Bibelimit atuagassani pingaarnersaasut Tussiaatit 107-imiit 150 ilanngullugu

Guuti pilluartoq, innuttai pilluartut!

Pilluarniarneq anguniagaavoq inuit amerlanersaasa anguneq ajugaat. Inuppaaluilli pilluarneq inooriaaseraat. Suna aqqutissaava? Eqqortumik pallorfiginninneq! Tussiaatinit qularunnaarsinneqarpugut Jehova Guutiusoq pilluartoq, taamaattumillu taanna pallorfigigutsigu uagut pilluarsinnaavugut. Tamatumunnga uppernarsaatissat paasiniarlugit Tussiaatit immikkoortortaasa tallimaat, tassa Tussiaatit 107-imiit 150 ilanngullugu, misissoriartigu.

Jehova tassaavoq aniguisitsisoq

Tussiaatit 107-imiit 119 ilanngullugu atuakkit. Juutit Babylonimi tigusaaqqanermit aniguisitaanissamik qinnutaat akineqarpoq, ’Jehovallu iperagaatitaasa’ aniguisitaanertik erinarsuutigaat. (Tussiaat 107) Tamatuma siornatigut aniguisitaagami, Davidip Guuti ’erinalersorfigaa’, asanninnera ajunngisaarneralu pillugit. (Tussiaatit 108, 109) Jehova pissatsissutigalugu Davidip Naalagaata, tassa Jesus Kristusip, Guutip akerai ajugaaffigissavai. (Tussiaat 110) Innuttani aniguisiinnarnagit, aammattaaq Jehovap peqqusersuitsut mianerinnitsini pilluaqqusarpai. (Tussiaatit 111, 112) Babylonimit aniguisitaanermik kingornatigut juutit tussiaatit Hallel-imik taaneqartut, tassa unnersiutiginnissutit, nalliussivissuarni ukiumoortuni tussiutigisarpaat. (Tussiaatit 113-imiit 118 ilanngullugu) Tussiaatit 119-iat tannerpaajuvoq versiinilu 176-iusuni tamani, marluk kisimik pinnatik, Guutip oqaasia inatsisaaluunniit eqqartorneqartarput.

◆ 107:27 — „Silatusaarsinnaanerat tamarmi iluaqutaanngi“tsoq qanoq paasisariaqarpa?

Anorersuartumi sakkortoqisumi umiartortut assigalugit, Babylonimi tigusaaqqanerata nalaani juutit silatusaarsinnaanerat iluaqutaanngilaq; inuit aniguisitsiniaraluarneri tamarmik iluatsinngitsoorput. Atugarliungaarnerminnili Jehova saaffigigamikku aniguisinneqarput. Taassuma assersuutikkut anorersuaq qatsortippaa „umiarsualivissiffigiumasaannullu“, tassa Judap nunaanut, ingerlallugit. — Tussiaat 107:30.

◆ 110:3 (NW) — ’Innuttat inuusuttut kanernertut immata’ qanoq paasisariaqarpa?

Kanernerit pilluaqqusaanermut, inerititaqarnermut peqangaarnermullu atatinneqartarput. (1 Môrsase 27:28) Aammalu kanernerit sallaapput, inuummarissinarput, inuunermik atatitsisuupput amerlangaarlutillu. Ullormi kunngip Messiasiusup sakkutuussanik sorsuttussarsiffigisaani, innuttai piumallutik kajumillutillu kiffaritissapput, ima amerlatigalutik kanernernut assersuunneqarsinnaallutik. Kanernertut inuummarissinartutut ullumikkut Jehovap peqatigiissortaani tamani angutit arnallu inuusuttut amerlangaartut Guuti pallorfiginneqatitillu kiffartorfigaat.

◆ 116:3 — ’Toqup qilerutai’ suuppat?

Imaappoq soorlu toqup tussiaasiortoq ima sukangatigisumik qilersoraa qilerut kittorassaanngitsoq qilerutigalugu aniguisinnaajunnaarsillugu. Timip avatai sukannersumik qilersorneqartut qilerutit annersitsisarput, grækerisuunngortitamilu Septuaginta-mi oqaaseq hebræerisooq isumaqartoq „qilerut“ „annernartoq“-mut nutserneqarpoq. Jesus Kristus toqummat, toqup qilerutaasa nimersimavaat nukillaartillugu, imaluunniit annersillugu. Taamaattumik Jehovap Jesus makitikkamiuk ’toqup annernartui qilerussaarpai’. — apustilit suliait 2:24.

◆ 119:83 — Qanoq ilillugu tussiaasiortup assigaa „pooruseq pujuugassatut nivinngagaq“?

Jehovap tuppallersaanissaa utaqqitillugu tussiaasiortup assigilerpaa pooruseq amiusoq atorneqannginnermini nivinngagaq. Tupermi illumiluunniit pujorfeqanngitsumi pujoqarsimanissaa pissutigalugu, pooruseq amiusoq qernalukkiartussaaq panersitilluni eqikkiartorlunilu. Tussiaasiortoq malersugaagami tamatumunnga assingusumik misigisaqarpoq. (Versi 84) Annikilliornera nikallungarpasinneratigut kiinnamilu eqisalunneratigut malunniussimassaaq; immaqalu timaa tamarmi sunnerneqarpallaarami ilaatigut isugutaarussimassaaq. (Naleqqiuguk Tussiaat 32:4) Taamaattumik immaqa poorutsitut amiusutut imerpalasunik imaqarsinnaanngimmat allanit atorsinnaanngitsutut isigineqarluni iginneqartutut taamalu sussaanngitsigisutut misigaaq. Taamaattorli ’Guutip ileqqoreqqusai puiorsimanngilai’.

◆ 119:119 — Qanoq ilillugu Guutip guutiitsut „aamakutut“ naggatissaqartissavai?

Minguttuut imaluunniit aamakut aatsitsivimmi aatsitat imerpalasut qaavannut nillikartartut igitassaapput sussaanngitsut. Taamaattumik aamakut aatsitanit soorlu kuultimit sølvimillu peerneqartarput iginneqartarlutillu. Taamatut guutiitsut Jehovap isaani allamut atortussaanngillat kisianni igitassaallutik. Aamakutut naggatissaqartissavai, nalissaqartunit iluarisaminit immikkoortillugit. — Naleqqiuguk Hisĩkiale 22:17-22.

Tamanna sumik ilinniarfigisinnaavarput: Itsarsuaq juutitut, ullumikkut Jehovap Nalunaajaasui aniguisinneqarnissaminnik — Harmagedonimi anorersuarmit — ilimagisaqarput. (sarĸúmersitat 16:14, 16) Guutip nallersiisaa nalliuppat pissutsinik aaqqissuussineq tamanna sorsunnersuarmi taamanikkussaq nalliukkumaartussami piuneerunneqassaaq. Jehovamut annaassisigalugu utaqqinngitsut piuneerussinerup annertuup maliinit milluutigineqalerunik sapersisitaalluinnassapput. Annattulli ’Jehova unneqqarissusia pillugu qutsavigissavaat’. Taamaattumik, ulluni kingullerni inuuffigisatsinni Jesusip malittaasa tanitaasut aammattaaq ’amerlangaartut’ Jehova tatigilluinnarsinnaavaat. — Tussiaat 107:31; sarĸúmersitat 7:9.

„Nalliuttorsioriarnermi erinarsuutissat“

Tussiaatit 120-miit 134 ilanngullugu atuakkit. Tussiaatit 15-iusut uku taaneqarput „majuarsiutit“ (NW). Immikkut ilisimasallit taaguutip tamatuma isumavianik isumaqatigiinngillat, ilimanarporli tussiaatit taakku erinarsuutigineqartartut Israelikkut illoqarfimmut qatsissumut, Jerusalemimut, majuartaraangamik ukiumut pingasoriarlutik nalliuttorsioriarlutik. — Tussiaat 122:1.

◆ 120:4 — ’Qarsut ipissakkat aamallu ikualasut’ suuppat?

Oqaq mamarliisoq sakkutut innertulluunniit aseruutaatigaaq. (ússatit 12:18; Jâko 3:6) Akiniaaffimmi oqqat mamarliisut sakkutuup qarsuinillusooq nipangersitaanissaat Jehovap isumagiumaarpaa. Orpigaasat ilaat (gyvel, NW) tussiaatip uuma allassimaqqaarfiani taaneqartoq aamalisaq assut ikummartuummat, Guutip ’oqqanut sallusunut’ Guutip eqqartuussissutaata ilungersussusia takutitsiarneqarpoq. — Tussiaat 120:2, 3.

◆ 131:2 — Qanoq ilillugu tarnip „miluersagaq“ (NW) assigaa?

Miluttartoq milutsinneqarusunnermit anaanaminut erinisarpoq. Aammattaaq miluersagaq anaanami taliini eqitaalluni nalerisimaarlunilu toqqissisimaarlunilu tuppallertarpoq. Tussiaasiortup makitaniarnani inooriaatsini tulluusimaarutigaa (versi 1) ’qasuerlunilu eqqissillunilu’ misigaluni, miluersakkatut anaanami taliini. Makitaniarnani Jehovamut utaqqigaanni peqqusaanillu ilioraanni toqqissisimaarnarlunilu amerlasuunik pilluaqquneqaatissaavoq.

Tamanna sumik ilinniarfigisinnaavarput: Jehovap innuttani annikilliornartunit aniguisissinnaavai, tamatigulli atugarliornaveersinneq ajorpai. Tassami, atugarliornermit tussiaasiortut tamakkuninnga tussiaasiortarsimapput. Guutilli ’artukkassinnik ussersinnavianngilaasi, kisianni aniguinissaq pinngortissavaa’. (1 Korintumiut 10:13) Kisiannili Jehovap anersaakkut tammarnaveersarpaatigut. Ilaatigut pisut aquttarpai annikilliornartoq nammineq peerlugu, ilaatigullu pissatsittarpaatigut tatineqarnitsinni aalajaassinnaaqqulluta. Tamanna siunertaralugu kristumiut ataatsimiinnitsinni ataasiussuseq nuannaarutigisartagarput eqqissiallannarlunilu iluaqutaavoq. — Tussiaat 133:1-3.

Guuti unnersiutigisariaqartoq

Tussiaatit 135-miit 145 ilanngullugu atuakkit. Guutipilunnit allaalluni Jehova unnersiutigisariaqarpoq. Guutiuvoq aniguisitsisoq — guutipiluilli susinnaanngillat, tamakkuninngalu sanasut aamma taamaalissapput. (Tussiaatit 135, 136) Babylonimiikkamik allaat innuttaasa „Zionimut erinalersuutit“ puiorsimanngilaat. (Tussiaat 137) David oqarpoq ’kunngit Jehova qutsavigissagaat’, qujassutigaalu ’tupinnangaartumik pinngortitaagami’. (Tussiaatit 138, 139) Guutimut illersoqquvoq ajunngissusialu qujassutigalugu, nalunnginnamiuk Jehovamut ajunngitsumik atassuteqarneq kisimi pilluarnartuusoq. — Tussiaatit 140-145.

◆ 138:2 — Guutip qanoq ilillugu oqaatsini pissaaneqartippai atini „ataqqinartinneqangaaqqullugu“?

Jehova atini tunngavigalugu nalunaaruteqaraangat, piviusunngornissaa pillugu assut ilimagisaqartarpugut. Ilimagisavulli akimorlugit piviusunngortitsisarpoq. Guutip oqaatsini pissaaneqartittarpai ilimagisatsinnit nuannernerungaartumik piviusunngortillugit.

◆ 139:9 — „Qaalersup . . . sului“ qanoq paasisariaqarpat?

Assersuusiornikkut qaalersoq suloqarlunilusooq kangianiit kitaata tungaanut qilakkut siammariartorasuarpoq. David ’qaalersup sului atoraluarunigit’ kitaata ungasinnerpaavanut tikiulluni, tassani suli Jehovamit isumassugaassagaluarpoq siulersugaallunilu. — Tussiaat 139:10; naleqqiuguk Aamorse 9:2, 3.

◆ 141:3 — Suna pillugu Davidip ’qarni paarsisoqarteqquaa’?

Oqqap ajoqusiisinnaanera, inuillu naammalluinnanngitsut, ingammik kamassarneqaraangamik, isumaalliorlutik oqalussinnaagajunnerat, Davidip ilisimavaa. Moses nunamiusunit tamanit annerusumik ilalaarpoq, taamaakkaluartorli Meribap erngini oqqani ajortuliuutigaa. (4 Môrsase 12:3; 20:9-13) Taamaattumik qarluvut paarisariaqarpavut ajoqutaasinnaasumik oqalunnaveersaarluta uummaterpullu ajortunngutsaaliorlugu. — Jâko 3:5-12.

◆ 142:7 — Suna pillugu David isumaqarpa tarnini (NW) „parnaarussivimmi“ittoq?

Ajornartorsiorami kisimiivilluni misigaaq, soorlulusooq parnaarussivimmi taartumi navianartumilu illuni, paasinerlugaalluni inunnillu tamanit immikkoortitaalluni. Uagut taamatut misigigaangatta isumaqarlutalu ’talerpipput’ (NW) saassunneqaratarsinnaasoq, isumalluarluta Jehova torlulaffigisinnaavarput ikioqqulluta. — Tussiaat 142:3-7.

Tamanna sumik ilinniarfigisinnaavarput: Tussiaammi 139-mi David oqarpoq nuannaarutigigini Guutip „misissuiffigisima“mmani aqqutinilu tamaasa ’nalunngimmagit’. Qimaanianngilaq, kisiannili David suli annerusumik Jehovap siulersuineranut naalakkersuineranullu tunniukkusuppoq. Nalunngilaa Guutip tamatigut isigigaani. Tamanna nalunagu ajortuliornaveersitsissutaannaanngilaq aammataarli tuppallersaataalluinnarluni. Jehovap pisariaqartitavut takusarai, ajornartorsiutivut paasigai, ikiorumallutalu piareersimajuaannartoq nalunnginnatsigu toqqissisimaarutaalluinnarpoq eqqissiallaataallunilu, pilluarnissatsinnut pisariaqarluinnartumik.

Jah unnersiutigisiuk!

Tussiaatit 146-miit 150 ilanngullugu atuakkit. Tussiaatini tamani eqqarsaatit pingaarnersaat tussiaatini ukunani erseqqissarneqarpoq: „Jah unnersiutigisiuk!“ (NW) Tussiaatit taakkua oqaatsit taakku nuanningaartut aallaqqaatigisarlugillu naggatigisarpaat. Tamanna tussiaatit 150-ianni nuannerseruttorpoq, pinngortitat tamarmik kajumissaarneqarmata ’Jah unnersiutigeqqullugu!’

◆ 146:3 — Suna pillugu siulersuisut nunamiut tunaarissanngilavut?

Siulersuisut nunamiut toqusussaapput. Imminulluunniit annassinnaanngillat tatigisitilluunniit annassinnaanagit. Taamaattumik siulersuisunik nunamiunik tunaarinninnerup toqusinnaanissaat nalikillissutigaa. ’Pilluarporli Jehovamut Guutiminut neriulluartoq.’ (Tussiaat 146:5, 6) Inuit siulersuisinnaanerannit qutsinnerusumik siulersortariaqarnissaq tussiaasiortup paasivaa.

◆ 148:4 — „Erngit qilaap qulaani“ suuppat?

Tussiaasiortup pinnguatsiarpai nuissat imillit nunap qulaaniittut siallersitsigaangamik imaartartut, erngilu kiisa imarpissuarnut utertaraat. Kaaviiaarneq tamanna uummassuseqarnermut pisariaqarluinnarpoq, ingerlaneralu Pinngortitsisumut naalannaataavoq. Silaannaqarfik nunap nuissallu akornanniittoq qilammik taaneqartarmat, tussiaasiortup nuissat taavai „erngit qilaap qulaani“.

Tussiaatini ilumoortoq una erseqqilluinnarpoq: Pilluarluinnassagutta Jehovamut ajunngitsumik pissuseqartariaqarpugut. Guutip innuttaasa anguniagaat tamarmi piunittalu siunertaa tamarmi tussiaasiortup naggasiilluni kajumissaarutaani eqikkarneqarsinnaavoq: „Anerneqartut tamarmik Jah unnersiutigilissuk. Jah unnersiutigisiuk!“ — Tussiaat 150:6, NW.