Bibelimik atuarnermi pingaarnersat: Jûîtdle 1:1–4:21

Jehovap aqqa torlorfigisiuk aniguisitaallusilu!

„ERLOQINARTOQ tamanna ingasakkaluttuinnassaguni Afrika Kangillermut Kangia Qiterlermullu siaruaakkiartuinnassaaq. Taamaalissaguni ajunaarnersuussaaq.“ Sullinerit neriumatuut ulluni makkunani milliardilikkuutaat Afrikap avannaata kitikannianut isaasut — pillertat — pillugit FN-ip inuussutissanut nunalerinermullu immikkoortortaqarfiata (FAO-p) oqaaseqartitaa taama oqarsimavoq.

Ukiup 820-p u.n.a.s. missaani Guutip pruffiitiata, Joelip, erloqinartoq taama ittoq oqaluttuaraa. Oqaatsit uumassuseqarpaluttut atorlugit asseqanngitsumillu eqqoqqissaartumik piviusorsiortumillu naalagaaffiup Judap sullinernit amerlasoorujussuarnit atugarliortitaanissaa oqaluttuaraa. Kisianni erloqinartoq tamanna silaannaap naasullu imminnut sunniuteqartarneratigut aarlerinartorsiornermit pingaaruteqarneroqisumut assersuutaavoq. Tassaavoq „Jehovap ullussaa“-nik aallarnersaaneq! Kinguaariit uagut ’ulloq siooranartoq’ aseruiffiungaartussaq atugassaraarput. Aniguiumaarnissamik neriuuteqarpa? Aammalu Jûîtdlip agdlagai siulittuutaasut sumik ilinniarfigisinnaavavut?

Sullinerpassuarnit erloqisitaaneq

Jehovap ulluani siooranartumi annakkumagaanni allamik isumataartariaqarpoq. Qullugissanit, pillertanit angalasartunit, pillertanit suloqanngitsunit saaluallannillu ujamerissanit nunap tamarluinnarmi naasuerneqarneratigut ajunaarnersuaq Joelip isaanik isigaarput. Palasit, utoqqaanertat Judallu naalagaaffiani innuttaasut allat allamik isumataaqquneqarput ’Jehovamullu torlulaqqullugit ikioqqullutik’. Quit aserorneqarput karrinullu iserteriviit pissamaatissanik imaarukkiartuartillugit ingitserneqarlutik. Nersutaatit paatsiveqaratik angalapput, mangiarfissarsiulussinnarlutik. Alianaraluassusia! Tassaavoq erloqinartorsiortitaaneq Ajugaqanngitsumit pisoq! — 1:1-20.

Jehovap ullussaata qanillineranik ilisimanninnitta iluartumik ileqqoqarluta guutimut-tunniusimallutalu suliaqarnissatsinnut killittariaqarpaatigut. (2 Pîtruse 3:10-12) Joelip takorloortippaatigut ullormik nuiasumik taggariinnavimmillu. Pillertat ullussamut taassumunnga annilaarnartumik aarlerisaarutaapput. Tamakku malisungaannarlugit Juda, Edenip naatsiiviatut issimagaluartoq, piuneerussimavoq. Pillertat nipaat immini aarlerisaarisuuvoq, tassami qamutitut sorsuutitut innerujussuartullu karrit timitakuinik nungutitsisutut ikkami. Pillertat angalasartut ’inuiattut artornartutut sorsunnermut sakkulersorsimasutut’ qerlertoruukkamik kiisa qarmarsuit qaqivaat, illoqarfinnullu illunullu isaallutik. ’Jehovap ulluani siooranartumi’ allaat seqineq, qaammat ullorissallu taarsissapput. — 2:1-11.

Qanoq annaanneqarsinnaasugut

Annaanneqarumagutta akuerisariaqarparput ’Jehova Guutiummat allamillu naami’. ’Uannut saagitsi uummatissigut iluunngarlusi,’ Jehova taama oqaaqqissaarivoq. Inuusuttut utoqqaallu nalliuttorsuarmut katersuuteqquneqarput Guutip iluarinninnissaa qinnutigiartoqqullugu. Guutip innuttani naakkigissavai, sullinerit aserugaat taarserumaarlugit innuttanilu naammattorsuarmik peqangaalersinnerisigut pilluaqqujumaarlugit. Jehovamik Guutitut ilumoortutuatut annassutitullu akuerinnittut pakatsisinneqassanngillat. — 2:12-27.

Jehovap aqqa uppernikkut torlorfigigutsigu aatsaat annakkumaarpugut. ’Jehovap ulluata angeqisup siooranangaartullu’ nalliutinnginnerani Guutip ’anersaani kuiumaarpaa uinilinnut [assigiinngitsunut NV] tamanut’. Inuusuttut utoqqaallu, angutit arnallu, siulittuiumaarput. Taamaaliornikkut amerlasuut misigiumaarpaat ’kinaluunniit Jehovamik aqqagut torlorfiginnittoq aniguiumaartoq’. — 3:1-5.

Inuiannut eqqartuussineq

Inuiannut eqqartuussut naammassiguniuk Jehovap innuttani aalajaatsut annaakkumaarpai. (Naleqqiuguk Hisĩkiale 38:18-23; sarĸúmersitat 16:14-16.) Tyrus, Zidon Filisterit Nunaanniittullu Guutip innuttaanik pinerluffiginnissimanertik inussianngortillugillu tunisisimanertik pissutigalugu pillarneqartariaqarput. Judamiut Jerusalemimiullu aallarussaasimasut Jehovap utertikkumaarpai, akeqqanilu unammillerpai ima oqarluni: ’Sorsunnissaq illernarsarsiuk.’ Guutimulli akeraanissaminnut piukkunnanngillat, taassumalu taakkununnga eqqartuussutini ’Josafatip qooruani’ assersuutaasumi naammassiumaarpaa. Naak qilak nunalu sajussagaluartut innuttaasa Jehova qimaaffissarissavaat. Inuiannut eqqartuussutip naammassineqarnerani aalajaatsut aniguissapput pissutsillu paratiisimisut ittut atorlugit inuuneq nuannaarutigisinnaassallugu. — 3:1-21 .

Eqqaamasariaqartut pingaarnerit: Annakkumagaanni Jehovap ulluata siooranartup nalliutinnginnerani allamik isumataartariaqarpoq. Taamaattumik ullussap tamatuma qanillineranik ilisimanninnitta iluartumik ileqqoqarluta guutimut-tunniusimalluta suliaqarnissatsinnut kajumissisissavaatigut. Jehovap kisimi Guutiunera akuerigutsigu aatsaat annassaagut. Uppernikkut taassuma aqqa torlorfigigutsigu, inuiannut eqqartuussutini naammassiguniuk annaakkumaarpaatigut.

Joelip siulittuutaata amerlasuunik eqqarsaatissippaatigut. ’Jehovap ullua angeqisoq siooranartoq’ takkutilivippoq! Inuiaat tamarmik mianersoqquneqartariaqarput. Pillertat Joelip siulittuutaani eqqartorneqartut assigalugit Jehovap Nalunaajaasuisa kristumiuuneraqatigiit piuneerutippaat anersaakkut ittumik naggorluttuunerat qulaartuaramikku. Upperisarsiornikkut siulersuisut tamanna kamaatigaat akerlilersuilissutigalugulu, pillertalli assersuutaasut akornuserniarsaralugit ingerlavissaannut qarmarsuartut ittunik assersuiniarnerat sunaluunniit kinguneqarnavianngilaq. Jehovap anersaani innuttaminut kuisimavaa, taamaalilluni eqqartuussutiminik tusarliussisinnaanngortillugit. Taamaattumik Guutip ulluata siooranartup nalliutinnginnerani piffissaq sivikitsoq atorlugu, tamakkiisumik inuit allat ikioriartigik ’Jehova aqqagut torlorfigeqqullugu aniguisinnaaqqullugit’. (wD 15/3 89)

[Qupp. 16-mi ungalusaq]

ALLASSIMAFFIIT PILLUGIT OQAASEQAATIT

○ 1:2 — Joelip ’utoqqaanerit’ inuiannik tammarsaarisimasut saaffigai. ’Nunap inuisa’ siulersuinerluttut taakku malissimagamikkik taakkuttaaq Jehovap isaani nassuertussaapput. Aamma ullumikkut kristumiuuneraqatigiinni upperisarsiornikkut siulersuisut savaatitik tammarsaarpaat. Joelitut ilillutik Jehovap Nalunaajaasuisa palaseqatigiit tusarliussanik tusarlertarpaat. Aammattaarli inuinnaat Guutip oqaasianik tusarlerneqartariaqarput taakkuttaaq Jehovamut nassuertussaagamik. — Isaia 9:15-17; Rûmamiut 14:12.

○ 2:1-10; 3:1 — Israelikkut mianersoqquneqarsimapput Guuti naalanngikkunikku inerititamik pillertanit sullinernillu allanit nerineqarlutik nungunneqarumaarnissaannik. (5 Môrsase 28:38-45) Kana’anip nunaani Joelip allaatigisaatut annertutigisumik sullinerparujussuarnik saassussisoqarsimanersoq Bibelimi oqaluttuarineqanngimmat, erloqinartoq tamanna assersuutaaginnarunarpoq. Siulittuut tamanna piinsip ulluani ukiumi 33-mi eqquutilersimavoq, Jesusip ajoqersugaanut Jehovap anersaani kuisalermagu, taamaalillutik taakkua Guutip tusarliuteqqusaanik tusarliussinermikkut eqqunngitsumik upperisarsiortut paamitsatsittalerpaat. (apustilit suliait 2:1, 14-21; 5:27-29) Ullumikkut Jehovap Nalunaajaasui taama paamitsaataatigisumik suliaqarput.

○ 2:12, 13 — Itsarsuaq atisanik aliineq aliasunnermik ersersitsineruvoq. (1 Môrsase 37:29, 30; 44:13) Takoqqusaaginnarlunili taamaaliortoqarsinnaavoq. Joelip erseqqissarpaa aliasunnermut qallikkut ersersitsinerit naammanngitsut. Inuit uummatikkut iluunngarlutik allamik isumataarnermikkut ’uummatitik alittariaqarpaat’.

○ 3:4, 5 — Joelip nalaani aalajaatsut aniguisitaanissaat Jehovap isumagaa. Maanna, ’ulluni kingullerni’, Jesus Kristus aqqutigalugu Guuti annannissamut periarfissiuisimavoq. (2 Timûtiuse 3:1; Rûmamiut 5:8, 12; 6:23) Kisianni Jehovap aqqanik torlorfiginnikkunik aatsaat inuit ajortillit naassaanngitsumik annatsitaassapput. Tamanna tassaavoq Guutip aqqanik ilisimanninneq, ataqqinnilluinnarneq, tamatuminngalu Ateqartumik tunaarinnilluinnarneq. Taamaalillutik Jehovap aqqanik uppernikkut torlorfiginnittut Guutip ’ullumini angeqisumi siooranartumi’ inuiannut eqqartuussutini naammassippagu ’aniguiumaarput’. — Sivfânia 2:2, 3; 3:12; Rûmamiut 10:11-13.

○ 3:7, 19 — Guutip eqqartuussutaasa ’Jehovap ulluani’ naammassineqarumaarfissaanut assersuutaasoq taaneqarpoq ’qooroq nangaaffissaarussivik’. Taaneqarportaaq ’Josafatip qoorua’. Taaguut tamanna naleqqulluarpoq ateq Josafat isumaqarami „Jehova eqqartuussisuuvoq“. Josafat kunngiutillugu Moabikkut, Ammonikkut Se’irimiullu sakkutooqatigiivinit Judap Jerusalemillu saassunneqarnerannit Guutip aniguisippai, saassussisut paatsiveerutsillugit imminnut akiuutsilersikkamigit. (2 nalunaerssûtigdlit 20:1-30) Uagut ullutsinni ’Josafatip qoorua’ assersuutikkut viinnissanik tunguiaaffittut issaaq, tassanilu inuiaat viinnissatut aserorterneqassapput Jehovap innuttaanik naalliutsitsisimagamik.

○ 3:11 — Tyrusip, Zidonip Filisterit Nunaatalu Judamiut Jerusalemimiullu inussianngortillugit grækerinut tunisimavaat. Immaqa juutit inuiannit allanit tigusarineqarsimasut inussiaarniartartunut Tyrusimiunut, Zidonimiunut Filisterinullu tunniunneqarsimapput. Sulili assuarnarnerusoq unaavoq: immaqa inuiaat taakkua juutit akeqqaminnit qimaallutik qimarravissarsiortut inussianngortissimavaat. Suna pissutaagaluarpalluunniit, inuit inuunerannik nioqqutillit taakku Guutip nassueqquai innuttaminik naalliutsitsisimammata. Tamatuma takutitsiarpaa inuiaat ullumikkut Jehovap kiffaanik malersuisartut suna atugassarissagaat.

[Qupp. 15-mi suminngaanneernera]

Pictorial Archive (Near Eastern History) Est.