Ulersuaq — mianersoqqussut itsarsuarmeersoq

INUIAAT ingerlaasianni sivisuumi ajunaarnersuaqartarpoq pinngortitap imminik pilersitaanik Mount St. Helensip qaarneratut annertutigisunik taassumanngaluunniit annertunerusunik. Arlaannaataluunniilli ulersuaq Noap nalaani nalliussimasoq nallersimanngilaa. Ulersuaq ima annertutigigami imalu aseruitigigami inuiannut nunarsuarmi tamarmi najugaqartunut tamanut katattussaanngivissumik sunniuteqarsimavoq.

Nunarsuup ilaani assigiinngitsuni, soorlu Babylonimi, Romami, Indiami, Australiami aammalu Amerikami Avannarlermi Kujallermilu, ulersuarsimaneq pillugu 150-inik assigiinngitsunik itsarnitsanik oqaluasaaqarpoq. Oqaluasaat tamakku naak annikitsualuttaamikkut assigiinngissuteqaraluarlutik, assigiissutigaat ulersuarnerata ileqqussatigut pissuteqarsimanera, inuiaat nunarsuarmi tamarmi piuneerunneqarnerat, ilaqutariillu ataatsit umiarsuarmi annassimanerat. Ajunaarnersuaq nunarsuarmi tamarmi pisimassaguni aatsaat taama annertutigisumik katattussaanngitsigisumillu inunnut sunniuteqarsinnaasimassaaq.

Bibelimik ilisimatooq allassimavoq: „Oqaluttuat tamakkua tamarmik assigiissuteqarnerat assortugassaanngitsumik uppernarsaataavoq oqaluasaap tamatuma oqaluttualiaannaannginneranut; oqaluttualiaannaasut asseqarneq ajorput, silarsuarmi tamarmi assigiissuteqarneq ajorput; taamaattumik nalunanngilaq oqaluttuarisaq tamanna pisimasuimmik tunngaveqartoq; itsarujussuaq inuiaat meeraaneranni ilumut pisimasup tamanna kinguneraa.“ Sunali pillugu ajunaarnersuaq itsarujussuaq pisimasoq kinguaariinnut maannakkut inuusunut mianersoqqussutaava?

Pissusiusimasut ulersuarmik kinguneqartut immikkut malugisariaqarpavut. Pissutsit taamani atuuttut ullumikkut pissusiusunut assingummata ulersuaq uatsinnut pingaaruteqarpoq. Pissutsit tamakku Bibelip atuagartaani Môrsasip agdlagaine sujugdlerne ima allaatigineqarput: ’Jehovallu takulerpaa inuit ajorsusiat angingaartoq nunami, uummataasalu eqqarsaataasa isumaliuutigisaat ajorsinnartut ullut tamaasa. Guutip taava nuna isigilerpaa aarit aserorsimasoq, uinillit tamarmik aqqutertik aserorsimammassuk nunami.’ — 1 Môrsase 6:5, 12.

Inuiaat ileqqussatigut annertuumik ajortunngorluinnarsimapput, eqqarsaataasa isumaliuutigisaat ajorsinnarmata. Tamanna pissutigalugu „nuna aserorsimavoq . . . persuttaasarnernik ulikkaarluni“. (1 Môrsase 6:11, NW) Inuit nunap piinik piniarneq kinguaassiuutitigullu pilerigisatik kiserluinnaasa soqutigaat. Jesus Kristusip tamanna uparuarpaa oqarami: ’Soorlumi ulluni taakkunani ulersuup siornagut iliortut nerillutillu imerlutillu nuliarlutillu uinillutillu ulloq taanna Noap umiarsuarmut iserfia tikillugu paasinagulu, aatsaalli ulersuaq nalliummat tamaasa nungutillugit, taamattaaq ikkumaarpoq inuup ernerata tikiuffissaani.’ (Matîuse 24:38, 39) Uinikkut pilerigisaminnik naammassinninniarneq kiserluinnaat soqutigisaraat.

Ukiorpassuit ulersuup siornatigulli Noap mianersoqqujuaannarpai, kinguaariilli taakkua sioorasaarut upperiumanngilaat. Ulersuarmik misigisaqarsimanngisaannarput. Pissutsit taamaaginnarmata, sioorasaarut tusarnaarumanngilaat. Sianiginngilaat. Sioorasaarutip Noa aqqutigalugu Pinngortitsisiminneersuunera soqutiginngilaat.

Guutilli Noa oqarfigaa: ’Uinillit tamarmik naggatissaat nalliuppoq takkunnut, nuna ulikkaarmat iluaatsuliornerinik, tassa aserussavakka nuna tappullugu.’ (1 Môrsase 6:13) Ulersuaq nalliummat, Noa inoqutaalu annatsinneqarput sioorasaarut sianigigamikku Guutillu unnersuussutai maleruaramikkik. Sunali pissutigalugu uagut tamakku immikkut soqutigisariaqarpavut?

Pissutsit siullernut assingusut

Soorlu ulluni ulersuup siornagut issimasoq, ingammik sorsunnersuup siulliup kingornagulli nakuuserneq inooriaasertut ittunngorsimavoq. Nunat naalakkersuinerup tungaatigut imminnut persuttaattarneri sorsunnernik inuiaat ingerlaasianni aatsaat taama aserornartigisunik amiilaarnartigisunillu kinguneqarsimapput. Persuttaasarnerit illoqarfinnut, aqqusinernut inuillu angerlarsimaffiinut siaruariartorsimapput; angalasunut allaat aarleqqutiginartarput. Aammattaaq TV-kkut aallakaatitassiat, filmit atuagassallu tamalaat amerlanerusutigut nakuuserneq imarisarpaat.

Ullumikkut inuit amerlanersaasa inooriaasiat aamma taamani piusimasumut assinguvoq. Kinguaariit maannakkut inuusut kinguaassiuutimikkut nunallu piisigut pilerigisaminnik naammassinninniarneq kiserluinnaat soqutigaat. Nunarsuarmi tamarmi ileqqussatigut ajortunngorluinnarsimaneq nappaatit kinguaassiuutitigut aatsornartuusartut nappaalanersuartut ittumik siaruaassimanerinik kinguneqarsimavoq. Allasiornerit, kanngunartuliornerit angutillu anguteqatiminnik atoqateqartarneri nalinginnaapput. Kinguaariittut ulersuup siornatigut inuusimasutut, kinguaariit maannakkut inuusut uinikkut nuannaarniutit nunallu piinik pigisaqarneq Guutimit nuannarineruaat.

Inuit ulersuup siornatigut inuusut ingasattumik ileqqupilui Guutip ’uummammigut aliasuutigigamigit’, tunngavissaqarluannginnerpa isumaqassalluni ileqqupiluit ullumikkut silarsuarmi tamarmi ileqquusut taamatut misigissallugit? Kinguaariinnut Noap nalaani inuusimasunut nalliutissimasai kinguaariinnut maannakkut inuusunut mianersoqqussutaassannginnerpat? Tunngavissaqarluannginnerpa isumaqassalluni Guutip isumaqarfigissagai soorlu Môrsasip agdlagaine sujugdlerne 6:5-7-imi oqarsimasoq? Inuiaat ajorsusiat takuleramiuk ’uummammigut aliasuutigaa’. Jehovalu oqarpoq: ’Inuit pinngortitakka nunamit piiassavakka.’ Bibelimik allattut anersaami sunniineratigut isumassarsisitaasut aqqutigalugit Guuti nalunaartarsimavoq kinguaariit inuulluapilukkumatuut ullumikkut inuusut eqqartuussummik tamatumunnga assingusumik eqqartuukkumaarini. Ajunaarnersuaq inuiaat ingerlaasianni aatsaat taama annertutigisussaq nalliutilerpoq.

Ullut kingulliit

Uagut ulluvut Bibelimik allattup siulittuutigalugit, Guutip anersaavata sunniineratigut isumassarsisitaalluni Timoteusimut allakkami aappaanni allaatigai pissutsit ajortunngorluinnarsimasut maannakkut silarsuarmi tamarmi takussaasut. Kapitali 3-mi, versillu 1-imiit 4 ilanngullugu oqarpoq: „Imaattorli ilisimassavat, ullussani kingullerni nalorninartunik nalliuttoqassammat anigorniarneri ajornartuusunik. Inuit inuujumaarmata imminnik asasut, aningaaserituut, usorsitsaapiluttut, anneruniartut, Guutimik mitallersut, angajoqqaaminnut naalanngitsut, qujasuitsut, ilumoorfigeqatigiinngitsut, pissusissatut asanninngitsut, saamajuitsut, mamarliisut, imminnut naalakkersorsinnaanngitsut, qiningasut, ajunngitsunik uumissuisut, killuussisut, namminiinnaq isummaminnik atuiumasut, pingaakujuttut, Guuti kajumiginagu sualuttumik pilerissuseqarnermut atatillugu nuannaarutinut kajumittut.“ — NW.

Jesus Kristusittaaq pissutsit aaqqissuussaanerata ullussai kingulliit siulittuutigisimavai. Siulittuinermini ingasalluinnartumik nakuuserneq sorsunnersuup siulliup nalaaniilli atuuttoq eqqartorpaa, oqarluni: ’Inuiaammi pikitsitsiumaarput inuiaqatiminnut, naalagaaffillu naalagaaffeqatiminut.’ (Matîuse 24:7) Eqqartorpaattaaq inatsisaatsuussuseq ullumikkut atugaangaartoq inuillu piumaartussanik siooranerat. ’Iluaatsuliornerit amerliumaarmata,’ Jesus oqarpoq, ’asanninneq amerlasuuni nillertunngorumaarpoq.’ (Matîuse 24:12) Oqarportaaq ’inuit ersinermit inuillu najugaannut piumaartussanik ilimasunnermit tumanngussasut’, tassa: issanngussasut. — Lúkarse 21:26.

Oqaatsit ’ullut kingulliit’ kinguaariinnut maannakkut inuusunut kinguneqassapput soorlu kinguaariinnut ulersuup siornatigut inuusunut kinguneqarsimasut — inuit pissutsinik aaqqissuussinerisa annerpaartaata naggaserneqarnissaanik. Tásalûníkamiunut agdlagkame áipáine 1:8, 9-mi Bibelimik allattoq Guutip anersaavata sunniineratigut isumassarsisitaq apustili Paulus oqarpoq Jesus Kristus aqqutigalugu Guutip ’Guutimik ilisimasaqanngitsunut Naalakkattalu Jesusip iivangkiiliuanut naalakkumanngitsunut akiniutissaq aggersissagaa; taakku pillaammik atugaqassapput tammarnissamik naassaanngitsumik Naalakkap isigernanit nakuussusiatalu naalannassusianit’.

Ulersuarmi annassimasut takuaat kinguaariit ulersuup siornatigut inuusut nunamit peerneqarsimasut. Inuit inooriaasiallu pingaarnerutitaallu tamarmik piiagaapput. Tamanna peqqikkumaarpoq Guutip akiniaaneratigut kinguaariit nakuuserpaluttut maannakkut inuusut piuneerunneqarpata. „Guutiitsoq erniinnaq peeruttussaavoq, inaa takuniaraluarukku peerutereersimassaaq.“ — Tussiaat 37:10.

Annattoqarsinnaavoq

Kinguaariit ulersuup siornatigut inuusut kinguaariillu uagut inuit ajorssusiatiguinnaanngitsoq taakkualu piuneerunneqarnerisiguinnaanngitsoq assigiissuteqarpugut. Soorlu ulersuarmi amiakkuullutik inuusoqarsimasoq, taamatut pissutsit aaqqissuussaanerata maannakkut atuuttup naggatissaani amiakkuullutik inuusoqarumaarpoq. Ulersuarmi annassimasut inuupput qanilaartut inuttut amerlanertut inooriaaseqanngitsut. Naapertuilluarnermik nuannarisaqartuupput Guutimut naalattarlutik taassumalu sioorasaarutaanik sianiginnillutik. Môrsasip agdlagaine sujugdlerne 6:8, 9-mi oqaluttuunneqarpugut: ’Noa saammaannarsivoq Jehovap isaanut. . . . Noa inooqatimini angutaavoq iluartoq inuusia tamarmiusoq.’ Taanna annaqataalu pillugit apustili Peter allassimavoq Guutip ’silamiut siulliit erliginngikkai, Noali iluarnermik oqaluussisoq arfineq-pingatsiullugu aniguisikkamiuk, ulersuaq silamiunut iluaatsunut nalliutikkamiuk’. — 2 Pîtruse 2:5.

Guutip pruffiitiisigut qularunnaarsinneqarsimavugut Guutip pissutsit aaqqissuussaanerannik maannakkut atuuttumik piuneerussineranit amiakkuullutik inuusussat amerlangaassasut. Taakkuttaaq inuussapput qanilaartut naapertuilluarnermik nuannarisaqartut Guutillu unnersuussutaanik maleruaasut, soorlu Noa taamaattoq. Iluaatsut aserorneqarnissaat siulittuutigereeramiuk, tussiaasiortoq oqarpoq: „Kisianni qanilaartut namminneq nuna pigissavaat, eqqissineqangaarnerlu tipaatsuutigilluinnassavaat.“ — Tussiaat 37:11, NW; sarĸúmersitat 7:9, 13, 14.

Jesusip siulittuutigisimavaa ullussani kingullerni Guutip naalagaaffianik tusagassaq nuannersoq silarsuarmi tamarsuarmi oqaluussissutigineqassasoq. Tamanna periaaseralugu nunamiut naapertuilluarnermik nuannarisaqartut pingaartitsisullu annaffissaminnut katersorneqariartorput. Jesusip tamanna assersuuppaa savanik savaasanillu avissaartitsinermik assersuusiorami. Assersuusiornini naggaserpaa oqarluni inuit iluaatsut savaasatut pissusillit ’aallarumaartut naassaanngitsumik uternaveersitaassallutik, iluartulli naassaanngitsumik inuussallutik’. — Matîuse 25:31-46, NW.

Naak ulersuaq itsarujussuarli nalliussimagaluartoq, erseqqissumik uatsinnut mianersoqqussutaavoq sianiginninngitsooqqunata. Pisimanera allaaserineqarsimavoq, soorlu Bibelimi allassimasoq, ’uatsinnut ilinniutissaalluni’. (Rûmamiut 15:4) Mianersoqqussutaavoq silamiorpaluttumik, nakuuserpaluttumik, inuulluapilukkumasumik nunallu piinik pingaartitsivallaartumik inooriaaseqaqqunata, Pinngortitsisitsinnik soqutiginninngitsooqqunata. Taanna allanngorneq ajorpoq. Kinguaariit ulersuup siornatigut inuusut Guutip piuneeruppai ajorpallaaqimmata. Tamannattaaq patsisigalugu kinguaariit maannakkut inuusut, politikkikkut naalakkersuinermik, nunap piinik pingaartitsivallaartumik niuernermik ingerlatsinermik eqqunngitsumillu upperisarsiornermik aaqqissuussineri tamaviisa tappullugit, suujunnaarsilluinnarumaarpai.

Pissutsinik aaqqissuussinerup matuma naggatissaagut annassagutta, mianersoqqussut itsarsuarmeersoq sianigisariaqarparput. Naapertuilluarnermik nuannarisaqartuusariaqarpugut, soorlu ulersuarmi annassimasut arfineq-pingasuusut taamaattut. Aammalu, annassagutta unnersuussut Sivfânia 2:3-mi allassimasoq maleruartariaqarparput: ’Iluarnissaq ilungersuutigisiuk, ilalaarnissaq ilungersuutigisiuk; isertugassaajumaarnersusi Jehovap kamannerata ulluani.’ (wD 15/9 86)

[Qupp. 7-mi assiliartaq]

Soorlu Noa ilaqutaalu ulersuarmi annassimasut, aamma pissutsinik aaqqissuussinerup matuma naggatissaani annakkumaartussat illit ilagisinnaavatit