Ullut kingulliit — katersuiffik
’Takunnileramalu, ata, nuia qaqortoq, nuiallu qaani issiasoq inuup erneratut asseqartoq, taassuma niaqorut kuultiusoq niaqormiugigaa, killuullu ipittorsuaq tigumiaraa.’ — SARKÚMERSITAT 14:14.
1. Pisimasut suut eqqarsaatigalugit ukiut hundredillit maanna atuuttut naleqanngitsuuppat?
UKIUT 2000-issaanni maanna atuuttuni pisimasut ila allanngorarsimassusii! Inuiaat silarsuaq tamakkerlugu sorsunnerit amiilaarnartut marluk atugarisimavaat. Nunat tulleriiaaginnaat mumisitsinerit atugarliuutigisimavaat. Kaannersuit inuiaat ingerlaasianni aatsaat taama naalliuutaatigilerput. Aningaasatigut unerissimannginneq, pinerlunnerit, mingutsitsinerit, nappaatillu annilaarnartut inuit tamarmik inuulluarnerannik aarlerinartorsiortitsipput. Tamakkununngali peqatigitillugu inuit ilisimatuussutsikkut tupinnaannartumik siumukarsimapput. Atomip nukinga atugassaminnut atorsinnaalersimavaat allaallu qaammammi pisussinnaalersimallutik. Ilumut, kinguaariit uagut assigiinngitsorpassuartigut naleqarsimanngilagut. Taamaattorli, nalitsinni pisimasut ilaqarput pingaarnerpaalluinnartumik, tamatumunngalu naleqqiullugu allat tamarmik suunngitsutut isigineqassapput.
2. Danielip siulittuutigisimasaa suna uagut nalitsinni pisussaava?
2 Pisimasoq ullunik nutaanik pilersitsisoq naleqanngitsoq tamanna ukiunik naatsorsuisarnitta aallartinnerata siornagut ukiut hundredillit arfernanni pruffiiti Danielimit siulittuutigineqarsimavoq. Guutip sunniineratigut nalunaarutigisimasaa tusarnaariaruk: ’Takunnikkama unnuami takorloornikkut, sunaaffa qilaap nuiaasigut aggersoq inuup erneralusooq; ullut utoqqaasuat tikikkaa, saanullu sassartitaalluni. Tunineqarporlu naalagaassusermik naalannarsusermillu naalagaaffimmillu, inuiaqatigiit tamarmik akimanngitsullu immikkullu oqaasillit kiffartuussagaat taanna.’ — Dâniale 7:13, 14.
3. (a) ’Ullut utoqqaasuat’ kinaava, aammalu ’inuup erneralusooq’ sumik tunivaa? (b) ’Inuup erneralusooq’ taanna kinaava, Jesusillu taassuma kinaassusia ersersimmagu, upperisarsiornikkut pisortat juutiusut qanoq periaaseqarpat?
3 ’Ullut utoqqaasuat’ tassaavoq Jehova Guuti. Danielip takuaa taanna ’qilaap nuiaa’niilluni, tassa takussaanani anersaat najugaanniilluni, ’inuup erneralusooq’ kunngiussusermik tunigaa. Kinaana taanna? Ukiumi 33-mi u.n.a.k. juutit killisiuisoqatigiissortaannut eqqartuussassanngortitaalluni Jesusip apeqqut tamanna akivaa. Juutit palasiunerata Guuti naqqissigalugu uppernarsaaqquaa oqarfigeqqulluni taannaanersoq Kristus. Akissummini Jesusip nakimanani Danielip siulittuutaa imminut tunngatippaa, oqarluni: ’Matuma kingornagut inuup ernera takujumaarparsi pissaanerup talerpiata tungaani issiasoq qilaallu nuiaasigut aggersoq.’ Jehovap kunnginngoqqusaa akuerinagu, palasiunerup Guutimik mitaatiginnittuunerarpaa. Tamatuma kingunerisaanik upperisarsiornerup tungaatigut pisortat juutiusut Pontius Pilatus kimigiiserfigaat Jesus toqutassanngorteqqullugu. — Matîuse 26:63-65; 27:1, 2, 11-26.
4. Jesus qanga kunngitut niaqoruserneqarpa, tamannalu qanoq assortorneqarpa?
4 Tassuuna Jesusip oqaasiisa eqquunnissaannik pitsaaliiniaraluarnerat taamaatinneqarpoq toqusunit makititaammat qilaliarlunilu, Naalagaaffimmik tunissalluni Jehovap nallersiisaa utaqqissallugu. (apustilit suliait 2:24, 33, 34; Tussiaat 110:1, 2) Nallersiisaq 1914-imi nallerpoq. Uppernarsaatit tamaasa naapertorlugit, ukiup tamatuma affaani kingullermi Jesus ’ullut utoqqaasuannit’ kunngitut niaqoruserneqarpoq naalagaalerlunilu. (Matîuse 24:3-42) Naalagaaffik pilerserlaaq sakkortuumik assortorneqalerpoq. Kisiannili ukiuni hundredilinni siullerni upperisarsiornerup tungaatigut pisortat juutiusulluunniit, inuiaqatigiit tamarmik peqatigiillutik pissaanilissuilluunniit, Sataniluunniit inngilipilui ilanngullugit Guutip piumasaa naammassitsaalisinnaasimanngilaat. (Tussiaat 2:2, 4-6; sarĸúmersitat 12:1-12) Piffissarpiaq 1914-imi nallermat qilammiorpassuit erinarsorrallutik nipaat tutsiuppoq: ’Silamiut naalagaaffiat Naalakkatta tanitaatalu pigilerpaat, taannalu kunngiussaaq naassaanngilluinnartumik.’ (sarĸúmersitat 11:15) Taamanerniilli pissutsinik aaqqissuussinerup ajortup matuma ulluini kingullerni inuuvugut. — 2 Timûtiuse 3:1.
Katersuiffik
5. (a) Danielip siulittuutaa naapertorlugu, kikkut kunngi niaqorusigaaqqammersoq kiffartuutissavaat? (b) Johannesip Jesus kunngitut niaqorusigaaqqammersoq takorloornikkut sukkut takuaa?
5 Danielip siulittuutaa naapertorlugu, Jesus naalagaassusermik tunineqarmat ’inuiaqatigiit tamarmik akimanngitsullu immikkullu oqaasillit kiffartuussavaat taanna’. Tamanna qanoq taamaassinnaava inuiaat ataatsimut isigalugit kunngitut itigartimmassuk? Takusap pissanganartup apustili Johannesimut saqqummersitap akissutissaq takutitsiarpaa. Johannesip takusaminik oqaluttuuppaatigut: ’Ata, nuia qaqortoq, nuiallu qaani issiasoq inuup erneratut asseqartoq, taassuma niaqorut kuultiusoq niaqormiugigaa, killuullu ipittorsuaq tigumiaraa.’ (sarĸúmersitat 14:14) Danielip takusaanut assingusumik, uani Jesus takussaavoq nuiap qaani issiasoq taaneqarlunilu ’inuup erneratut asseqartoq’. Kunngitut niaqorut niaqormiugaa, kunngilli tigumiaa pinnagu katersuisartup killuutaa tigumiaraa. Suna pillugu?
6. Suna suliffigeqqullugu Jehovap Jesus niaqorusigaaqqammersoq peqquaa?
6 Johannesip oqaatsini ima ilavai: ’Inngililu alla naalaffimmit anivoq nuiap qaani issiasumut nipituumik torlulalluni: Killuutersorit killuutinnik katersuilerlutillu, katersuiffissaq nalliummat, nunamit katersugassat inerimmata.’ Jesusip, naak kunngiugaluarluni, naalakkiutit Jehovamit ’naalaffimmiittumit’ pisut maleruartarpai. Taamaattumik Jehovap peqqummani ulluni kingullerni katersuinermut suleqataaqqulluni, naalappoq. Jesusip ’killuunni nunap qaagut aalatilerpaa, nunallu naasui katersorneqalerput’. — sarĸúmersitat 14:15, 16; Eprîarit 9:24; 1 Korintumiut 11:3.
7. (a) ’Nunamit katersugassat’ suuppat? (b) ’Katersugassat’ kikkut siullersaraat?
7 ’Nunamit katersugassat’ suuppat? Tassaapput inuit Satanip pissutsinik aaqqissuussineranit anisut Jehova kunngiutitaalu kiffartuukkumallugit. Katersuiffik aallartippoq 144.000-it Jesus ilagalugu naalagaaffiani qilammiittumi naalakkersuisussat sinneri katersorneqalermata. (Matîuse 13:37-43) Tassaapput ’Israel Guutip pigisaa’, ’Guutimut savaaqqamullu naaqqaataasut’. ’Immikkut naggueqatigiissunit immikkullu oqaasilinnit immikkullu inuiaasunit inuiaqatigiinnillu tamanit’ pisiaapput. (Galâsiamiut 6:16; sarĸúmersitat 14:4; 5:9, 10) Tamatumuuna inuit ’inuiaqatigiinnit akimanngitsunillu immikkullu oqaasilinnit’ tamaneersut Jesus kunngitut issiavissaarsuarminiittoq kiffartuutilerpaat.
8. (a) Ukioq suna missiliorlugu tanitat 144.000-iusut sinnerisa katersorneqarnerat naammassineqannguatsiarpa? (b) Johannesip takusaa alla naapertorlugu, katersuineq qanoq ingerlateqqinneqarpa?
8 Kisimiinngillalli. Takusami ilaanni allami 144.000-it nunngutaat naqissuserneqartut Johannesip takuai. (sarĸúmersitat 7:1-8) Taakkua katersorneqarnerat 1935-p eqqaani naammassineqannguatsiarpoq. Taavali Johannesip nalunaarutigaa takunnilluni ’amerlangaartut kisinneqarsinnaanngitsut, inuiaqatigiit immikkullu naggueqatigiissut immikkullu inuiaasut immikkullu oqaasillit tamarmik ilaat, issiavissaarsuup saani savaaqqallu saani qeqartut’. (sarĸúmersitat 7:9-17) Tassuuna katersuineq ingerlajuarpoq inuit suli amerlasuut ’inuiaqatigiinnit akimanngitsunillu immikkullu oqaasilinnit’ tamaneersut Jesus kunngitut kiffartuutilermassuk.
9. Takkuterlaat taakku kikkuuppat, aamma ’ullussani kingullerni’ takkunnissaat siulittuutini sorlerni eqqartorneqarsimava?
9 Ilannguteqqammersut taakkua paratiisimi nunami Jehovap toqqagaa kunngigalugu inuunissaq qilanaaraat. (Tussiaat 37:11, 29; 72:7-9) Taakkua katersorneqarnissaat siulittuutini arlalinni siulittuutigisaavoq. Assersuutigalugu, Esajasip siulittuutigaa ’ullussani kingullerni’ inuiaqatigiit Jehovap illuanut aggialerumaartut. (Isaia 2:2, 3) Haggajip siulittuutigaa inuiaqatigiit aalassangaartinneqarnissaanni ’inuiaqatigiit tamarmik erlinnangaartortaat’ takkutissasut. (Haggai 2:7, NW) Aamma Zakariasip eqqartorpai ’akimanngitsut immikkut oqaasillit tamalaat angutitaat quliullutik’ Guutip innuttaanut ilanngutissasut. (Saggaria 8:23) Aammattaarli Jesusip nammineq amerlangaartut taakku siulittuutigai. Oqarpoq: „Inuup Ernera naalannassutsi atisimallugu tikiukkuni, inngilillu tamaasa ilagalugit, taava issiavissaarsuarminut naalannassutsimi pianut ingissaaq. Inuiaqatigiillu tamarsuarmik saanut katersorneqassapput, inuillu avissaartissavai, soorlu nersutaatinik paarsisup savat savaasanit avissaartittarai. Savallu talerpimmi tungaanut pisissavai savaasallu saamimmi tungaanut.“ — Matîuse 25:31-33, NW.
10. (a) Suut periaaseralugit ’nunamit katersugassat’ maannakkut katersorneqarpat? (b) Kikkut taamaallaat sulinermi tamatumani inngilit suleqatigaat?
10 Aap, inuiaqatigiit tamarmik misissoqqissaarneqarput, paasiniarlugit kikkuusut „savat“ kikkuusullu „savaasat“. Misissueqqissaarneq tamanna naammassiniarlugu qanoq suliarineqarpa? Johannesip takusaani, ’nunamit katersugassat’ katersorneqarput tusarliussat kimittuut inngilit tusarliussaasa tutsiuttarnerannut peqatigitillugu. Inngilit ilaat „tusagassamik nuannersumik ittuinnartumik“ (NW) oqaatigisassaqarpoq. Allap Babylonip Angisuup uppinnera nalunaarutigaa. Pingajuat mianersoqqussuteqarpoq nersut, tassa Satanip naalakkersuinikkut aqutsinermik aaqqissuussinera, pallorfigeqqunagu. (sarĸúmersitat 14:6-10) Soorunami inngilit taakkua nipaannik tusaasoqarsimanngilaq. Tusarliussalli inuit ilumoortut oqaluutigisaat tusartarpavut. (Matîuse 24:14; Isaia 48:20; Saggaria 2:11; Jâko 1:27; 1 Juánase 2:15-17) Taava erseqqissumik tusarliussat taakku inngilit siulersuineratigut inuit oqalutsigalugit tusarliussaasarput. Tusarliussanik inngilineersunik qanoq ilassinninnermikkut inuit ersersittarpaat ’savatut’ imaluunniit ’savaasatut’ pissuseqarnerlutik. Ukiut 2000-issaanni maanna atuuttuni taamaallaat Jehovap Nalunaajaasuisa inngilit sulinikkut pingaartukkut tamatumuuna suleqatigisarpaat.
11. Inngilit tusarliussaasa tamanut tusarliunneqarnissaat qanoq pisariaqartigaa?
11 Tusarliussanik tamakkuninnga tusarliussineq suliassat ullumikkut suliarineqartartut pingaarnersaraat. Naalakkersuisut isumaqatigiissinnaanngikkaluartut kiisami isumaqatigiissuteqalernerata suulluunniit imaluunniit ilisimatusaatitigut nassaap suulluunniit pingaarnermigut tamanna nallersinnaanngivippaa. Tusarliussat tamakkua inuiaat ajornartorsiutaasa tamavimmik aaqqiissutissaat tikkuarpaat, inuillu unneqqarissut qanoq ilillugu naassaanngitsumik annannissaq anguniarsinnaagaat oqaluttuaralugu. Aammalu, pingaarnerpaamik, Jehovap aqqata illernarsinissaanut attuumassuteqarput.
Ukiumoortumik nalunaarusiaq
12, 13. Ukiumoortumik nalunaarusiaq issuaaffigalugu manna tikillugu katersoriikkat amerlangaarnerat takutinniarlugu taasaqarit.
12 Tamanna pissutigalugu Jehovap Nalunaajaasuisa ukiut tamaasa qilanaarisarpaat Jehovap peqatigiissortaani sulisimanernik ukiumoortumik nalunaarusiap atuarnissaa. Guutip sulinerminnik pilluaqqusiuarsimaneranut takussutit takullugit pissangagisarpaat. 1987-imut nalunaarusiaq, quppernerni 12-imiit 15-imut misissorukku, paasissavat inngilit suleqataallu inuusut ukiumi qaangiuttumi ulapittorujussuusimasut.
13 Tusagassaq nuannersoq nunani 210-ni tusartinneqarsimavoq — tassaapput ’immikkut naggueqatigiissut immikkullu oqaasillit immikkullu inuiaqatigiit’ maannakkut tikinneqarsinnaasut tamarmik. (Mákorse 13:10) Aamma, qaammammi ataatsimi amerlanersaat 3.395.612-it suleqatigiipput tamanna anguniarlugu — kristumiut oqaluttuarisaaneranni aatsaat taama amerlatigalutik. Nunat ataasiakkaat ilaanni allaat kisitsisit angusanik takutitsisut kakkaginaqaat. USA-mi oqaluussisartut 773.219-inngorsimapput — aatsaat taama amerlatigilersimallutik. Nunani allani marlunni, Brasiliami Mexicomilu, oqaluussisartut aatsaat taama amerlatigilersimapput, tassa 216.216-it aammalu 222.168-it; nunanilu allani arfinilinni, tassa Tuluit Nunaanni, Tysklandimi, Italiami, Japanimi, Nigeriami kiisalu Filippinerini, tamarmik immikkut amerlanerpaallutik 100.000-it sinnerlugit oqaluussisartoqarsimavoq. Akerlianilli nunat ilaanni amerlangaartunik inoqarfiusuni tuusinterpaalunnguaannarnik ikinnerusunilluunniit oqaluussisartoqarpoq. Oqaluussisartut ilumoortut taakkua sulineri pingaartorujussuupput sallusuissutip qaamanera artornartorsiortillutik qaamajuartinniarlugu. — Matîuse 5:14-16.
14. Inuit qanoq ittut Jehovap peqatigiissortaanut katersorneqarpat?
14 Soorunami Guutip innuttaasa amerliartornerinnaq soqutiginngilaat. Nalunngilaalli ilannguteqqammersut taakkorpassuit Jehovap peqatigiissortaanut isaasut Jehovap isaani ’erlinnangaartuusut.’ Ilarpassui kristumiuuneraqatigiinni ’suliarisaasut narrujuumminartut tamaasa pillugit aliasullutillu erloqipput’. (Hisĩkiale 9:4) „Jehovap qaqqaanut“ aggiapput Guutip aqqutigeqqusaani ajoqersorneqarusukkamik. (Isaia 2:2, 3, NW) Jehovap pilluaqqusisimaneranut takussutip ila sakkortussusia, pissutsit aaqqissuussaaneranni ajortunngorsimasumi timillu piinik pingaartitsivallaarfiusumi inuugaluartugut ukiut tamaasa inuit hundredinik tuusintikkuutaat takkuttarmata Jehovap ’erlinnangaartuutitaasut’ pissuseqarlutik!
Suliassaq nukinginnartoq
15. (a) Oqaluussiffigisassat qanoq annertutigaat? (b) Johannesip takusaa naapertorlugu ’amerlangaartut’ qanoq ulapaartigaat, ullumikkullu tanitat, ’savat allat’ ilanngullugit, sulinerat Johannesip takusaanut naapertuuppa?
15 Jehovap Nalunaajaasuisa oqaluussinermik suliaat nukinginnarpoq. Suna pissutigalugu? Oqaluussiffigisassat annertoorujussuummata. „Tusagassaq nuannersoq“ ’tamanut inuiaqatigiissunut immikkullu naggueqatigiissunut immikkullu oqaasilinnut immikkullu inuiaasunut’ tusarliunneqartariaqarpoq. (sarĸúmersitat 14:6) Jesusip assersuusiaani ’inuiaqatigiit tamarmik’ avissaartinneqartussaapput, „savat“ „savaasallu“ immikkoortillugit. Suliassat suli amerlaqaat. Taava naleqqulluarpoq amerlangaartut Johannesip takusaasa Guuti ’naalaffiutaani ullukkullu unnuakkullu’ unnersiutigimmassuk. (sarĸúmersitat 7:15) Tamatuma eqquutinneratut amerlangaartut taakkua, suleqatigisatik tanitaasut ilanngullugit, nalunaarutigaat siorna nalunaaquttap akunneri 739.019.286-it oqaluussinermi atorsimallugit — ila amerlangaaramik paasissaanngingajattut. Silarsuarmi tamarmi oqaluussisartut tamarmik immikkut agguaqatigiissillugit qaammammut nal. ak. 18-it atortarsimavaat. Tamanna ukiut qulit matuma siornagut qaammammut nal. ak. 12-inut naleqqiukkutsigu paasisinnaavarput oqaluussisartut sulerulunnerujartuinnarsimasut. Illit nammineq qaammatit agguaqatigiissillugit angusimasatit silarsuarmi tamarmi angusimasanut naleqqiullugit qanoq oqaatigisinnaavigit?
16. (a) Qanoq iliorluta ’oqaaseq oqaluussissutigisinnaavarput ilungersuutigalugu’? (b) Siorna qassit sulinermut nersornartumut tamatumunnga peqataasimappat?
16 Malugeriaruttaaq pionerit ikiortaasut nalinginnaasullu aatsaat taama amerlatigilersimammata: 650.095-it. Tassa siorna pioneriusut 1955-imi oqaluussisartunit tamanit amerlanerusimasut. Pionerinut taakkununnga illit ilaavit? Taamaakkuit, taava Paulusip unnersuussutaa sulinikkut pitsaalluinnartumik maleruarniarsinnaasimavat, taanna oqarsimammat: „Oqaaseq oqaluussissutiguuk, ilungersuutiguuk.“ (2 Timûtiuse 4:2, NW) Ukiumi oqaluussiffigisami 1988-imi minnerpaamik qaammat ataaseq pionerioqataaniassamaarit!
Suli amerleriarnissaq
17. Kisitsisit suut takutippaat siunissami amerleriarnissaq ilimanarluinnartoq?
17 Siunissami suli amerleriarnissaq ilimanarluinnarpoq. Angerlarsimaffimmi Bibelimik atuaqqissaaqatigiinnerit 3.005.048-t aqunneqartarput — Bibelimillu atuaqqissaartartut tamarmik immikkut ’erlinnangaartunut’ ilaasinnaalissapput! Aammattaaq 8.965.221-t siorna aprilimi Naalakkap unnukkorsiortitsineranut najuupput. Najuuttut amerlanersaat Jehovamut Nalunaajaasuunngillat. Sallusuissummik soqutiginnilerlaanik ilaqarput. Tamarmik qamannga pisumik tikilluaqqusaapput, kajumissaarpavullu siumukarluartuaqqullugit. Najuuttut ilagaat siornatigut eqqaaniaanermut arlaleriarlutik najuuttarsimasut. Taakkua Nalunaajaasut nuannaarutigalugu naapeqatigisarpaat kisiannili iliuuseqaqqinnissartik suli pisariaqartinnagu.
18. Zakariasip Jesusillu siulittuutaat naapertorlugit, Jehovap ’savaataanut’ ilaassaguni inuk qanoq iliortariaqarpa?
18 Nersortariaqarput sallusuissummik Bibelimeersumik soqutiginnikkamik. Eqqaamasariaqarpaalli, Jesusip assersuusiaani „savat“ inuunermik naassaanngitsumik pissaqartitaasut tassaammata Jesusip qatanngutaanut tanitaasunut ikiuukkusuttut suleqatiginnikkusuttullu. (Matîuse 25:34-40, 46) Zakariasip siulittuutaani inuit naammalluartumik amerlassusillit, tassa ’qulit’, nangaassuteqaratik nalunaarput: ’Ingerlaqatigilassi, tusaamagatta Guutip najoraasi.’ (Saggaria 8:23) Ikinngutinnersumik isumaqaannanngillat. Guutip innuttai ’tiguaat’ ingerlaqatigalugillu, taakkua Guutiat kiffartuukkumallugu tunniulluinnarlutik. Uagut ullutsinni tassaavoq Jehovap peqatigiissortai tamatigut suleqatigiumalluinnarlugit.
Piffissaarutilerpoq
19, 20. (a) Johannesip takusimasaa naapertorlugu, ’nunamit katersugassat’ katersorneqarnerat naammasseriarpat sumik pisoqassava? (b) Tamanna Jesusimut kunngiusumut naalatsigitikkumanngitsunut tamanut qanoq kinguneqassava?
19 Aamma suli alla pissutigalugu katersuineq nukinginnarpoq. Ungasinngitsukkut naammassissaaq. (Matîuse 24:32-34) Taavami? Tullinngorlutik piumaartussat Johannesip takusimasai atuariartigik: ’Inngililu alla naalaffimmit qilammiittumit anivoq, taannattaaq ipittorsuarmik killuuteqarpoq. Inngililu alla innermut piginnaassuseqartoq tunisivimmit anivoq, nipituumillu torlulavoq ipittorsuarmik killuuteqartumut taassumunnga oqarluni: Killuutinnik ipittorsuarmik killuutersorit, nunap viinnequtaata paarmiorfii killorlugit, viinnissat inerimmata. Inngilillu taassuma killuunni nunap qaagut aalatilerpaa, nunallu viinnequtaa killuiffigaa viinnissai tunguiaaffissuarmut Guutip kamannerata pianut igillugit.’ — sarĸúmersitat 14:17-19.
20 ’Erlinnangaartunik’ katersuinerup naammassereerneragut, silarsuup ajortunngorsimasup matuma ataavarnissaanut pissutissaarutissaaq. ’Nunap viinnequtaa,’ tassa silarsuatsinni pissutsit aaqqissuussaanerat Satanimit aqunneqartoq tamarmi, killorneqassaaq aserorneqassallunilu. Taamaalisukkut assortuisut allaat Jehovap kunngioqqusaa pinngitsooratik akuerisariaqassavaat. Johannes ima allappoq: ’Ata, nuiatigut [Jesus] aggerpoq, tamarmillu isaasa takujumaarpaat, taakkuattaaq taassuminnga kapisisut; nunamilu naggueqatigiit tamarmik kappialassutigiumaarpaat.’ (sarĸúmersitat 1:7; Matîuse 24:30) Taamanikkussaq Jesusip upperisarsiornerup tungaatigut pisortat juutiusut, tassa ’taassuminnga kapisisut’ pingaarnerusut, pillugit oqaasii eqquukkumaarput. (Matîuse 26:64) Tassa imaanngilaq upperisarsiorlutik ilumoortuusaartut taakku makitinneqassasut Jesusilu ’takussallugu’. (Matîuse 23:33) Ullumikkulli inuusut taakkunatut isumaqartut Jehovallu kunngioqqusaanik akuersiumanngitsut tamarmik pinngitsaalisaallutik paasiumaarpaat taannaasoq, Harmagedonimi inuiaqatigiit aseroriartorlugit tikiuppat. — sarĸúmersitat 19:11-16, 19-21.
21. Suna pissutigalugu Guutip innuttai inngilit qilammiut suleqatigalugit tamaviaartariaqarpat?
21 Ilumut, inuit ataasiakkaat annannissaat apeqqutaavoq. Inngilit suleqatigigatsigik akisussaafferujussuaqarpugut. Kisiannili immikkut pisinnaatitaaffitta ila asseqanngissusia! Inngilit qilammiut suleqatigitillugit tamaviaartuarta, inuit savatut pissusillit, Jehovap ’erlinnangaartuutitai’, tamaasa katersuiffik naammassineqanngikkallartillugu naniniarlugit. (wD 1/1 88)
Uku nassuiarsinnaavigit?
□ Ukiut 2000-issaanni maanna atuuttuni manna tikillugu pisimasut suna pingaarnersaraat?
□ ’Nunamit katersugassat’ suuppat, qanorlu ilillugit maannakkut katersorneqarpat?
□ Jehovap ’savaataasa’ suut ilisarnaatigaat?
□ Ukiumoortumik nalunaarusiami Jehovap katersuinermik pilluaqqusinera qanoq takutinneqarpa?
□ Suna pissutigalugu oqaluussineq nukinginnarpa?
[Qupp. 12-15-mi nalunaarsugaq]
1987-IMI SILARSUARMI TAMARMI JEHOVAP NALUNAAJAASUISA SULINERANNIK NALUNAARUSIAQ
(Allassimasut qanoq inissisimanersut naqitami takuneqarsinnaavoq)