Iikkami allannerit takuigit?
„Uppinnissaanut siulittuutitut kisitsisit
iikkami naqinnertut allassimapput.“
OQAATSIT taakku oqaaseralugit atuakkiortup ukiut 1900-ssaanni inuusup Irlandimiup Jonathan Swiftip aningaaserivimmi pisortaq allaatigaa. Aningaasaatiminnik aningaaserivimmiititaqartut tamarmik ataatsikkut aningaasaatitik tigujumammatigik, aningaaserivimmi pisortap ajortuulivilluni malugaa. Ukiut hundredilippassuit oqaatsit ’iikkami allannerit’ ajunaarnissamik nalliulluinnalersumik eqqarsalersitsisarput.
’Iikkami allannerit’ ukiut 2500-t sinnerlugit matuma siornagut takkuteqqaarput. Allannerillu eqquunnerata silamiut ingerlaasiat allamut sangutippaa. Oqariartaaseq ’iikkami allannerit’ qanoq pilersimasoq misissussagutsigu Danielip allagai Bibelimiittut sammisariaqarpavut. Tassani allassimasut iluatsillugit mianersoqqussutit Allakkani Illernartuni allassimasut pingaaruteqassusii paasilersinnaassavavut, ullumikkullu mianersoqqussut ilungersornartoq sianigeqqullugu killissavaatigut.
Pissatseruttorfianit
Oktoberip ulluisa tallimaasa unnuaraa, ukioq 539 u.n.a.s. Babylonimiut erngupput qitillutillu. Naak akeraat Mediamiut Persiamiullu illorpassuaqarfiup isaaffiisa ungasinngitsuanniikkaluartut, illoqarfik isumannaappaluppoq. Qarmarsui tigussaanngillat. Illoqarfimmiut tamarmik nuannaarlit. Nalliuttorsiorpalaarnersuarmit ungusisimasut isumaqassagunarput illoqarfik sivisuumik tiguneqatsaalisinnaassasoq!
Illussaarsuami inersuani nalliuttorsiortarfiusumi qularnanngitsumik usorsisimaarluni kunngi Belsazzarip inuppassuit nuimasut nalliuttorsioriartoqqusani qiviarpai. Kiffani peqquai qummuattat kuultiusut sølviusullu aataami, kunngi Nebukadnezarip, ukiut qulilinnik arlallit siornatigut Jehovap naalaffiutaanit Jerusalemimiittumit tigusai aaqqullugit. Ilimanarluinnartumik Belsazzar oqarsimassaaq: ’Taakku imertarfigalugit viinnisorta guutitta naalannaatissaannik!’ — Dâniale 5:1-4.
Piuneerulluinnarneranut
Tassanngaannaq Belsazzar annilaarnermit qarsorpoq. Ikani, naneruuserfiup nalaani assaat nuipput. Oqaatsit sisamat atuaruminartut paasissaanngitsulli allappai. Taamaalinerani nipilersortut nipangerput, qitittullu unipput. Kunngi annilaangaarpoq seeqquilu sajupput. Ilimasaarut tamanna qanoq paasisariaqarpa? Ilisimatuut ullorissallu najoqqutaralugit siulittuisartut isertissigik! Allannernik taakkuninnga sukuiaasoq angisuumik ataqqinartinneqassaaq. — Dâniale 5:5-7.
Najuuttut tamarmik annilaarlutik ilisimatuut oqaaseqalernissaat utaqqivaat. Paatsiveeruppulli. ’Iikkami allannerit’ itinerusumik qanoq isumaqarnerpat? Kialuunniit misilikkumanngilaa sukuiassallugit, kunngilu suli quarsaarnerulerpoq. — Dâniale 5:8, 9.
Suna pisimasoq tusaramiuk kunngip arnaa inersuarmut iserpoq. Belsazzar eqqaasippaa naalagaaffimmi anguteqartoq nunami allamiumik ilisimatuumik ilisimassutsiminik ersersitsisimasumik. Taava Daniel qaaqquneqarpoq. Nakimanani kunngi eqqaasippaa siornatigut Nebukadnezarimut pisimasunik. Taava Danielip Belsazzar oqaluttuuppaa atugassaanik, oqarluni:
’Imaappullu allannerit taakku titakkat: MENE, MENE, TEKEL aamma PARSIN.
Oqaatsillu sukuiaatissaat imaappoq: MENE, Guutip ullut naalagaaffisit kisippai naasimallugillu.
TEKEL, uuttuutinik uuttorneqaravit oqippallaarputit.
PERES, naalagaaffiit avillugu Mediamiunullu Persiamiunullu tunniussaavoq.’ — Dâniale 5:10-28.
Eqquukkasuarnera
Belsazzar sivisuumik utaqqisariaqassava Danielip oqaasii eqqortuunersut paasiniassallugit? Tullianik pisimasut takoriartigik. Nalliussimasut pisimasuinnarnut pingaaruteqanngillat.
Sakkutoorpassuit Mediamiut Persiamiullu ikerasalialiorsimapput kuussuaq Eufrat illorpassuaqarfiup Babylonip qeqqatigut kuuttoq allamut sangutinniarlugu. Kunngip Kyrosip pilersaarutigisani piviusunngortissallugu unnuk manna nallersiisimavaa, Babylonimiut taarsilerpat sissuerunnaassasorigamigit. Ikerasaliat ammarneqarput. Kuussuup allamut sangutitaasup erngi naammattumik apparmata, sakkutuut kuussuup sinaanit kuuffigigaluanut aqqarput.
Unnuk manna illorpassuaqarfiup isaaffii kuussuup sinaaniittut matuneqanngitsoorput, immaqa qunusuinniarnermit. Mediamiut Persiamiullu sakkutoorpassuisa terlinganeerillutik illorpassuaqarfik isaaffigaat. Sakkutoorpaaluit kunngikkormiut illussaarsuannut isaapput, Belsazzarilu toqutaavoq. Babylonimiut naalagaaffissuat pissaanilissuaq uppippoq. — Dâniale 5:30.
Suujunnaarsitaanissaq tassanngaannaqatigisaa
Danielip sinnattukkamik sukuiaanerata eqqoqqissaarnerata Bibelimi mianersoqqussutit ilungersornassusii takutippai. Pisimasut tamakkua kingornisigut apustili Paulusip allagaasa takutippaat suli pingaaruteqartunik nalliuttussaqartoq tassanngaannaq piumaartussanik. Kristumiunut Thessalonikamiittunut Guutip sunniineratigut isumassarsisitaalluni allakkamini siullerni ima allappoq: ’Oqarpata: Eqqissinarpoq, siooranartoqanngilaq, taava perlussap tassanngaannaq tikikkumaarpai, soorlu nallisarnerit ernisulersoq tikittaraat; aniguinavianngillallu.’ — 1 Tásalûníkamiut 5:3.
Soorluli Daniel juutillu annatsitaasut Babylonip uppinneratigut, taama suujunnaarsinneqarnissami Guutip nalliutitassaani aniguisoqarsinnaassaaq. Qanoq ilillutik? Anersaakkut eqqumagunik Jehovamit sernissugaajumaarput. ’Ilissili, qatanngutivut ukorsii,’ Paulus oqarpoq, ’taarmiunnginnassi ullussap taassuma tillittutut qaninngassanngilaasi.’ — 1 Tásalûníkamiut 5:4.
Paulusip pivaa „Jehovap ullussaa“, tassaasoq Guutip Messiasikkut Naalagaaffini sakkugalugu inunnut attuumassuteqartunut akuliuffissaa. (1 Tásalûníkamiut 5:2, NW) ’Iikkami allannerit’, tassa nalunaaqqutit akuliunnissaanut sioorasaarutaasut, takkutilernissaat qaqugu ilimagisinnaavarput? Apeqqutit tamakku siusinnerusukkut siulittuutigineqartumi, Dânialip agdlagaisa kapitaliisa aappaanni allassimasumi, akineqarput. (wD 15/11 86)