Jesusip inuunera ajoqersuineralu:
Inunngunngikkallaramili ataqqinartinneqarpoq
INNGILIP Gabrielip arnaq inuusuttoq Maria ernertaarumaarnissaanik taassumalu naassaanngitsumik kunngiunissaanik oqaluttuutereerpaa. Mariali aperivoq: ’Qanoq ililluni tamanna pissava, angummik atoqateqannginnama?’
’Guutip anersaava iluartoq ilinnut piumaarpoq, tamannalu pillugu erniassat Guutip erneranik taaneqassaaq,’ Gabriel nassuiaavoq. Tamatuminnga Maria paasinneqqullugu Gabriel nassuiaaqqippoq: „Atalu, Elisabetissaaq eqqarlerisat ernertaassaminik naartulerpoq utoqqaanermini, qaammatillu arfinilinngorpai taassuma ernisuitsuuneragaasup.“ Gabrielip oqalunnera Mariap upperaa oqarlunilu: „Oqaatsit naapertorlugu pineqarnaanga!“
Kinguninngua Gabrielip Maria qimappaa, Mariallu Elisabet uini ilagalugu Judæap qaqqalittaani najugaqartoq tikeraarniarlugu piareersalerpoq. Nazaretimi Mariap najugaqarfianit tikeraarfissaa ungasittuuvoq ullut pingasut sisamalluunniit ingerlasariaqarluni.
Kiisami Maria apuukkami Zakariasikkut illuannut iserpoq ilassillugillu. Taava Elisabet anersaamik iluartumik ilumioqangaalerpoq, Marialu oqarfigaa: „Pilluaqqusaavutit arnani, pilluaqqusaavorlu timivit ilumiua. Sunalu taama pineqaatiginerpara naalakkama arnaata ornimmanga? Ata, ilassinnittutit tusalerakkit ilumiuga nuannaarluni ilunni aalalerpoq.“
Maria oqaatigisassaanngitsumik nuannaarluni oqarpoq: ’Guutip uannut angingaartunik iliorfiginninneri pillugit, matuma kingornagut kinguaariit tamarmik pilluarnerassavaannga.’ Maria qaammatit pingasut missaanni Elisabetimiippoq, Elisabetillu sapaatit akunnerini kingullerni naartuffiini qularnanngitsumik ikiuutaalluaqaaq. Tassami arnanut ilumoortunut taakkununnga Guutip ikiuineratigut ilumilersimasunut nuannissaqaaq piffissami aalajangersimasumi inuuneranni pilluaqqusaaffiusumi najorsinnaasimanerat.
Inunngunngikkallarmalli ataqqinaat Jesusimut takutinneqartoq malugaajuk? Elisabetip Jesus ’Naalakkaminik’ taavaa, Marialu isermat naartua nuannaarnermik pikippoq. Aappaatigut inuit allat Maria meerassaalu ataqqinninngitsumik iliorfigaat, tamannalu kingusinnerusukkut takussavarput. Immikkoortumi tullermi Elisabetip meeraa Johannes annerusumik ilisariniassavarput. Lukas 1:26-56.
◼ Mariap qanoq ililluni naartulerumaarnissaminik paasinninnissaanut ikiorniarlugu Gabriel qanoq oqarpa?
◼ Qanoq ililluni Jesus inunngunngikkallaramili ataqqinartinneqarpa?
◼ Qanoq sivisutigisumik Maria Elisabetimiippa, soorliuna piffissami tassani Mariap Elisabetimiinnissaa pissusissamisoortoq? (wD 15/4 85)