Jesusip inuunera ajoqersuineralu

Jesusip ajoqersugai sabbatimi karrinik nutsuipput

ERNIINNAQ Jesus ajoqersugaalu Jerusalem qimappaat Galilæamut uterniarlutik. Upernaavoq, narsanilu karrit inerititaqalerput. Ajoqersukkat kaakkamik karrinik nutsuilerput nerillugillu. Sabbatiummalli taamaaliornerat arajutsineqanngilaq.

Jerusalemimi upperisarsiornerup tungaatigut pisortat Jesus sabbatisiunngitsoornerarlugu toqutaatinniarsareqqammerpaat. Maanna farisiiarit pasillilerpaat oqarlutik: „Ata, ajoqersukkatit sabbatimi peqqusaanngitsumik iliorput.“

Farisiiarit isumaqarput karrinik nutsuineq nerisinnaajumallugillu assanik tagiullugit inerititaanik kaanngartitsinerup assigiinnaraa karrinik katersuineq karrertaajaanerlu. Kisianni sulineq pillugu isumaata sukannersup sabbat artornartunngortippaat, massa sabbat tassaasussaagaluartoq inunnut nuannaarfik anersaakkullu ineriartorsarfik. Jesusip taakkua oqaatigisaat tamanna akerlilerpaa Allakkat issuarlugit takutillugu Jehova Guutip sabbatimik inatsisini taama sualutsigisumik sukannertigisumillu atorneqarnissaa siunertarisimanngisaannaraa.

Jesusip eqqaavaa ilaani David angutitanilu kaaleramik illernartuutiliamiiginnarsimasut timiusallu sassaassassat neriffigalugit. Naak timiusat nerrivimmit Jehovap saaniittumit peerneqarsimallutik timiusanillu nutaanik tarserneqareeraluartut palasit kisimik nerisartussaasimavaat. Kisianni pissutsit immikkut ittut pissutigalugit Davidikkut timiusamik nerinerminnik assuarineqanngillat.

Allamik assersuuteqarluni Jesus oqarpoq: „Inatsisini atuanngilasi, sabbatiugaluartumi palasit naalaffimmi sabbat nalinnginaatittaraat, pisuutinneqarnatilli?“ Aap, allaat sabbatini palasit nersutaatinik toqutsisarlutillu naalaffimmi allanik suliaqartarput pilliutissat piareersarniarlugit! „Oqarfigaassili,“ Jesus oqarpoq, „naalaffimmit annerusoq tamaaniippoq.“

Jesusip farisiiarit ima oqaaqqissaarpai: „Ilisimasuugussiuk matuma isumaa: ’Naakkinninneq iluaraara, pilliutilli pinnagit,’ taava pinngitsut pillagassaatinngeqqajaqaasi.“ Taavalu naggataatigut oqarpoq: „Inuummi Ernera sabbatimuttaaq naalagaavoq.“ Jesusip tamatumani suna isumaga?

Jesusip ukiuni tuusintini eqqissinermut naalagaaffimmi naalakkersuinissaa innersuussutigaa. Ukiuni 6000-tini inuiaat Satan Diavulumit sualuttumik inussiaataasimapput. Nakuuserneq sorsunnerlu ulluinnarni pisarput. Tamatuma akerlianik Kristusip sabbatissami annerusumi naalakkersuinissaa tassaajumaarpoq qunutitaanermit naalliunnermillu qasuersaarfissaq. Mattæus 12:1-8; 3 Môrsase 24:5-9; 1 1 Sâmuale 21:1-6; 4 Môrsase 28:9; Húsia 6:6. (wD 15/7 86)

◆ Jesusip ajoqersugai qanoq unnerluutigineqarpat, Jesusilu qanoq akiva?

◆ Farisiiarit kukkunerat suna Jesusip uparuarpaa?

◆ Qanoq ililluni Jesus ’sabbatimut naalagaava’?