Kuissutip qanoq annaassinnaagaatigut
’Kuissut annaffigaarput.’ — 1 PÎTRUSE 3:21.
1, 2. Jehovap kuisikkumasut sunik piumasaqarfigai?
JEHOVAP annakkusuttut aalajangersimasunik piumasaqarfigai. Eqqorluartumik ilisimalersariaqarput, uppernikkut suliaqartariaqarput, ajortuliatik peqqissimissutigisariaqarpaat, allamik isumataartariaqarput, Guutimut tunniulluinnartariaqarput, kiisalu uppertutut kuisittariaqarlutik. (Juánase 3:16; 17:3; apustilit suliait 3:19; 18:8) Kuisittussat inuit tutsaanni nalunaarutigisariaqarpaat Jesusip pilliutaa tunngavigalugu ajortuliatik peqqissimissutigisimagitik Jehovamullu tunniulluinnarsimallutik. Aammattaaq paasisariaqarpaat tunniulluinnarnermikkut kuisinnermikkullu Jehovap Nalunaajaasuinut ilanngullutik.
2 Kuisinnermik aaqqissuussaaneq tamarmi, kuisittussat uppernerminnik nassuerutiginninnerat tamanna ilanngullugu, annassinnaassagaanni pisariaqarluinnartuuvoq. (Rûmamiut 10:10) Tamanna apustili Peterimit ima uppernarsarneqarpoq: ’Kuissut annaffigaarput.’ (1 Pîtruse 3:21) Oqaatsilli taakku qanorpiaq paasisariaqarpat? Versit ataqatigisaasa suna takutippaat?
Kuissutip qanoq annaassinnaagaatigut
3. Nammineq oqaatsitit atorlugit Pîtrusip agdlagai sujugdlît 3:18-21 qanoq pingaarnersiussaviuk?
3 Peterip takutitsiarpaa Jesus, anersaanngorluni makereernermi kingornagut, anersaapilunnut parnaarussivimmiittunut, tassa inngilipilunnut Jehovap ullussarsuani eqqartuussivissap tungaanut kalunnernik qilersugaaqqasunut, oqaluussiartorsimasoq. Taakku naalanngissimapput uiniusumik timeqalersimagamik aamma arnat atoqatigisimagamikkik taamani ’Guuti kamajuerluni utaqqimmat Noa inuugallartillugu, umiarsuaq sananeqartillugu, tamannami inuit qassinnguit (tamassa tarnit arfineq-pingasut [Noa, taassuma nulia, erneri, taakkualu nulii]) annaffigaat imikkut’. Peter nangilluni ima allappoq: ’Akerlialu maanna annaffigigissi kuissut, timimut eqqiarfiunngitsoq [tamannali aamma pisariaqartuusoq], Guutimulli ilerasunnaveerutissamik angeruseqarfiusoq Jesusip Kristusip makinnera pissutigalugu.’ — 1 Pîtruse 3:18-21; 1 Môrsase 6:1, 2; 2 Pîtruse 2:4; 2 Korintumiut 7:1.
4. Oqarami ’akerlialu manna’ Peterip suna pivaa?
4 Peter qanoq isumaqarpa ima oqarami: ’Akerlialu manna’? Isumaqarpoq upperneq tunngavigalugu kuissutip naligigaa Noap ilaqutaasalu Ulersuaqarnerani, umiarsuup silataaniittut tamarmik ajunaarutigisaanni, annatsitaanerat. Soorlu Noa umiarsualiornissaminut uppersuseqartariaqarsimasoq, aammattaaq kuisillutik Jesus Kristusimut ajoqersuganngortut Jehovamullu nalunaajaasunngortut tamarmik uppersuseqartariaqarput silarsuarmit uppersuseqanngitsumit taassumalu guutianit, Satan Diaavulumit, tatineqarnertik tamaat akiorsinnaassagunikku. — Eprîarit 11:6, 7; 1 Juánase 5:19.
5. Qanoq ililluta ’Jesusip Kristusip makinnera pissutigalugu’ annatsinneqarsinnaavugut?
5 Kuisinneq immini annassutaasinnaanngilaq. ’Timimut eqqiarneq’ naak pisariaqaraluartoq, aamma tamanna kisimi annassutaasinnaanngilaq. Akerlianilli, ’Jesusip Kristusip makinnera pissutigalugu’ annassinnaavugut. Taamaallaat Guutip ernerata pilliutitut toqunera makissimaneralu pissutigalugit annassinnaasugut kuisinniartut uppertariaqarpaat. Aammattaaq Jesus Naalakkamittut uumasunik toqusunillu eqqartuussisussaasutut akuerisariaqarpaat. Peter ima allappoq: ’Taanna qilaliarsimalluni Guutip talerpiata tungaaniippoq inngilillu naalakkersuisullu pissaanerillu naalatsigalugit.’ — 1 Pîtruse 3:22.
6. Kuisittussaq ilerasunnaveerniarluni qanoq iliortariaqarsimava?
6 Peterip kuissut ’Guutimut ilerasunnaveerutissamik angeruseqarfiusumik [qinnuteqarfiusumik, NV]’ taavaa. Ilerasukkunnaarumalluni kuisinniartup ajortuliani peqqissimissutigisariaqarpai, eqqunngitsumik iliuuseqartarnini taamaatittariaqarlugu, kiisalu Jesus Kristus aqqutigalugu qinunikkut Jehova Guutimut nangaanngivilluni tunniulluinnartariaqarluni. Guutip najoqqutassiaanik maleruaajuarnermigut inuup kuisimasup ilerasuuteqannginnini atatikkuniuk, annaqqasutut ittuassaaq imminerminut nuanniitsumik Jehovamit eqqartuunneqassanani.
Kikkut kuisissinnaappat?
7. Kuisinneq eqqarsaatigalugu, kristumiuuneraqatigiit ajoqersuiartortitaat qanoq iliuuseqarsimappat?
7 Jesusip ajoqersukkat kueqqullugit malitsigisani peqqugamigit, oqanngilaq uppinngitsut tuusintilikkuutaat serpartassagaat. Kristumiuuneraqatigiilli ajoqersuiartortitaat qanoq iliortarpat? Jesuitti Francisco Xavier Indiami ajoqersuiartortitaanini pillugu ukiumi 1545-mi ima allappoq: „Kunngeqarfimmi Travancoremi . . . qaammaterpaalunnguit ingerlaneranni angutit, arnat meeqqallu tituusintinit amerlanerusut kuisimavakka. . . . Illoqarfeeqqamiit illoqarfeeqqamut angalaarpunga kristumiunngortillugillu.“ Jesusili taamatuunngitsoq ’kristumiunngortitsisarpoq’. Kuisinniartut kuisinnissaminnut piumasarineqartut aalajangersimasut inuit naammassisariaqarpaat.
8. Allakkani kukkulluni Paulusimit allanneqarsimasorineqartuni kuisinniartut qanoq allaatigineqarpat?
8 Allaat kristumiuunerartut apustilit kingornagut inuusimasut ilaasa paasisimavaat piumasarisat sukannersut kuisinniartunit naammassineqareersimasariaqartut. Allakkani Bibelimiinngitsuni, kukkulluni apustili Paulusimit allanneqarsimasorineqartuni, kuisinniartut pillugit ima allassimasoqarpoq: „Ileqqui inooriaasiallu misissorneqarlit . . . Katissimasuunngikkunik, kanngunartuliunnginnissartik ilinniarlissuk, inatsisinut naapertuuttumik aappaqalerlit. . . . Arnaq inuunerluttoq [kuisikkumalluni] aggissaguni inuunerluttutut inooriaatsini taamaatilliuk, taamaatikkumanngikkuniullu itigartinneqarli. Guutipiluliortartoq aggissaguni, suliani tamanna taamaatilliuk, taamaatikkumanngikkunili itigartinneqarli. . . . Ajortulianik taasasssaanngitsunik ajortuliortartoq . . . ilisiitsoq, angakkuarnittartoq, ullorissat najoqqutaralugit siulittuiniartartoq, eqquiniartartoq, taallanik eqqumiitsunik atuisartoq, . . . aarnualiortartoq, angakkoq, siulittuisartoq, assaap titarniusartai najoqqutaralugit siulittuiniartartoq . . ., misilinneqaqqaarlit . . . taamaaliornitillu taamaatikkunikkik, ilassineqarlit; taamaatikkumanngikkunikkilli, itigartinneqarlit.“
9. Suna siunertaralugu ilagiit utoqqaanertaasa kuisinniartut oqaloqatigisarpaat?
9 Jehovap Nalunaajaasuisa allakkat Bibelimeersuunngitsut soorlu aatsaannguaq issuaaffigineqartut maleruagassarinngilaat, ilagiilli utoqqaanertaasa kuisinniartut peqqissaartumik oqaloqatigisarpaat. Suna siunertaralugu? Qulakkeerniarlugu kuisinniartut uppertuunersut, Guutimit piumasarineqartunik naammassinnissimanersut, Jehovamullu tunniulluinnarsimanersut. (apustilit suliait 4:4; 18:8; 2 Tásalûníkamiut 3:2) Apeqqutit atuakkami Organiseret til at fuldføre vor tjeneste (Kiffartuussinitsinnik naammassinninniarnitsinni aaqqissuussaavugut)-miittut oqaloqatigiissutiginerisigut utoqqaanertat aalajangerniarsinnaavaat kuisinniartoq kuisissinnaatitaassanersoq. Ajoqersuutit arlaannik paasilluanngisaqarsimappat, imaluunniit Guutip najoqqutassiaanut naapertuuttumik inuulersimanngippat, utoqqaanertat anersaakkut ikiorumassavaat.
10. Kuisikkumagutta qanoq isumaqartariaqarpugut?
10 Siunertaminik ilinniarnitsinni ikiuinermigut Guutip uatsinnut ajunngisaarfiginninnerata angissusia paasigutsigu, inuit Paulusip Antiochiami Asiaaqqamiittumi oqaluussiffigisai assigissavavut. Naak juutinit assortorneqaraluarlutik ’Guutimik nalusut [juutiunngitsut] tamanna [Guutimit iluarisaanissamik periarfissartik] tusaramikku tipaatsulerput. Jehovallu oqaasia unnersiutigaat, inuunermillu naassaanngitsumik pissaqaqqusaasut tamarmik upperlutik’. (apustilit suliait 13:48) Uppertunngortut taakku kuisipput.
Inuusuttuulluni kuisinneq
11. Suli inuusuttuulluni Guutimut tunniulluinnarneq naleqquppa, sunalu pillugu taama akissuteqarpit?
11 ’Inuunermik naassaanngitsumik pissaqaqqusaasut’ inuusuttunik ilaqarput. Tamanna eqqarsaatigalugu eqqaamasariaqarpoq angajoqqaat qitornatik sinnerlugit tunniulluinnarsinnaanngimmata, naak Samuel Johannes Kuisisorlu inunngornermik siornagulli Guutimut tunniunneqarsimagaluartut. (1 Sâmuale 1:11, 24-28; 2:11, 18, 19; Lúkarse 1:15, 66) Bibelili tunngavigalugu perorsarluagaanermik kingunerisaanik inuusuttut ilarpassui kuisissinnaanissaminnut siumukartarput. Qatanngut arnaq ajoqersuiartortitaasoq inuusuttuaraalluni kuisissimasoq ima allappoq: „Isumaqarpunga Pinngortitsisima piunera paasigakkuli taanna kiffartuukkumallugu tunniulluinnarsimallunga, taassuminngalu siunertaanillu eqqortumik ilisimasaqalerama tunniulluinnarsimanera ersersikkumallugu kuisikkumavunga. Kisianni anaanama qularutigaa aalajangernerma kingunerisassai paasilluarsimanerikka, taamaattumik allap kuisinnissaminut piareersimalernissaata tungaanut utaqqissasunga siunnersuutigaa.“ Taava arnamik kuisikkusuttoqalerpoq, qatanngutillu arnap oqaatsini ima nangippai: „Taamani kuisinniartut immikkut ajoqersorneqarneq ajorput, kisianni Suliassanik Aaqqissuisup, Peqatigiiffitta toqqagaata, . . . alloriarnerma pingaaruteqassusianik inussiarnersumik oqaluuppaanga. Piumasarineqartut tamaasa naammassiumaarlugit piumaqalunga akuersivunga, 1921-milu majiugaa sapaammi seqinnersorsuugaa ullaap-tungaa [arnaq taanna] uangalu kuisippugut.“
12. Qatanngut Russellip inuusuttut tunniulluinnarnissaat qanoq isigaa?
12 1914-imi C. T. Russell (Vagttårnip Peqatigiiffiani taamani præsidentiusoq) kristumioqatimi ilaannit allagarsivoq aperisumit ernini aqqaneq-marlunnik ukioqartoq Guutimut tunniulluinnaqqullugu kaammattortussaanerlugu. „Uanga illiugaluaruma,“ Russell akissummini oqarpoq, „tunniulluinnarnissaanik pinngitsaaliumassanngikkaluarpara, akerlianilli eqqaasittuassagaluarpara tunniulluinnarnerup inunnit eqqarsaatersortartunit Guutimik taassumalu siunertarisaanik ilisimannittunit tamanit anguniagaviusussaaneranik . . . Tunniulluinnarsimanngikkaanni naassaanngitsumik inuuneqarsinnaanavianngilaq . . . Ernivit tunniulluinnarneq ajoqutigisinnaanngilaa, iluaqutigisorujussuusinnaalluguli. . . . Oqartoqarsinnaava meeraq qulinik ukiulik eqqarsaatimigut oqaatsimigullu suliamigullu nangaanngivilluni tunniulluinnarnermik paasinnilluarsinnaanavianngitsoq? Kingumut qiviaraangama eqqaamasarpara suli aqqaneq-marlunnik ukioqalernanga tamakkiisumik tunniulluinnarsimallunga.“
13. Ukiut 94-it missaanniittut matuma siornagut atuagassiap uuma inuusuttut qanoq oqaaseqarfigai?
13 Zion’s Watch Tower-imi 1. juli 1894-imi saqqummersumi ima allassimasoqarpoq: „NAPASULIAQ ALAPERNAARSUIFFIK-up meeqqat inuusuttullu asanartut uummatiminnik Guutimut tunniussisimasut, ullullu tamaasa Jesusimik maleruaaniartut tamaasa inuulluaqquai. Ilisarisimasaqarpugut meerannguanik Jesusimik asannittunik, meeqqallu allat Jesusimik asannittuunngitsut taassumunngalu iluaritinniartuunngitsut akornanni Jesusimik illersuinissaminnut ittooruteqanngitsunik; tatitusaartunik Guutimullu ilumoortunik, naak allaat atuaqatiminnit Naalagaaffik pillugu tusagassamik nuannersumik oqalussiffigisaminnit illaruaatigineqarlutillu eqqumiigineqartaraluarlutik. Nuannaarutigaarpullu takullugit inuusuttut ilaat tatitusaarlutik silarsuarmik taassumalu angusaqarumatussusianik nuannaarniutaanillu tunussisimasut Naalakkamullu tunniulluinnarsimasut aalajaatsuunersaannut ilaasut. Allaffitsinni suleqataasut ilaat naqitigaatitsinnillu angallassillutik tuniniaasut pikkorinnerit ilarpassui suli inuusuttuupput.“ Illit naak suli inuusuttuugaluarlutit Jehova Guutimut tunniulluinnarnissat pillugu sooq angajoqqaatit oqaluttuunnianngiligit?
Angajoqqaat isumagisassaat
14. Inuusuttut Jehovamut tunniulluinnarnertik qanoq iluaqutigisinnaavaat?
14 Eqqarsaatigeriaruk meeqqanut qanoq iluaqutaatigisoq kuisinnissaannik kinguneqarnartumik angajoqqaaminnit perorsarneqarpata. (Evfisumiut 6:4) Anersaamut tunnganerusunik eqqarsaatiginnittarunik silarsuarmut tunngasunik sammisaqarpallaarnissaraluartik aammalu silarsuarmit nakutinneqarnissaraluartik pinngitsuussavaat. (1 Juánase 2:15-17) ’Uinimmut siaruarterinerup’ kingunipiluinik katersuinavianngillat. (Galâsiamiut 6:7, 8) Guutimik mianerinnittutut inooriaaseqarnissaminnik ilinniartinneqaramik Guutip anersaavata inerititaanik pissuseqarniartarput. (Galâsiamiut 5:22, 23) Guutimut tunniulluinnarsimagamik taassumunnga qanimut attaveqarput. Aammalu ’Jehovamik isumalluarfiginninneq’ ilikkarsimagamikku, ilisimassut qilammeersoq najoqqutarisarpaat aqqutillu atoruminartut eqqissinartullu ingerlavigalugit. — ússatit 3:5, 6, 13, 17.
15. Angajoqqaat kristumiuusut qitornamik inooriaasiat ilusilersorniarlugu qanoq iliorsinnaappat?
15 Jehovamut tunniulluinnarsimaneq inuusuttunut iluaqutaaqimmat angajoqqaat kristumiuusut qitornamik inooriaasiat sapinngisartik tamakkerlugu ilusilersorniartariaqarpaat. Timoteusitut meeqqat naalungiarsuunerminniilli Allakkanik Illernartunik ajoqersorneqarsinnaapput ’ilinniarfigisatik imminullu uppernarsagaasut aalajangerfigisinnaaniassagamikkik’. (2 Timûtiuse 3:14, 15) Angajoqqaat Guutimik mianerinnittuusut maligassiuinermikkut qitornatik sunnerniarsinnaavaat, namminneq Guutimut attaveqarnertik, misilittakkatik inersimalluartutullu siuneqarsusertik aqqutigalugu ilisimassummik tunisarlugit. Eqqortumik periaaseqarsimagaanni ilungersuutigisimasat asuliinnarneq ajorput. — ússatit 22:6.
16. Meeqqat angajoqqaamik maligassiaanni ajoqersuinerannilu sumik takusaqarsinnaasariaqarpat?
16 Maligassiuinissigut ajoqersuinissigullu qitornasi paasitinniarsigik Jehovap peqatigiissortaasa Satanillu peqatigiissortaasa qanoq erseqqilluinnartumik assigiinngissuteqarnerannik. Paasitinniarsigik eqqortuusup akerlianut, silarsuarmut matumunnga eqqortutut isigisaanut, akuersiinnartoqarsinnaanngitsoq, silarsuup matuma ’isertugai kanngunartut’, nuannaarniutai Guutimik mianerinninnanngitsut, angusaqarumatussusia aammalu silamiorpaluttunik ilagisartagaqarneq kristumiut tunuttariaqaraat. (1 Korintumiut 15:33; 2 Korintumiut 4:2) Isumassigut, ajoqersuinissigut maligassiuinissigullu qitornasi paasitinniarsigik nuannaarniutit silamiorpaluttut qanoq suussuseqanngitsigissusiannik, silap matuma inuisa Jehovap Nalunaajaasuinut naleqqiullugit qanoq salloqittagaatigissusiannik. Nassuiaatikkit qanoq Guutip anersaani iluartoq atortoralugu siulersorsimagaasi, aqqusinernut alianartunik kinguneqartartunut ingerlalersoornaveersaartissimagaasi, annikilliornissinni aliasuuteqarnissinnilu qanoq napatittarsimagaasi. Kukkusumik isumaqarnaveeritsi, tassa qitornasi silap matuma inuisut pingaarniartuullutik, angusaqarumatuullutik, qarsupittuullutik sianiilliortuullutillu ingerlanissaannik akuerigussigik naggataatigut uppertunngorumaartut. Qitornasi silarsuarmit matumannga nakkartinneqartinnagit sunniinipilunnerinit ajoqutaasunit illersorniakkit, ikiorlugillu Jehova asaleqqullugu isumalluarfigileqqullugulu.
Kuisinnerup kingornanut isigigit
17. (a) Suna peqqutigalugu kristumiut kuisimasut ilaat uteriartoortarpat? (b) Tunniulluinnarsimanerput qanoq isigisariaqarparput?
17 Inuusuttuugaluarunik utoqqaagaluarunilluunniit kuisinniartut tamarmik Jehovamut aalajaakkumassapput. Taava suna peqqutaasinnaava kuisimasut ilaasa anersaakkut uteriartarnerannut? Assigiinngitsut pissutaaqataasinnaapput, tunngaviusumilli peqquteqarunarpoq: Tunniulluinnarnerup pingaarutai tamakkernagit paasisimavaat. Suliassamut tunniulluinnarnerunngilaq. Suliassaq ulapputigisinnaagaluarparput, suliassaqarnerulli tassaalersinnavianngilaatigut inuit anersaakkut soqutigisallit. Eqqaamajuaannartariaqarparput suliamuunngitsoq kinaassusilimmulli — Jehova Guutimut — tunniulluinnarsimagatta. Tamanna eqqaamagutsigu aatsaat tunniulluinnarneq alloriarnerinnartut pingaaruteqarpianngitsutut, suleqataalernissatsinnut pisariaqartuinnartutut, isumaqarfiginaviissavarput. Tunniulluinnarnikkut inuk pisariaqarluinnartumik, sernissorneqarlunilu ataavartinneqartariaqartumik attaveqalersarpoq. Tamatumani Jesus Kristusip maligassiaanik maligassaqarpugut. Oqaatsit siulittuutaasut ukua Jesusip oqaaserisaasa Jehovamut tunniukkami uummammigut asanningaarnera ersersippaat: „Maaniippunga . . . Piumasat, Guutiga, naammassissallugu kajungeraara, inatsisitillu ilunni ipput.“ (NV) — Tussiaat 40:7-9; Eprîarit 10:5-10.
18. Guutip inatsisaasa Jesusip ’iluani ittuunerat’ qanoq paasisariaqarpa?
18 Qanoq paasisariaqarpa Jehovap inatsisai Jesusip ’iluani ittut’? Allakkanik ilisimasoq juutiusoq Jesusip nassuiaassimavaa Jehova Guuterput ataasiusoq peqateqanngitsorlu; taama oqarnermigut Jehovap qutsinnerussaartuunera erseqqissarpaa. Taava Jesusip takutippaa Guutip inatsisaasa pingaarnersarigaat Jehova uummatikkut iluunngarluta, paasinnissinnaassuserput tamakkerlugu nukivullu tamakkerlugit asassagipput, tullerpullu uatsitut asassagipput. (Mákorse 12:28-34) Tamanna peqqutiginerullugu Jesus ima oqarsinnaasimavoq: „Piumasat, Guutiga, naammassissallugu kajungeraara.“ Naak sakkortuumik misilinneqartaraluarluni naalliutsitaagaluarlunilu ingerlavini aalajaatsumik ingerlavigiuarsinnaasimavaa, suliassaminik ajunngitsutut isiginninnini pissutigiinnarnagu, pissutiginerulluguli Jehova Guutimut qanimut attaveqarnini. Taassumatut uaguttaaq Jehovap qutsinnerussaartuunera akuerigutsigu unioqqutitassaanngitsumillu tunniussimalluta taanna asagutsigu, tunniulluinnarsimanerput kuisimanerpullu aalajangiullugit inuusinnaassaagut.
19. Jehovamut attaveqarnitta aamma suliassap suliarisatta imminnut suna atassutigaat?
19 Guutimut attaveqarnerput aamma suliassarput soorunami imminnut atassuteqarput. Naalagaaffimmik oqaluussissutiginninnitsigut Jehovamik asanninnerput ersersipparput. Tamanna pillugu, Grant Suiter maanna qanganngoreersoq, Jehovap Nalunaajaasuisa Siulersuisoqatigiivinut ilaasortaasimasoq, ima allassimavoq: „[Nakkutilliisoq angalasartoq aalajangersimasoq] Jehovamik kiffartuussinerup immikkut pisinnaatitaaffiunera kiffartuussinermillu akisussaaffeqarnerput pillugit oqalugiartoq tusarnaartillugu paasilerpara qanoq iliortussaallunga qanorlu iliorusullunga. Taamaattumik nammineq Jehovamut tunniulluinnarpunga, tamatumalu missaani ilaquttakka aamma tunniulluinnarput. 1926-mi oktoberip ulluisa qulinganni, San Josemi, Californiamiittumi, tamatta ataatsikkut imermut morsutsitaanitsigut Jehova Guutimut tunniulluinnarsimanerput ersersipparput. . . . Kuisinnitta kingornagut . . . ataatama utoqqaanertaq kuisinnermik nakkutilliisoq oqarfigaa: ’Ilissi naqitikkanik tuniniaallusi angalaartarpusi, ilaa? Maanna uagut aamma tamatumunnga suleqataarusulerpugut.’ Taamaalilluta ilaqutariit uagut oqaluussilluta angalaartalerpugut.“ Ullumikkut inuit piumasarineqartunik naammassinnittut kuisinnermik siornagut allaat oqaluussinermut peqataasalersarput.
Kuissutip annaassinnaavaatigut
20, 21. (a) Jehovap inussiai qanoq ilillutik ’nalunaaqutserneqarpat’? (b) ’Nalunaaqut’ sunaava, nalunaaqutsigaasullu qanoq pineqassappat?
20 Suliatsigut ersersitsisinnaavugut ’Jehovap pigigaatigut’. Taassumunnga tunniulluinnarsimalluta inussiatut aalajaatsumik suligutta aatsaat annakkumaarpugut! (Rûmamiut 6:20-23; 14:7, 8) Itsaq inussiat qaamikkut nalunaaqutsigaasarput. Ullumikkut ’angutip meqquluaatsumik qaqortumik atisallip’ — tassa Jesusip ajoqersugaanut tanitaasunut sinneruttut — pissutsit aaqqissuussaanerata matuma naggatissaani annakkumaartussat oqaluussinikkut ’nalunaaqutsersorpai’. ’Savat allat’ suliakkut tamatumuuna tanitat tapersersorpaat. (Hisĩkiale 9:1-7; Juánase 10:16) ’Nalunaaqut’ sunaava? Jehovamut tunniulluinnarsimanitsinnut Jesusimullu kuisimalluta ajoqersugaanitsinnut taassumatullu inuttut pissuseqarnitsinnut erserneruvoq.
21 „Naggatissap nalaa“ qangali aallartereermat ’nalunaaqutsersimanissarput’ tamatuminngalu atatitsinissarput ingammik maannakkut pingaartorujussuuvoq. (Dâniale 12:4, NV) Annassagutta aaqqissuussaanerup matuma imaluunniit maanna inuunitta ’naggatissaanut aalajaattariaqarpugut’. (Matîuse 24:13) Jehovamut nalunaajaasutut aalajaatsuugutta aatsaat kuissutip annaatissavaatigut. (wD 15/1 89)
Uteqqiineq
□ Qanoq iliortariaqarpugut annakkumagutta?
□ Suna siunertaralugu utoqqaanertat kuisinniartut oqaloqatigisarpaat?
□ Angajoqqaat qanoq iliorsinnaappat qitornatik anersaakkut, kuisinnissaan- nik kinguneqarnartumik, siulersorniarlugit?
□ Suliassamut tunniulluinnarpugut?
□ Kuissutip qanoq annaassinnaavaatigut?
[Qupp. 16-mi assiliartaq]
Nalunngiliuk qanoq kuissutip Noap ilaqutaasalu umiarsuarmi annassimanerat assigigaa?
[Qupp. 17-mi assiliartaq]
Tunniulluinnarneq kuisinnerlu inuusuttunut iluaqutaapput. Qanoq taamaannera nalunngiliuk?