Josija ajunngitsunik ikinnguteqarpoq

Ilaannikkut eqqortuliornissat sapernartittarpiuk? — Inuit amerlanersaasa ilaannikkut sapernartittarpaat. Biibilimi oqaluttuarineqarpoq nukappiaqqap Josijamik atillip eqqortuliornissani ingammik sapernartissimagaa. Kisianni ikinngutiminit ajunngitsunit ikiorneqartarpoq. Josija ikinngutaalu pillugit paasisaqariarta.

Josijap Judap kunngia, Amoni, ataatagaa. Amoni ajortorujussuuvoq guutipilunnillu pallorfiginnittarluni. Josijap ataataa toqummat Josija arfineq-pingasuinnarnik ukioqarluni Judami kunnginngorpoq! Josija ataatamisut ajortuusoraajuk? — Ajortuusimanngilaq!

Meeraagaluarluni Josija Jehovamut naalakkusuppoq. Taamaattumik Jehovamik asannittut kisiisa ikinngutigerusuppai. Ikinngutaasalu Josija eqqortuliornissaanut ikiortarpaat. Taakkua ilaat kikkuuppat?

Josijap ikinngutaasa ilaat tassaavoq pruffiiti Sefania. Taassuma Judakkut oqarfigai guutipilunnik pallorfiginninnerat ajortumik kinguneqarumaartoq. Josijap Sefania naalakkamiuk guutipiluit pallorfiginagit Jehova pallorfigivaa.

Josijap ikinngutaa alla tassaavoq peroriartoqataa Jeremia. Taanna illoqarfeeqqami Josijap najugaqarfiata eqqaaniittumi peroriartorpoq. Ikinngutigiil­luangaaramik Josija toqummat Jeremiap taassuminnga maqaasinini taalliaraa. Jeremia Josijalu Jehovamut naalakkumallutik eqqortu­liorumal­lutillu ikioqatigiipput.

Josija qanoq ilinniarfigi­sinnaa­viuk? — Josija nukap­piaraa­galuarluni eqqortuliorusuppoq. Inunnik Jehovamik asannittunik ikinnguteqar­tariaqarluni paasivaa. Aamma illit Jehovamik asannittunik eqqortulior­nissannullu ikiuerusuttunik ikinnguteqarnissat pingaaruteqarpoq!