Jesusip inuunera ajoqersuineralu

Jesus ulloriarsiortullu

ANGUTERPAALUIT kangianit tikissimapput. Ulloriarsiortuupput — oqartarpullu ullorissat inissisimanerat najoqqutaralugu siunissamik siulittuisinnaallutik. Kangiani najukkaminni ulloriaq nutaaq takusimavaat, massakkumullu kilometerit hundredeppaalukasiit Jerusalemip tungaanut malittarereersimavaat.

Ulloriarsiortut taakku Jerusalemimut pigamik aperipput: „Inoorlaap juutit kunngissaat sumiippa? Ulloriaa pavani takugatsigu palloriartorparput.“

Jerusalemimi kunngip Herodesip tamanna tusaramiuk assut eqqissiunnaassutigaa. Taamaattumik palasiunerit qaaqquai aperalugillu: ’Messias sumi inunngussava?’ Allakkallu Illernartut innersuussutigiitigalugit oqarput: ’Betlehemimi.’ Herodesillu ulloriarsiortut aatikkassuarpai oqarfigalugillu: „Aallarlusi naalungiaq apeqqutigeqqissaarniarsiuk, nanigussiullu nalunaarfigisinga, uangattaaq pallorfigiartussagakku.“ Kisianni Herodesip ilumigut kissaatigeqaa meeqqap naninissaa toqutikkumagamiuk!

Aallartullu tupinnaqisumik pisoqarpoq. Ulloriaq ulloriarsiortut kangianiikkallaramik takusaat nikippoq siornanniilerlunilu. Ulloriaq taanna nalinginnaasimanavianngilaq. Siulersorniaannarlugit qilammut ikkussaasimassaaq. Ulloriarsiortullu ulloriaq taanna malippaat illu Josefip Mariallu inisimaffigisaat tikitserlugu.

Ulloriarsiortut illumut iseramik takuaat Maria meeranngualu Jesus. Tamarmik seeqqummerput pallorfigalugulu. Tunissutissatillu puuminnit amuaat, kuulti, tipigissaat morralu. Kingornatigut Herodes meeqqap sumiinneranik oqaluttuukkiartussallugu uternissaminnut piareertullu sinnattukkut Guutimit taamaaliornissaminnut nangarneqarput. Taamaattumik aqqut alla atorlugu nunaminnut aallarput.

Kiaana ulloriarsiortut siulersussallugit ulloriaq qilammut ikkussimagaa? Eqqaamajuk ullorissap Jesusimut Betlehemimiittumut toqqaannartumik siulersunngimmagit. Jerusalemimut siulersorneqarput, tassanilu kunngi Herodes, Jesusimik toqutserusuttoq, attaveqarfigalugu. Herodesilu iluatsitsisimassagaluarpoq Guuti akulerussimanngitsuuppat ulloriarsiortullu Herodes Jesusip sumiinneranik oqaluttuunnissaanik inerterlugit. Jesusip toqunnissaanik kissaateqartoq tassaavoq Guutip akeraa, Satan Diaavulu, taassumalu siunertaminik naammassinniaraluarnermini ulloriaq taanna atorpaa. Matîuse 2:1-12; Migga 5:1. (wD 1/7 85)

◆ Suup takutippaa ulloriaq ulloriarsiortut takusaat ulloriaasoq nalinginnaanngitsoq?

◆ Ulloriarsiortut Jesus sumiittoq nanivaat?

◆ Qanoq ililluta nalunngissinnaavarput ulloriarsiortut siulersorniarlugit ullorissamik qilammut ikkussisimasoq tassaasoq Satan?