Kristumiutut inuunerput kiffartornerpullu pillugit ataatsimiinnermut ilitsersuutit

Imai

1. Ilitsersuutit matumaniittut ulluinnarni ataatsimiinnerni pisassaqartunut iluaqutissiaapput. Pisassaqartut tamarmik Kristumiutut inuunerput kiffartornerpullu – Najoqqutassaq aamma matumani ilitsersuutit piareersarnerminni misissussavaat. Oqaluussisartut tamarmik ilinniartutut pisassaqartalernissamut kajumissaarneqartariaqarput. Ilagiit ataatsimiinnerini peqataasartut allat Biibilimi ajoqersuutigineqartut akuerigunikkit kristumiullu najoqqutassiaat malillugit inuugunik pisassaqarsinnaapput. Oqaluussisartuunngitsoq pisassaqartalerusuppat Inuuneq kiffartornerlu pillugit ataatsimiinnermi nakkutilliisup pisassaqartunut piumasaqaatinik eqqartueqatigissavaa paasitissallugulu pisassaqartalersinnaanersoq. Eqqartueqatigiinnermi taassuma Biibilimik ilinniartitsisua, imaluunniit angajoqqaava Nalunaajaasoq, najuutissaaq. Pisassaqartunut piumasaqaatit aamma oqaluussisartunut imermut morsutsinneqanngitsunut piumasaqaatit assigiipput. – od-D kapitali 8, imm. 8.

AALLARNIINEQ

2. Minutsi 1. Sapaatit-akunneri tamaasa aallarniutitut erinarsornerup qinunerullu kingorna ataatsimiinnermik aqutsisoq sammineqartussat eqqaanerisigut qilanaartuusiisassaaq. Ataatsimiinnermik aqutsisup sammisassat ilagiinniittunut iluaqutaanerpaasussat aalluttariaqarpai.

GUUTIP OQAASIANI ERLINNARTUUTIT

3. Oqalugiarneq: Minutsit 10. Qulequtaq immikkoortullu pingaarnerit marluk pingasulluunniit ulluinnarni ataatsimiinnermut najoqqutassamiipput. Utoqqaanertaq imaluunniit ilagiinni kiffartortoq piumasaqaatinik eqqortitsisoq oqalugiassaaq. Sapaatip-akunnerani Biibilimi atuagassani atuagaq nutaaq sammineqartussaagaangat tamanna pillugu isiginnaagassiaq takutinneqartassaaq. Isiginnaagassiap qulequttallu assigiissuteqarnerat oqalugiartup eqqaasinnaavaa. Najoqqutassamili immikkoortut tamaasa sammisariaqarpai. Aamma assilissat sammineqartussanut iluaqutissatut suliarineqarsimasut atorluartariaqarpai. Biibililersaarutit allat innersuussutigineqanngikkaluartut aamma atorneqarsinnaapput najoqqutassami sammisassanut naapertuuppata.

4. Anersaakkut erlinnartut: Minutsit 10. Immikkoortumi matumani aallarniinani naggasiinanilu apeqqutit akissutaat sammineqassapput. Utoqqaanertaq imaluunniit ilagiinni kiffartortoq piumasaqaatinik eqqortitsisoq aqutsisuussaaq. Qatanngutip angutip apeqqutit tamaasa tusarnaartunut apeqqutigisariaqarpai. Allassimaffiit innersuussutigineqartut atuarneqartariaqarnersut nammineq aalajangissavaa. Akisut sekundini 30-ni sivikinnerusumilluunniit akisinnaapput.

5. Biibilimit atuffassineq: Minutsit 4. Pisassaq una ilinniartumut angummut suliassiissutigineqassaaq. Aallarniinani naggasiinanilu atuagassani atuassavaa. Ilinniartup eqqortumik, paasiuminartumik, uneqattaarnani, eqqortumik naqissusiisarluni, nipiminik allanngorartitsilluni, pissusissamisoortumik unillatsiartarluni pisarnermisullu pissuseqarluni atuffassinissaanut ikiornissaa ataatsimiinnermik aqutsisup immikkut eqqumaffigissavaa. Biibilimit atuffassissutigineqartussat ilaat naannerusarlutillu allat takinerusarmata Inuuneq kiffartornerlu pillugit ataatsimiinnermi nakkutilliisup suliassiinermini ilinniartut pisinnaasaat eqqarsaatigisariaqarpai.

OQALUUSSINERMUT PIAREERSARNEQ

6. Minutsit 15. Ataatsimiinnerup immikkoortuani matumani siunertaavoq kikkut tamarmik oqaluussinissamut sungiusarnissamut aamma oqaloqatigiinnermut, oqaluussinermut ilinniartitsinermullu pikkorinnerulernissamut periarfissinnissaat. Quppersakkami Ajoqersuineq-mi imaluunniit Inoqatit asajuk-mi ilinniagassaq ulluinnarni ataatsimiinnermut najoqqutassami pisassap kingorna ungaluuserlugu allassimasoq ilinniartut sulissutigisariaqarpaat. Pisariaqarpat utoqqaanertat tamatuminnga pisassinneqarsinnaapput. Ilaannikkut ilagiittut eqqartueqatigiittoqartassaaq. Tamanna utoqqaanertamit ilagiinniluunniit kiffartortumit piukkunnaatilimmit siulersorneqartassaaq. – Qanoq eqqartueqatigiittoqassanersoq paasiumallugu takuuk immikkoortoq 15.

7. Oqaloqatiginneqqaarneq: Pisassaq una angummut arnamulluunniit suliassiissutigineqarsinnaavoq. Ilinniartup angutip arnaq taamatuttaarlu arnap angut ilaqutarinngikkuniuk qaqeqatigisinnaanngilaa. Ilinniartoq qaqeqataalu issiasinnaallutilluunniit nikorfasinnaapput. – Oqaloqatigiissutissat oqaluusseriaatsillu pillugit paasisaqarumallutit takukkit immikkoortut 12 aamma 13.

8. Pulaaqqiineq: Pisassaq una angummut arnamulluunniit suliassiissutigineqarsinnaavoq. Ilinniartup angutip arnaq taamatuttaarlu arnap angut qaqeqatigisinnaanngilaa. (km 5/97 qupp. 2) Ilinniartoq qaqeqataalu issiasinnaallutilluunniit nikorfasinnaapput. Ilinniartup oqaloqatiginikuusami pulaaqqinnerani qanoq oqaloqatigiittoqarsinnaanersoq takutissavaa. – Oqaloqatigiissutissat oqaluusseriaatsillu pillugit paasisaqarumallutit takukkit immikkoortut 12 aamma 13.

9. Ilinniartitsineq: Pisassaq una angummut arnamulluunniit suliassiissutigineqarsinnaavoq. Ilinniartup angutip arnaq taamatuttaarlu arnap angut qaqeqatigisinnaanngilaa. (km 5/97 qupp. 2) Ilinniartoq qaqeqataalu issiasinnaallutilluunniit nikorfasinnaapput. Pisassami matumani Biibilimik misissueqateqarneq aallartinneqareersimappat ilinniartup aallarniineq naggasiinerluunniit sulissutigissanngippagit aallarniisoqartariaqanngilaq naggasiisoqartariaqarnaniluunniit. Sammineqartussatut innersuussutigineqartut tamarluinnaasa atuarnissaat pisariaqanngilaq, taamaaliortoqarsinnaavorli.

10. Upperisamik nassuiaaneq: Oqalugiaataappat angummut suliassiissutigineqassaaq. Takutitsineruppat angummut arnamulluunniit suliassiissutigineqarsinnaavoq. Ilinniartup angutip arnaq taamatuttaarlu arnap angut ilaqutarinngikkuniuk qaqeqatigisinnaanngilaa. Ilinniartup paasissutissat innersuussutigineqartut atorlugit qulequttami apeqqut paasiuminartumik periaaserilluni akissavaa. Biibililersaarut innersuussutigineqartoq oqaatigissanerlugu ilinniartup nammineq aalajangersinnaavaa.

11. Oqalugiarneq: Pisassaq una angummut suliassiissutigineqassaaq ilagiinnullu oqalugiaatitut saqqummiunneqassalluni. Quppersakkami Inoqatit asajuk-mi tapiliussaq 1 tunngavigalugu oqalugiassaguni erseqqissassavaa allassimaffiit oqaluussinermi qanoq atorneqarsinnaasut. Assersuutigalugu allassimaffik qaqugukkut atorneqarsinnaasoq, qanoq paasisariaqartoq kiisalu allassimaffik tunngavigalugu qanoq eqqarsalersitsiniaasoqarsinnaasoq nassuiarsinnaavaa. Quppersakkami Inoqatit asajuk-mi ilinniagassat ilaat tunngavigalugu oqalugiassappat nassuiassavaa pissuserineqartussaq pineqartoq oqaluussinermi qanoq ersersinneqarsinnaasoq. Allassimaffiit immikkoortoq 1-imiittut imaluunniit allassimaffiit ilinniagassami innersuussutigineqartut allat erseqqissarsinnaavai.

12. Oqaloqatigiissutissat: Immikkoortumi matumani tulliuttumilu ilitsersuutit pisassani “Oqaloqatiginneqqaarneq”-mi “Pulaaqqiineq”-milu atorneqassapput. Allamik ilitsersuuteqanngippat ilinniartup Biibilimi ilinniartitsissutigineqartut pingaarutillit ilaat eqqartussallugulu oqaloqatigeeqqinnissaq tunngavilissavaa. Ilinniartup oqaluussiffigisartakkamini soqutigineqartut ilaat nammineq toqqassavaa. Biibililersaarut videuluunniit ilinniartitsinermi atortakkatta ilaat saqqummiutissanerlugu nammineq aalajangersinnaavaa. Aallarniutip alanngaarnissaa anguniagarinagu ilinniartup oqaloqatiginnillaqqinnerulernissani, assersuutigalugu inuttut soqutiginninneq, sulissutigissavaa.

13. Oqaluusseriaatsit: Oqaluusseriaatsit ataani allassimasut ilinniartup oqaluussiffigisaminut naleqqussassavai. Assersuutigalugu:

(1) Illumiit illumut: Oqaluusseriaatsimut matumunnga ilaapput inummut ornigunnikkut, oqarasuaatikkut allakkatigulluunniit oqaluussineq aamma illumiit illumut oqaloqatigisimasamut pulaaqqiineq.
(2) Torrutiinnarlugu oqaluussineq: Uani nalinginnaasumik oqaloqatigiinnermi Biibilimik eqqartuilernissamut periarfissarsiorneq pineqarpoq. Taamaaliortoqarsinnaavoq suleqammut, atuaqammut, sanilimut aamma bussernermi sumiiffimmilu allami naapitamut.
(3) Tamanut oqaluussineq: Oqaluusseriaatsimut matumunnga ilaapput atuagaasiviit angallattakkat atorlugit oqaluussineq aamma suliffeqarfinni, aqqusinermi, biilinut inissiisarfinni sumiiffimmilu allami inunnit orniguffiusartumi oqaluussineq.

14. Videumik Biibililersaarummilluunniit saqqummiussineq: Tulluarpat ilinniartup video Biibililersaarulluunniit saqqummiunniarlugu nammineq aalajangersinnaavaa. Video innersuussutigineqarpat imaluunniit ilinniartup video saqqummiunniarlugu aalajangeruni takutinnagu eqqartuinnassavaa.

KRISTUMIUTUT INUUNEQ

15. Erinarsornerup kingorna minutsini 15-ini Guutip oqaasianik maleruaanissamut tusarnaartut iluaqutissaat sammineqassapput, sammineqartoq ataasiinnaasinnaavoq marluusinnaallutilluunniit. Allamik allassimasoqanngippat sammineqartut taakku utoqqaanertanut imaluunniit ilagiinni kiffartortunut piukkunnaatilinnut suliassiissutigineqarsinnaapput, ilagiinnulli naleqqussagaq utoqqaanertamit taamaallaat saqqummiunneqarsinnaavoq. Eqqartuinermi aqutsisoq najoqqutassami apeqqutit saniatigut aamma allanik apeqquteqarsinnaavoq. Pingaarnernut eqqartueqatigiinnissamullu naammattumik piffissaqassappat naatsumik aallarniissaaq. Apersuisoqassappat apersorneqartoq pisinnaaguni qaqisarfimmiit oqaaseqassaaq.

16. Ilagiit Biibilimik misissueqatigiinnerat: Minutsit 30. Immikkoortoq una utoqqaanertamit piukkunnaatilimmit aqunneqassaaq. (Utoqqaanertat amerlavallaanngippata pisariaqaraangallu ilagiinni kiffartortut piukkunnaatillit aqutsisinnaapput). Utoqqaanertaqatigiit nalilissavaat kikkut ilagiit Biibilimik misissueqatigiinneranni aqutsisussatut piumasaqaatinik eqqortitsinersut. Akuerineqartut pitsaasumik aqutsisinnaassapput, piffissamik eqqortitsisinnaassapput, allassimaffinnik pingaarutilinnik erseqqissaasinnaassapput kikkullu tamaasa sammineqartup atoriaannaaneranik paasinninnissaannut ikiorsinnaassallugit. Taakku atuaqqissaaqatigiinnermik qanoq aqutsisoqartassanersoq pillugu ilitsersuutit saqqummersinneqarsimasut atuarunikkit iluaqutigissavaat. (w23.04 qupp. 24, ungalusaq) Sapaatip-akunnerani sammineqartussaq naammaginartumik eqqartorneqareerpat misissueqatigiinnerup sivitsornissaa pisariaqanngilaq. Ajornanngippat sapaatit-akunneri tamaasa aqutsisut atuffassisullu assigiinngitsuussapput. Inuuneq kiffartornerlu pillugit ataatsimiinnermik aqutsisoq aalajangerpat misissueqatigiinneq naalisarneqassasoq misissueqatigiinnerup qanoq naalisarneqarnissaa siulersuisup aalajangissavaa. Aalajangersinnaavoq immikkoortut ilaat atuarneqassanngitsut.

NAGGASIINEQ

17. Minutsit 3. Ataatsimiinnermik aqutsisup ataatsimiinnermi sammineqartut iluaqutissartaat uteqqissavai. Piffissaqarpat taamaaliorsinnaavoq najuuttut oqaaseqartillugit. Aamma sapaatip-akunnerata tulliani sammineqartussat oqaatigissavai. Piffissaqarpat sapaatip-akunnerata tulliani ilinniartut pisassaqartut atii nalunaarutigisinnaavai. Allamik allassimasoqanngippat aqutsisup naggasiinermini nalunaarutit pisariaqartut oqaatigissallugillu allakkat ilagiinnut atuffassissutigineqartussat atuassavai. Paasissutissat nalinginnaasut, soorlu katersuunnissat eqqiaanissamullu pilersaarutit, qaqisarfimmiit nalunaarutigineqarnatik allagarsiivimmut nivinngarneqassapput. Nalunaarutit oqaatigineqarnissaannut allakkalluunniit atuarneqarnissaannut naggasiinermut piffissaliussap iluani angumerineqarsinnaanngippata aqutsisup qatanngutit angutit ataatsimiinnerup immikkoortuani “Kristumiutut inuuneq”-mi pisassaqartut qinnuigissavai pisassaminnik naalisaaqqullugit. (Immikkoortut 16 aamma 19 takukkit). Ataatsimiinneq erinarsornermik qinunermillu naggaserneqassaaq.

NERSUALAARINEQ SIUNNERSUINERLU

18. Ilinniartut pisassaminnik saqqummiussereeraangata ataatsimiinnermik aqutsisoq ilinniagassaq sulissutigineqartussaq tunngavigalugu minutsip ataatsip missaa atorlugu nersualaarisinnaallunilu siunnersuisinnaavoq. Pisassaq sioqqullugu aqutsisup ilinniagassaq sulissutigineqartussaq nalunaarutigisassanngilaa. Ilinniartorli saqqummeereeraangat aqutsisullu nersualaareeraangamiuk ilinniagassaq sulissutigineqartoq eqqaasinnaavaa oqaatigalugulu sooq ilinniartup ilinniagassani naammassilluaraa nassuiarluguluunniit sooq aamma qanoq ilinniartup ilinniagassaq taannarpiaq sulissutiginerussagaa. Takutitseriaaseq allatigut qanoq ilinniarfigineqarsinnaasoq aqutsisup eqqaasinnaavaa isumaqaruni tamanna ilinniartup tusarnaartulluunniit iluaqutigissagaat. Ataatsimiinnerup kingorna piffissamiluunniit allami aqutsisup ilinniartoq allat tusaatinnagit quppersagaq Inoqatit asajuk, quppersagaq Ajoqersuineq imaluunniit Skolebogen tunngavigalugu ilinniagassaq sulissutigineqartoq ilinniagassarluunniit alla pillugu atoriaannaasumik ilitsersorsinnaavaa. – Inuuneq kiffartornerlu pillugit ataatsimiinnermik aqutsisup aamma siunnersortip suliassaat pillugit paasisaqarnerujumallutit immikkoortut 19, 24 aamma 25 takukkit.

PIFFISSARITITAASUT

19. Pisassaqartut tamarmik aamma ataatsimiinnermik aqutsisoq piffissarititamik qaangiissanngillat. Ulluinnarni ataatsimiinnermut najoqqutassami pisassat piffissaligaagaluartut sammineqartussaq matussuserneqarluarsimappat suli piffissaqaraluartoq sivisunerusariaqanngilaq. Saqqummiussisut piffissamik qaangiisut ataatsimiinnermik aqutsisumit siunnersortimilluunniit allat tusaatinnagit siunnersorneqartassapput. (Immikkoortoq 24 aamma 25 takukkit). Ataatsimiinneq, erinarsuutit qinnutillu ilanngullugit, nalunaaquttap-akunneranik ataatsimik minutsinillu 45-nik sivisussuseqartassaaq.

ILAGIINNIK NAKKUTILLIISUP TIKERAARNERANI

20. Ilagiit ilagiinnik nakkutilliisumit tikeraarneqarpata ulluinnarni ataatsimiinnermut najoqqutassaq malillugu ataatsimiinneq ingerlanneqassaaq. Kisianni “Kristumiutut inuuneq”-mi ilagiit Biibilimik misissueqatigiinnerat ilagiinnik nakkutilliisup minutsini 30-ni kiffartorneq pillugu oqalugiaataanik taarserneqassaaq. Kiffartorneq pillugu oqalugiaat sioqqullugu ataatsimiinnermik aqutsisup ataatsimiinnermi sammineqartut uteqqissavai, sapaatip-akunnerani tulliuttumi sammineqartussat eqqaassavai, nalunaarutit pisariaqartut nalunaarutigissavai, allakkat pisariaqartut atuassavai tamatumalu kingorna ilagiinnik nakkutilliisoq ilisaritissallugu. Kiffartorneq pillugu oqalugiaatip kingorna ilagiinnik nakkutilliisup ataatsimiinneq erinarsuummik nammineq toqqakkaminik naggasissavaa. Qatanngut angut alla qinunermik naggaseeqqusinnaavaa. Ilagiinnik nakkutilliisup tikeraarnerani ilinniartut assigiimmik oqaasillit eqimattanut marlunnut immikkoortinneqassanngillat. Oqaluussisartoqatigiit ilagiinnik nakkutilliisup tikeraarnerani immikkut ataatsimiissinnaapput. Oqaluussisartoqatigiilli ilagiinnik nakkutilliisoq kiffartorneq pillugu oqalugialerpat ilagiinnut inersuarmiittunut akuliuteqqissapput.

SAPAATIT-AKUNNERI ATAATSIMEERSUARFIUSUT

21. Sapaatip-akunnerani ullormi ataatsimi pingasuniluunniit ataatsimeersuarfiusumi ilagiit ataatsimiissanngillat. Ilagiit eqqaasinneqassapput sapaatit-akunnerini taakkunani ataatsimiinnerni sammisassatut pilersaarutaasut nammineerluni ilaqutariittulluunniit sammineqassasut.

SAPAATIP-AKUNNERA EQQAANIAAFFIUSOQ

22. Ulluinnarmi eqqaaniaasoqassappat inuuneq kiffartornerlu pillugit ataatsimiittoqassanngilaq.

INUUNEQ KIFFARTORNERLU PILLUGIT ATAATSIMIINNERMI NAKKUTILLIISOQ

23. Utoqqaanertaqatigiit utoqqaanertaq inuuneq kiffartornerlu pillugit ataatsimiinnermi nakkutilliisussatut toqqassavaat. Taassuma ataatsimiinnerup aaqqissuussaasumik ilitsersuutillu matumaniittut malillugit ingerlanneqarnissaa akisussaaffigaa. Siunnersorti attaveqaqatigilluartariaqarpaa. Kristumiutut inuunerput kiffartornerpullu – Najoqqutassaq saqqummeriarpat ataatsimiinnermi pisassat tamaasa kikkunnut suliassiissutigineqassasut aalajangissavaa. Tamatumunnga ilaapput ilinniartut pisassaat, saqqummiussassat allat aamma utoqqaanertaqatigiinnit akuerisaasunik ulluinnarni ataatsimiinnermik aqutsisuunissamik suliassiinissaq. (Immikkoortut 3-16 aamma 24 takukkit). Suliassiileraangami eqqarsaatigisassavai ilinniartup pisassinniakkami ukiui, misilittagai aamma suliassiissutigineqartussaq taassumunnga tulluartuunersoq. Ataatsimiinnerup immikkoortuini allani suliassiilernermini assingusumik naliliisariaqarpoq. Pisassaqartut tamarmik kingusinnerpaamik sapaatit-akunnerinik pingasunik sioqqutsilluni ilisimatinneqartassapput. Kristumiutut inuunerput kiffartornerpullu – Pisassaq (S-89) atorlugu ilinniartut pisassaqarnerminnik ilisimatinneqartassapput. Inuuneq kiffartornerlu pillugit ataatsimiinnermi nakkutilliisup ataatsimiinnermi pisassaqartut allattorsimaffiata allagarsiivimmut nivinngarneqarnissaa qulakkeertariaqarpaa. Utoqqaanertaq alla ilagiinniluunniit kiffartortoq nakkutilliisumut ikiortissatut utoqqaanertaqatigiinnit suliassinneqarsinnaavoq. Pisassat ilinniartunit saqqummiunneqartussaanngitsut kikkunnut suliassiissutigineqassanersut taamaallaat utoqqaanertap aalajangersinnaavaa.

INUUNEQ KIFFARTORNERLU PILLUGIT ATAATSIMIINNERMIK AQUTSISOQ

24. Sapaatit-akunneri tamaasa utoqqaanertaq ataaseq ulluinnarni ataatsimiinnermik aqutsisuusassaaq. (Utoqqaanertat amerlavallaanngippata pisariaqaraangat ilagiinni kiffartortut piumasaqaatinik eqqortitsisut siulersuisuusinnaapput). Taassuma aallarniineq naggasiinerlu akisussaaffigai. Aammattaaq pisassaqartut tamaasa ilisaritittassavai utoqqaanertallu qanoq amerlatiginerat apeqqutaatillugu ataatsimiinnermi pisassaqarsinnaalluni, pingaartumik isiginnaagassiaq eqqartorneqartussaanngitsoq eqqarsaatigalugu. Saqqummiussisoqareeraangat oqaaseqarnerit sivikitsuararsuusariaqarput. Utoqqaanertaqatigiit aalajangissapput utoqqaanertat kikkut aqutsisutut akisussaaffeqarsinnaasut. Utoqqaanertat piumasaqaatinik eqqortitsisut paarlakaajaallutik aqutsisuusassapput. Ilagiinni aqutsisinnaasut apeqqutaatillugit inuuneq kiffartornerlu pillugit ataatsimiinnermi nakkutilliisoq utoqqaanertanut piumasaqaatinik eqqortitsisunut allanut sanilliullugu akulikinnerusumik aqutsisuusarsinnaavoq. Utoqqaanertaq ilagiit Biibilimik misissueqatigiinneranni aqutsisutut piukkunnaruni aamma ataatsimiinnermik aqutsisutut piukkunnarsinnaassagunarpoq. Eqqaamaneqassaarli utoqqaanertaq aqutsisoq ilinniartunik pisassaqartunik asannittumik iluaqutaasumillu nersualaarisassammat, pisariaqaraangallu siunnersuisassammat. Aqutsisup aamma ataatsimiinnerup piffissaq eqqorlugu naammassinissaa qulakkiissavaa. (Immikkoortut 17 aamma 19 takukkit). Aqutsisup piumaguni inissaqarpallu tulliulluni saqqummiussisussap oqaluttarfimmukarnerani taanna ilisaritissinnaajumallugu mikrofoni kanaartalik qaqisarfimmiittoq alla atorsinnaavaa. Taamatuttaaq aqutsisoq piumaguni ilinniartup Biibilimit atuffassinerani aamma ataatsimiinnerup immikkoortuani “Oqaluussinermut piareersarneq”-mi qaqisarfimmi nerriviup eqqaani issiasinnaavoq. Tamanna piffissamik atorluaanermut iluaqutaasinnaavoq.

SIUNNERSORTI

25. Siunnersortip pisariaqaraangat utoqqaanertat ilagiinnilu kiffartortut oqalugiaataat pillugit allat tusaatinnagit siunnersortassavai, taamatuttaaq ulluinnarni ataatsimiinnermi saqqummiussineq, tamanut oqalugiarneq aamma Napasuliaq Alapernaarsuiffik-mik atuaqqissaaqatigiinnermi imaluunniit ilagiit Biibilimik misissueqatigiinneranni aqutsineq atuffassinerluunniit pillugit. – Immikkoortoq 19 takuuk.

ILINNIARTUT EQIMATTANUT IMMIKKOORTINNEQARNERAT

26. Ilinniartut amerlassusii apeqqutaatillugu ilagiinni ilinniartut eqimattanut immikkoortinneqarsinnaapput. Eqimattani tamani piumasaqaatinik eqqortitsisumik, ajornanngippat utoqqaanertamik, siunnersorteqartassaaq. Pisariaqarpat ilagiinni kiffartortoq piumasaqaatinik eqqortitsisoq siunnersuisuusinnaavoq. Utoqqaanertaqatigiit kikkut taamatut kiffartorsinnaanersut paarlakaajaattassanersullu aalajangissavaat. Siunnersortip immikkoortumi 18-imi malittarisassat malittariaqarpai. Ilinniartut eqimattanut immikkoortinneqarunik ataatsimiinnerup immikkoortuani “Guutip oqaasiani erlinnartuutit”-mi “Anersaakkut erlinnartut”-up kingorna ilinniartut qinnuigineqassapput ineeqqamukaqqullugit. Ilinniartut saqqummeereerunik inersuarmut iseqqissapput.

ISIGINNAAGASSIAT

27. Ataatsimiinnermut atatillugu isiginnaagassiat toqqarneqarsimasut atorneqassapput. Ulluinnarni ataatsimiinnermi isiginnaagassiat atortorissaarutini elektroniskiusuni assigiinngitsuni app-eq JW Library® atorlugu pissarsiarineqarsinnaapput.

S-38-GL 9/25