut naalatsigitin­nis­sani eq­qaamasariaqaraa. Tas­sa oqimaaqatigiis­saarisariaqar­poq.

6. Najoq­qutas­siat suut nuliaasup kristumiup puiun­ngisaan­nar­tariaqar­pai?

⁶ Ilagiit ataatsimiin­nerinut najuun­neq Biibililu aal­laavigalugu up­perisamik al­lanut oqalut­tuarin­nin­neq pal­lorfigin­nin­nermut ilumoor­tumut ilaap­put kristumiumut pingaar­tut sumigin­nar­neqar­tariaqan­ngitsul­lu. (Rûmamiut 10:9, 10, 14; Eprîarit 10:24, 25) Taavali qanoq ilius­savit Guutip piumasaqaataanik aalajangersimasumik maleruaanis­san­nik toq­qaan­nar­tumik iner­ter­neqaruit? Jesus Kristusip apustilii ima nalunaarsimap­put: ’Guuti inun­nit naalat­tariaqar­neruvoq.’ (apustilit suliait 5:29) Taamaalil­lutik pis­sutsit nalaat­tak­kat­ta ilar­pas­suini atorsin­naasumik maligas­siuip­put. Jehovamut asan­nin­ner­pit taas­sumun­nga tun­niusimasus­saanin­nik ersersitsinis­san­nut kil­lis­savaatit? Uin­nul­lu asan­nin­ner­pit taas­sumin­ngalu ataq­qin­nin­ner­pit taas­suma akuerisin­naasaanik Guutimut tun­niusimanermik ersersitsinis­san­nut kil­lis­savaatsit? — Matîuse 4:10; 1 Juánase 5:3.

7. Nuliaasup kristumiup aalajaat­tuaan­nar­nera qanoq kinguneqarsin­naava?

⁷ Jesus oqarsimavoq taamaalior­nis­saq ilaan­nik­kut ajor­narsin­naasoq. Mianersoq­qusisimavoq pal­lorfigin­nin­nermut ilumoor­tumut akerlilersuineq pis­sutigalugu ilaqutariin­ni up­per­tor­taasut ilaqut­tamin­nit avis­saaq­qasutut misigisin­naas­sasut, soorlulusooq panamik avis­saaquteqarlutik. (Matîuse 10:34-36) Taman­na ar­nap Japanimiup misigisimavaa. Uiata ukiuni 11-ni akerlilersorsimavaa. Peq­qar­neeqisumik iliorfigisar­paa akulikitsumil­lu aniseriarlugu matu par­naar­tarlugu. Ar­narli nikal­lun­ngilaq, ilagiin­nilu kristumiuni ikin­ngutaasa ikior­tar­paat. Qinujuar­tar­poq oqaatsil­lu Pîtrusip agdlagai sujugdlît 2:20-miit­tut tup­pal­lersaatigisarlugit. Ar­nap kristumiup taas­suma qularin­ngivip­paa aalajaat­tuaan­naruni ul­lut arlaan­ni uimi Jehovamut kif­far­toqatigilerumaaraani. Taamatul­lu pisoqar­poq.

8, 9. Nuliaasoq qanoq iliorluni uiminut pisariaqan­ngitsumik akor­nutaanaveersaarsin­naava?

⁸ Aap­pap isumaa al­lan­ngor­tin­niarlugu iliuuserisin­naasat amerlaqaat. As­sersuutigalugu, uiit up­perisan­nut akerliup­pat al­latigut naam­magit­taal­lior­nis­saanut pis­sutis­sin­naveersaar­tariaqar­pat. Angerlarsimaf­fis­si ipiitsuutiguk. Im­minut takujuminar­tuutigit. Uin­nik asan­nin­nerit pingaar­titsineril­lu akulikitsumik oqaatigisaruk. Isor­nar­torsior­nis­saanut taarsiul­lugu tapersersoruk. Siulersuineranik malin­nik­kusun­nerit ersersit­taruk. Naaper­tuil­luan­ngitsumik iliorfigineqar­tutut misigiguit akiniaasan­ngin­nis­sat ilungersuutigiuk. (1 Pîtruse 2:21, 23) Inut­tut naam­mal­luin­nan­ngis­sutsimut kamagit­tar­tuugit, as­sor­tuus­simagaangas­silu maniguul­lutit siul­liul­lutit utoq­qatser­niar­tarit. — Evfisumiut 4:26.

⁹ Ataatsimiigiar­tar­nitit nerisar­nis­si kingusinaar­tar­nis­saan­nut pis­sutaatin­naveersaar­tak­kit. Imaas­sin­naavoq aam­ma uivit angerlarsiman­ngif­fiini oqaluus­sinermut peqataasas­sasutit. Silatusaar­ner­paas­saaq nuliaasup kristumiup uimi taman­na nuan­narin­ngip­pagu uiminut oqaluus­sinaveersaar­tar­nis­saa. Apustilip Peterip un­nersuus­sutaa malik­kuniuk pitsaanerus­saaq: ’Nuliaasusi uis­sin­nut naalat­tuugitsi, oqaatsimut naalas­seriitsoqar­pat taak­ku oqaaseqan­ngitsuk­kut nuliamik saqineratigut ilataarineqaq­qul­lugit, mianerin­nil­lusi piitaajuitsumik saqinersi isigisaraangamik­ku.’ (1 Pîtruse 3:1, 2) Nuliaasut kristumiut Guutip anersaavata inerititaanik ersersitsinermut pik­korin­neruler­nis­sar­tik sulis­sutigisar­paat. — Galâsiamiut 5:22, 23.

NULIAASOQ UPPINNGITSUUPPAT

10. Uiusoq up­per­toq nuliaminut al­lamik up­perisaqar­tumut qanoq pis­suseqar­tariaqar­pa?

¹⁰ Taavami uiusoq kristumiuup­pat, nulia pin­nani? Aam­ma pis­sutsinut taama it­tunut Biibilimi un­nersuus­suteqar­poq. Ima al­las­simagami: ’Qatan­ngutit ilaat up­pin­ngitsumik nuliaqaruni taas­sumalu najuin­narumap­pani qiman­ngik­kiliuk.’ (1 Korintumiut 7:12) Aam­ma uiusut ima siun­nersor­neqar­put: ’Angutit ukorsii, nuliasi asaniarsigik.’ — Kulorsamiut 3:19.

11. Uiusoq nuliani al­lamik up­perisaqar­pat ’niaquusutut’ qanoq ilil­luni siuneqas­sutsimik pis­suseris­saar­nermil­lu ersersitsisin­naava?

¹¹ Nuliat al­lamik up­perisaqar­pat ataq­qin­nin­nermik ersersitsiviginiaq­qis­saar­tariaqar­pat misigis­susiilu eq­qarsaatigisarlugit. Soorunami inut­tut nam­minersor­tutut nam­mineq up­perisaminik ingerlatsinis­saminut kif­faan­ngis­suseqar­poq, naak im­maqa tamatumani il­lit isumaqatigin­ngik­kaluarit. Ilimagis­san­ngilat up­perisan­nik ataasiarlutit oqalut­tuuk­kuk­ku ukior­pas­suar­ni up­perisarisimasani ingerlaan­naq nutaamik taarser­nias­sagaa. Up­perisarsior­nik­kut ileq­qulersuutit taas­suma ilaqutaasalu ileq­qoriuarsimasaat sukan­nersumik isor­nar­torsior­niaan­nar­nagit naam­magit­tarlutit Biibili tun­ngavigalugu eq­qarsalersin­niar­tarsin­naavat. Ilagiin­nut tun­ngasunik sam­misaqar­pal­laaruit im­maqa sumigin­nar­neqar­tutut misigis­saaq. Im­maqa Jehova kif­far­tuun­niarlugu ilungersor­nitit akerlilersor­tar­pai, im­maqa paasitin­niaraluarlutit nuliat pif­fis­saqarfiginerusariaqaraluarit. Taamaat­tumik naam­magit­tarit. Asan­nit­tumik isumas­soruk­ku im­maqa up­perisamik ilumoor­tumik ilas­sin­nik­kiar­tuaar­nis­saanut ikiorsin­naas­savat. — Kulorsamiut 3:12-14; 1 Pîtruse 3:8, 9.

MEEQQANIK PERORSAANEQ

12. Uiusoq nuliaasorlu tamarmik im­mik­kut up­perisaqaraluarlutik qanoq ilil­lutik meeq­qamin­nik perorsaanermin­ni suleqatigiis­sin­naap­pat?

¹² Ilaqutariin­ni angajoq­qaat tamarmik im­mik­kut up­perisaqar­pata meeq­qat up­perisarsior­nik­kut ajoqersor­neqar­nis­saat akerleriis­sutin­ngorsin­naasar­poq. Taamaap­pat Biibilimi najoq­qutas­siat qanoq ator­tariaqar­pat? Biibili naaper­tus­sagaan­ni ataataasoq meeq­qanik ajoqersuinis­samut akisus­saaner­paavoq, aam­mali anaanaasoq pingaaruteqar­poq. (Us­satit 1:8; naleq­qiuguk Mosesimik al­lak­kat siul­liit 18:19; Mosesimik al­lak­kat tal­limaat 11:18, 19.) Ataataasorli ilaqutariin­nut ’niaquuvoq’, Kristusip siulersuinera akuerin­ngik­kaluaruniul­luun­niit.

13, 14. Nuliaasoq qanoq iliorsin­naava uimi meeq­qatik kristumiut ataatsimiin­nerinut or­nigut­taq­qun­ngip­pagit imaluun­niit atuaq­qis­saaqatigisaq­qun­ngip­pagit?

¹³ Ataataasut up­pin­ngitsut ilaasa meeq­qamik anaanamin­nit up­perisarsior­nik­kut ajoqersor­neqar­nis­saat ajorineq ajor­paat. Ilaasali ajorisar­paat. Qanoq ilius­savit uivit meeq­qasi ilagiit ataatsimiin­nerinut ilagisaq­qun­ngip­pagit im­maqalu angerlarsimaf­fis­sin­ni Biibilimik atuaq­qis­saaqatigisaq­qun­ngip­pagit? Taamaap­pat pisus­saaf­fiit arlal­lit oqimaaqatigiis­saar­tariaqar­patit, tas­sa Jehova Guutimut pisus­saaf­fiit, ilaqutariin­nut ’niaquusumut’ pisus­saaf­fiit meeq­qan­nul­lu pisus­saaf­fiit. Qanoq ilius­savit?

¹⁴ Pis­sutsit Jehova Guutimut qinunik­kut saq­qum­miutik­kit. (Filípimiut 4:6, 7; 1 Juánase 5:14) Il­lil­li inaarutaasumik aalajangiisariaqar­putit. Pis­suseris­sumik uin­nut erseq­qis­saatigiguk­ku taan­na ’niaquus­susiatigut’ unam­minian­ngik­kit, im­maqa akerlilersuinera qasuk­kaamis­saaq. Naak uivit meeq­qasi ataatsimiigiar­taq­qun­ngik­kaluarai imaluun­niit aaq­qis­suus­samik Biibilimik atuaq­qis­saaqatigisaq­qun­ngik­kaluarai, ilin­niar­tin­nis­saan­nut suli periarfis­saqar­putit. Ul­luin­nar­ni oqaloqatigisar­neran­ni maligas­siuil­luar­nik­kul­lu meeq­qavit Jehovamik asan­niler­nis­saat taas­sumalu oqaasiinut up­piler­nis­saat sulis­sutigisin­naavat. Ilin­nut ataatamin­nul­lu ataq­qin­nin­nis­saan­nik, al­lanut isumas­suisuunis­saan­nik sulinermul­lu atatil­lugu pitsaasunik ileq­qoqar­nis­sap pingaaruteqas­s­susianik paasin­nin­nis­saan­nik ilin­niar­tik­kit. Im­maqa tamatuma kinguneri pitsaasut pif­fis­sap ingerlanerani ataataata malugiar­tuaas­savai ilungersuutivil­lu naleqas­susiat paasiar­tuaarlugu. — Us­satit 23:24.

15. Ataataasoq up­per­toq meeq­qanik ajoqersuinis­samut sumik akisus­saaf­feqar­pa?

¹⁵ Il­lit angut, up­per­tuuguit nulial­lu up­per­tuunani, akisus­saaf­fiit naam­mas­sil­lugu meeq­qasi ’perorsar­tariaqar­patit iner­ter­tarlugil­lu Jehovamit’. (Evfisumiut 6:4) Soorunami taman­na ilutigalugu inus­siar­nersumik, asan­nit­tumik ingasat­tajaan­ngitsumil­lu nulian­nut pis­suseqar­tariaqar­putit.

ANGAJOQQAATTUT UPPERISAQAN­NGIKKUIT

16, 17. Meeq­qat angajoq­qaamik up­perisaan­nit al­laanerusumik up­perisaqarunik Biibilimi najoq­qutas­siat suut eq­qaamasariaqar­paat?

¹⁶ Al­laat meeq­qat ukiukin­nerusut angajoq­qaamik up­perisaan­nit al­laanerusumik up­perisaqar­tar­nerat qaqutigoor­tuujun­naar­poq. Il­lit taamaak­kuit Biibili ilin­nut­taaq un­nersuus­sutis­saqar­poq.

¹⁷ Guutip oqaasia imaap­poq: ’Angajoq­qaasi naalas­sigik Naalak­kami, taama iluarmat. Ataatat anaanal­lu ataq­qik­kit.’ (Evfisumiut 6:1, 2) Tas­sa angajoq­qaatit ajun­ngitsumik ataq­qisariaqar­patit. Angajoq­qaanul­li naalan­nis­saq pingaar­tuugaluar­toq aam­ma Guuti ilumoor­toq eq­qarsaatigisariaqar­poq. Meeq­qat nam­min­neq aalajangiinis­samin­nut naam­mat­tumik utoq­qaas­suseqaleraangamik iliuutsimin­nut akisus­saas­suseqar­nerulersar­put. Taamaap­poq silamiut inatsisaat kisiisa eq­qarsaatiginagit, aam­mali Guutip inatsisai eq­qarsaatigalugit. ’Taamaat­tumik nungul­luta im­mitsin­nik Guutimut nas­suersus­saajumaar­pugut.’ — Rûmamiut 14:12.

18, 19. Meeq­qat angajoq­qaamik up­perisaan­nit al­laanerusumik up­perisaqar­tut qanoq iliorlutik angajoq­qaatik up­perisamin­nik paasin­nin­nerulersis­sin­naavaat?

¹⁸ Up­perisat pis­sutigalugu inuunin­ni al­lan­nguiguit angajoq­qaavit qanoq at­tor­neqar­nis­saat sapin­ngisan­nik paasin­nif­figiniaruk. Qular­nan­ngitsumik nuan­naas­sap­put Biibilimi ilin­niarsimasavit kingunerisaan­nik ataq­qin­nin­nerulerlutil­lu, naalan­nerulerlutil­lu qin­nuigineqaraangavit aalaniar­nerusaleruit. Aam­mali ileq­qut pingaar­tutut isigisatik malik­kun­naaruk­kit im­mis­sul­lu up­perisaqarun­naarlutit, im­maqa misigis­sap­put ilin­nut kingor­nutsin­niagaraluar­tik ajat­torit. Im­maqa aam­ma sam­misar­tak­kat inun­nit nuan­narineqar­pal­laan­ngim­mat, imaluun­niit sam­misar­tak­kat taman­na pigis­saaler­nis­san­nut iluaqutigisin­naasorisaan­nit sal­liutik­kak­ku, isumakuluutigaatsit. Pingaar­nias­suseq aam­ma akor­nutaasin­naavoq. Im­maqa misigip­put iluamik oqaatigalugu il­lit im­minut ilumoor­nerar­tutit taak­kulu kuk­kuneraritit.

¹⁹ Taamaat­tumik sapin­ngisamik piaar­ner­paamik angajoq­qaavit ilagiin­ni utoq­qaaner­tanik oqaluus­sisar­tunil­luun­niit inersimal­luar­tunik al­lanik ilisarisimasaqaler­nis­saat isumagiuk. Angajoq­qaatit naalagaaf­filersaar­tarfim­mut ilaanis­saan­nik kajumis­saak­kit, suut eq­qar­tor­neqar­tar­nersut nam­min­neq tusaanias­sam­matigik Jehoval­lu nalunaajaasui inut­tut qanoq it­tuunersut nam­min­neq paasinias­sam­mas­suk. Im­maqa pif­fis­sap ingerlanerani angajoq­qaatit akuersaar­nerulis­sap­put. Angajoq­qaat ilaat akerlilersuisorujus­suusar­put, atuagas­sianik Biibililersaarutinik aseror­terisarlutik meeq­qatil­lu kristumiut ataatsimiin­nerinut or­nigut­taq­qunagit. Taamaak­kaluaraangal­luun­niil­li meeq­qat al­lami atuar­nis­saat, kristumioqatimin­nik oqaloqateqar­tar­nis­saat al­lanul­lu oqaluus­sinis­saat amerlasuutigut ajor­nar­neq ajor­poq. Aam­ma Jehovamut ikioq­qul­lutit qinusarsin­naavutit. Inuusut­tut ilaat angerlarsimaf­fim­min­nit nuun­nis­samut naam­mat­tumik utoq­qaas­suseqaleraangamik aatsaat iliuuseqar­nerusin­naasar­put. Angerlarsimaf­fis­sin­nili pis­sutsit qanorluun­niit ik­kaluar­pata ’ataatavit anaanavil­lu ataq­qinis­saat’ puius­san­ngilat. Ilaqutariin­ni eq­qis­sinermik atuutititseqataaniarlutit, pingaar­ner­paamil­lu Guuti eq­qis­seqatiginiarlugu, sapin­ngisan­nik ilior­tariaqar­putit. — Rûmamiut 12:17, 18.

’ILAQUTASSARIIT’

20. Meeraq ataatas­saqar­toq imaluun­niit anaanas­saqar­toq qanoq misigisin­naasar­pa?

²⁰ Ilaqutariit ilar­pas­sui up­perisarsior­nik­kut pin­natik, timik­kut qanigisariin­ngis­sutsimik unam­miniar­nar­tumik nam­magas­saqar­put. Ilaqutariit arlaqaqisut tas­saap­put aap­pariit taak­kualu arlaata tamarmil­luun­niit aap­parisimasamin­nit meeraat. Taman­na meeq­qat sin­ngaqat­taan­neran­nik narrutsaateqat­taan­neran­nil­lu nas­sataqarsin­naavoq, im­maqalu kimut ilumoorfigin­nin­nis­saq paatsiveerus­sutaasarluni. Tamatuma kingunerisaanik im­maqa ataatas­samik anaanas­samil­luun­niit ajun­ngitsumik siuner­taqarlutik angajoq­qaajul­luar­niarsarinerigalui tunuar­tit­tar­paat. ’Ilaqutas­sariit’ ingerlal­luar­nis­saan­nut suup ikiorsin­naavai?

21. Sooq angajoq­qaas­sat im­mik­kut it­tunik atugaqaraluarlutik Biibilimut ikior­tis­sarsior­tariaqar­pat?

²¹ Naak ilaqutariin­ni taama it­tuni pis­sutsit im­mik­kut ik­kaluar­tut Biibilimi najoq­qutas­siat ilaqutariin­nut al­lanut atuut­tut aam­ma ator­neqarsin­naap­put. Im­maqa najoq­qutas­siat tamak­ku sumigin­nar­nerisigut ajor­nar­torsiutip aaq­qipal­lan­nis­saa ajor­nan­ngin­nerusorinarsin­naavoq, taamaalior­nerli ungasin­nerusoq eq­qarsaatigalugu aliasun­nermik nas­sataqas­saaq. (Tus­siaat 127:1; Us­satit 29:15) Ilisimas­suseq siuneqas­suserlu ineriar­tor­tin­niarsariniarsigik — ungasin­nerusoq eq­qarsaatigalugu kingunis­sai pitsaasut eq­qaamal­lugit Guutip najoq­qutas­siaanik atuinis­samut ilisimas­suseq, aam­malu sooq ilaqutariin­nut ilaasut sooq aalajangersimasumik oqar­tarlutil­lu ilior­tar­tut paasinis­saanut siuneqas­suseq. Aam­ma misigin­neqataas­sutsimik ersersitsisar­nis­saq pisariaqar­poq. — Us­satit 16:21; 24:3; 1 Pîtruse 3:8.

22. Sooq meeq­qat ataatas­sar­tik anaanas­sar­til­luun­niit akueriuminaatsis­sin­naasar­paat?

²² Meeras­saqaruit, im­maqa ilaqutariin­nut ikin­ngutaannaagallaravit meeq­qat ilas­sil­luar­paatsit, ataatas­sarileramitsil­li imaluun­niit anaanas­sarileramitsit al­lan­ngoriar­tuaarsimal­lutik. Im­maqa meeq­qat ataatavitsik anaanavitsil­luun­niit najorun­naarsimasar­tik eq­qaamasar­paat, kimul­lu ilumoorfigin­nin­nis­sar­tik paatsiveerus­sutigeq­qajaasarlugu. Imaas­sin­naavoq misigisut ataatavim­min­nut anaanavim­min­nul­luun­niit suli asan­nin­ner­tik il­lit ’til­lin­niarsarigit’. Im­maqa ilaan­nik­kut toq­qaan­nan­ngik­kaluamik eq­qaasit­tar­paatsit ataataviginak imaluun­niit anaanaviginak. Taman­na an­ner­nar­torujus­suuvoq. Kisian­ni ’isumak­kut narrutsak­kasuaqinak’. (akugdlîssup oκâuse 7:9) Meeq­qat misigis­susii pineqaraangata siuneqas­sutsimik misigin­neqataas­sutsimil­lu ersersitsinis­saq pisariaqar­poq.

23. Ilaqutariin­ni meeras­salin­ni perorsaatis­siisar­neq eq­qarsaatigalugu qanoq ilior­toqarsin­naava?

²³ Inut­tut pis­sutsit tamak­ku aam­ma perorsaatis­siisar­nermi pingaaruteqar­torujus­suup­put. Aalajangersimal­luin­nar­nis­saq pingaar­torujus­suuvoq. (Us­satit 6:20; 13:1) Meeq­qal­lu as­sigiin­ngim­mata perorsaatis­siisar­nerit as­sigiin­ngiiaarsin­naap­put. Angajoq­qaas­sat ilaasa paasisimavaat pitsaanerusar­toq perorsaanerup ilaa taman­na aal­laq­qaataani ataataviusup anaanaviusul­luun­niit isumagisar­pagu. Pingaar­torujus­suuvorli angajoq­qaat marluul­lutik perorsaatis­siisar­nik­kut isumaqatigiin­nis­saat, meeraviit meeras­sal­lu as­sigiin­ngisin­nagit. (Us­satit 24:23) Naalan­nis­saq pingaar­torujus­suuvoq, eq­qaamasiul­li kik­kut tamarmik naam­mal­luin­nan­ngitsuum­mata. Qisuariapiloor­naveersaar­taritsi. Asan­nin­nik­kut perorsaatis­siisaritsi. — Kulorsamiut 3:21.

24. Ilaqutas­sariin­ni ileq­qus­satigut ajor­nar­torsiulersoqar­nis­saata pinaveersaar­niar­nerani suna iluaqutaasin­naava?

²⁴ Ilaqutariit­tut ataatsimoorluni oqaloqatigiit­tar­nik­kut ajor­nar­torsiutit ilar­pas­sui pin­ngitsoor­tin­neqarsin­naasar­put, taamaalil­lutil­lu ilaqutariit inuunermi pingaar­nerusunik aal­lus­sinis­samin­nut akor­nusersor­neqan­ngin­nerusarlutik. (Naleq­qiuguk Filípimiunut agdlagkat 1:9-11.) Taamatut oqaloqatigiit­tar­nik­kut aam­ma ataasiak­kaat paasitin­neqarsin­naap­put qanoq ilil­lutik ilaqutariit anguniagaan­nik angusaqar­titseqataasin­naaneran­nik. Aam­mat­taaq ilaqutariit ataatsimoorlutik oqaloqatigiit­tar­nerat ileq­qus­satigut ajor­nar­torsior­toqaler­nis­saanik pinaveersimatitsisin­naasar­poq. Niviarsiaq­qat paasisariaqar­paat ileq­qoris­sutsimik ersersitsisunik atisalersor­tar­nis­sar­tik ataatas­samin­nul­lu imaluun­niit qatan­ngutis­samin­nut nukap­piaq­qanut eq­qor­tumik pis­susilersorfigin­nin­nis­sar­tik, nukap­piaq­qal­lu anaanas­samin­nut qatan­ngutis­samin­nul­lu niviarsiaq­qanut eq­qor­tumik pis­suseqar­nis­sar­tik pil­lugu un­nersuun­neqar­tariaqar­put. — 1 Tásalûníkamiut 4:3-8.

25. Inut­tut pis­sutsit suut ilaqutas­sariin­ni eq­qis­sinermik atatitseqataasin­naap­pat?

²⁵ Angajoq­qaas­saanermut atatil­lugu unam­miniar­nar­tut im­mik­kut it­tut anigorsin­naas­sagaan­ni naam­magit­tas­suseq pisariaqar­poq. Aam­malu ilaqutariit nutaat im­min­nut qanimut at­taveqaler­niar­nerat sivisusin­naasar­poq. Meeras­sanit asaneqaler­niar­neq ataq­qineqaler­niar­nerlu sulias­saavoq imaan­naan­ngitsorujus­suaq. Anguneqarsin­naavorli. Ilisimas­suseq siuneqas­suserlu kiisalu Jehovap iluarisaanik iliorusus­suseq sak­kor­tooq ’ilaqutas­sariin­ni’ eq­qis­sinerup ataan­nar­tin­nis­saanut pingaar­torujus­suup­put. (Us­satit 16:20) Inut­tut pis­sutsit tamak­ku aam­ma al­latigut iluaqutaasin­naap­put.

PIGISAQARUSUS­SUSEQ ANGERLARSIMAF­FISSINNI SAQITSAANNERMIK PILERSITSIVA?

26. Aningaasatigut ajor­nar­torsiutit pigisanul­lu isigin­nin­neq qanoq ilil­lutik ilaqutas­sariin­ni saqitsaan­nermik pilersitsisin­naap­pat?

²⁶ Aningaasatigut ajor­nar­torsiutit ilaqutariil­lu pigisanut isigin­nin­nerat amerlasuutigut saqitsaan­nermik pilersitsisin­naap­put. Ajoraluar­tumik ilaqutariit ilaat aningaasat pil­lugit as­sor­tuut­tar­nitik pisuun­ngorusus­suser­til­lu, imaluun­niit pisuujunerulaalerusus­suser­tik, pis­sutigalugit avis­saar­tar­put. Akerleriit­toqalersin­naasar­poq aap­pariit tamarmik sulif­feqar­tut isuma ’uanga aningaasaatik­ka, il­lit aningaasaatitit’ pigileraangas­suk. Im­maqalu aningaasat pil­lugit as­sor­tuut­tan­ngik­kaluarunil­luun­niit aap­pariit tamarmik sulif­feqar­nerat im­min­nut pif­fis­saqarfigin­ngingajan­neran­nik nas­sataqarsin­naavoq. Aam­malu silarsuarmi nalingin­naanerujar­tuin­nar­poq ataataasut sivisunerusuk­kuutaarlugu — qaam­matik­kuutaarlugu imaluun­niit ukioq ilivitsuk­kuutaarlugu — najugarisamin­ni pisin­naan­ngil­luin­nak­kamin­nik akis­sarsior­niarlutik ilaqut­tamin­nik qimatsigal­lar­tar­nerat. Taman­na ajor­nar­torsiutinik an­ner­toorujus­suar­nik nas­sataqarsin­naavoq.

27. Ilaqutariit aningaasaqar­niar­nik­kut tatineqar­tut najoq­qutas­siat suut iluaqutigisin­naavaat?

²⁷ Pis­sutsinut taama it­tunut maleruagas­salior­toqarsin­naan­ngilaq, ilaqutariit tamarmik im­mik­kut ajor­nar­torsiutaat pisariaqar­titaal­lu as­sigiin­ngim­mata. Biibilimili un­nersuus­sutinik maleruaaneq iluaqutaasar­poq. As­sersuutigalugu, Us­satit 13:10-mi Ny Verden-nutsigaq naaper­torlugu al­las­simavoq pisariaqan­ngitsumik saqitsaan­nerit ilaan­nik­kut pin­ngitsoor­tin­neqarsin­naasar­tut isumasioqatigiin­nik­kut. Isum­map oqaatiginis­saan­naa tas­sani pineqan­ngilaq. Aap­paq siunersior­tariaqar­poq paasiniarlugu tamas­si im­mik­kut qanoq isumaqar­nersusi. Im­maqa aningaasatigut piviusorsior­tumik naatsorsuusior­nik­kut ilaqutariit ilungersuutitik ataatsimut kat­tus­sin­naavaat. Ilaan­nik­kut aap­pariit marluul­lutik sulinis­saat pisariaqar­tar­poq, im­maqa utaq­qiisaan­naasumik, aningaasar­tuutit qaf­fas­simasut matus­sutis­saqar­tik­kumal­lugit, ingam­mik meeq­qat al­lal­luun­niit im­min­nit tapersersor­neqar­nis­sar­tik pin­ngitsoorsin­naan­ngip­pas­suk. Taamaap­pat uiusup nuliani suli pif­fis­saqarfiginerarlugu eq­qis­sisarsin­naavaa. Anaanaasup kisimi suliarisar­tagaraluisa ilaat uiusup meeq­qal­lu asan­nil­lutik suliarisin­naavaat. — Filípimiut 2:1-4.

28. Suup ilaqutariit ataasius­suseqaleriar­tuaar­tis­sin­naavai?

²⁸ Pingaar­torujus­suuvoq eq­qaamas­sal­lugu aningaasat pis­sutsit aaq­qis­suus­saaneran­ni matumani pisariaqar­tuugaluarlutik pil­luar­nermik tunisineq ajormata. Aam­mami inuunermik tunisisin­naan­ngil­luin­nar­put. (Nalunaajaasup oqaasii 7:12) Akerlianil­li pigisanik pingaar­titsival­laar­neq anersaak­kut ileq­qus­satigul­lu nak­kaat­tuus­sutaasin­naavoq. (1 Timûtiuse 6:9-12) Pitsaanerujus­suuvoq Guutip naalagaaf­fia naaper­tuil­luas­suserlu taas­suma pia pingaar­ner­paatis­sal­lugit, qularutiginagu inuus­sutis­saqarumal­luta ilungersor­nivut pil­luaq­qujumaarai. (Matîuse 6:25-33; Eprîarit 13:5) Anersaak­kut soqutigisat sal­liutin­nerisigut tamanil­lu pingaar­nermik Guutimik eq­qis­seqateqar­nis­sap noq­qaas­sutigineratigut ilaqutariit­tut — ilaan­nik­kut saqitsaan­nermik pilersoqarsin­naasaraluar­toq — pingaar­nerusutigut ataasius­suseqarsin­naas­saagut.