Meeqqatit ernumassutigaagit?

SOORUNAMI ernumassutigaatit! Navianartut ilaasa pingasut, tassa nappaatit, ikiaroornartunik atornerluinerup pinerluttuliortarnerullu, meeqqatit ingerlavissaanni qamavaallusooq. Angajoqqaat annerusumik minnerusumilluunniit meeqqaminnik ernumassuteqartarnerat pissusissamisuuginnarpoq.

Angajoqqaat amerlanerit tamanna misigereersimavaat — aallaqqaataaniilli. Aammattaaq tamanna Bibelimi takutinneqarpoq. Eqqaamajuk Jakobip isumaalunnini pissutigalugu Josef qatanngutaanik takusaatikkaa. (1 Môrsase 37:13, 14) Aammattaaq Job ernumassuteqartarsimavoq, naak ernini inersimasunngoreeraluartut ilaqutaqalerlutillu. Ima eqqarsarpoq: ’Immaqa ernikka ajortuliorsimanersut, Guuti perloqqusimanerlugu uummatimikkut.’ — Jûpe 1:4, 5.

Allaat Josefip Mariallu ernertik Jesus naammalluinnartoq isumaalugaat! Ilaanni, Jesus aqqaneq-marlunnik ukioqartoq, paasileramikku peqanngitsoq, allaat isumaalungaalerput. Kisianni Jesusip angajoqqaani ataqqinaatissippai, imminnullu avoqqaarissutissaqanngillat. Taamani qanorpiaq pisoqarsimanersoq atagu maluginiaqqissaariartigu, isumaliutigalugulu angajoqqaat ullumikkut pisimasoq tamanna sumik ilinniarfigisinnaaneraat.

Erneq tammartoq

Illit meeraqaruit takorloorsinnaassavat Maria qanoq misigisimassasoq Jesus naveeramiuk oqarluni: ’Erneraa, sooq taama pivisigut? Ata, ataatavit uangalu erloqilluta ujarpatsigit.’ Josefip Mariallu Jesus ullut pingasut takusimanngilaat. Taamaattumillu tupinnanngilaq ernertik aqqaneq-marlunnik ukiulik sumiinnersoq isumaaluutigisimammassuk. — Lúkarse 2:48.

Sooq Josefip Mariallu Jesusip peqannginnera akueraat? Nassuiaasartoq ilisimaneqarluartoq isornartorsiuerpalulluni ilaanni ima allappoq: „Uffa nalunagu erlinnartuut taama pingaartigisoq pigalugu, sooq piffissami taama sivisutigisumi nakkutigisimanngilaat? Anaanap naakkinnissusia saamasumillu isumaalunnera naak?“ Kisianni, soorlu oqaluttuamik tamatuminnga peqqissaartumik misissuinitta ersersikkaa, Josefimut Mariamullu annertuumik assuarliutissaqanngilaq.

Bibelimi ersersinneqarpoq Maria arnaasoq nersornartoq anaanaalluartorlu. Inngili Gabrielip Jesusip inunngornissaa siulittuutigiartorlugu ornikkamiuk oqarfigaa ’Guutimut saammaannarsisimasoq’. (Lúkarse 1:28, 30) Meeqqap taassuma asseqanngitsup erniarinissaanut nangaanani akuersivoq akisussaaffillu angingaartoq, tassa meeqqap perorsarnissaa ilinniartinnissaalu, tigullugu. Arnaavoq maniguuttoq Guutimullu upperluartoq. Jesusip inunngornerata kingorna Jehovap inatsisaani piumasarineqartut tamaasa naammassivai, ’soorlu allassimasoq’. — Lúkarse 1:38, 45-48; 2:21-23, 39.

Josef, Mariap uisaava Jesusillu ataatasiariligaa, aammattaaq angutaasimavoq ajunngitsoq assuarnaatsorlu. Sisamariarluni nalunaarutit Jehovap inngilianit tigusarsimavai. (Matîuse 1:19, 20; 2:13, 19, 22) Eqqaamajuk Josef Marialu Jehovap toqqarsimagai ernituaminik erligeqisaminik perorsaasussatut. Allamik pitsaanerusoqanngilaq kisianni aappariit ernerup taassuma Guutimik ilisimassutsikkut peroriartornissaanik ikiussallugu sapinngitsunik toqqaassalluni!

Pissusissamisoorluinnarpoq angajoqqaat ul- lumikkut avatangiisit ulorianartoqaqisut ase- rorsaasullu pissutigalugit meeqqaminnut isumaaluttarmata. Meeraallumi Jesusitut naammalluinnartuunngillat. Taamaakkaluartorli Josefip, Mariap Jesusillu maligassiaat qimerloorutsigik iluaqutigisinnaavavut. (wD 15/2 87)