Pruffiiti siunissamik takorruuisinneqarpoq

DANIELI, angut inuusuttoq maluginiarnartumik assuarnaatsuusoq, Jerusalemi suli piuneerussaanngitsoq Babylonimut aallarussaavoq. Taanna juutillu allat — naalagaaffimmit Judamit aallarussaasut — aallarussisiminnit killilimmik kiffaanngissuseqartitaapput. Danieli Babylonimi inuunermini sivisuumi Guutimit pilluaqqusaangaarpoq, allaallu løvet inaanni toqumit aniguivoq siunissamilu ungasissorsuarmi pisussanik takorruuisinneqarluni. Danielip siulittuutigisaani pingaarnerni Missiarsi taassumalu naalakkersuinissaa pineqarput.

Danieli paasitinneqarpoq Missiarsi qaqugu tikiutissasoq. Danieli oqaluttuunneqarpoq Guutip innuttaasa ‘Missiarsip siulersuisup’ qaqugu tikiunnissaa naatsorsuutigisinnaagaat — tassa Jerusalemip iluarsarneqarluni kingumut qarmarneqarnissaata peqqussutigineqarneraniit sapaatit-akunneri 69-it ukiunngortitat qaangiuppata. Sapaatip-akunnera nalinginnaasoq arfineq-marlunnik ulloqarpoq; sapaatit-akunneri ukiunngortitat tamarmik immikkut ukiunik arfineq-marlunnik sivisussuseqarput. Tamanna peqqussutigineqarpoq Danielip toqunerata kingunerujussuagut, tassa ukiumi 455-imi Kr.in.si. Ukiumi tamatumani sapaatit-akunneri 69-it aallartipput, ukiunik 483-inik sivisussuseqarlutik ukiumilu 29-mi Kr.in.king. naallutik. Quppernerni tulliuttuni ukiumi tamatumani susoqarnersoq misissussavarput. Danielip aamma ajortit saammaanneqaqqullugit Missiarsip ‘peersitaanissaa’, imaluunniit toqutaanissaa, siulittuutigaa. — Danieli 9:24, 26; 9:25, 1900.

Missiarsi qilammi kunngiussaaq. Danielip qilammik takorruuinermini immikkut ittumi takuaa Missiarsi, ‘inuup erneratut isikkoqartutut’ eqqaaneqartoq, Jehovap issiavissaarsuanut sassartoq. Jehovap taanna “naalagaassusermik naalannaammillu kunngiussusermillu” tunivaa. Naalagaaffik taanna naassaanngitsumik atasussaavoq. Danieli naalagaaffik Missiarsikkoortoq pillugu immikkuualuttumik pissanganartumik aamma allamik paasisaqarpoq — kunngi naalakkersueqateqassaaq, ‘Qutsinnerussaartup innuttaatut illernartutut’ eqqartorneqartunik. — Danieli 7:13, 14, 27.

Naalagaaffiup tamatuma silarsuarmi naalagaaffiit suujunnaarsissavai. Guutip Danieli Nebukadnesarip, Babylonip kunngiata, sinnattuanik eqqissiunnaarutigisaanik nassuiaasinnaatippaa. Kunngip takusimavaa inuusaliarujussuaq niaqua kuultimit sanaajusoq, sakiaa taliilu sølvimit, naava siffiaalu kanngussammit, niui saviminermit isigaalu saviminermit marrarmik akusamit sanaajusut. Ujarak qaqqamit kaanngarpoq, inuusaliap isigai qajannartut eqqorpai inuusaliarlu sequmisillugu. Danieli nassuiaavoq inuusaliap timaata ilai assigiinngitsut silarsuarmi naalagaaffissuarnut kingoraartaattunut assersuutaasut, Babyloni niaquatut kuultiusutut eqqartorneqartoq siulliulluni. Danielip siulittuutigaa silarsuarmi ajortumi matumani naalagaaffiit kingullersaata nalaani Guutip naalagaaffia akuliutissasoq naalagaaffiillu taakku tamaasa aserortissagai. Taava naalagaaffik taanna naassaanngitsumik naalakkersuissaaq. — Danieli, kapitali 2.

Danieli utoqqarsuulluni Babylonip uppititaaneranik takunnittuuvoq. Pruffiitit siulittuisimanerattorluinnaq kunngip Kyrosip illoqarfik taanna uppitippaa. Kinguninnguatigut kiisami juutit aallarussaaqqanerminnit piffissaq eqqorlugu aniguipput — siulittuutigineqartutut nunartik ukiuni 70-ini inoqanngereersoq. Juutit nunami naalagaatitanit, palasinit pruffiitinillu aalajaatsunit siulersorneqarlutik naggataatigut Jerusalemi Jehovallu naalaffia qarmaqqippaat. Ukiulli 483-it qaangiuppata qanoq pisoqassava?

— Tunngavigineqartut: Danielimik allakkat.