Jesusip inuunera ajoqersuineralu
Johannes kinguariarpoq, Jesus siuariarluni
UKIUMI 30-mi upernaakkut poorskereersoq Jesusip ajoqersugaasalu Jerusalem qimappaat. Galilæamulli angerlanngillat Judæamili angalaalerlutik, tassanilu inuit kuisarpaat. Johannes Kuisisup aamma suliaq tamanna ukiup ataatsip missaani maanna ingerlatereersimavaa, sulilu ajoqersukkaminik najorteqarpoq.
Iluamik oqaatigalugu Jesus nammineq kuisineq ajorpoq, ajoqersugaali taassumannga siulersorneqarlutik kuisisarlutik. Taakkua kuissutaat Johannesip kuissutaatulli isumaqarpoq, tassa juutit angeruseq tunngavigalugu inatsisinik Guutimit atulersinneqarsimasunik unioqqutitsisimanerata kingorna isumataarnermut assersuutaammat. Makinnermili kingorna Jesusip ajoqersukkani kuissummik allamik isumalimmik kuisisassasut oqaluttuuppai. Kristumiutut kuisinneq assersuutaavoq inuup imminut tunniulluinnarneranut Jehova Guutimut kiffartorumalluni.
Kisianni Jesusip kiffartornerata aallartilaarnerata nalaani — naak immikkoorlutik suligaluarlutik — Jesus aamma Johannes isumataartunik ajoqersuillutillu kuisisarput. Johannesilli ajoqersugai Jesusimut sinngalerput, Johannesimullu maalaarput oqarlutik: „Rabbi! . . . [taanna] kuisisarpoq, tamarmillu ornippaat.“
Johannesili sinnganngilaq. Akerlianilli Jesusip siuariartornera nuannaarutigaa, kissaatigaalu tamanna aamma ajoqersukkami nuannaarutigissagaat. Oqarfigai: „Ilissimi ilisimannittuuvusi oqarama: Kristusiunngilanga, siornagulli aallartitaavunga!“ Taavalu kusanartumik assersuusiorpoq: „Nuliassamik piginnittoq uissaavoq, uissalli ikinngutaata taassuminnga tusarnaartup uissap nipaa tipaatsuutigillaaraa. Tipaatsuutiga tamanna maanna naammassisimavoq.“
Tamanna ukiup affaanik sioqqullugu Johannesip, uissap ikinngutaatut, ajoqersukkani Jesusimut ilisaritikkamigit nuannaarnermik misigisimavoq. Taakkua ilaat Kristusip nuliassaanut qilammiusumut ilaasortaasussanngorput. Katersami tassaniissapput kristumiut anersaamik iluartumik tanitaasut. Johannesip kissaatigaa ajoqersukkat suli imminiittut Jesus malissagaat, tassami isumagisassani tassaammat Jesusimut aqqummik piareersaanissaq, aammalu taassuma kiffartornerata siuarsarnissaa. Soorlu Johannesip nassuiaraa: „Taanna alliartussaaq uangali milliartussaanga.“
Tamatuma kinguninngua kunngi Herodesip Johannes tigusaraa. Herodesip Herodias, qatanngummi Filipip nulia, katissimavaa, Johannesillu tamanut oqaatigimmagu taama iliornera kukkusuusoq, Herodesip parnaarussaatippaa. Jesusip tusaramiuk Johannes tigusaasimasoq, ajoqersukkani ilagalugit Judæa qimappaa Galilæaliarlunilu. Johannes 3:22-miit 4:3 ilan- ngullugu; Apustilit suliaat 19:4; Mattæus 28:19; 2 Korintumiut 11:2; Markus 1:14; 6:17-20. (wD 15/12 85)
◆ Jesusip makititaanera sioqqullugu kuissut taassuma siulersuineragut suliarineqartoq qanoq isumaqarpa? Aammalu kuissut kingorna suliarineqartoq qanoq isumaqarpa?
◆ Johannesip qanoq takutippaa ajoqersukkami maalaarutaat patsisissaqanngitsuusoq?
◆ Sooq Johannes parnaarussaava?