Bibelimit atuagassani pingaarnersiukkat ússatit 1:1-imiit 31:31 ilanngullugu

Jehova mianerigukku pilluassaatit

’Ilisimanermut aallaqqaataasoq tassa Jehova mianeralugu.’ (9:10) Tamatuma ilumuussusia Bibelip atuagartaani ússatine erseqqissarneqarluarpoq. ússatit, ukiumi 716 u.n.a.s. missaanni allanneqarnermikkut inaakkat, ilisimassummik eqqortumik atuinitsigut silatusaarnissatsinnut iluaqutissiipput. Oqaatsit silatuut tassani allassimasut maleruarutsigik pilluassaagut.

Ilisimassummut naalaartarit

ússatit 1:1-imiit 2:22 ilanngullugu atuakkit. ’Jehovamik mianerinninneq’ ilisarsinerup pingaartortaraa. Perorsagaaneq ilassigutsigu ajortuliortartut eqqunngitsumik iliornerisigut malissanngilavut. Jehovap mianerinnitsini ilisimassummik tunisarpai eqqunngitsuliortartunut illersuutigisinnaasaannik.

◆ 1:7 — ’Jehovamik mianerinninneq’ sunaava?

Mianerinnittumik ataqqinninneruvoq, Jehovalu mianeralugu taassumannga iluarisaannginnissarput peqqissumik siooragissavarput, asanninnera avaaginninneralu ilisimallugillu pingaartikkatsigik. ’Jehova mianeralugu’ tassaavortaaq taanna imatut isigigipput Ajugaqanngitsutut Eqqartuussisuunertullu Guutimut naalanngitsut pillassallugit toqussallugilluunniit pisussaasutut piginnaassuseqartutullu. Tassaavortaaq Guuti ilumoortumik kiffartuutissagipput, taanna tatigilluinnaratsigu, taassumalu ajorisai uumigigatsigik. — Tussiaat 2:11; 115:11; ússatit 8:13.

◆ 2:7 — Assuarnaassuseq sunaava?

Oqaatsit hebræerisuut assuarnaassusermut atatitaasut nagguimmikkut isumaqarput „tamarmiusoq“ imaluunniit „naammalluartoq“. Isumaqartarput ileqqussatigut assuarnaassuseq unneqqarissuserlu. ’Assuarnaatsumik saqisut’ Jehovamut tunniulluinnarnermikkut patajaatsuupput. ’Peqqusersuitsunut’ taakkununnga Jehova ’eqqornaveeqqutaavoq’, silatuumik iliortarmata Guutillu najoqqutassiai iluartut maleruarmatigik.

Tamanna sumik ilinniarfigisinnaavarput: Jehova mianerigutsigu oqaatsimigut peqatigiissortamigullu perorsaaneri ilassissavavut. Taamaaliunngitsoorutta ’sianiitsutut’, ajortuliortartutut guutiitsutut, issaagut. Taamaattumik asannittumik perorsaaneri tigusartigik. — ússatit 1:7; Eprîarit 12:6.

Ilisimassut pingaartiguk

ússatit 3:1-imiit 4:27 ilanngullugu atuakkit. Siuneqarluassaguit ’Jehova isumalluarfigiuk uummatikkut iluunngarlutit’. Ilisimassummik pingaartitsisut pilluartarput. Ingerlaviata assigaa qaamasoq qaammarissiartortoq, uummatertilli paarisariaqarpaat.

◆ 4:18 — Iluartut ingerlavianni qaamasoq qanoq ililluni qaammarissiartorpa?

Qaalerneraniilli seqernup qaamanera qaammarissiartorpoq ’ulloq naammatsitserlugu’. Aamma Jehovap innuttaanut anersaakkut qaamaneq ukiut ingerlatillugit qaammarissiartortarpoq. Nalliuttussat qanilliartortillugit, Jehovap siunertaasa qanoq naammassiartorumaarnissaat paasiartortarparput. Guutip siulittuutigisimasai paasinarsiartortarput Guutip anersaavanit iluartumit annertusiartortumik qaammarsartillugit, silarsuarmilu pisimasutigut imaluunniit Jehovap innuttaasa misigisimanerisigut eqquukkiartortillugit. Tassuuna ’ingerlaviat qaammarissiartorpoq’.

Tamanna sumik ilinniarfigisinnaavarput: Eqqortumik ilisimassut maleruarutsigu Guutillu inassutai najoqqutarigutsigik sianiitsumik ingerlanissatsinnut toqujaarutaasinnaasumut pitsaaliorneqassaagut. Soorlu imaattoq: Jehovap inassutaanik kinguaassiuutitigut kanngunartuliornaveeqqutaasunik soqutiginninngitsut nappaatipilummit toqujaarutaasinnaasumit tunillatsissinnaassapput. Taava Guutip piumasaanut naapertuuttumik iliuuseqartarta; taamaappat ilisimassut uatsinnut ’orpiussaaq inuunartoq’. — ússatit 3:18.

Ilisimassummik ersersitsiniarneq

ússatit 5:1-imiit 9:18 ilanngullugu atuakkit. Ilisimassummik ersersitsineruvoq kanngunartuliornaviissalluni ’inuusunnernilu nuliarilikkat tipaatsuutigi’ssallugu. Jehovap maajugisai arfineq-marluk taaneqarput arnallu inuunerluttup ussassaarineri mianersoqqussutigineqarlutik. Ilisimassut inuttut pissusiligaasoq tassaavoq Guutip ’sulillaqqissorsuutitaa’ (NW). Aamma ’ilisimanermut aallaqqaataasoq tassa Jehova mianeralugu’.

◆ 6:1-5 — Unnersuussutit makku tunisiumatussusermut akerliuppat?

Ussat tamanna tunisiumatunermut akerliunngilaq, nangaasaarutaavorli inuit allat, ingammillu ilisarisimanngisat, niuerniarnerinut akuliutitinneqarnissamut. Israelikkut qatanngutertik ’piitsunngorsimasoq’ ikiorsertussaavaat. (3 Môrsase 25:35-38) Ilaalli annertuumik pilertortumillu iluanaaruteqarniarlutik niuernikkut pissarsiorput inunnullu allanut aningaasatigut tapersersoqqullutik qularnaveeqquseeqqullugit, neriorsorlugit pisariaqalissappat inuit akiligassaqarfii akilerumaarlugit. Inuk, immaqa usorsitsaapilussimanermigut, taamatut ajornartoorsimassaguni, silatuumik siunnersorneqarpoq piaarnerpaamik aniguiniassasoq. — ússatit 11:15.

◆ 8:22-31 — Taanna unaannaava ilisimassutip allaatigineqarnera?

Naagga, ilisimassummi naassaanngitsumit ippoq, Guutip naassaanngitsuusup pissusiisa ilagimmani. (Jûpe 12:13) Uanili allassimavoq ilisimassut Jehovap ’pigileraa’, taassumalu ’sanianiittoq sulillaqqissorsuulluni’ (NW) nunap pinngortinneqarnerata nalaani. Oqassalluni ilisimassut inuttut pissusiligaasoq tassaasoq Guutip ernera, oqaatsinut ukununnga naleqqulluarpoq: ’Taassumani pequutit ilisimassutsip ilisarsissutsillu pii tamarmik isertugaapput.’ — Kulorsamiut 1:15, 16; 2:3.

Tamanna sumik ilinniarfigisinnaavarput: ’Tunissut qujaniut’ aamma ’unnersuutini’ taagamigit, arnaq inuunerluttoq ússatit kapitali 7-imi eqqartorneqartoq toqqarlugu taanngikkaluaraa nalunanngilaq paasitinniaraa anersaakkut uummaarissuseq amigaatiginngikkini. Tunissutit qujaniutaasut neqi, qajuusat, uulia viinnilu ilagisarpaat. (3 Môrsase 19:5, 6; 22:21; 4 Môrsase 15:8-10) Paasitinniarpaa angerlarsimaffimmini nerisassat naammaqisut, tassanilu ’inuusuttoq isumaatsoq’ ilorrisimaassasoq. Tassuunakkorpiaq inuk kukkusumik siunertalik kanngunartuliornissamut uanneqartarpoq. Ila pisariaqassusissaa mianersoqqussut tamanna ilassissallugu taamatullu Guutimut ajortuliornaveerluni! — 1 Môrsase 39:7-12.

Akerleriissut eqqarsaatissarsinartut

ússatit 10:1-imiit 15:33 ilanngullugu atuakkit. Salomonip ussataasa aallaqqaatigaat eqqarsaatit imminnut akerleriissut illugiikkuutaartinneqarnerat. ’Jehovamik mianerinninneq’ erseqqissarneqartarpoq. — 10:27; 14:26, 27; 15:16, 33.

◆ 10:25 — Suna pillugu ’anoraasuaq’ eqqartorneqarpa?

Najoqqutassat iluartut tunngaviginnginnamikkik, guutiitsut assigaat illut patajasut anorersuartumi uppittartut. Iluartulli patajaapput Guutip najoqqutassiai tunngavigilluinnarlugit eqqarsartaaseqaramik. Illu pitsaasumik tunngaviligaq assigalugu, tatineqaraangamik akuersiinnarneq ajorput. — Matîuse 7:24-27.

◆ 11:22 — Qanoq illilugu arnap assigisinnaavaa tullerut puulukip siggummiugisaa?

Tullerut kuultiusoq sorluup tarparsimarnaniititaq imaluunniit sorluit akornanniititaq nalunaaqqutaavoq inuata akimasuususianut. Israelikkulli puulukit mingunnartuutippaat maajunnartuutillugillu. Taamaattumik arnap pinnersuugaluarluni sianiitsup assigaa tullerut kuultiusoq naleqqutinngitsumik puulukip siggummiugisaa.

◆ 14:14 — Ilumuunngitsoq qanoq ililluni qaarsillartarpa?

Tatigisassaanngitsumik uummatillup nunap piinik pingaartitsivallaarnini qaarsillaatigisarpaa. (Tussiaat 144:11-15a) Guutip isaani eqqortumik iliortarnissani soqutigisarinngilaa, Jehovamullu akisussaanini eqqarsaatigineq ajorlugu. (1 Pîtruse 4:3-5) Kisianni ’inuup ajunngitsup’ tatigisassaanngitsut iliuusaat akiorluartarpai ’pigilikkanilu’ qaarsillaatigisarlugit. Anersaakkut soqutigisani salliutittarpai, Guutip najoqqutassiai maleruartarlugit, taassuminnga kiffartuussinini naleqanngitsumik nuannaarutigisaraa, Guutillu pilluaqqusineri tulluusimaarutigisaralugit. — Tussiaat 144:15b.

◆ 15:23 — Qanoq ilillugu ’qanitta akissutai tipaatsuutigisinnaavavut’?

Tamanna pisinnaavoq siunnersuutivut tiguneqarpata ajunngitsumillu kinguneqarlutik. Ikiorsiisinnaassaguttali, allat naalaarluartariaqarpavut, ajornartorsiutaannut pissutaasut nalilerlugit, taavalu Bibeli tunngavigalugu siunnersuilluta. ’Atalu, ajunngingaarmat oqaaserisariaqarfiagut oqaaserisaq’ taamaattoq!

Tamanna sumik ilinniarfigisinnaavarput: ’Sianiitsup narrutsannini katsornani nittararaa.’ Sianisoorli Guutip anersaavanik qinnuteqassaaq imminut naalakkersorsinnaaqqulluni Guutillu oqaasia maleruarsinnaaqqullugu. (ússatit 12:16) Taamaaliornitsigut assortuuttuarnissat pinngitsoortissavavut uagutsinnut allanulluunniit timikkut ittumik misigissutsitigulluunniit ajoqutissarsinermik kingueqarsinnaagaluartut.

Ussatit assigiissutissarsiutaasut

ússatit 16:1-imiit 24:34 ilanngullugu atuakkit. Salomonip oqaaserisai silatuut tamakku amerlanertigut aallartittarput oqaatsit assigiissutissarsiutaasut atorlugit. ’Jehovamik mianerinninneq’ erseqqissarneqaqqippoq. — 16:6; 19:23; 22:4; 23:17; 24:21.

◆ 17:19 — Isaariaq portusooq sooq ajornerarneqarpa?

Illumik isaariaanik illullu iloqqasut akornannut isaariaanik pukkitsunngortitsinngitsut navianartorsiorput angutit hestersut isaanissaannut pigisaannillu arsaartuinissaannut. Aammattaarli pineqarsinnaavoq qaneq isaarissatut takorloorneqartoq inuata anneruniarpallaartumik usorsitsaapiluttumilluunniit oqalunneratigut portusuunngortinneqartoq. Taamatut oqaluuseq assortuunninngortarpoq ajunaarnermillu kinguneqarumaarluni.

◆ 19:17 — Suna pillugu nikanartumik ikiorsiineq Jehovamik atukkiinertut ippa?

Guutip nikanartut pigai, taakkununngalu iliornerit taassumunnga iliornertut naatsorsuutigineqartarput. (ússatit 14:31) Asanninnermit tunisiumatunermillu nikanartut ajunngisaarfigisarutsigik imaluunniit piitsut pajuttarutsigik, akiniaallutik tunisinissaat utaqqinagu, Jehovap tunisinerit taamaattut imminut atukkiussatut isigisarpai, taarsiillunilu ajunngisaarfiginnikkumaarpoq pilluaqqusiumaarlunilu. — Lúkarse 14:12-14.

◆ 20:1 — ’Viinni mitallersorsuusoq’ qanoq paasisariaqarpa?

Viinnisorpallaarnermit inuit illaruaatigitittarput soqqusaatsumillu iliortarlutik. Imerpallaarneq taama ittunik kingunipiloqartarmat tamanna kristumiut ingalattariaqarpaat. — 1 Timûtiuse 3:2, 3, 8; 1 Korintumiut 6:9, 10; ússatit 23:20, 21.

◆ 23:27 — Arnaq akilersilluni atortittartoq qanoq ililluni ’nakkarfissaava’, aamma sooq ’itersaliaava’?

Soorlu uumasut itersalianut piniartut assaallutik nakkarfissiaannut nakkartoorsimallutik pisarineqartartut, taamatut arnamik akilersilluni atortittartumik atoqateqartartut kanngunartuliornermit tigusaritipput. ’Arnaq allanertaq’ tassaavoq arnaq inuunerluttoq, qularnanngitsumik pissutigalugu Israelimi arnat akilersillutik atortittartut amerlanersaat nunani allamiuummata. ’Itersaliaq ninnittoq’ imertarfigiuminaattarpoq, qummuattammi marraasut itersaliap iigaanut aserujapput. Taamatut arnanik inuunerluttunik atoqateqartartut misigissutsikkut timikkullu ajunaaratarsinnaapput. — ússatit 7:21-27.

Tamanna sumik ilinniarfigisinnaavarput: ’Nalunaajaasoq sallulluni oqaluttoq’ Guutimik ataqqinninngilaq inatsisillu malillugit toqumik pillarneqarsinnaalluni. Taamaassutsi pillugu inunnit Jehovamilluunniit ’asiu’tinneqarsinnaasoq. (ússatit 21:28; 5 Môrsase 5:20; 19:16-21; naleqqiukkit apustilit suliáinik agdlagkat 5:1-11.) ’Tusaaniartorli’ tusakkani qularinngikkaangamiuk aatsaat oqaluttaraaq. Taanna ’oqalussinnaatuinnarpoq’, nalunaajaataa ilumoormat, ilumuunngitsutullu paasineqassanani. Aamma nalunaajaasutut sallulluni oqaluttutut toqusussanngunngilaq. Jehovap Nalunaajaasuisa ilagiissaanni eqqartuussinermik piginnaaneqartitaasunut ilisimannittuullutik nalunaajaasut tusarnaaqqissaarsimasariaqarput, eqqortumik paasissutissiisinnaaqqullutik, eqqunngitsumimmi ilumuunngitsumilluunniit nalunaajaateqarneq anersaakkut ajoqusiisinnaavoq.

Naleqqiussinerit iluaqutaasut

ússatit 25:1-imiit 29:27 ilanngullugu atuakkit. Salomonip ussatai kunngip Ezekiasip angutitaanit aaqqissugaasut naleqqiussinikkut ajoqersuutaapput. Allat ilanngullugit Jehovamut isumalluarnissaq kajumissaarutigineqartarpoq.

◆ 26:6 — ’Isikkani kipisarai’ qanoq paasisariaqarpa?

Isikkaminik kipisisoq avataajarsimatippoq, soorluttaaq ’silaqanngitsumik’ atorfinitsitsisoq nammineq soqutigisaminik ajoqusiisartoq. Suliassaq silaqanngitsumut suliareqqusaq iluatsinngitsuussaaq. Taamaattumik silatusaarneruvoq angutit ’misilinneqaqqaassasut assuarnaakkunik’ ilagiinni kiffartuuteqarnissaminnut toqqarneqartussanngortinnatik! — 1 Timûtiuse 3:10.

◆ 27:17 — Inuk ’isigissisinneqartoq’ qanoq paasisariaqarpa?

Soorlu savimineq atorneqarsinnaasoq suup savissaa ipissassallugu, taamatut inuup inoqanni isumakkut anersaakkullu pissuserissarsinnaavaa. Pakatsisinneqarnermit inunnillu najoruminaatsunik suleqateqarnermit nikallungagaangatta, uppeqatitta misiginneqataapasinnera bibelerpaluttumillu kajumissaarinera qiimmatsinneqaatigisarpavut. Aliasuppasinnerput aanngartarpoq, nutaamillu neriulersitaagatta nuannaajallalluta aallarneqqissinnaanngortarpugut. — ússatit 13:12.

◆ 28:5 — ’Tamaasa’ suuppat?

Ajortuliortuaannartut anersaakkut tappiipput. (ússatit 4:14-17; 2 Korintumiut 4:4) ’Innarluissut,’ tassa Guutip najoqqutassiai naapertorlugit eqqortuusut, paasisarinngilaat. Taamaattumik pissusiusut eqqortumik nalilersinnaanngilaat silatuumillu aalajangiineq saperlutik. Inuilli qinunikkut Guutillu oqaasianik atuaqqissaarnikkut ’Jehovamik ujarlersut’ taanna iluarisaasumik kiffartuutissallugu pisariaqartitatik ’tamaasa paasisarpaat’. — Evfisumiut 5:15-17.

◆ 29:8 — Mittatilliigajuttut qanoq ilillugu illoqarfik ’innertut supoortarpaat’?

Mittatilliigajuttut oqartussaatitaasunik ataqqinninngitsut oqqartusarput. Tassuuna ajortoq ajornerulersiinnartarpaat isumaqatigiinnginneq sakkortusaannarlugu, illoqarfimmiut tamaasa ’innertut supoortarlugit’, puffassaarlugit. Ilisimatuulli ’kamanneq nipangersittarpaat’, saamasumik silatusaarlutillu oqaluttarlutik, kamannerup ikualaneri qaminniarlugit eqqissinissarlu siuarsarniarlugu. — ússatit 15:1.

Tamanna sumik ilinniarfigisinnaavarput: Pingaarniartuugutta, inornartinniarnitta nikanartitaanissarput kingunerissavaa. (ússatit 29:23) Makitasuut annerunniarpallaarajuttarput, tamatumalu kingunerisinnaavaa ataqqineqarunnaarluni nikanarsagaanera naakkumaarami nakkarlunilu. (ússatit 11:2; 16:18; 18:12) Pingaarniartup makitanaveersagaanissaa, sukkut arlaatigut nikanarsagaanissaa, Guutip isumagiumaarpaa, immaqa allaat aserussallugu. Inuit taamaattut ataqqeqqutuupput, ileqquili inuit maajugisarpaat. Kisiannili ’qanilaartoq ataqqinarsiumaarpoq’.

’Oqaatsit isumasiorissat’

ússatit 30:1-imiit 31:31 ilanngullugu atuakkit. Agurip oqaasiisa ’isumasiorissaasut’ miserratiginngilaat ’Guutip oqaasii tamarmik sukuluitsuusut’. Aamma oqaatsit tupinnarpallaaramik paasissaanngitsut issuarneqarput. ( 30:1-33) ’Oqaatsit isumasiorissaasut’ Lemuelip anaanaminit pisaasa mianersoqqussutigaat aalakoornartutortartut eqqartuussutinik allanngortitsisoorsinnaasut, iluartumik eqqartuussinissamut inatsipput, nuliarlu pikkorissoq allaatigaat. — 31:1-31.

◆ 30:15, 16 — Assersuutit makku qanoq paasisariaqarpat?

Piumatunerup naammatsittussaanngissusia takutinneqarpoq. Aammik miluttartut qaarsillajuipput, soorluttaaq piumatuut aningaasanik pissaanermillu aammaartuaannartut. Aammattaaq sheol naammatsinneq ajorpoq, piareersimajuaannarporli toqusut suli aamma tigussallugit. Ernisuitsoq meeqqanik naammatsinneq ajorpoq. (1 Môrsase 30:1) Nuna siallissaarsimaffiusoq sialuk milluarsimallugu paqqersimaavarpoq. Innerullu innermut iginneqartut nungoreersimallugit ikualanerisa ikuallajasut angusinnaasatik ikuallatsittarpaat. Inuit piumatuut taamaapput. Ilisimassulli Guutimeersoq najoqqutaralugu inuusut namminissarsiornermit taamaattumit ingerlanneqartuaannarunnaartarput.

◆ 31:6, 7 — Suna pillugu ’tarnimigut aliatsangaartoq’ viinnimik imminneqassava?

Imigassat kimittuut viinnilu nipaallisaataapput. Taamaattumik ’sussaajunnaalersut’, tassa toqulersut, imaluunniit ’tarnimikkut aliatsangaartut’ tamakkuninnga imminneqartarput annerisaminnik annikilliuutiminnilluunniit misissarissusiat millisinniarlugu. Itsarsuarmit ileqquummat pinerluttut toqutaalernermikkut annerisaat nipaallisarumallugit viinnimik ilisimajunnaarsaatilersimasumik immittarlugit, paasineqarsinnaavoq suna pissutigalugu sakkutuut Romamiut Jesus Kristus nappakkamut paagussimasoq tamatuminnga imminniaraluaraat. Viinni ilisimajunnaarsaatilersimasoq imerumanngilaa misilinneqarnermini silaqarluarusukkami Guutimut assuarnaassutsiminik aalajangiussisinnaajumalluni. — Mákorse 15:22-24.

◆ 31:15 — ’Arnat inuusuttut’ kikkuuppat?

Illumi kiffat arnat pineqarput. Nerisassaaleqisuunnginnamik suliassaaleqisuunatillu naammagittaalliuutissaqanngillat. Nuliap eqiasuitsup inoqutini nerisassaannik tunisarpai, kiffallu arnaasut nerisassaqartarnissaat suliassaqartarnissaallu isumagisarlugit.

Tamanna sumik ilinniarfigisinnaavarput: Ajortiliugatta immaqa ilaatigut silaatsumik ’anneruniartarpugut’, immitsinnik pingaartippallaalerluta. Taamaaliortoorutta, imaluunniit kamalluta oqaluttoorutta, taava ’qanerput assatsinnik assissavarput’, ajuallannartumik kamannartumilluunniit suli aamma oqaaseqarnaveersaarluta. Soorlu immuk aalaterneqarluni punniliarineqartartoq, qingarlu naqinneqaruni aalersartoq, taamatut inuit kamannertik nununiarneq ajoraangamikku saqitsaattarput. (ússatit 30:32, 33) Pitsaanerussaqaaq nipangissalluni tassuunakkut ajornartorsiulersinnaaneq pinngitsoortikkumallugu!

ússatit ila iluaqutissarsiffiginassusii! Oqaaserisat silatuut Jehovamik mianerinninnermik ineriartornartut tamakku erligisigik. Maleruarutsigik ilumut pilluassaagut. (wD 15/5 87)