Guutimut ilinnullu ’attuumassuteqartut iluarsiniarniakkit’
„Ajortuliasi aappallarissutut ikkaluarunik aputitut qaqorsagaassapput.“ — Isaia 1:18, NV.
1, 2. (a) Ima oqartoqarpat: ’Qaagit, eqqartuuteqatigiissa,’ taava qanoq isumaqarnarsinnaava? (b) Sooq inuup kialuunniit Guuti eqqartuuteqatigisinnaanngilaa?
INOQATIT kukkuluttorfigisimagukku isumaqatigiikkunnaarallarsimallusilu, taava qanoq qisuariassagaluarpit taassuma ima oqarfigisuuppatit: ’Qaagit, eqqartuuteqatigiissa’? Oqqaterujussuaqqaarluni isornartorsiuuterujussuaqqaarlunilu aatsaat isumaqatigiinniarnissamut pilerisaarinertut tamanna nipeqarsinnaavoq.
2 Kisianni Pinngortitsisup tamanna isumaginerpaa Bibelimi kalaallisuunngortitami atortussaatitaasumi Isaia 1:18-imi oqarami: ’Qaassasusi, eqqartuuteqatigiissa’? Ilaa, naamik? Inuup kialuunniit Jehova Guuti saqitsaassiffigisinnaanngilaa, imaluunniit nassueqqusinnaanngilaa — soorlulusooq Guuti arlaannik kukkusimasoq nassuerutigisariaqakkaminik, imaluunniit soorlu isumaqatiginninniarnissaminut pisariaqartitsisoq. Sumilliuna Jehovap kiffani Isaia 1:18-imi inakkai?
3. Oqaatsip hebræerisuup nutsikkat ilaanni Isaia 1:18-imi „eqqartuuteqatigiinneq“-mik nutserneqarsimasup suna isumavigaa?
3 Oqaatsip hebræerisuup „eqqartuuteqatigiinneq“-mik nutserneqarsimasup isumavii tassaapput „aalajangerpaa, eqqartuuppaa, uppernarsarpaa“. Tamanna inatsisitigut najoqqutassaqarpoq; inuit marluk oqqannerat kisimi pineqanngilaq. Oqaatsip isumavia tassaavoq aalajangiineq.a (1 Môrsase 31:37, 42; Jûpe 9:33; Tussiaat 50:21; Isaia 2:4) Wilson’s Old Testament Word Studies naapertorlugu oqaaseq taanna ima isumaqarsinnaavoq: „Ilumoortuuneq; tunngaveqartumik eqqarsarneq, suna eqqortuullunilu ilumoortuunersoq uppernarsarlugu.“ Guutip inassutaa taanna taamaattumik ima nipeqarpoq: „Qaaniaritsi, immitsinnut attuumassuteqartut iluarsiniariartigik,“ soorlu nutsikkami nutaami Ny Verden-ip nutsernerani Isaia 1:18-imi allassimasoq.
4-6. Esajas kinaana, qangalu pruffiititut kiffartuuteqarsimava?
4 Tusarliussaq pissaaneqangaartoq tamanna Jehova Guutip pruffiitimigut Esajasikkut tusarliuppaa. Esajas kinaana, aammalu sooq tusarliussaq tamanna taassuma nalaani tusarliutissallugu pisariaqarsimava? Aamma uagut tusarliussaq tamanna iluaqutigisinnaavarput, taamaappallu qanoq ililluta?
5 Oqaaseq „pruffiiti“ inuit ilaasa tusaraangamikku qularnanngitsumik eqqaasarpaat angut inuusuttoq imminut naaggaartoq pissusiviusumut paasinnittaatsimik sangutilaakkamik nalunaarutiginnittoq, ilaasali eqqaasarlugu angut utoqqaq eqqumiikujooq pissutsinik atuuttunik assuarinnittoq. Esajasili, angut isummamigut aalajasuunngitsoq silassorissuusorlu nammineq aterminik taaguuserneqartumik atuakkamik Bibelimiittumik Jehova Guutimit allatsinneqartoq, angutinut qulaani taaneqartunut assingunngilluinnarpoq.
6 ’Esajas, Amozip ernera,’ Judami najugaqarsimavoq ukiunilu 40-ni Jehovamik kiffartuussilluartuusimalluni ’Uzzija, Jotam, Akaz Ezekiasilu Judakkunni kunngiutillugit’. Nuimaniartuunnginnami Esajas imminut oqaluttuarinngingajavissimavoq. Kinguaariinnit oqaluttuarsiat naapertorlugit kunngikkormiunik kinguaariinnik Judakkuusunik ilagisaqarpoq. Qularutiginagu ilisimavarput nuliaqarsimasoq, marlunnillu ernertaarfigisimagaa. Nuliali toqusimavoq, immaqalu nuliaqqippoq ernertaaqqissimallunilu, taannalu siulittuutaasoq naapertorlugu Immanuelimik atserneqarsimavoq. — Isaia 1:1; 7:3, 14; 8:3, 18.
7. Sooq Esajasip siulittuutai soqutigisariaqarpavut?
7 Esajasip nalaani pissutsit uagullu nalitsinni pissutsit imminnut assingupput. Kikkulluunniit nalunngilaat piffissami inuiaqatigiit akornanni pissanganartorsiorfiusumi, sorsuffiusumi sorsunnermullu siooraffiusumi, inuusugut. Upperisarsiornermut naalakkersuinermullu pisortat Guutimik pallorfiginnittuunerarput inunnullu ajunngitsumik maligassiuinerarlutik — akuttunngitsunilli tusagassiuutitigut aqqi taaneqartut tusartarpavut aningaasatigut peqquserlunnernut kinguaassiuutitigullu kanngunartuliorsimanernut tunngatillugit. Guutip pisortat taama ittut, pingaartumik kristumiuuneraqatigiinnut attuumassutillit, qanoq isumaqarfigai? Taakkua malittaasalu siunissaat sumik nassataqassava? Guutimit tusarliussat apeqqutinut taakkununnga tunngassuteqartut Isaiap agdlagaine nanisinnaavavut. Aammattaaq uagut tamatta immikkut Guuti kiffartuunniarlugu ilungersuuteqarnitsinni Isaiap agdlagai ilinniarfigilluarsinnaavavut.
Inuiaqatigiinnut ajortiliusunut pruffiiti
8. Isaiap agdlagai sunik imaqarpat, qanorlu ittumik allagaappat?
8 Isaiap agdlagai atuarutsigik tusarliussat Judap Jerusalemillu pisuunerinut tunngasut, akeqqat isaasarnerinut pisimasuinnut tunngasut, inuiaqatigiit avatangiisimasut piuneerunneqarnissaannik tusarliussanut tunngasut, aammalu Israelip atuutileqqinneranik aniguisitaaneranillu siulittuutinut qiimmaallannartunut tunngasut nanisinnaavavut. Tamakku tamarmik kimittuumik tiguartinnartumillu allagaapput. Dr. I. Slotki ima allappoq: „Ilisimatuut misissuisartut uummatimikkut iluunngarlutik Esajasip isumassarsiffiulluarsinnaanera aammalu takorlooruminartumik allattaasia, sunniulluarsinnaasunik assersuusiullaqqinnera, oqaatsit aallaqqaataasa assigiiaarnerat assigisaallu, oqaaseqatigiilioriaasiatalu oqimaaqatigiissaarnerat taalluaqatigiissaarnerallu pillugit nersorpaat.“ Atagu siullermik Isaiap agdlagaisa aallaqqaataat sammeriartigu — kapitali siulleq.
9. Isaiap agdlagaisa kapitaliisa siulliata qanga pissutsillu suut atuunnerisa nalaanni allanneqarsimaneranut tunngasut suut ilisimavavut?
9 Pruffiitip taassuma kapitali taanna qangarpiaq allannerlugu taanngilaa. Isaia 6:1-13 ukiumi kunngi Uzzijap toquffiata nalaaneersuuvoq. Kapitalit siulliit tamanna sioqqullugu Esajasip allassimagaluarpagit, taava ukiuni Uzzijap kunngiuffigisaani pissutsinut saqquminngitsunut immaqa eqqaanassagaluarput. Uzzija (829-777 u.n.a.s.) amerlanertigut ’Jehovap iluarisaanik iliortarpoq’, taamaattumillu naalagaassusia Guutip pilluaqquaa siumukarnermik. Taamaakkaluartorli ilisimavarput suut tamarmik pissusissamissut ingerlasimanngitsut, tassami ’suli inuit tunisisarlutillu tipigissaatilliisarput kingittunnguani’, taamaattumillu Guutip Uzzija (imaluunniit Azarja) makitassutsimigut naalaffimmi tipigissaatilliimmat, pillarpaa pupissunngortillugu. (2 nalunaerssûtigdlit 26:1-5, 16-23; 2 kúngit 15:1-5) Anngiortumik eqqunngitsuliat kunngi Uzzijap nalaani pisimasut ajussusermik, Uzzijap erngutaanut, kunngi Akazimut (762-745 u.n.a.s.) tunngatillugu atuakkatsinnik, kinguneqarsimagunarput, kisianni aamma imaassinnaavoq kunngi Uzzijap nalaani pissutsit Esajasip allaatigisimagai. Kapitalilli siulliup ukioq sunarpiaq allanneqarsimanerata aalajangiunnissaaninngarnit pingaarnerungaarpoq paasissallugu suna pissutigalugu Guuti ima oqarsimanersoq: „Immitsinnut attuumassuteqartut iluarsiniariartigik.“
10. Akazip kunngiunerata nalaani Judami pissutsit suut atuuppat, pingaartumik inunnut naalagaasut akornanni?
10 Esajas erseqqissumik ima oqarpoq: ’Eqqanaq inuiaat ajortuliortut, inuiaat ajortulinerup nanigai, iluaatsuliortut kinguaat qitornat aseruisut; Jehova qimappaat, Israelip illernartua ajattorlugu tunummullu avissaarlutik. Niaqoq tamarmi annernarsivoq, uummat tamarmi napparpoq. Aluinit niaquannullu allaat naami peqqissoq.’ (Isaia 1:4-6) Ukiut 16-it Akazip naalakkersuiffigisai maajunnartumik guutipilussiorfiungaarput. ’Ernini [pilliutitut] innikkut ingerlatippai, akimanngitsut maajunnartuliaat issuarlugit; tunisisarpoq tipigissaatilliillunilu kingittunnguani qaqqannguillu qaanni orpiillu pilutartuut tamarmik ataanni.’ (2 nalunaerssûtigdlit 28:1-4; 2 kúngit 16:3, 4) Naapertuilluanngitsuliornerit, akiliilluni peqquserlutsitsinerit, kanngunartuliornerillu naalagarsuit, qanga Sodomami naalakkatut piukkunnaateqarnerusut, inuuneranni ullut tamaasa pisarput. (Isaia 1:10, 21-23; 1 Môrsase 18:20, 21) Guutip taakku iluarinngikkai nalunanngilaq. Qanormi inuit ingerlasarpat taamaattunik aqutsisoqaraangamik?
11. Oqaatsit Isaia 1:29, 30-miittut qanoq paasisariaqarpat?
11 Esajasip orpiit iluartuutitat naatsiiviillu guutipilunnut tipigissaatilliiffiusartut assersuutitut atorpai ersersinniarlugu inuit qanoq ajortigisumik inuuneqartut. Inuit ’orpissuit’ kanngusuutigisussanngorpaat. (Isaia 1:29; 65:3) Taava Esajasip assersuusiani taanna guutipilussiortunut tutsippaa, allallunilu: ’Orpik manngertuusaq pilutaarutilersoq assigilerussiuk naatsiivillu imeqanngitsoq.’ (Isaia 1:30) Aap, inuit Jehovamik qimatsisut ’nunngut’tussaapput. Ilupaassiatut ikuallajasutut ilissapput, guutipiluilu aamaannanngorlutik — tamarmillu innermit nungunneqassapput. — Isaia 1:28, 31.
12, 13. Pissutsinik Esajasip nalaani uagullu nalitsinni atuuttunik imminnut assingusunik taasaqarit.
12 Atagu tamanna ullumikkut pissutsinut atuuttunut sanilliuteriartigu. Qaammatip ataatsip ingerlanerinnaani Amerikamiut aviisiitigut allaatigineqarput præsidentimut qinigassanngortittoq nuimasoq tunuartariaqarsimasoq allasiortarnerminut tunngasut tusarliunneqareersullu, aamma ilagiinni kiffartuutilik tusaamasaq taarserneqartariaqarsimavoq allasiorsimanini nassuerutigereeraalu, aammalu anguteqatiminik atoqatiginnittarsimasutut, nuliaminik taartigeeqatigiittarsimasutut aammalu aningaasanik paarisaminik akiliilluni peqquserluttuliortitsisarsimasutut unnerluutigineqarsimalluni. („Oqaatigineqarpoq 1984-imiilli dollarinik 4,6 millioninik nalilinnik tigusisarsimasoq,“ Time-imi 11. maji 1987-imeersumi allassimavoq.) 1986-imi illoqarfimmi Reinimi Østrigimiittumi mattuttut misissortaat ’soraarsinneqarpoq unnerluutigineqarlunilu kaasariusimasut kinguaavisa arnallu inuusuttut taakkunatut pingaartiginngitsumik tunuliaqutaqartut nuannaterujuttarfissaannut illuaqqamut aallaaniartarfiusumut koruuninik 42 millioninik aningaasaliisimasutut’. Qularnanngitsumik illit nammineq taasaqarsinnaavutit naalakkersuinermik suliaqartunik upperisarsiornermillu aquttuusunik atorfimminnik atornerluisimasunik. Illit qanoq isumaqarpit taakku Guutip qanoq isiginerai?
13 Inuit nalinginnaat eqqarsaatigalugit, amerliartuinnartut upperisarsiorneq qimakkaluttuinnarpaat. Inuit ilaasa upperisarsiornerit suulluunniit tunussimavaat nakerinnginnamikkik imaluunniit soqutiginngilluinnaramikkik. Assersuutigalugu taasinnaavarput Tuluit Nunaanni innuttaasut pingasorarterutaannaat ilagiinni naalagaaffimmut atassuteqartuni naalagiartartut. Illuatungaatigulli upperisamik ingasaassilluni pingaartitsineq saqqumilaaqaaq. Tamanna takuneqarsinnaavoq uppeqatigiinni karismatiusuni, tassa killinnartuliornernik pingaartitsisuni, „annaassisarnermikkut“, oqaatsinik allanertanik oqaluttarnermikkut, napparsimasunillu „ajorunnaarsitsisarnermikkut“ misigissutsikkut kajumissaarisuni. Tupinnartulianik pisoqarnissaa neriuutigalugu inuit iluartuutitaliaqarfiit ornigartuarpaat. Allallu sorpassuit pilliutigisarpaat; soorlu: ilaasa uppernermikkut suliatut ilungersoqalutik seeqquinnarminnik aanaartuinnarnik ingerlallutik Mexico Citymi Niviarsiaq Guadalupemeersoq takuniartarpaat. Aviisit ilaanni allassimavoq: „Naak Niviarsiap piunera ilungersuullugulu pallorfigisaanera kristumiussutsimik Guutimillu nalusuussutsimik akulerussinertut kusanaatsutut inuit ilaannit isigineqannguatsiaraluartoq, taamaattoq Mexicomi katuuliussutsip pingaarnersarigunarpaa.“
Qanoq ililluta Jehovamit iluaritissinnaavugut?
14. Jehovap Esajas aqqutigalugu qanoq ililluni ersersippaa imminik pallorfiginninnerartut tamakkernagit iluarigini?
14 Jehova Guutip imminik iliginninnerartunut kisianni ’anersaakkut ittumik ilumoortumillu’ imminik pallorfiginnikkumanngitsunut qanoq isiginninnini isertuutinngilaa. (Juánase 4:23) Inuiaat, upperisarsioqatigiit imaluunniit inuit ataasiakkaat Guutip malittareqqusai saqqummersitaasut malinngikkunikkik, taava upperisarsiornerminni suliaat naleqarnavianngillat. Itsaq Israelimi upperisarsiornermut atatillugu nalliuttorsuit pilliisarnerillu ilumoortumik pallorfiginninnermi pinngitsuugassaanngillat. (3 Môrsase, kapitalit 1-7, 23) Esajasilli juutit ilumuunngitsut erseqqissaaffigai Guutip isaani naammanngitsoq inatsisit tamakku maleruarunikkik. Guuti oqarpoq: ’Assasi siaaraluarussigik, taamaattoq isikka matuakka ilissinnut; pallortarnisi amerlanaaraluarussigilluunniit tusassanngilassi.’ (Isaia 1:11-15) Ullumikkut aamma taamaappoq. Nalliuttorsiorpalaartumik upperisarsiornerit isumaqanngitsut imaluunniit upperisamik nassuerutiginnittarnerit qinnutillu alanngaarnikkut pisartut Guutip kissaatiginngilai, kissaatigaali eqqortumik iliornerit qinnutillu uummammit pisut.
15. Sooq Isaia 1:18 neriunnissamut tunngavissiiva, oqaatsillu: „Immitsinnut attuumassute- qartut iluarsiniariartigik“ suna isumagaat?
15 Tamanna ilisimagutsigu taava neriunnissatsinnut tunngavissaqarpugut. Guutimit iluaritinneq inunnut ajornanngilaq. Qanoq ililluni? Esajas kajumissaarerpasilluni oqarpoq: ’Uffaritsi, eqqiaritsi, suliassi ajorsusiat isima saannit peersiuk, ajortoq alarsiuk. Ajunngitsuliornermut sungiusaritsi, innarluissut apeqqutigisiuk.’ Taava kingornatigut Guutip inassutaa saqqummiuppaa: „Qaaniaritsi, immitsinnut attuumassuteqartut iluarsiniariartigik.“ Uani Jehova kajumissaarinngilaq naligiinnut isumaqatigiinnissamik tungaanut oqallissuataaqqusilluni. Suna eqqortuunersoq sunalu naapertuilluartuunersoq Jehovap nalunngilai. Aalajangiinera ima nipeqarpoq: Allanngortariaqartut tassaapput inuit; taakkua Guutip najoqqutassiai naapertuilluartut maleruartariaqarpaat. Ullumikkuttaaq taamaappoq. Arlaannik allannguinissaq ajornanngilaq taamaalillunilu Guutimit iluarisaalerluni. Allaat inuit ajortorujussuusimasut allanngorsinnaapput. Esajas allappoq: „Ajortuliasi aappallarissutut ikkaluarunik aputitut qaqorsagaassapput.“ (NV) — Isaia 1:16-18.
16. Bibeli tunngavigalugu unnersuussutit unioqqutitsinermut tunngasut inuit ilaasa qanoq isumaqarfigeqqajaasarpaat?
16 Taamaakkaluartorli inuit ilaat isumaqaqqajaasarput siunnersuut tusagartik inunnut allanuinnaq tunngatinneqartoq. Qularnanngitsumillu Esajasip nalaani inuit amerlaqisut taamatut isumaqarsimapput. Kisianni tamatta immitsinnut misilittariaqarpugut. Kristumiu ajortuliorujussuarsimaguni, soorlu salluliorsimaguni, peqquserluttuliorfiginnissimaguni, kinguaassiuutitigut kanngunartuliorsimaguni arlaatigulluunniit unioqqutitserujussuarsimaguni, pingaartorujussuuvoq isumataarnissaa tamannalu naapertorlugu suliaqarnissaa. (apustilit suliait 26:20) Inuit ilaasa sapinngisartik tamaat ’Jehovamut imminnullu attuumassuteqartut iluarsiniarsimavaat’, tamatuminngalu nersortariaqarput. Ajortuliat inoqatinit takuneqarsinnaanngitsut Guutimulli ersittut pillugit apeqqut Napassuliaĸ Alapernaerssuivfik-mi 1. maji 1986-imeersumi sammineqarsimavoq. (Matîuse 6:6; Filípimiut 4:13) Immikkoortut pingasut pingaarnerusutut sammineqarput: Isertortumik aalersortinneq, imminut inertittarneq aalakoornartumillu atornerluineq. Allaserisat taakkua atuareerlugit ikinngeqisut Vagttårnip peqatigiiffianut allagaqarput allaaserisanik pingaartitsinertik nuannarinninnertillu ersersillugu; miserratiginngilaat taamatut sanngiissuteqarsimallutik, kajumissaarneqarlutillu peqqissiminissaminnut allamullu saanniarnissaminnut.
17. Oqaatsit Isaia 1:18-imiittut qanoq ikiorsinnaavaatigut, allaat unioqqutitserujussuarsi- manngikkaluaraangattaluunniit?
17 Qujanartumik kristumiut ilumoortut ikittuinnaat unioqqutitsinermut sualuttumut pisuusarput. Taamaakkaluartoq Esajasip oqariartuutaata tamatta uummatitsinnik misissueqqissaarnissatsinnik killittariaqarpaatigut. Jehovamut immitsinnullu attuumassuteqartunik arlaannik iluarsiniagassaqarpa? Esajasip oqariartuutaata ilaa pingaarneq periaatsinut eqqortunut tunngavoq. Qinnutit eqqarsaatigalugit immitsinnut aperisinnaavugut: „Qinnutikka uummatinnit pisarpat, aammalu qinnutikka naapertorlugit sapinngisara tamaat atorlugu iliortarpunga?“ Imminnut taama aperisimasut ilaasa misiutiginngilaat tassuuna siuariaateqarsinnaallutik. Immaqa Guutip piumasaanik ilisimassummik annertunerusumik pigisaqalernissartik qinnutigisimavaat, piffissarli annikitsuinnaq Bibelimik aammalu atuakkanik atuagassianillu kristumiorpaluttunik atuarnermut atortarlugu. Allallu qinnutigisimavaat oqaluussisarnerup annertunerusumik peqataaffigilernissaa, inooriaaserli nunap piinut tunngasunik suliaminnik millisitsinissaminnut aammalu minnerusumik isertitaqarlutik inuulernissaminnut periarfissiinngitsoq aalajangiusimaannarlugu. Illit immaqa Guutimut qinusimavutit oqaluussisarnerit pilluaqqoqqullugu ajunngitsumik kinguneqarnissaanik? Qanorli annertutigisumik iliuuseqarpit ajoqersuinermut pikkorinnerulerumallutit? Peqqissaartumik oqaloqatigisimasatit pulaaqqittarpigit, aammalu piumassuseqarpit aalajangersimasumik Bibelimik atuaqqissaaqatiginninnissamut piffissavit atornissaanut? Kissaatigigukku qinnutitit Guutip tusassagai, taava qinnutitit naapertorlugit tamaviaarlutit sulissuteqartariaqarputit.
18. Sooq Guutimut uatsinnullu „attuumassuteqartut iluarsiniar“nissaat soqutigisariaqarparput?
18 Inuunitsinni sutigut tamatigut ajunngitsumik Guutimut, Pinngortitsisitsinnut, minguitsumik attaveqarnissarput anguniartuartariaqarparput. Malugiuk Esajasip tunngaveqarluni taamaanneraraa: ’Ussigup inuni ilisarisarpaa, siutituullu ilisimavaa pigisimi nerisitsivia; Israelili misiginngilaq, innuttakka sianigisaqanngillat.’ (Isaia 1:3) Arlaannattaluunniit iluarinavianngilaa ussimmit siutituumilluunniit ilisimaatsunerusutut qujasuinnerusutullu eqqartorneqassalluni. Kisianni taamaassimassaagut misigigutta Inuunermik Tunisiserput uagutsinnullu piumasarisai ilinniassallugit pisariaqanngitsut, aammalu ilinniakkavut naapertorlugit ilumoorluta inuunianngikkutta.
19. Imminnut Guutimullu ’attuumassuteqartunik iluarsii’simasut siunissaannut tunngasut suut pingaarnersiorlugit Esajasip eqqartullatsiarpai, tamannalu uagutsinnut qanoq pingaartigaa?
19 Esajasip inuit neriulluarnissaannut pissutissippai. Oqarpoq Guutimut attaveqarnerat minguitsunngorsinnaasoq. Attaveqarnerat qanorluunniit aappillaritsigigaluaruni, savat meqquisut Hermonilluunniit Qaqqaata aputitaasut qaqqoritsigilersinnaavoq. (Isaia 1:18; Tussiaat 51:7; Dâniale 7:9; sarĸúmersitat 19:8) Inuilluunniit amerlanerit oqariartuut tamanna tusarusunngikkaluarpassuk taamaattumillu inuiaqatigiit ajorsartitaallutik tiguagaallutillu, sinneruttut ilumoortut nunamut utersinnaassapput. Aamma uagut Jehovamit iluaritilersinnaavugut, immaqa ilagiinnik nakkutilliisut ilumooqqissaartut asannillutik ’eqqartuussisuullutillu siulittaasuusut’ ikiortigalugit. (Isaia 1:20, 24-27; 1 Pîtruse 5:2-4; Galâsiamiut 6:1, 2) Qularutigissanngilat ilinnut Guutimullu attuumassuteqartut iluarsiniarneqarsinnaammata. Guutimillu iluarisaareersimagutta, taava taassumunnga attaveqarnerput nakussatsissinnaavarput. Qularissanngilat ilungersulussinnarnaviarnak. (wD 15/10 87)
[Quppernerup ataani ilanngussaq]
a Dr. E. H. Plumptre nassuiaalluni oqarpoq: King James-ip nutsernerani nutsigaq (’eqqartuuteqatigiissa’) „isumaqarnarpoq naligiissut oqaloqatigiinnerat pineqartoq. Hebræerisuulli pineruaa naalakkersuisunit pisortaatitap pinngitsaaliiniummik nalunaaruteqarnera, soorlu eqqartuussisup unnerluutigisamut oqaaseqarnera.“
Apeqqutit uteqqitassat
□ Peqqussut Guutimut ’immitsinnullu attuumassuteqartunik iluarsii’niarnermut tunngasoq qanoq paasisariaqarpa?
□ Pissutsit Esajasip nalaani uagullu nalitsinni atuuttut sutigut imminnut assingussuteqarpat?
□ Guutimit iluarisaajumagutta tamatta immikkut qanoq iliortariaqartugut Esajasip ersersippaa?
□ Unioqqutitserujussuarnerup saniatigut sutigut pisariaqalersinnaava Guutimut uatsinnullu ’attuumassuteqartunik iluarsii’niarnissaq?
[Qupp. 3-mi assiliartaq]
Hermonip Qaqqaata sivingarni apisimasut, Jordanip qooruata aallaavianit Galilæap qattunerisa tungaannut isikkivik
[Qupp. 6-mi assiliartaq]
Esajas oqarpoq ’siutituup ilisimagaa pigisimi nerisitsivia’. Tamanna qanoq ilinniutigisinnaavarput?