KAPITALI 8
Aaperaat Saaralu Guutimut naalapput
Babelip ungasinngisaani illoqarfeqarpoq Urimik taaguutilimmik. Inuit tassaniittut Jehova guutisiorfiginagu allarpassuarnik guutisiortarput. Anguteqarporli Jehovamik guutisiortumik. Taanna Aaperaamik ateqarpoq.
Jehovap Aaperaat oqarfigaa: ‘Nunagisat ilaquttatillu qimallugit nunamut takutikkusutannut aallarit.’ Taava Jehovap neriorsorpaa: ‘Inuiassuanngortikkumaarpakkit, illillu pillutit inuppassuarnut ajunngitsuliorumaarpunga.’
Aaperaap Jehovamit sumunnartitaassanerluni nalugaluarpaa, kisianni Jehova tatigaa. Taava Aaperaat, nulia Saara, ataataa Teera soraluaalu Lotsi pigisatik poortoriarlugit naalallutik ungasissorsuarmut aallarput.
Aaperaat 75-inik ukioqartoq ilaquttanilu nunamut Jehovap takutikkusutaanut kiisami apuupput. Tikitaat Kaanaanimik taaguuteqarpoq. Tassani Guutip Aaperaat ima neriorsorpaa: ‘Nuna manna takusinnaasat meeqqannut tunniukkumaarpara.’ Kisianni Aaperaat Saaralu utoqqaallutillu meeraqanngillat. Taava qanoq ililluni Jehovap neriorsuutini eqqortissavaa?
“Aaperaat upperami nunamut kingornussassaminut aallaqquneqarpoq. Sumukassanerluni nalugaluarlugu naalalluni aallarpoq.” – Hebræerit 11:8