IMMIKKOORTOQ 20
Jiisusi Kristusi toqutaavoq
Jiisusi nalliuttorsiutigisassamik pilersitsivoq; killuutigineqarpoq nappakkamullu kikiattorneqarluni
JIISUSIP ukiuni pingasuni affarmilu oqaluussillunilu ilinniartitsereerluni nalunngilaa nunarsuarmi inuujunnaartariaqangajalerluni. Juutit upperisarsiornikkut siuttui perlulioqatigiinnikkut taanna toqutaatinnialersaarpaat, taakkuali inuit taassuminnga pruffiitiusorinnittut eqqissiviilliulissasoraat. Tamatuma nalaani Saatanip Jiisusip apustiliisa ilaat — Judasi Iskarioti — killuussisunngornissaanut sunnerpaa. Upperisarsiornikkut siuttut Judasi Jiisusimik killuutiginninnissaanut aningaasanik sølvinik 30-nik neqeroorfigaat.
Unnummi kingullermi Jiisusip apustilini katersortippai poorskisioqatiginiarlugit. Judasi anisereerlugu nalliuttorsiutigisassamik, Naalakkap unnukkorsiortitsineranik, pilersitsivoq. Timiusaq tiguaa qinullunilu, timiusarlu apustilinut aqqanilinnut kinguleruttunut agguaappaa. Ima oqarpoq: “Tassa timiga ilissi pillusi tunniunneqartoq. Taamaaliortaritsi uanga eqqaaniarlunga.” Ermuseq viinnimik imalik tigugamiuk aamma taamaaliorpoq imalu oqarluni: “Ermuseq manna tassa angerusisaaq uanga aakkut pillusi kuineqartukkut.” — Lukasi 22:19, 20.
Unnuk taanna Jiisusi apustiliminut oqaasissarpassuaqarpoq. Nutaamik peqqussuteqarfigai — tassa namminissarsioratik asaqatigiissasut. Ima oqarpoq: “Asaqatigiikkussi tamatumuuna tamarmik paasissavaat ajoqersugarigissi.” (Johannesi 13:34, 35) Ilungersorluni kajumissaarpai pisussat alianartut pingajalersut uummatimikkut annilaassutigeqqunagit. Jiisusip taakku ilungersorluni qinnuppai. Unnersiutiginnissutinik erinarsoqatigiipput unnuullu ingerlanerani Naatsiivimmut Getsemanemukarlutik.
Tassaniitillutik Jiisusi seeqqummerpoq uummammiunilu qinunikkut aniatillugit. Sivitsunngitsoq sakkutuut sakkulisartut, palasit allallu taanna tigusariniarlugu tikiupput. Judasi sassarpoq Jiisusillu kuninneratigut takutillugit kina tigussaneraat. Sakkutuut Jiisusimik qilersuineranni apustilit qimaapput.
Jiisusi juutit eqqartuussisoqatigiivinut sassartinneqarami Guutimut ernerunerarpoq. Eqqartuussisoqatigiit Guutimik mitaatiginnittuunerarpaat toqutassaatillugulu. Taava Jiisusi Romamiut naalagaatitaannut Pontiusi-Pilatusimukaanneqarpoq. Pilatusip Jiisusi pinerluutaanik nassaarfiginngikkaluarlugu inupalaanut, taassuma toqutaanissaanik nilliallutik piumasaqartunut, tunniuppaa.
Jiisusi Golgatamukaanneqarpoq, tassanilu Romamiut sakkutuuinit nappakkamut kikiattorneqarpoq. Ullup qaamarna tupinnartuliornikkut taarsivoq. Ualeq taanna Jiisusi toquvoq, nunalu sajuttorsuanngorpoq. Timaa ilivermut, qaarsumut ikuttarlugu assataasumut, ilineqarpoq. Aqaguani palasit iliveq matuaat isertarfialu paarsisulerlugu. Jiisusi ilivermi tassaniiginnassava? Naamik. Tupinnarnerpaamik tupinnartuliortoqangajalerpoq.
— Tunngavigineqartut: Matthæusi kapitalit 26-27; Markusi kapitalit 14-15; Lukasi kapitalit 22-23; Johannesi kapitalit 12-19.
a Jiisusip toqunerata pilliutitut nalinga sammineqarpoq atuakkami Biibilimi sorpiaat ajoqersuutigineqarpat?-mi kapitali 5.