Jesusip apustilini toqqarpai

Jesusip inuunera ajoqersuineralu

JESUSIMIK Guutimik savaaraatut Johannes Kuisisup ilisarititsineranit Jesusillu tamanut kiffartuussilerneranit ukioq affarlu qaangiupput. Tamatuma nalaani Andreas, Simon Peter, Johannes immaqalu Jakob (Johannesip qatanngutaa), Filipilu Natanaelilu (aamma Bartolomæusimik taaneqartoq), siulliullutik Jesusimut ajoqersuganngorsimapput. Kingusinnerusukkut allat amerlasuut taakkununnga ilanngupput Jesusilu malilerlugu.

Maanna Jesus apustilimi toqqarnissaannut piareerpoq. Taakku tassaassapput qaninnerpaamik suleqatigisassai immikkullu ajoqersorneqassallutik. Toqqartinnagilli qaqqamukarpoq unnuarlu naallugu qinulluni, qularnanngitsumillu ilisimassuseq Guutillu pilluaqqusinera qinnutigalugit. Ullaanngormat ajoqersukkani qaaqquai taakkunanngalu aqqaneq-marluk toqqarlugit. Suli Jesusip ilinniartitarimmatik suli ajoqersukkanik taaneqartarput.

Jesusip toqqagaasa ilaat arfinillit, qulaani eqqartorneqareersut, tassaapput Jesusip ajoqersugai siulliit. Mattæus, akileraaruserivimminit qaaqquneqarsimasoq, aamma toqqagaavoq. Toqqakkat ilaat tallimat tassaapput Judas (aamma Taddæusimik taaneqartoq), Judas Iskariot, Simon Ilungersornertooq, Thomas, Jakobilu, Alfæusip ernera. Taanna aamma taaneqarpoq Jakob Minneq, immaqa apustililu alla Jakobimik ateqartoq immikkortinniarlugit.

Taakku aqqaneq-marluk sivisunngaatsiartumik Jesus ilagereersimavaat, ilisarisimalluarpaalu. Tassami arlallit eqqarlerai. Jakob qatanngutaalu Johannes Jesusip illorinnguatsiarpai; qularnanngitsumillu Alfæusip Josef, Jesusip angutisiaa, qatanngutigaa. Taamaappat apustili Jakob, Alfæusip ernera, aamma Jesusip illoraa.

Soorunami Jesusip apustilimi aqqi eqqaamalluarsinnaavai. Illilli eqqaamasinnaavigit? Eqqaamaannassavat marluk Simonimik ateqartut, marluk Jakobimik ateqartut, marlullu Judasimik ateqartut, Simonilu qatannguteqartoq Andreasimik, Jakobilu qatannguteqartoq Johannesimik. Taamatut apustilit arfineq-pingasut atii eqqaamasinnaavatit. Allat sisamat tassaapput akileraarutilerisoq (Mattæus), kingorna qulaleraluartoq (Thomas), orpiup ataani qaaqquneqarsimasoq (Natanael), ikinngutaalu Filip.

Apustilit aqqanillit Galilæameersuupput, Jesusip aggerfianit. Natanael Kanameersuuvoq. Filip, Peter Andreasilu Betsajdamiuugaluarput. Peterili Andreasilu kingusinnerusukkut Kapernaumimut, qularnanngitsumik Mattæusip najugarisaanut, nuussimapput. Jakob Johannesilu aalisartuupput qularnanngitsumillu aamma Kapernaumimi eqqaaniluunniit najugaqarsimallutik. Apustilinit Judas Iskariot, kingorna Jesusimik pisitsisoq, kisimi Judæameersuunnguatsiarpoq. Markus 3:13-19; Lukas 6:12-16.

◆ Apustilit kikkut Jesusip eqqarlerigunarpai?

◆ Jesusip apustilii qanoq ateqarpat, qanorlu ililluni aqqi eqqaamaneqarsinnaappat?

◆ Apustilit suminngaanneersuuppat? (wD 1/9 86)

[Qupp. 9-mi assiliartaq]

Apustilini aqqaneq-marluk toqqartinnagit Jesus unnuaq naallugu Jehovamut qinuvoq