Harmagedon — sunáungitsok

ornigarput Haifamíngãnît bîlerdlune ungasíngilaĸ. kangiata ĸiterdliup seĸerngata kíssangârtup atâne avĸusineĸ Kisjonip kûgssuata kujatâta tungânĩtoĸ ingerdlavigârput ĸôrĸup nerukitdleriarnera tikitdlugo. ĸuvnerssuaĸ nerukitsoĸ Karmelip ĸáĸaisa portusût Galilæavdlo ĸagtunerisa akornánĩtoĸ avĸusârparput, tássángáinardlo Esdraelonip narssarssua siligtoĸ pûgutarssuartut íkátutut angnertôrssuartut ítoĸ tikíparput. narssarssûp kujatâ ingerdlavigiuarparput ĸagtorngup malungnartumik manigsumik ĸâgdlup, nunatut ĸatsigsutut torĸingnerussututdlo ítup, nuinigssâta tungânut. âjuna ornigarput! tássa Megiddop ĸagtunera, imalũnît tell-ia (tássa igdloĸarfiusimassup igdlukuisa ĸulãne ĸagtuneĸ), oĸautsip Harmagedonip nagguvia.

HARMAGEDONIP sũssusia pâsigssáungitsutut pasinakujugtututdlo isumaĸarfigineĸartarpoĸ. ássigĩngitsorpagssuarnik isumaĸartíneĸartarpoĸ. oĸautsivdle Harmagedonip, imalũnît „Megiddop ĸáĸâ“ta, Har-Magedon nagguvigâ.a oĸauseĸ táuna bîbilimit tigussauvoĸ sarĸúmersitat 16:16-ime agdlagsimavdlune, tássanilo agdlagsimavoĸ: „najugkamutdlo Eprîarit oĸausînik Armakitûnimik [tássa: Harmagedonimik] taineĸartumut katerssorpai.“

kíkut Harmagedonimut katerssorneĸarpat, sunalo sujunertaralugo? sarĸúmersitat 16:14-ime akíssuteĸarpoĸ: „inuit najugâta tamarme [kúngê] sorssungnigssamut Gûtip ajugaĸángitsup uvdlugssarssuane piumârtumut katerssor“neĸarput.

akíssutit táukua aperĸutigssarpagssuit avdlat aperĸutaulersípait. ’kúngit’ táukua kíkut sorssugfigísavait, sunalo akerdlerĩssutigalugo? suna sorssugfigssauva? atominik sákugssiat atúsanerpait? sorssungnigssaĸ pitsailineĸarsínauva? erĸortumik oĸautigalugo Harmagedon sunarpiauva?

tássáungilaĸ nuname najugaĸ

Harmagedon nuname najugausínáungilaĸ. ĸáĸaĸángilaĸ taima ítumik taigûtilingmik — kisiánile ĸagtuneĸarpoĸ Megiddomik taineĸartumik ĸangarssuaĸ igdloĸarfiusimassumik. Harmagedonip erĸortumik isumaĸarnera pâsineĸarsínauvoĸ akiũnerit Megiddop erĸâne itsarssuaĸ ingerdláneĸartartut ĸiviardlugit.

kangiata ĸiterdliup oĸalugtuagssartâne akiũnerit sorssũneritdlo sualungnerpât ajugaunermutdlo píssutaunerussut ilait Megiddome ingerdláneĸarsimáput. akiũnerit pingârutigdlit tássane ingerdláneĸarsimassut autdlarĸautigât ukiut 2000-gssãne u.n.m.a.s. Ægyptenime faraop Thutmosis III-p kana’animiut syriamiutdlo nâlagkersuissuinut ajugaorujugssuarnera, ukiutdlo ingerdlaneráne pissarput ukioĸ 1918 tikitdlugo tulûp sákutût nâlagaunerssâta Viscount Allenbyp tyrkit sákortûmik artorssartingmagit.

bîbilimigdle atuarĸigsârtartut pingârnerussutut isumaĸarfigísavât Megiddome pisimassoĸ sákutût Israelíkûssut erĸartũssissoĸ Barak nâlagaunertaralugo kúngip Jabinip sákutôrpagssuinut sákutût nâlagãnit Siseramit sujulerssorneĸartunut ajugaorujugssuarnerat. Jehova Gûte akuliúpoĸ Israelíkutdlo ajugaorujugssuartitdlugit. — erĸartũssissut 4:7, 12-16, 23; 5:19-21.

taimáitumik pâsineĸariartorpoĸ Harmagedon tássáusassoĸ akiũnerssuaĸ pingârtorujugssuaĸ, kíkutdlo ajugaussut ĸularnángivísassoĸ.

tássáusángilaĸ inuiaĸatigît nunamiut sorssũnigssât

akerdlerĩssut akiũnigssarssuarme Harmagedonime aulajangerneĸartugssaĸ — kina silarssuarmut nâlagaussugssaussoĸ — uvdlumíkut akerdlerĩssutauvoĸ pingârtorujugssuaĸ. nâlagauvfigssuitdle píssauniligssuit mardluk mãnákut nauk silarssuarmut nâlagaunigssaĸ ingiaĸátáussutigigaluarât, Harmagedon tássáusángilaĸ silarssuaĸ tamákerdlugo sorssungnigssaĸ nâlagauvfigssuit píssauniligssuit táukua nâlagaunermik unangmivfigssât. ilumôraluarpoĸ sákugssaliorníkut ingiarniúneĸ aitsât taima akisutigissoĸ ilungersornartigissordlo mãnákut silarssuarme ingerdláneĸartoĸ, tamánalo erĸarsautigalugo India Today-me agdlagsimavoĸ: „taimailiornerup nunarssuaĸ mána Harmagedonip — tássa nâlagauvfît sorssungnigssâta inârutaussup — kigdlinganut ârdlerinartumik pisípâ.“ sarĸúmersitanile 16:14-ime takutíneĸarpoĸ ’inuit najugâta tamarme kúngê’ ’sorssungnigssame Gûtip ajugaĸángitsup uvdlugssarssuane piumârtume’ peĸatigĩsassut.

taimáitumik Harmagedon tássáusángilaĸ inuit ingmingnut sorssũnigssât. Gûtip sorssungnigssarâ. Harmagedonime nâlagauvfît nunamĩtut tamarmik ârĸiagîgdlutik sorssugfigísavait „katerssat ĸilangmiussut“ „kúngit kúngiat nâlagkatdlo nâlagât“, tássa Kristus Jesus, nâlagaralugo sorssugtut. táuna silarssuarmut nâlagaussugssaviuvoĸ, Gûtip ’sût tamaisa Kristusip isigaisa atãnut pisingmagit’. — sarĸúmersitat 19:14, 16; Evfisumiut 1:22.

tássáusángilaĸ atominik sákugssiat atordlugit sût tamarmik aserordluínarfigssât

atominik sákugssiat atordlugit sorssungneĸarsínauneĸ ima amîlârnartigingmat inugpagssuit erĸarsautigiumángilâtdlũnît. ilisimatût 40-t 1983-ime misigssueĸatigîngneráne pâsineĸartut nâpertordlugit migssiliũneĸarpoĸ atominik sákugssiat atordlugit silarssuaĸ tamákerdlugo sorssungneĸásagpat silarssûp inuisa pingajorarterutait agfaitdlũnît ingerdláinaĸ toĸúsagaluartut. nalunaerusiât, atuagagssiame Science-ime sarĸúmersíneĸartoĸ, nâpertordlugo amiákûvdlutik inûssut alianangârtumik sujunigssât sujuligtûtigineĸarpoĸ. ilimasârivdlune agdlagsimavoĸ: „nâlagauvfît píssauniligssuit sorssũneráne atominik sákugssiat angnertungâtsiartumik atorneĸásagaluarpata, nunarssuarme tamarme píngortitat avdlángornigssait ima angnertutigísagaluarput nunarssuarme ũmássusigdlit naussutdlo ingmíkut píssuseĸatigĩkûtaisa ilarpagssuisa nungúnigssât ilimanardlune. tamána písagaluarpat, Homo sapiens-ip [tássa inuit] nungúsínaunigssâ pinaviángitsutut isumaĸarfigineĸarsínáungilaĸ.“

Gûtip ajugaĸángitsup Jehovap taima amîlârnartigissoĸ pitísagaluarnerpâ? nâgga! táussuma nuna „soĸángitsugssaĸ“ píngortíngilâ, ĸularungnaersitdlutale oĸarpoĸ píngortíkine „inoĸartugssaĸ“. (Isaia 45:18) Harmagedonime Gûtip ’nunamik aseruissut aseror’umârpai, atominik sákugssiat atordlugit sût tamarmik aserordluínarfigssãne ikuatdlagtínago. — sarĸúmersitat 11:18.

tássáungilaĸ ajúngíssutsip ajússutsivdlo akiũtuáinarnerat

ugperissarsiornerup tungâtigut pissortat ilait isumaĸarput Harmagedon tássaussoĸ ajúngíssutsip píssaunerisa ajússutsivdlo píssaunerisa, silarssuarme piussut imalũnît inûp erĸarsautaine piussut, akiũtuáinarnerat. „Harmagedon uvdlut tamaisa silarssûp ilâne sumilũnît pissáinarpoĸ,“ atuagkame bîbilimik navsuiautitalingme agdlagsimavoĸ. ĸanordle taimáisínauva bîbilime neriorssûtigineĸarmat Harmagedonime nâlagauvfît inuitdlo iluaitsut tássángáinaĸ sûjungnaersíneĸásassut? Gûtimit kúngíngortitauvdlune tanitap Kristusip Harmagedonime ’tigumiaminik saviminiussumik ordlorartísavai, aserorterdlugitdlo marriortup marriâsut’. — Tussiaat 2:9; ãmátaoĸ takúkit ússatit 2:21, 22; sarĸúmersitat 19:11-21.

tássáusángilaĸ silarssuarme aningaussarsiornermut túngassut ajornartôrnigssât

silarssuarme nâlagkersuissut píssauneĸarnerpaussut ârdlerĸutigât silarssûp pingajuanik taineĸartartume nunat sujuarsarniagkat akiligagssamingnik akilîsínáungínerata kinguneriartuârsínáusagâ silarssuarme tamarme aningaussarsiorníkut píssuseĸalernigssaĸ atuagagssiame Business Life-ime taineĸartoĸ „aningaussarsiornermut túngassutigut Harmagedon“. silarssuarme tamarme aningausserivît ârĸigssũssinere tamarmik ajornartũsagaluarpata angnertungârtumik kingunipiloĸásagaluarpoĸ, tássáusángilardle Harmagedon. Harmagedon bîbilime erĸartorneĸartoĸ silarssuaĸ tamákerdlugo píssusiúsaoĸ sorssungnermut atassoĸ, aningaussarsiornermut atanane. pruvfîte Jeremiasip nivtarpâ takordlôrnarsisitdlugo imáitumik oĸalugtuardlune: „[Jehova] saĸitsautigssaĸar[poĸ] akimángitsunut, uvinigdlit tamaisa erĸartũkumârmagit; iluaitsut panamut túniúkumârpai.“ — Jerimia 25:31.

tássáusángilaĸ kangiane ĸiterdlerme sorssungnigssaĸ

„ĸaĸugulũnît akiũnerssuit naggatigssât kangiane ĸiterdlerme nagdliúkumârpoĸ,“ îvangkîliulerissoĸ silarssuarme tamarme tusâmassaĸ Billy Graham oĸarpoĸ. tamána pivdlugo ugperissarsiorníkut suleĸatime ilarpagssue isumaĸatigai. Graham isumaĸarportaoĸ Harmagedon kinguartíneĸarsínaussoĸ. „uvanga isumaga maligdlugo silarssûp mãnákut Harmagedon torârpâ,“ oĸarpoĸ, „anersãkutdlo eĸêrsaineĸángigpat Gûtimutdlo sãngíkuvta, ukiune ĸulilingne mákunane silarssûp Harmagedonine atorumârpâ.“

Megiddop erĸâta „[nunap] kúngê táukualo katerssait“ imarisínáungivigpai. (sarĸúmersitat 19:19) taimaingmat bîbilip oĸausê malĩnavigdlugit ugperissaĸarniartut erĸarsautât Harmagedon tássáusassoĸ silarssuarmiut tamarmik sorssũnigssât Megiddop narssarssuane erĸortûssume tátûtdluínardlutik akiũnigssât pisínáungivigsutut isumaĸarfigineĸásángínerpa? pruvfîtip Jeremiasip takutitsiarpâ Harmagedonip angujumârai ’nunap isordlê’ taimaníkutdlo toĸutat „nunamĩkumâr[tut] isuanit isuatalo áipânut“. — Jerimia 25:32, 33.

ãmalo Harmagedon tássaungmat ’sorssungnigssaĸ Gûtip ajugaĸángitsup uvdlugssarssuane piumârtoĸ’, kialũnît nagdliutsailisínáungilâ. inuit ĸanoĸ iliorsínáungitdlat kinguartíniardlugo. akiũnigssap autdlartivfigssâ Jehovap aulajangerêrpâ. ’kingorĸutsísángilaĸ.’ — sarĸúmersitat 16:14; 11:18; Hâpakuk 2:3.

neriungnermut túngavik

nâpertuivdluarnermik nuánarissaĸartut Harmagedon sujôragísángilât. akerdlianigdle, neriungnermut túngaviuvoĸ. bîbilime agdlagsimavoĸ: „ĸilagdlo takuvara angmassoĸ, atalo ĸimugtuarssuk ĸaĸortoĸ, ĸânilo igsiassoĸ ilumôrtumik sagdlusuitsumigdlo taineĸarpoĸ erĸartũssinermigutdlo sorssungnermigutdlo nâpertuivdluarpoĸ.“ (sarĸúmersitat 19:11) akiũnerssuarme Harmagedonime nuna ajússusêrúneĸardluínásaoĸ, Harmagedonivdlo píssutsit nâpertuivdluartut atûtilerserĸingneĸarnigssât avĸutigssiorumârpâ. — Isaia 11:4, 5.

ukiut 100-t sivnerdlugit Jehovap nalunaiaissuisa tusardliútarpât píssutsit ârĸigssũssauneránik matumínga nâlagkersuissunut perĸuserdlugtuliortartunut mángertisimassunutdlo Gûtip ajugaujumârnigssâ. ingangmik ukioĸ 1925-míngãnîtdle nalunaiaissut Harmagedonip sũssusia pâsivdluínarpât nipangiúkumanagulo. kigsautigât inuit ikiorumavdlugit Harmagedonime amiákûvdlutik inûnigssãnut, toĸutagssanut ilaorĸunagit. taimáitumik tusarnârtut tamaisa kajumigsârtarpait Joelip sujúnersûtâ maleruarĸuvdlugo, Jûîtdlip agdlagai 3:4, 5-ime erĸartorneĸarmat ’Jehovap uvdluata angeĸissup sujôranartup nagdliúnigssâ’, nangitdlunilo agdlagsimavoĸ: „nalingínaĸ [Jehovamik] arĸagut tordlorfigingnigtoĸ aniguiumârpoĸ.“

ilaitdle erĸarsarunarput: Gûtip asangnigtup Harmagedon ilumut pitíkumásavâ? Harmagedonip erĸigsinigssaĸ piviussoĸ kingunerísavâ? Napassuliaĸ Alapernaerssuivfik normo tugdleĸ atuarniaruk, aperĸutit táuko tássane akineĸásangmata. (wD 1/1 85)

[Quppernerup ataani ilanngussaq]

[Qupp. 6-mi ungalusaq]

Harmagedon sunauva?

Harmagedon TÁSSÁUNGILAK’ . . .

◆ nuname najugaĸ

◆ inuiaĸatigît sorssũnigssât

◆ atominik sákugssiat atordlugit sût tamarmik aserordluínarfigssât

◆ silarssuarme tamarme aningaussar-siornermut túngassut ajornartôrnigssât

◆ ajúngíssutsip ajússutsivdlo akiũnerat

◆ kangiane ĸiterdlerme sorssungnigssaĸ

Harmagedon TÁSSAUVOK’ . . .

◆ píssuseĸ silarssuarme tamarme atũtugssaĸ, taimaníkugssardlo nuname nâlagauvfît Gûtip ernera, Kristus Jesus, íngilîlo katerssarpagssuit sorssugfigísavait ’sorssungnigssame Gûtip ajugaĸángitsup uvdlugssarssuane piumârtume’

[Qupp. 7-mi assiliartaq]

Harmagedonime Gûtip kúngíngortitâta, Jesus Kristusip, ’nâlagauvfît iluaitsut tamaisa tigumiamik saviminiussumik ordlorartísavai, aserorterdlugitdlo marriortup marriâsut’. — Tussiaat 2:9.