KAPITALI 4
Kamalerami nukkani toquppaa
Adami Evalu naatsiivimmiit anisitaareerlutik amerlasuunik meeqqiorput. Ernerat angajulleq, Kainimik atilik, nunalerisunngorpoq. Nukaalu, Aabelimik atilik, savanik paarsisunngorpoq.
Ullut ilaanni Kaini Aabelilu Jehovamut pilliuteqarput. Pilliut qanoq isumaqarnersoq nalunngiliuk? Tunissutaavoq immikkut ittoq. Aabelip pilliutaa Jehovap nuannaarutigeqaa, Kainilli pilliutaa nuannaarutiginngilaa. Tamanna Kainip kamaatigeqaa. Jehovap Kaini mianersoqquaa paasitillugu kamakkunnaanngikkuni ajortorujussuarmik iliuuseqariaannaasoq. Kainili tusaarusunngilaq.
Kaini Aabelimut oqarpoq: ‘Qaagit, narsaammukarta.’ Tassanilu kisimiitsillutik Kainip nukkani toquppaa. Jehova qanoq iliussava? Jehovap Kaini pillarpaa ungasissorujussuarmut aallartillugu. Kainilu ilaquttaminut uteqqinngisaannartussanngorpoq.
Tamanna uagutsinnut ilinniutissartaqarpa? Imaassinnaavoq pissutsit piumasatsitut ingerlanngippata isumalulersugut kamalerlutaluunniit. Kamannerput alliartorpat – arlaataluunniit kamannerput malugisimallugu mianersoqquppatigut – misigissutsigut aqunniapallattariaqarpagut ajortuliunnginniassagatta.
Aabelip Jehova asagamiuk eqqortuliormallu Jehovap eqqaamajuassavaa. Jehovap nunarsuaq paratiisinngortikkuniuk Aabeli uummarteqqikkumaarpaa.
“Qatanngutit eqqisseqatigeqqaarlugu utissaatit pilliutissarlu tunniullugu.” – Matiusi 5:24