Jesusip inuunera ajoqersuineralu

Pupissoq naakkinninnermik ersersitsiffigineqartoq

GALILÆAP illoqarfii Jesusimit ajoqersugaasalu ilaannit sisamanit angalaffigineqarlutik tamakkeriartuaarneqartillugit, Jesusip iliuusaanik nuannersunik tusagassat sumi tamaani siammariartuaarput. Taassuma suliaanik tusakkat aammattaaq illoqarfimmut angutip pupissup najugaanut anngupput. Angut taanna allaat nakorsap Lukasip oqaatigaa ’pupissorsuusoq’. Nappaat taanna amiilaarnartorujussuuvoq, atuullualeruttornermini timip pisatai assigiinngitsut arriitsumik takussunarsisikkiartuaartaramigit. Taamaattumik taanna angut maanna nallinnartorujussuuvoq.

Jesus illoqarfimmut isermat pupissup qanilliartorpaa. Guutip inatsisaa naapertorlugu inuit allat mianersoqquniarlugit pupissoq ima nilliasussaavoq: ’Minguttooq, minguttooq!’ — qanillivallaannginniassammata tunillatsillutillu. Maanna pupissoq kiinnaminik pallorpoq Jesusilu ima qinnuigalugu: „Naalagaq, piumaguit pupeerutsissinnaavarma.“

Ila uppernerup angissusia! Qularnanngitsumik nappaataata nallinnartumik isikkoqalersissimavaa, Jesusili qanoq qisuariarpa? Illit qanoq qisuariassagaluarpit? Misiginneqataarpaseqaluni Jesusip assani isatsippaa angullu attorlugu, ima oqaatigaluni: „Piumavunga; pupeerugit!“ Tassuuguinnarlu pupissuujunnaarpoq.

Taama naakkinnitsigisumik kunngeqarnissat kissaatigissagaluarpiuk? Jesusip pupissumut iliorfiginninnerata isumallualersippaatigut taassuma naalagaaffiata aqutsinerani Bibelimi allassimasut uku eqquukkumaartut: „Nallittussavai sanngiitsoq piitsorlu.“ Aap, Jesusip uummammigut kissaatini, tassa nappaatinik erloqisitaasut tamaasa ikiornissaat, eqquutsikkumaarpaa.

Jesusip pupissoq ajorunnaarsinngikkallarmaguli ajoqersuinera inuit akornanni assut aalassaataalereersimavoq. Esajasip siulittuutaata eqquunneratut Jesus ajorunnaarsitaminut maanna ima oqarpoq: „Mianersorit sunnguamik allamut oqaqqunatit.“ Nangillunilu: „Palasimut takutikkiartorit, Mosesillu peqqussutigisaa malillugu pupeerunnerit pillugu pilliigit nalujunnaarutissaannik.“

Angutilli ajorunnaarsinneqarnini pilluaatigingaaramiuk tupinnartuliaq tamanna nipangiusimasinnaanngilaa. Aallarpoq nutaarsiassarlu sumi tamaani oqaluttuarilerlugu — taamaalillunilu qularnanngitsumik inuit akornanni soqutiginnittoqalerlunilu alapernaasersoqalingaarmat allaat Jesus isertuarani illoqarfimmut sumulluunniit iserneq ajulerpoq. Taamaattumik Jesus avinngarusimasuniillunilu illoqannginnersaniittarpoq, inuillu sumit tamaneersut tusarnaariarlutik nappaatiminnillu ajorunnaarsinneqarusullutik aggiasarput. Lukas 5:12-16; Markus 1:40-45; Mattæus 8:2-4; Môrsasip agdlagaisa pingajue 13:45; 14:10-13; Tussiaat 72:13; Isaia 42:1, 2. (wD 15/4 86)

◆ Pupissuuneq qanoq kinguneqarsinnaava, inuillu allat pupissup qanoq mianersoqqusarsimavai?

◆ Qanoq ililluni pupissup Jesus qinnuigaa, Jesusillu qisuariarnera uagut sumik ilinniarfigisinnaavarput?

◆ Angutip ajorunnaarsitaasup sukkut Jesus naalanngitsoorpaa, tamannalu qanoq kinguneqarpa?