„Naggatissap nalaa“ inuuffigaarput?
„Illilli, Daniel, oqaatsit anngigikkit allakkallu naqissuserlugit naggatissap nalaa nalliutserlugu.“ — Dâniale 12:4, NW.
ILLORPASSUAQARFIMMI sutorniartarfimmiittoq paatsiveeruppoq igalaavatigut illoqannginersamut qiviarami takulerlugillu nalunaaquttat tikkuuteqanngitsut pingasut assigiinngitsut kisitsisit angisuut erseqqissullu atorlugit qaammartitsillutik qassinngorneranik takutitsisut. Tamaasa immikkut qiviatsiartarpai. Ilaat naapertorlugu nalunaaqutaq 11:28-nngorpoq. Ilaat sukkaannerumaarluni 11:26-nngorpoq. Pingajuat siuarusunnermit 11:29-nngoreersimavoq.
’Minuttit ataaseq marlussuilluunniit soqutaanngillat,’ immaqa oqarumassaatit. Sekunderpaalunnguaannarnilli bussimut, umiarsuarmut timmisartumulluunniit inortuisup isumaqatiginavianngilaatit! Aap, nalunaaquttap eqqortumik qassinngornera ilisimallugu pingaartorujussuusinnaavoq. Guutilli piffissarititai naapertorlugit piffissap ingerlanerani sumut killinnersugut ilisimassallugu pingaarnerpaavoq.
Ullut naggatissaanni eqqartuutiffissaqarsinnaanissaa
Soorlu nalunngikkit, ukiuni hundredilippassuarni inuit oqaluuserisarsimavaat „naggatissap nalaa“ — ilaatigut taasarlugu ’silarsuup naggatissaa’nik imaluunniit ’ullut naggatissaat eqqartuutiffissaq’-mik. Ukiut 2500-t matuma siornagut pruffiitip Danielip tamanna oqaluutigaa. (Dâniale 12:4) Soorluli ilanngutassiortartoq aalajangersimasumut attaveqanngitsoq James David Besser oqarsimasoq, ullumikkut „suut tamarmik aserorsinnaanissaat upperissallugu upperisarsiortuuneq imaluunniit pinngortitat pissusissaannut naapertuutinngitsunik upperisaqartuuneq pisariaarussimapput; fjernsynikkut nutaarsiassanik isiginnaartarneq naammaqaaq“. Isumaqatiginngiliuk?
Qularutissaanngitsumik fjernsynikkut nutaarsiassanik aallakaatitassiatigut silarsuarmi pisartut inuit angerlarsimaffiinut eqqussaasarput. Tassuuna ajornartorsiutit killinnarnerusutut malunnarsisimapput sakkortunerusumillu uatsinnut tuttarlutik. Tamakkunuunatigut eqqaasinneqartarpugut illoqarfik atominik sakkussiat atorlugit saassunneqarsinnaanissami piuneerulluinnarsinnaasussaq immaqa uagut illoqarfigissagipput, pinerluttuliornerit amerleriasaarneranni peqqarniitsumik iliorfigisaq immaqa uagut ernerisinnaavarput panigisinnaalluguluunniit, imaluunniit peqqarniisaarniat saassussineranni sallunaveeqqutitut tigusat immaqa uagut anaanagisinnaavarput ataatagisinnaalluguluunniit. Tamakkua pisinnaanissaannaat suut tamarmik aserorfissaata ungasinngitsukkut nalliunnissaanut uppernarsaataanngikkaluarpoq. Tamakkuli pisarmata suut tamarmik aserorsinnaanissaat piviusuunerusutut malunnarpoq, taamaammallu apeqqut: ’„Naggatissap nalaa“ inuuffigaarput?’ eqqarsaatigisariaqarnerusutut ilerpoq.
Jesus, Daniel silarsuullu naggatissaa
Ukiut 1900-nit amerlanerusut matuma siornatigut Jesus ajoqersugaasa aperivaat: „[Suna] najuunnissannut pissutsillu aaqqissuussaanerata naalerfissaanut [silarsuullu matuma naggatissaanut, kal. ator.] nalunaaqqutaassava?“ (Matîuse 24:3, NW) Akissutimigut nalunaaqqut Jesusip eqqartugaa amerlasuunik ilaqarpoq, tamarmillu ataatsikkut nalliunnerisigut nalunarunnaassaaq ’pissutsit aaqqissuussaanerata naalerfia’ inuuffigigipput. Nammineq bibelit tigoriaruk nammineerlutillu tamakku pillugit atuarlugit Matîuse, kapitalini 24-mi 25-milu, Mákorse, kapitalimi 13-imi, aammalu Lúkarse, kapitalimi 21-mi allassimasut.
Immaqa tupaallaatigissavat paasilerukku allassimaffinni taakkunani atuakkatit ullumikkut fjernsynikkut nutaarsiassanik aallakaatitassiat naalisarlugit oqaatigisatut immata. Atuassavatit sorsunnerit, nunap sajorujussuarneri, nappaalanersuit, nerisassaaleqinerillu — tamarmik silarsuaq tamakkerlugu pisartut. Atuassavattaaq ’inuiaqatigiit qussalallutillu aniguiffissaq nalugaat’, inuillu ’ersinermit inuillu najugaannut piumaartussanik ilimasunnermit issanngusut’. Illit tulluarnerusumik oqaasissarsisinnaassagaluarpit pissutsit silarsuarmi atuuttut nassuiarniarlugit, soorlu ullumikkut fjernsynikkut aallakaatitassiatigut amerlasuunik nalujunnaarsitaasugut? — Lúkarse 21:10, 11, 25, 26.
Pisimasut uppernarsaatissaviunngikkaluartut tamakku piinnarnagit allamittaarli uppernarsaatissaqarpoq ’naggatissap nalaani’ inuunitsinnut. Soorlu matuma siuliani taatsiarneqareersoq, naammaqutissamik uppernarsaatissarsisinnaavugut ukiunik suli 500-nik siusinnerusumut uterutta pruffiitip juutiusup Danielip nalaanut. Aqqa taallugu Jesusip taanna eqqartorsimavaa, siulittuutaatalu eqquunnissaa uparuarlugu. (Matîuse 24:3, 15, 21; Dâniale 11:31; 12:1, 4-mut naleqqiuguk.) Taama oqarnermigut Jesusip takutippaa Danielip oqaasii „tastamantitoqqami“ allassimasut naleqqukkunnaarsimasutut pingaanngitsutulluunniit isiginngikkini. Uaguttaaq taamatut isigissanngilavut.
Danielip oqaasiisa Jesusillu oqaasiisa qulaani allassimasut assigiissuteqarneri malugeriakkit. Taava imminut apereriarit: ’Taannaasoq tamarmik oqaluuserinnginnerpaat?’
Erseqqippoq Danielip Jesusittaaq taannaasoq, tassa „naggatissap nalaa“ Kristusip kunngitut pissaaneqarluni najuuffissaa, siulittuutigigaat. Piffissap tamatuma naanerani akeqqani maani nunamiittut tamaasa annikilliornartussami angisuumi suujunnaarsikkumaarpai. Guutilli innuttai aniguiumaarput.
Aniguiumaartussat ilagerusuppigit? Taava „naggatissap nalaa“ pillugu Danielip uppernarsaatissiineri misissoriakkit. Tamakku iluatsillugit Guutip piffissarititai naapertorlugit piffissap ingerlanerani sumorpiaq killittugut ilisimasinnaassavarput. (wD 1/11 86)
[Qupp. 4-mi ungalusaq]
DANIEL
’Naggatissap nalaagut . . . Mikael [Jesus Kristus] . . . piginnaanngorsarumaarpoq ullut annikilliornartut nalliukkumaarmata, inoqaleqqaarneranit ullullu taakku tikillugit asseqarsimanngitsut. Taamaalisukkut innuttatit aniguiumaarput.’ — Dâniale 11:40; 12:1.
JESUS
„[Suna] najuunnissannut pissutsillu aaqqissuussaanerata naalerfissaanut nalunaaqqutaassava?“
’Naalliunnartoqangaassaaq silarsuaqaleqqaarneranit mannalu tikillugu naleqanngisaannartumik . . .
Ullullu taakku ikilisinneqanngippata inummik ataasimilluunniit annattoqanngeqqajaqaaq; . . . ullulli taakku ikilisinneqassapput.’ — Matîuse 24:3 (NW), 21, 22.