Jesusip inuunera ajoqersuineralu

Jesusip ussernartorsiortinneqarneri ilinniarfigikkit

JESUS kuisissimatsiaannarluni Guutip anersaavanit siulersorneqarluni Judæap puilasuitsuanukarpoq. Eqqarsaatigisassarpassuaqarpoq, kuisinneragummi ’qilaat ammalerput’, taamaalillunilu qilammi pisut paasisinnaalerlugit. Guutip erneratut anersaajusutut inuusimanini Jesusip eqqaamalluarpaa, aammalu Guutip oqaaserisimasai tamaasa. Massakkorpiaq eqqarsaatigeqqissaagassarpassuaqarpoq!

Jesus ullut 40-t unnuallu 40-t puilasuitsumiippoq tassanilu piffissamik nerinngiivilluni. Taamaattumik kaattorujussooriarmat Diaavulup usserniarlugu saaffigaa, oqarluni: „Guutip ernerippatit ujaqqat uku timiusanngoqqukkit.“ Jesusip nalunngilaa nammineq inuttut kissaatigisani piinnarlugit tupinnartuliorsinnaassutsi atussallugu kukkunerusoq. Taamaattumik usserneqarumanngilaq.

Diaavululi nakkaannanngilaq. Misileqqippaalu. Jesus naalaffiup qarmarsuanit pisseqquaa Guutip inngiliisa annaatissammassuk. Jesusilli ussiiniarneq taanna taama ittannerorpasitsigigaluartoq nakkaanarfiginngilaa. Jesusip Allakkanit Illernartunit issuaajutigaluni takutippaa Guutimik misiliiniarneq eqqunngitsuliornerusoq. Pingajussaanik Diaavulup Jesus usserniaramiuk tupinnartuliornikkut silarsuup naalagaaffissui takutippai oqarlunilu: „Makku tamaasa ilinnut tunniukkumaarpakka, nunamut pallorfigigumma.“ Jesusilli ajortumik usseriarneqarnerigaluani aamma itigartippaa, Guutimullu ilumoortuarnini qinerlugu.

Jesusip usseriarneqarnerigalui taakku uagut ilinniarfigisinnaavavut. Taakkua takutippaat inuit ilaasa ima oqartarnerat: ’Diaavulu tassaaginnarpoq inuup iluani ajortoq,’ ilumuunngitsuusoq, takutilluguli Diaavulu kinaassusiliusoq takussaanngitsoq. Aammattaaq Jesusip usseriarneqaraluarnerisa pingajuata takutippaa silarsuarmi naalagaaffissuit tamaasa Diaavulup pigisarigai. Diaavulummi neqeroorutini pigisimanngitsuuppagit qanorilillutik Jesusimit ussernartorsiorfigineqassagaluarpat?

Makku eqqarsaatigeriakkit: Diaavulu oqarpoq ataasiaannarluniluunniit Jesusip pallorfigigaluarpani akilerumaarlugu, allaat nunap naalagaaffissui tamaasa tunniukkumaarlugit. Diaavulup tamatumunnga assingusumik usserniarsinnaalluarpaatigut, immaqa pilerinartunik periarfissinnermisigut, soorlu nunap pisuussutaanik, pissaanermik atorfimmilluunniit qutsissumik angusinissamik. Kisianni tamanit silatunerpaassaaq Jesusip iliornera malikkutsigu Guutimullu ilumoortuaannarutta misilinneqarnerput suugaluarpalluunniit! Mattæus 3:16; 4:1-11; Markus 1:12, 13; Lukas 4:1-13.

◆ Qilaat ammarnerat Jesusimut qanoq isumaqarpa?

◆ Diaavulup Jesus qanoq ililluni usseriarpaa?

◆ Jesusip usseriarneqarneri qanoq ilinniarfigisinnaavavut? (wD 1/10 85)

[Qupperneq 9-mi tamakkerlugu asseq]